Dahaka Dainai Iehova Ita Hesiai Henia?

“IEHOVA ena dina ia ginidae! ‘Hisihisi badana’ be kahirakahira, bema Dirava oi hesiai henia lasi do oi roho mauri lasi.” Bema ta be oi dekenai unai ia hadibaia, edena bamona do oi karaia?​—Sefania 2:​2, 3; Mataio 24:21.

Momokani, Iehova ena dina ita laloa be namo, bona do ia mai hisihisi badana amo ita roho mauri totona namona be abidadama dekenai Dirava ita hesiai henia. To ia namo unai badina dainai sibona mai helaga danu Iehova ita hesiai henia, a? Dahaka dainai oi ese Iehova oi hesiai henia?

Badina Maorona be Namo

Bema ta be Dirava ia hesiai henia to badina maorona dainai ia karaia lasi, bona ia naria gauna be ia laloa negana dekenai ia vara lasi, sedira gaukara do ia rakatania. Haheitalai be inai: taunimanima haida idia laloa Iesu Keriso be lagani 1843 eiava 1844 ai do ia giroa mai, unai laganidia idia lao ore to idia naria gauna ia vara lasi. Unai dekenai George Storrs ese ia torea gauna ita laloa, ia be Bible Examiner magasin halasia tauna bona gabeai Charles Taze Russell, Watch Tower Society ena presiden ginigunana ia diba. September 1846 ena Bible Examiner magasin lalonai, Storrs ia torea, ia gwau:

“Dirava ita hesiai henia ena maduna ita huaia be Lohiabada ena dina ia mai kahirakahira dainai sibona lasi. . . . Bema lagani 1846 bona 1847 do idia lao ore bona unai lou mai negana do ia vara lasi, bona unai be reana do ia vara diba, unai be lalohisihisi bada gauna momokani. Ia vara vadaeni gauna ese unai ia hamomokania​—lagani 1843 bona 1844 lalodiai ia vara gauna lau herevalaia. Lohiabada do ia mai negana ena boiboi idia kamonai dainai dala maorona dekenai ‘Dirava hesiai henia totona idia toreisi’ taudia momo be edeseniai? Bona unai hereva gwauraia lou neganai idia be EDESENIAI!!! Idia ten ten amo sedira tamona tamona ita davaria diba edia Keristen gaukarana idia do karaia noho. Dahaka dainai momo idia karaia lasi? Idia karaia ena badina ia kerere dainai. Sibodia idia laloa bada karana ese ia veridia bona ia hamoaledia. Idia be gorere dainai, eiava davara ia hurehure neganai, kahirakahira ia mase neganai kara dika tauna ta bamona. Bema ia mase gwauraia, ia be Keristen ai do ia lao. Bema ia diba do ia mase lasi, Keristen ena kara do ia laloa lasi.”

Badina Maorodia Dainai Hesiai Ita Karaia

Sedira sibodia idia laloa dainai eiava idia laloa do idia mase dainai Iehova hesiai henia gaukarana idia karaia. Ma haida be sedira Paradaiso lalonai mauri ena helaro idia moalelaia bada dainai, unai badina sibona dainai Dirava idia hesiai henia. To, unai bamona ia vara badina sibodia dainai idia gaukara taudia bema idia laloa Iehova ena dina bona hisihisi badana ena nega be ia kahirakahira momokani lasi, sedira Dirava do idia hesiai henia goadagoada lasi.

Momokani, Dirava ena gwauhamata bona ia perovetalaia hahenamo gaudia ita moalelaia neganai ita gwau lasi unai be sibona laloa guna karana. Ia ura iena Natuna, Iesu Keriso, ena murinai ita raka dainai do ita abia gaudia ita moalelaidia. Aposetolo Paulo ia gwau: “Lohiabada dekenai do umui naria noho mai moale danu.” Ma ia gwau: “Dika neganai do umui gini goada. Guriguri do umui goadalaia nega ibounai.” (Roma 12:12) Mai guriguri ida “Iehova moalelaia karana” ese ita ia durua hahetoho ita haheaukalaidia bona mai manau ida Dirava ena gwauhamata do idia guguru dalana totona ita naria. (Nehemia 8:10) To hari danu, badina momo dainai Iehova ita hesiai henia diba. Unai badina haida be dahaka?

