“Diari Taudia Bamona Do Umui Noho”

“Mauri matamata do umui atoa, dabua matamata umui atoa bamona. . . . Inai mauri matamata ena kara be maoromaoro, helaga bona momokani.”​—EFESO 4:24.

1. Iehova tomadiho henia taudia be dahaka hahenamo idia abia? Dahaka dainai?

IEHOVA DIRAVA “ese diari ibounai ia karaia,” bona “dibura sisina sibona ia dekenai ia noho lasi.” (Iakobo 1:17; 1 Ioane 1:5) Iena Natuna, Iesu Keriso, be sibona ia gwauraia, ia gwau: “Lau be tanobada ena diarina. Lauegu murina dekenai do ia raka tauna be dibura lalonai do ia loaloa lasi, to mauri ena diari do ia abia.” (Ioane 8:12) Unai dainai, Iehova tomadiho henia taudia momokanidia, iena Natuna idia badinaia taudia, be ia ese lauma diarina ia henidia bona edia lalodia ia hadiaridia, bona idia “hedinarai, hisiu ese tanobada idia hadiaria bamona.”​—Filipi 2:15.

2. Isaia ese edena bamona ia hahedinaraia Dirava ena orea taudia edia noho do ia idau, tanobada ena hegeregerena lasi?

² Gunaguna, peroveta tauna Isaia ia gwau: “Itaia, dibura ese tanobada do ia koua, bona dibura masemase ese tanobada besedia do ia koudia; to Iehova ese oi do ia hadiaria, bona iena hairai be oi latanai do ia hedinarai.” Baibel ia gwau, Dirava diba lasi taudia iboudiai be “tanobada ena dibura lohiadia” edia siahu henunai idia noho.​—Isaia 60:2; Efeso 6:12.

3. Dahaka dainai Paulo ena sisiba namona ita laloa bada?

³ Aposetolo Paulo ia laloa momo, Keristen taudia be unai dibura lalonai do idia vareai lou garina. Ia sisiba henidia, ‘Dirava diba lasi taudia bamona do idia noho lasi,’ to ‘diari taudia bamona do idia noho be namo.’ (Efeso 4:17; 5:8) Ia ese danu unai do idia kwalimulaia dalana ia gwauraia. Hari inai negai, tanobada besedia ia koudia diburana be ia bada ia lao. Tanobada be kara maoromaoro ai bona lauma ai ia dabu momokani. Ita Iehova tomadiho henia taudia ese tuari badana ta ita tuarilaia, bona Paulo ena hereva ita laloa bada.

Keriso Dibaia

4. Dahaka dainai Paulo ia gwau: “Keriso ena hadibaia hereva be unai bamona lasi, ani”?

⁴ Tanobada ena anina lasi karadia bona ena kara mirodia ia gwauraidia murinai, aposetolo Paulo ese Keristen taudia Efeso ai ma ia herevalaidia lou. (Efeso 4:​20, 21 mani oi duahia.) Paulo be lagani toi bamona unai hanua ai ia haroro bona ia hahediba, unai dainai unai kongregesen taudia momo be ia diba. (Kara 20:​31-35) Inai hereva, “Keriso ena hadibaia hereva be unai bamona lasi, ani?” ia torea, badina ia diba hereva kereredia, siri 17 ela bona 19 lalonai ia gwauraidia karadia dika rohorohodia gwauraidia namo herevadia, be ia ese ia hadibalaidia lasi. Ia diba Keristen noho dalana maorona, Iesu Keriso ese ia hahedinaraia dalana, be ia ese ia hadibalaidia goevagoeva bona maoromaoro vadaeni. Unai dainai, idia be dibura ai idia raka lasi, dirava lasi taudia idia raka bamona, to idia be diari taudia.

