Sivarai Gwauhamata Tanona Amo

Umui Moale! Dehoro be Hodu amo Ia Hebubu

PEROVETA tauna Ioel ese Siona ena natuna ia haganidia ‘do idia moale bona Iehova do idia moalelaia.’ Edia moale bona edia noho namo ia herevalaia neganai, olive dehorona ia gwauraia, ia gwau: “Uiti kwadia gabudia ai na uiti ai do idia honu, uaina bona dehoro na hodu amo do idia hebubu.”​—Ioel 2:​23, 24.

Idaunegai, Israel ai bema oi noho, bona olive auna ta be oiemu ruma badinai eiava oiemu uma ai bema ia noho, oi moalelaia bada. Unai au ese oiemu hekwarahi ia hamaragia bona oiemu noho ia hanamoa. Vadaeni, dahaka dainai olive auna be mai anina bada?​—Hahemaoro Taudia 9:​8, 9 itaia.

Olive auna ta ena laulau be lauri kahanai.a Ena toana mani oi laloa guna. Olive audia be lagani handred handred idia mauri, haida be lagani daha ta idia mauri. Edia gabadia be mia-kurokuro bona mai edia gudugudu. Idia tubu daekau ela bona mita 6 bamona. Hua iboudiai idia be mai edia raurau, unai dainai edia ikerukeruna be namo. To taunimanima ese idia lalodia bada, edia toana dainai lasi eiava edia ikerukeruna dainai lasi.

Edia huahua be mai anina bada! Au tamona ese huahua, girini o korema gaudia, tausen tausen ia atodia. Unai huahua dainai olive auna be mai anina bada Israel taudia edia mauri ai. May huana ai palaoapalaoa ese au idia koua, gabeai huahua idia vara. (Iobu 15:33) Idia karukaru neganai idia girini bamona, bena idia lo neganai idia korema reana.

October bona November ai olive huahuadia idia gogodia mai edia hekwarahi bada. Dabua be au henudiai idia lahaia bena au idia kwadidia neganai mage gaudia be dabua latadiai idia moru. (Deuteronomi 24:20) Unai murinai olive huahuadia idia huridia bena tadi ranuna lalonai idia atodia, edia idita kokia totona.

Taunimanima ese olive kasiridia idia anidia, bona haida be muramura lalonai idia atodia do idia dika haraga lasi totona, bena hua momo lalodiai idia anidia diba. Taunimanima haida ese olive momo bali paraoana ida idia anidia.

Olive momo amo dehoro idia karaia, bena unai dehoro be dala idauidau ai idia gaukaralaia. Dehoro karaia dalana ta be mage gaudia idia botadia sisina eiava nadi disina ai idia hapatadia eiava aedia amo idia moidia. (Mika 6:15) Unai dala amo dehoro goevagoevana idia karaia, bona ia hegeregere kalaga helagana ena lamepa ai idia gaukaralaia. (Esodo 25:37; 27:​20, 21) Taunimanima ese danu unai bamona dehorona idia gaukaralaia, dina badadia edia aniani idia karaia negadiai.

Bema olive idia namo momokani lasi, bosea ai idia udadia bena idia latadiai metau gauna ta idia atoa. Ia taodia diho bona dehoro ia halasia, to unai dehoro ia goevagoeva lasi. Idaunegai, dehoro halasia gaudia idauidau idia gaukaralaidia. Ta ena laulau be inai rau ai. Olive be uro badana ta lalonai idia udadia bena doniki ta eiava taunimanima ta ese nadi badana ta na idia latadiai ia keia hanai neganai, dehoro be olive amo ia lasi bena kavabu ai idia bubua.​—Mataio 18:6.

Olive dehorona ena namo be bada herea bona dala idauidau ai idia gaukaralaia diba. Au tamona ena huahua amo idia abia dehorona be hegeregere, ruma bese ta mai ena taunimanima faiv o sikis do idia gaukaralaia ela bona lagani ta do ia ore. Nega momo edia aniani ai idia atoa, unai amo goada idia abia. (Ieremia 41:8; Esekiel 16:13 itadia.) Dehoro be muramura mai bonana namona ida idia buloa bena edia kopidia idia dahulaidia, eiava vadivadi tauna ena kwarana ai idia bubua, edia heabidae toana. (2 Samuel 12:20; Salamo 45:7; Luka 7:46) Bero ai idia atoa danu, hanamodia totona.​—Isaia 1:6; Mareko 6:13; Luka 10:34.

Olive dehorona idia gaukaralaia daladia ma haida be inai: Edia ruma idia hadiarilaia, Dirava enai idia bouboulaia, bona idia hoihoilaia danu. Idaunegai, olive auna ena namo be bada herea, unai dainai Ioel ese ia gwauraia, noho namo bona moale edia toana bamona.​—Deuteronomi 6:11; Salamo 52:8; Ieremia 11:16; Mataio 25:3-8.

[Footnotes]

[Picture Credit Line on page 24]

Pictorial Archive (Near Eastern History) Est.