‘Mauri Matamatana Ita Atoa’
1 Keristani taudia ese hereva momokani idia diba dainai idia moale! Iseda mauri lalonai tanobada taudia edia mauri dalana ita dadaraia karana ita dibaia. “Dirava ena mauri be idia davaria diba lasi” dainai, “edia laloa be dibura.” (Ef. 4:18) Baibel ese ita ia hadibaia tanobada ena lalohadai ita rakatania bona iseda laloa ita hamatamataia be gau badana. Unai ita karaia totona, namona be mauri gunana ita kokia bona mauri matamatana ita atoa.—Ef. 4:22-24.
2 Mauri gunana ia badinaia tauna be ena kara dika ia habadaia, ela bona ena kara idia dika momokani, bena ia mase. Unai dainai, Basileia sivaraina idia kamonai taudia ai noia inai karadia, badu, dagedage, laloa dika, hereva dika, bona hereva mirodia idia rakatania. Bema ta ia ura Dirava ese ia do ia abia dae, gau badana be dabua mirona ia kokia hegeregerena, mauri gunana ena kahana ibounai do ia kokia vaitani.—Kol. 3:8, 9.
3 Laloa Hamatamataia: Mauri matamatana ita atoa ena anina ta be iseda laloa ita hamatamataia. (Ef. 4:23) Dala maorona ai ia raka namonamo totona, ta ese edena bamona iena laloa ia hamatamataia diba? Unai ia karaia dalana be hanaihanai Dirava ena Hereva ia stadilaia namonamo, bona ia stadilaia herevadia ia laloa dobu. Unai amo, laloa matamatana ia havaraia matamaia, bona Dirava bona Keriso ese idia laloa hegeregerena do ia laloa. Keristani karadia idauidau hegeregere, bogahisihisi, durua, manau, manada, haheauka, bona lalokau ia atoa neganai, iena mauri ia idau vaitani.—Kol. 3:10, 12-14.
4 Mauri matamatana ita atoa dainai, tanobada taudia amo ita gini siri. Iseda mauri dalana dainai ita idau. Mai momokani ida ita hereva bona hereva namodia ita gaukaralaia ma haida ita hagoadaia totona. Iseda badu mamina ita biagua, bona heai, dagedage, hereva dika, bona samania koikoi hereva ibounai ita hadokoa bona Dirava ena kara maoromaorodia ita hahedinaraia. Ita ta ta eda kara dika ita gwauatao sibona lasi, to unai hereva ena anina korikori ita badinaia momokani. Unai ibounai ita karaia mai eda kudouna ibounai ida.—Ef. 4:25-32.
5 Mauri matamatana oi kokia lasi. Bema ia noho lasi, Iehova ese iseda hesiai gaukara do ia abia dae lasi. Ia amo taunimanima ita veria diba hereva momokani dekenai, bona Iehova, iseda mauri matamatana ia Havaraia Tauna do ita hanamoa.—Ef. 4:24.