5. Hereva momokani lalonai ita noho be idau bona hereva momokani be ita lalonai ia noho be ma idau; edia idau be dahaka?

⁵ Unai dainai, gau badana be “Keriso ena hadibaia hereva” do ita dibadia maoromaoro! Unai hereva dibadia daladia kereredia be idia noho a? Oibe. Guna, Efeso 4:​14 ai, Paulo ese tadikaka ia sisiba henidia, ia gwau: “Namo ita be natuna maragidia bamona ita noho lasi, hadibaia hereva idauidau ese ita do [idia] koia lou lasi. Badina be koikoi taudia edia hadibaia hereva ese haida idia hakaua kerere vadaeni.” Haida, ena be Keriso ena hadibaia herevadia idia diba vadaeni, to tanobada ena dala ai idia raka noho, bona ma haida edia lalodia idia anidia toho, idia danu be unai bamona do idia karaia totona. Bema haida edia hereva hegeregerena ita be hereva momokani lalonai ita noho, to hereva momokani be ita lalonai ia noho lasi, dika do ita davaria diba. Paulo ena nega lalonai haida edia lalo-parara be maragi dainai, ma haida ese edia lalodia idia anidia haraga diba, bona hari inai negai danu be unai bamona. Unai dika ia koua totona, Paulo be ma ia gwau, namona be Efeso taudia ese ‘Keriso ena gadona be momokani idia kamonai, bona iena hereva momokani idia diba vadaeni.’​—Efeso 4:21.

6. Edena dala amo Keriso ese ita ia hadibaia bona ena gadona ita kamonai diba?

⁶ Ena hereva, “hadibaia,” “kamonai,” bona “diba” amo Paulo ese stadi bona hahediba dalana ta, sikuli lalonai hegeregerena, be ia herevalaia. Momokani, hari inai negai Iesu ena gadona ita kamonai diba lasi bona ia sibona ese ita ia hadibaia diba lasi. To iena “hesiai tauna mai ena kamonai bona mai ena kara maoromaoro” ena amo ia ese Baibel hahedibalaia gaukarana na tanobada hegegemadai ia karaia noho. (Mataio 24:​45-47; 28:​19, 20) Lauma aniani be hesiai tauna oreana ena amo bema ita abia loulou, bona sibona eda stadi ai o kongregesen lalonai bema ita stadilaia namonamo, bona bema ita laloa namonamo bena ita badinaia, “Keriso ena hadibaia hereva” do ita dibalaidia goevagoeva. Namona be ena heduru gaudia iboudiai do ita gaukaralaidia guguru, bena mai eda momokani ida do ita hereva diba, do ita gwau, ‘Iena gadona be momokani ita kamonai bona iena hereva momokani ita diba vadaeni.’

7. Dahaka dainai Paulo ia gwau: “Hereva momokani be Iesu lalonai”?

⁷ Efeso 4:​21 ai, Paulo ese diba tahua dalana ia gwauraia murinai, ia be ma ia gwau: “Hereva momokani be Iesu lalonai hegeregerena.” (NW) Ena be ena revareva ai Iesu ena ladana korikori mo sibona ia torea momo lasi, to reana unai siri lalonai ia torea badina be ia ura duahia taudia ese Iesu ena kara toana tanobada ai ia hahedinaraia be do idia laloa bada. Mani oi laloa, Iesu be sibona ia gwauraia, ia gwau: “Dala be lau, hereva momokani be lau, mauri danu lau.” (Ioane 14:6; Kolose 2:3) Iesu ia gwau: “Hereva momokani be lau,” badina be ia herevalaia bona ia hahedibalaia sibona lasi, to sibona ena kara amo ia hahedinaraia danu. Oibe, Keristen dalana be lalohadai ta sibona lasi, to ia be noho dalana ta. Ta ese “Keriso ena hadibaia hereva” ia dibadia, anina be ia hegeregerena hereva momokani ia badinaia. Iesu oi tohotohoa a? Dina dina iboudiai iena aena gabudia ai oi raka noho a? Unai dala tamona amo ita be diari taudia bamona do ita noho diba.

