Guba Dekenai Oi Do Ia Abia Daekau, A?

TAUNIMANIMA momo idia laloa idia mase neganai guba dekenai do idia daekau. To haida idia laloa Dirava ese do ia abidia daekau guba dekenai, bona unai idia gwauraia rapture karana. Oi danu unai bamona oi laloa, a?

Protestan haroro tauna ta be unai bamona rapture karana ia herevalaia, ia gwau: “Taunimanima milion milion do idia boio haraga bamona, bona taunimanima idia tahudia neganai do idia davaridia lasi!” Evangelical Dictionary of Theology bukana ia gwau, hari hereva “rapture” anina be “Keriso ena lou mai neganai ekalesia taudia be ia ida do idia hedavari.”

Haida idia daradara sisina badina idia ura lasi turadia bona edia varavara idia rakatanidia Iesu Keriso ida idia hedavari totona. To, momo idia laloa unai rapture karana do ia vara. Momokani do ia vara, a? Bema ia vara, edena negai do ia vara?

Lalohadai Idauidau Rapture Karana Dekenai

Baibel ia gwau, Keriso ena gwauhamata Lagani Daha Lohia Negana ia do hamatamaia lasi neganai, nega ta, ladana “hisihisi bada herea” do ia vara guna. Iesu ia gwau: “Unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mataio 24:21; Apokalupo 20:⁠6) Haida idia gwau unai rapture karana be do ia vara hisihisi badana ia do vara lasi neganai. Ma haida idia laloa hisihisi badana lalonai do ia vara. Bona ma haida idia laloa unai hisihisi badana murinai do ia vara.

Ema bona 1830 C.E. bamona momo idia laloa unai rapture karana be do ia vara hisihisi badana murinai. To murinai, England dekenai, Church of Ireland ena haroro tauna gunana ta, John Nelson Darby, ese lalohadai matamatana ta ia halasia. Ia bona unai bamona idia laloa Anglican taudia haida edia ladana be Brethren. Ena hanua Plymouth amo, Darby ia lao haroro Switzerland bona Europe ena kahana idauidau dekenai. Ia gwau Keriso ena lou mai be mai ena kahana rua. Ginigunana be rapture karana hehunina, “helaga taudia” be Keriso ese do ia abidia daekau guna bena murinai lagani-7 ena hisihisi bada ese tanobada do ia hadikaia momokani. Ma murinai Keriso do ia hedinarai, unai “helaga taudia” danu, bona ia ida tanobada dekenai do idia lohia ela bona lagani daha do idia ore.

Darby ia gwau namona be tanobada amo idia gini siri, bona murinai ia ena lalohadai idia abia dae taudia idia gwauraidia Exclusive Brethren. Tau ta ladana B. W. Newton ese ma taunimanima haida ia hakaudia bona idia edia lalohadai be hisihisi badana ia do vara lasi neganai unai rapture karana do ia vara. Ma tau ta, Alexander Reese, ia laloa hisihisi murinai unai rapture karana do ia vara, to ia laloa “Rapture Hehunina ena hahediba be kerere, bona unai ese Keriso ena Lou Mai helarona ia hadikaia.”

Hisihisi badana vairanai rapture do ia vara idia abia dae taudia idia laloa unai lalohadai ese “[edia] helaro Keriso ena lou mai dekenai” ia haidaua diba. Ma haida idia laloa “rapture ena kahana be rua,” idia gwau, Keriso idia abidadama henia bada taudia do ia abidia daekau guna bena murinai idia abidadama henia maragi taudia be ia abidia daekau.

Evangelical orea momo idia laloa kahirakahira abidadama Keristen taudia do ia abidia daekau guba dekenai. To, badina lalohadai idauidau idia noho dainai, Britain ena Elim Pentecostal Church edia buklet ta ia gwau: “Ena be ai ese Lohiabada Iesu ena lou mai herevana ena hereva badadia ai abia dae . . . , to emai orea taudia ta ta sibona sibona ese unai peroveta herevana ena anina idia tahua bona edia lalohadai ta ta hegeregerena idia abia dae. Emai orea taudia momo be edia lalodia idia hadaia lasi, to unai peroveta herevana ena guguru negana idia naria noho sibona.”

Lauma Helaga ese ia havaraia, Dirava ena Hereva, Baibel, sibona ese taunimanima edia hahediba herevadia ia hamomokanidia eiava ia hakoikoidia diba. (2 Timoteo 1:13; 3:​16, 17) Unai dainai, hari rapture karana edena bamona ia gwauraia?