Basileia Haroro Ripoti

Eda Kara Maoromaoro Dainai Eda Gaukara Idia Laloa Bada

KARA maoromaoro be Keristen taudia edia kara korikori. Aposetolo Paulo ia gwau: “Ai ura be nega ibounai kara maoromaoro do ai karaia.” (Heberu 13:18) Iseda kara maoromaoro ese ‘hairai bona mataurai Sivarai Namona dekenai idia havaraia.’ (Tito 2:10) Tonga ai, Keristen taudia rua edia kara maoromaoro bona edia Basileia harorolaia gaukarana ese taunimanima idia hadibadia. Watch Tower Society ena branch opesi Western Samoa ai ia gwau:

“Lagani momo lalodiai Witness tauna ta mai adavana be edia motumotu ai Dirava ena Basileia idia harorolaia, to toana be edia gaukara ese anina ia havaraia lasi. Vadaeni, tau ia gorere neganai, hahine ese edia plenteisini ia naria. Hoihoi taudia idia mai kobara sekea totona neganai, ma ta ena baege ta be hari hahine ena baege 5 ida idia haboudia kerere. Hanua taudia ese idia hamaoroa namona be do ia dogoatao, do ia laloa ia be hahenamo ta Dirava ena amo. To ia be unai bamona ia karaia lasi. Hoihoi taudia ese kobara ena davana idia henia neganai, unai baege ena davana ia abia dae lasi. Iena kara maoromaoro idia itaia.

“Gabeai, tau be motumotu idauna ta ia lao henia gwauraia neganai, sitoa biaguna ta ese ia noia gau haida do ia hoia, iena. Witness tauna be unai bamona ia karaia bena moni orena ia haloua. Sitoa biaguna ia hoa. Ia gwau unai be nega ginigunana ta ese moni orena ia haloua. Gabeai, hari Witness tauna ia ura gau ta be iena sitoa amo do ia hoia neganai, ia ese sitoa ena ki ia henia bena ia hamaoroa ena ura gauna do ia abia bena davana be sitoa ai do ia atoa. Haida ese iena hereva idia kamonai neganai, idia nanadaia dahaka dainai ki be Witness tauna ia henia, to idia ia henidia lasi. Ia gwau ia ese Witness tauna mo sibona ia abidadama henia.

“Hanua taudia ese hari tau bona hahine edia kara namo idia herevalaia. Idia diba Witness taudia idia kara maoromaoro, politik amo idia gini tabe, bona Dirava ena Basileia idia harorolaia. Unai ese ia hahedinaraia hanua taudia ese idia abia dae herevadia be idau, Baibel ena hereva hegeregeredia lasi. Hari, bema taunimanima be mai edia henanadai Baibel enai, Witness taudia dekediai idia lao, haere abia totona. Hanuaboi ta hanua taudia ese Witness tauna idia haoa bena edia hebou idia hakaua lao, edia henanadai Baibel enai do ia haerelaidia totona. Mase taudia idia guridia negadiai, nega momo idia noia, Baibel ena hereva mase enai do ia gwauraia, bona ena hereva idia abia dae.”

Hari Witness tauna mai ena adavana edia kara maoromaoro bona edia Basileia harorolaia gaukarana ese unai motumotu ai idia noho taudia idia hadibadia. Idia ura ma haida ese Baibel ena hereva do idia tahua bona hereva momokani do idia abia dae. Bema unai bamona do idia karaia, Iehova Dirava ese do ia hanamodia.​—Ioane 8:32.