‘Emui Mauri Gunana Do Umui Kokia’

8. Dahaka hereva hegeregerena be Paulo ese Efeso 4:​22, 24 ai ia gwauraia, bona dahaka dainai unai be maoro?

⁸ Efeso 4:​22-24 ai, Paulo ese ia hahedinaraia, “Keriso ena hadibaia hereva” do ita dibadia bona diari taudia bamona do ita noho totona, kara toi do ita karaia be namo. Ginigunana be inai: “Emui mauri gunana dabua gunana bamona umui kokia. Badina be iena dika bona iena koikoi dainai ia be mase dekenai ia lao noho.” (Efeso 4:22) Paulo ese kara haida be dabua kokia bona atoa karadia ida ia hahegeregeredia loulou. (Roma 13:​12, 14; Efeso 6:​11-17; Kolose 3:​8-12; 1 Tesalonika 5:8) Iseda dabua bema ita hamiroa, gabeai dala ita davaria neganai ita kokia bona dabua matamatana ita atoa. Bema lauma dalanai ita miro, unai danu ita laloa momo be maoro, ani?

9. Ta ese ena mauri gunana edena bamona ia kokia?

⁹ Vadaeni, ta ese ena mauri gunana edena bamona ia kokia? Inai hereva “kokia” be Greek gado herevana ta ida idia hahegeregerea; unai hereva ena toana ese ia hahedinaraia unai be ta ese nega tamona mo ia karaia karana. Unai ese ia hahedinaraia namona be eda “mauri gunana” (“tau gunana,” Buka Helaga), mai ena kara gunana do ita kokia vaitani. Bema unai ita lalohadailaia daudau mai eda daradara ida, do ita kwalimu diba lasi.

10. Dahaka dainai eda mauri gunana be mai eda goada ida do ita kokia be namo?

¹⁰ Inai hereva, “ia be mase dekenai ia lao noho,” ese ia hahedinaraia “tau gunana” ena kara ia dika ia lao ela bona ia dika momokani. Lauma diarina idia dadaraia dainai, taunimanima be mase idia diho henia. Paulo ia gwau unai be ‘edia dika bona edia koikoi dainai.’ Edia tauanina edia ura ese idia koidia, badina be edia toana be namo reana, to dokonai idia hadikadia vaitani. (Heberu 3:13) Bema idia koudia lasi, do idia hamirodia bona idia hamasedia. (Roma 6:21; 8:13) Unai dainai namona be eda mauri gunana do ita kokia vaitani, dabua gunana mai mirona ita kokia bamona.

‘Dara ena Lauma Matamatana’

11. Dahaka do ita hamatamataia guna be namo?

¹¹ Namona be kopukopu gurina amo ia toreisi tauna ese ena dabua mirodia do ia kokidia sibona lasi, to do ia digudigu goevagoeva danu, dabua goevadia ia do atodia lasi neganai. Paulo ese ia hahedinaraia lauma diarina abia totona do ita karaia karana iharuana be unai; ia gwau: “Umui emui laloa bona emui kudouna do umui hamatamataia, be gau badana.” (Efeso 4:23) Siri 17 bona 18 lalodiai ia hereva bamona, Dirava diba lasi taudia “edia laloa be anina lasi” bona “edia laloa be dibura.” Vadaeni, ta ese mauri matamata do ia atoa totona, namona be ena darana, iena diba bona ena lalo-parara be idia noho gabuna, be do ia hamatamataia guna. Paulo ena hereva ena anina be iseda darana ia doria siahuna do ita hamatamataia be namo. Unai siahu be dahaka?

12. Ta ena darana ia doria siahuna be dahaka?

¹² Unai siahu be lauma helaga a? Lasi. Greek gado ai Paulo ena hereva “emui laloa” ena anina korikori be “emui darana edia lauma.” Baibel be nega ta ia gwau lasi Dirava ena lauma helaga be taunimanima edia gau ta. Inai hereva “lauma” anina ta be “laga,” to Baibel lalonai idia ese taunimanima ta ena lalohadai ia havaraia o kara ta ai ia hakaraia o dala ta ai ia harakaia siahuna be ena lauma idia gwauraia. Unai hegeregerena, ‘dara ena lauma’ be ta ena darana ia doria siahuna, ia ha-uraia siahuna unai.