Maduna bona Dagi

Ia be Gau Iboudiai Edia Lohia dainai, namona be Iehova sibona ita tomadiho henia. (Esodo 20:​4, 5) Unai dainai Keristen ta ta iboudiai be mai edia maduna Dirava idia hesiai henia, herevana hisihisi badana be kerukeru, lagani vairanai, eiava gabeai do ia matamaia. Sibona do ia laloa guna lasi, to Iehova do ia hesiai henia badina mai ena kudouna, souli, darana, bona goada ibounai ida Dirava ia lalokau henia dainai. (Mareko 12:30) Keristen gunadia haida idia laloa Iehova ena dina be ia mai kahirakahira, to idia naria gauna ia vara lasi, bona unai dina idia itaia lasi badina idia mase guna. (1 Tesalonika 5:​1-5; 2 Tesalonika 2:​1-5) To, bema idia abidadama ela bona idia mase neganai, Keriso murinai idia raka horoa taudia be gabeai do idia toreisi bona guba maurina ena davana do idia abia.​—Apokalupo 2:10.

Namona be idia bapatiso vadaeni Iehova ena Witness taudia be abidadama dekenai do idia hesiai henia badina sibodia edia ura dainai iena ura karaia totona maduna idia abia. Oi laloa! Aneru helagadia hegeregeredia, ita be Gau Ibounai Ia Lohiaia Tauna ena ura ita karaia diba. (Salamo 103:​20, 21) Iesu be unai dagi ia laloa bada dainai ia gwau: “Egu aniani be inai, lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:34) Bema iseda lalohadai be unai bamona, ita be Iehova hanamoa herevadia do ita harorolaia goadagoada bona ma haida dekenai iena ura, Baibel lalonai ia hedinarai hegeregerena, do ita herevalaidia. Unai dala dekenai, ita danu be lauma dalana ai ma haida ita durudia diba. Bona momokani, herevana edena negai Iehova ena dina ia matamaia, Dirava ita lalokau henia dainai iena ura ita karaia be gaukara maduna namo hereana.

Ita Moale Henia Dainai Ita Karaia

Dirava be lalokau amo iena Natuna ia henia mauri davana totona, unai ita moalelaia dainai Iehova ita hesiai henia be namo. Guna iseda kara dika dainai Iehova Dirava ita kahirakahira henia diba lasi. To, Iesu ia gwau: “Dirava ese inai tanobada [taudia] ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Iehova be kara ta ia karaia, Paulo ese ia torea hegeregerena, ia gwau: “Dirava ese iena lalokau badana ia hedinaraia ita dekenai, badina ita be do kara dika noho taudia neganai Keriso be ita dainai ia mase.” (Roma 5:8) Dirava ena lalokau be unai dala ai ia hahedinaraia ita moalelaia dainai mai iseda kudouna ibounai ida do ita hesiai henia.

Lauma dalana ai bona tauanina dalana ai Iehova ese ia henia gaudia ita moalelaia dainai unai be ma badina haida abidadama dekenai ita hesiai henia totona. Dirava ena Hereva be hakaua gauna momokanina​—iseda dala ia hadiaria gauna. “Hesiai tauna mai ena kamonai bona mai ena kara maoromaoro” oreana ese ita idia henia buka bona magasin be ita idia durua iseda mauri lalonai Dirava ena ura ita badinaia totona. (Mataio 24:​45-47; Salamo 119:105) Bona Basileia ita tahua guna dainai, Iehova be iseda tauanina gaudia ia henia. (Mataio 6:​25-34) Unai gaudia dainai oiemu moale oi hahedinaraia, a?

Tomadiho koikoi amo Dirava be ita ia ruhaia dainai unai be ma badina ta abidadama dekenai Iehova ita hesiai henia totona. Tomadiho ariara hahinena Babulono Badana be ‘sinavai momo latanai ia helai,’ unai sinavai anina be “tano idauidau taudia, bese idauidau taudia, kopina idauidau taudia bona gado idauidau taudia.” (Apokalupo 17:​1, 15) To, Iehova ena hesiai taudia dekenai ia helai lasi, ena tomadiho dalana ai ia veridia lasi, bona ia biagudia lasi. Haheitalai be, tomadiho koikoi hahedibana, taunimanima edia souli ia mase diba lasi herevana, idia dadaraia. Idia diba taunimanima be Dirava ese ia havaraia “mauri tauna,” bona mase taudia be “gau ta [idia] diba lasi,” bona gabeai toreisi lou do ia vara. (Genese 2:7; Kohelete 9:​5, 10; Kara 24:15) Unai dainai mase taudia idia gari henidia lasi bona idia tomadiho henidia lasi. Lauma dalana ai unai hereva koikoi amo oi ia ruhaia dainai hereva momokani oi dadaraia lasi bona Iehova ena tomadiho goevana oi dogoatao noho, a?​—Ioane 8:32.

