‘Lohiabada Danu Hedavari Totona Ia Abidia Daekau’—Edena Bamona?

INAI tanobada dikana ena dokona be ia mai noho, gau ta ese ia koua diba lasi. Ita ese guna idia perovetalaidia gaudia idia guguru ita itadia. Hari rapture karana be unai gaudia ta, a? Bema ia be unai gaudia ta, edena negai bona edena bamona do ia vara?

Unai hereva “rapture” be Baibel dekenai ia noho lasi. To unai hereva idia abia dae taudia idia gwau aposetolo Paulo ese ia hamomokania 1 Tesalonika 4:17 dekenai. Unai siri bona ia badinai siridia ita tahua inai. Paulo ia toretore, ia gwau:

“Aiemai varavara taudia e, ai ura lasi mase dekenai idia mahuta taudia totona umui daradara. . . . Mase dekenai idia mahuta vadaeni taudia be do idia toreisi lou guna. Unai neganai ita mauri noho taudia be Dirava ese idia danu ita do ia abia daekau, guba ena ori latanai, Lohiabada danu do ita hedavari. Vadaeni Lohiabada danu do ita noho hebou hanaihanai. Unai dainai, inai hereva dekena amo umui ta ta dekenai goada do umui henia.”​—1 Tesalonika 4:​13-18.

Unai kongregesen taudia haida idia lalohisihisi badina edia taunimanima haida be “mase dekenai idia mahuta.” To, Paulo ese ia torea herevadia, toreisi-lou herevana unai, ese Tesalonika taudia ia hagoadadia.

Keriso ena “Lou Mai”

Ia ese abidadama Keristen taudia edia toreisi-lou ia hamomokania neganai, Paulo danu ia gwau: “Lohiabada do ia giroa mai neganai be ita mauri noho taudia ese guna mase dekenai idia mahuta taudia do ita gunalaia lasi.” (Siri 15) Aposetolo ia gwau Lohiabada ena “giroa mai.” Greek gado dekenai ia torea neganai unai hereva be pa·rou·siʹan, bona ena anina be “badinai ia noho.”

Idau tanobada ena lohia be ma tanobada ta ia vadivadi henia neganai, ia mai negana bona ia noho ena daudau idia boiboilaia. Unai bamona danu ia vara Lohiabada Iesu Keriso ena mai neganai. Hanaihanai Gima Kohorona be kudou maoro, Baibel idia stadilaia taudia dekenai ia hahedinaraia Iesu be Basileia ena siahu ai ia lou mai lagani 1914 ai, bona unai nega amo ia mai hari ia noho. Unai nega amo ia mai hari gau haida idia vara dainai ita diba Iesu be hehuni ai ia noho. (Mataio 24:​3-14) Unai dainai ia gwau Iesu ena lou mai bona ena noho neganai Keristen haida be ‘guba ena ori latanai, Lohiabada danu do idia hedavari,’ Paulo ia laloa idia mauri taudia be Keriso ida do idia hedavari ita itaia diba lasi gabuna, guba dekenai. Unuseniai Iesu be Dirava ena imana idibana kahanai ia helai. Ia gwau lasi idia be Iesu ida idia hedavari inai tanobada ena ori korikoridia latanai. (Heberu 1:​1-3) To unai bamona taudia be daidia?

“Dirava Ena Israel”

Baibel lalonai tanobada Israel ia herevalaia momo bona ‘Dirava ena lauma Israel’ ia herevalaia danu. (Galatia 6:16; Roma 11:​25, 26; 1 Ioane 2:​20, 27) Apokalupo bukana ia hahedinaraia lauma Israel taudia edia namba be 144,000. Keriso ida guba dekenai do idia pavapava bona kohena gaukara do idia karaia. (Apokalupo 7:​1-8; 14:​1-4; 20:6) Unai orea lalonai Tesalonika ena kongregesen bona ma kongregesen haida lalodiai idia noho taudia do idia vareai, herevana idia be edena kopi eiava edena bese taudia.​—Kara 10:​34, 35.

Hisihisi auna dekenai Iesu ia mase guna bena murinai guba maurina dekenai ia toreisi lou bamona, guba dekenai do idia daekau Keristen taudia danu do idia mase guna, murinai edia davana idia abia. (1 Korinto 15:​35, 36) Unai bamona ia vara lagani 1 ia mai 99 C.E. lalonai idia noho lauma Israel taudia dekenai, bona hari inai negai idia noho lauma Israel taudia dekenai danu.

“Lohiabada do ia giroa mai” negana ia herevalaia murinai, Paulo ese idia mase vadaeni abidadama lauma Israel taudia edia guba davana abia negana ia gwauraia. Ia gwau: “Mai goada danu Lohiabada do ia boiboi, bona aneru badana ese do ia boiboi, Dirava ena kibi regena danu. Bona unai neganai Lohiabada be guba dekena amo do ia diho mai. Vadaeni Iesu idia abidadama henia taudia, bona mase dekenai idia mahuta vadaeni taudia be do idia toreisi lou guna.” (Siri 16) Unai dainai, Iesu be pavapava daginai ia lohia neganai, ita diba guba lao henia toreisi-lou negana ia matamaia, bona idia toreisi lou taudia ginigunadia be mai edia abidadama danu idia mase vadaeni lauma Israel taudia. (1 Korinto 15:23) Harihari idia be Iesu badinai idia lohia guba dekenai. To, tanobada dekenai idia do noho horoa Keristen taudia be edena bamona? Idia be momo lasi, to idia ese unai “rapture” idia naria, a?