13. Dahaka dainai unai siahu do ita hamatamataia be namo?

¹³ Taunimanima edia daradia idia goevadae lasi dainai, edia tauanidia edia ura gaudia idia lalodia bada. (Kohelete 7:20; 1 Korinto 2:14; Kolose 1:21; 2:18) Ena be ta ese ena mauri gunana mai ena kara dikadia ia kokia, to bema ena darana ia doria siahuna ia hamatamataia lasi, do ia doria, ia rakatanidia gaudia do ia lou henidia totona. Kuku ania, inuinu momo, eiava kara dikadia ma haida idia hadokodia toho taudia momo be unai bamona idia hekwakwanai lou, ani? Edia daradia ia doridia siahuna bema idia hamatamataia toho lasi, unai kara dikadia idia karaia lou be haraga. Ta ese ena kara do ia haidaua momokani totona, namona be ena darana do ia hamatamataia vaitani.​—Roma 12:2.

14. Ta ese ena darana ia doria siahuna be edena bamona do ia hamatamataia diba?

¹⁴ Vadaeni, ta ese unai siahu edena bamona do ia hamatamataia, bena ena darana be dala maorona ai do ia doria lao? Inai hereva “hamatamataia” Greek gado ai, anina be ta be hari inai negai ia karaia noho karana. Anina be, Dirava ena Hereva momokani stadilaia loulou karana bona ena anina helalolaia karana amo ta ese unai siahu ia hamatamataia diba. Saiens taudia idia gwau, taunimanima ta ena kwara harana lalonai, diba be paua o muramura daladia amo niuron ta amo ela bona niuron ta ia hanai negadiai, daukau heheni gabudia momo ladadia sinapisi ia hanaidia. Buka ta ladana The Brain ia gwau: “Diba be ia hanai bona sibona ena toana ia rakatania neganai, helalo-tao be nev sinapisi ai ia havaraia.” Unai diba be ma nega ta ia hanai lou neganai, nev sel be idia diba ia bona idia kara haraga. Bema inai ia vara loulou, lalohadai dalana matamatana be unai tau lalonai ia havaraia. Bema lauma herevadia namodia ita tahudia loulou, unai ese lalohadai dalana matamatana ia karaia noho, bona eda darana ia doria siahuna ita hamatamataia noho.​—Filipi 4:8.

“Mauri Matamata Do Umui Atoa”

15. Ta ese mauri matamata ia atoa anina be dahaka?

¹⁵ Dokonai, Paulo ia gwau: “Mauri matamata do umui atoa, dabua matamata umui atoa bamona. Inai mauri matamata dainai emui toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.” (Efeso 4:24) Oibe, Keristen tauna ese mauri matamata ia atoa. Anina be, Dirava ena ura hegeregerena ia ese ena mauri ia hamatamataia vaitani. Kolose 3:​10 ai, Paulo be ma ia gwau, “Inai mauri matamata be Dirava ese ia havaraia” bona ia dainai “Dirava ena toana momokani do umui abia.” Inai mauri matamata be edena bamona ia vara?

16. Dahaka dainai ita gwau mauri matamata be ‘Dirava ena ura hegeregerena’ ia karaia?

¹⁶ Iehova Dirava ese taunimanima ginigunadia, Adam bona Eva, ia karadia Iena laulauna. Siahu ia henidia, kara maoromaoro bona lauma gaudia do idia lalohadailaidia diba; unai amo animal idia hereadia momokani. (Genese 1:​26, 27) Ena be edia gwau-edeede ese taunimanima iboudiai na kara dika bona mauri dikana ai ia havareaidia, to ita, Adam ena bese taudia, ese kara maoromaoro bona abidadama karadia ita hahedinaraidia diba. Dirava ena ura be Keriso ena boubou karana idia abidadama henia taudia ese edia mauri gunana do idia kokia, bena “Dirava ena natuna edia hairai do idia abia, . . . vadaeni kwalimu momokani do idia abia.”​—Roma 6:6; 8:​19-21; Galatia 5:​1, 24.