“Abidia Daekau”​—Edena Bamona?

Idia mase vadaeni horoa Keristen taudia ia gwauraidia murinai, Paulo ma ia gwau “Unai neganai ita mauri noho taudia be Dirava ese idia danu ita do ia abia daekau, guba ena ori latanai, Lohiabada danu do ita hedavari. Vadaeni Lohiabada danu do ita noho hebou hanaihanai.” (Siri 17) “Mauri noho taudia” be Keriso ena lou mai negana lalonai idia do mauri noho taudia. Idia be do ia ‘abidia daekau’ Lohiabada Iesu danu do idia hedavari totona. Hegeregerena, guna idia noho abidadama Keristen taudia bamona, idia mase guna, vaia taunimanima edia mase bamona, murinai guba dekenai Keriso danu idia hedavari diba.​—Roma 8:​17, 35-39.

Korinto dekenai Keristen taudia ia toretore henidia neganai, Paulo ia gwau: “To lauegu varavara taudia e, lauegu hereva ena anina be inai: tauanina bona rara ese Dirava ena Basileia do idia abia diba lasi. Bona mase tauna danu ese mase diba lasi taudia edia mauri ia abia diba lasi. Umui kamonai. Hunia hereva umui lau hamaoroa inai. Ita ibounai do ita mase lasi, to Dirava ese ita ibounai do ia senisia, do ita idau. Inai be karaharaga momokani do ia vara, matana hakapua haraga ena nega bamona, dokona kibina do idia hiriria neganai. Oibe, kibi do idia hiriria, vadaeni mase taudia do idia toreisi lou, bona do idia mase lou diba lasi. Bona ita ibounai Dirava ese do ia senisia, do ita idau.” (1 Korinto 15:​50-52) Keriso ia noho neganai bema abidadama dekenai idia mase, lauma Israel ena orena taudia ta ta iboudiai be kara haraga edia davana idia abia. “Matana hakapua haraga ena nega bamona,” lauma mauridia ai idia toreisi lou bona ia ‘abidia daekau’ Iesu ida idia hedavari bona guba ena Basileia lalonai ia ida idia lohia hebou totona. To ma taunimanima haida, Iehova idia tomadiho henia taudia unai, be edena bamona? Inai tanobada dikana ena dokona ia kahirakahira negana lalonai, idia do ia abidia daekau danu, a?

Roho Mauri​—To Ia Abidia Daekau Lasi

Badina Iesu ia mai lohia noho lagani 1914 ai, ita be “dina gabedia” edia dokona kahanai ita noho. (Daniel 12:4) Paulo ia sisiba, ia gwau: “Inai bamona hereva, ‘Maino bona gari lasi ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae! Rogorogo hahine ese mara ena hisihisi ia davaria haraga bamona unai hisihisi do ia ginidae. Bona unai taunimanima do idia roho mauri diba lasi.” (1 Tesalonika 5:​1-3) To idia naria namonamo Keristen taudia do idia roho mauri. Edena bamona?

Unai hereva “Maino bona gari lasi ita noho inai,” be Iesu ia gwauraia “hisihisi bada herea” kahirakahira do ia vara negana idia boiboilaia. Mai edia abidadama taudia “hutuma bada herea,” ia gwauraidia neganai Apokalupo ena buka ia gwau: “Unai dagedage idia hanaia vadaeni, mai mauri danu. Bona idia ese edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro momokani.” (Apokalupo 7:​9, 14; Luka 23:43) Idia be guba dekenai do ia abidia daekau lasi. Lasi, to do idia roho mauri tanobada dekenai. Idia hegaegae unai roho mauri idia abia totona, unai dainai lauma dalanai idia noga noho be namo. Edena bamona oi ese unai bamona oi karaia bona inai nega ena dokona amo do oi roho mauri?

Namona be oi ‘laloa goada. To gau badana be oi ese abidadama bona lalokau oi atoa, oiemu kemena ena dabua aukana bamona. Dirava ena hahemauri oi naria mai laloa goada danu, inai kara oi atoa, oiemu kwara gauna aukana bamona.’ (1 Tesalonika 5:​6-8) Harihari be nega namona Dirava ena peroveta Herevana, Baibel, ita kamonai henia. (1 Tesalonika 5:​20, 21) Iehova ena Witness taudia ese oi idia boiria edia Kingdom Hall dekenai oi mai totona, unuseniai Baibel ena peroveta herevadia bona Dirava ese ia havaraia Herevana ena hereva ma haida idia ida do umui stadilaia totona.

Bema oi abidadama momokani, oi be hisihisi badana amo do oi roho mauri diba bona tanobada dekenai mase taudia milion momo idia toreisi lou neganai oi danu do oi noho bona idia ida umui hedavari lou. Dirava ena Basileia, Iesu Keriso bona ia ida idia lohia taudia, ‘Lohiabada guba dekenai ia abidia daekau’ taudia unai, ese idia naria Basileiana do oi moalelaia!

Unai dainai tanobada ena kamonai taudia edia helaro momokanina, Baibel dekenai, be dahaka? Ia be rapture karana lasi, eiava guba dekenai abia daekau karana lasi. Lasi, ia be mauri hanaihanai tanobada dekenai, Dirava ena Basileia henunai.

[Picture on page 7]

Hisihisi badana amo idia roho mauri taudia be mase amo idia toreisi lou taudia ida do idia hedavari tanobada paradaisona lalonai Iesu bona guba dekenai ia ‘abidia daekau’ taudia edia lohia siahuna henunai