17. Dahaka dainai mauri matamata ena kara badadia be maoromaoro, helaga bona momokani?

¹⁷ Paulo ia gwau mauri matamata ena kara be maoromaoro, helaga bona momokani. Anina be, unai mauri matamata be ia havaraia Diravana ena toana hegeregerena. Salamo 145:17 ia gwau: “Iehova ena dala iboudiai be maoromaoro bona ena kara iboudiai lalodiai ia helaga bona ia momokani.” Bona Apokalupo 16:5 ese Iehova inai bamona ia gwauraia: “Helaga Diravana e, . . . oiemu kota henia karadia be maoromaoro momokani.” Oibe, namona be do ita kara maoromaoro mai eda momokani ida, Iehova hegeregerena ai do ita lao bona iena hairai do ita hahedinaraia totona. Namona be Sekaria, Ioane Bapatiso ena tamana, hegeregerena ai do ita lao. Lauma helaga ese ia hasiahua neganai, Dirava ia hanamoa, ia gwau: “Ena hesiai gaukara do ita karaia, bona ita gari lasi. Mai helaga danu bona mai maoromaoro danu ia vairana dekenai do ita raka.”​—Luka 1:​74, 75.

“Diari Taudia Bamona Do Umui Noho”

18. Paulo ese tanobada ena dala edena bamona ia gwauraidia hedinarai goevagoeva?

¹⁸ Paulo ena hereva Efeso 4:​17-24 ai be ita tahua namonamo vadaeni dainai, gau momo do ita lalodia be namo. Siri 17 ela bona 19 ai, Paulo ese tanobada ena dala ia gwauraidia hedinarai. Tanobada taudia ese Dirava dibaia dalana idia dadaraia bona edia lalodia idia ha-aukadia ia dekenai, unai dainai mauri abia gabuna korikorina idia davaria diba lasi. Unai dainai edia lalohadai be kavakava bona edia hekwarahi be hekwarahi kava. Madi, edia kara dika idia habadaia noho bona lauma dalanai idia dabu momokani! Unai dainai, gau badana be eda lalona do ita hadaia, diari taudia bamona do ita noho!

19. Ia ese ita edena bamona ia hagoadaia, diari taudia bamona do ita noho totona?

¹⁹ Bena, siri 20 bona 21 ai, Paulo ia hahedinaraia gau badana be hereva momokani do ita dibaia momokani, bena do ita abia kava lasi, to Iesu hegeregerena do ita badinaia. Bena, siri 22 ela bona 24 ai, ita ia sisiba henia, mauri gunana do ita kokia bona matamatana do ita atoa​—mai eda goada ida. Bona ita ese eda lalohadai be lauma gaudia namodia tahudia dalana ai do ita hakaudia. Mai anina bada gauna be, diari taudia bamona do ita raka noho lalonai, heduru be Iehova dekenai do ita tahua noho. Badina be ‘Dirava ia hereva, ia gwau, “Dibura dekena amo diari do ia hedinarai.” . . . Iseda lalona dekenai iena diari ia atoa, ita do ia hadiaria totona.’​—2 Korinto 4:6.

Oi Laloatao Eiava?

◻ Edena bamona Keriso ita dibaia?

◻ Dahaka dainai mauri gunana ita kokia vaitani be namo?

◻ Ta ena darana ia doria siahuna be dahaka, bona edena bamona ia hamatamataia?

◻ Mauri matamata ena kara be dahaka dahaka?

[Picture on page 15]

Iesu ia gwau: “Dala be lau, hereva momokani be lau, mauri danu lau”

[Picture on page 16]

“Emui mauri gunana mai ena dika . . . umui kokia.” Gaudia be: dagedage, badu, kara dika, hereva dika, hereva mirodia, bona koikoi.​—Kolose 3:​8, 9

[Picture on page 17]

“Mauri matamata do umui atoa . . . emui toana be Dirava ena toana bamona, ia ese ia karaia gauna.”​—Efeso 4:24