Dina iboudiai Iehova ese ita ia durua dainai ita moale bona ita ura abidadama amo ita hesiai henia karana ita habadaia. Salamo torea tauna David ia gwau: “Iehova ita hanamoa, dina ibounai iseda lalo-metau ia huaia.” (Salamo 68:19) Ma siri ta dekenai salamo torea tauna ia gwau: “Bema lauegu tamana bona lauegu sinana ese lau idia rakatania, Iehova sibona ese lau ia abia dae diba.” (Salamo 27:10) Iehova be hanaihanai oi ia durua dainai oi ese emu moale hahedinaraia totona mai emu abidadama ida oi hesiai henia, a?​—Salamo 145:14.

Iehova bona Iena Lohia Dagina Abia Isi

Ita ura Iehova ita hanamoa dainai ita hesiai henia. Guba anerudia be inai hereva amo Dirava idia hanamoa, idia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai oi do idia henia, bona oiemu siahu henunai do idia noho. Badina be gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” (Apokalupo 4:11) King David ese Dirava ia hanamoa, ia gwau: “Iehova e, goada bona siahu bona hairai bona kwalimu bona hereadae be oiemu . . . Iehova e, basileia be oiemu . . . Taga bona hemataurai idia mai daladia be oiemu amo; oi ese gau iboudiai oi biagua . . . Vadaeni, emai Dirava e, harihari oi ai hanamoa, bona oiemu ladana mai hairaina ai hanamoa.” (1 Sisiga 29:​10-13) Ita be Iehova ena hesiai taudia dainai, iena gwauhamata do idia guguru negana ita naria noho lalonai, iseda maduna be hereva amo bona kara amo ita hanamoa. Unai ita diba, a?​—1 Korinto 10:31.

Ita ura bada Dirava ena Basileia ita harorolaia dainai unai be ma badina ta Iehova ita hesiai henia totona. Unai badina namona be salamo torea tauna ena hereva dekenai ia gwauraia, ia gwau: “Iehova e, oi karaia gaudia iboudiai ese oi do idia hanamoa, bona oi idia badinaia taudia ese oi do idia hanamoa. Emu basileia ena hairai do idia herevalaia, bona emu siahu do idia gwauraia. Emu siahu karadia be taunimanima do idia hadibalaidia bona emu basileia ena hairai goevadaena danu. Emu basileia be noho hanaihanai basileiana, bona emu lohia siahuna ia noho uru iboudiai lalodiai.” (Salamo 145:​10-13) Keristen gaukarana be Basileia sivaraina idia harorolaia, bona hari inai nega lalonai unai gaukara be mai anina bada herea. (Mataio 24:14; 28:​19, 20) Oi ura dikadika Iehova ena ladana oi hanamoa bona ma haida dekenai iena Basileia oi harorolaia, a?

Ita ura bada Iehova ena ladana ita hahelagaia bona iena lohia ena maoro ita abia isi dainai ita ura abidadama amo ita hesiai henia. Iehova ena ladana hahelagaia bona iena lohia dalana abia isi totona ita guriguri diba. (Mataio 6:9) Keristen haroro gaukara ita karaia noho neganai bona ma haida dekenai unai anina bada hereva momokanidia ita hadibaia neganai iseda guriguri ita hamomokania diba.​—Esekiel 36:​23; 39:7.

Moale bona Lalo-Namo Abia

Abidadama amo Iehova ita hesiai henia neganai, iena kudouna ita hamoalea bona unai amo ita hamomokania Diabolo be koikoi tauna. Ena be Satana ia koikoi, ia gwau taunimanima be sibodia edia ura idia tahua guna dainai Dirava idia hesiai henia, to, lalokau amo, Iehova ena abidadama hesiai gaukarana ita karaia neganai Dirava ia gwau henia tauna ena hereva ita hakoikoia diba. (Iobu 1:​8-12) Unai badina namona dainai ita be Hereva Lada-isidia 27:11 ena hereva ita badinaia noho diba, ia gwau: “Natugu e, oi aonega, lauegu lalona oi hamoalea, lau ia gwau henia tauna do lau haere henia totona.” Ma danu, herevana Satana ese dahaka ia karaia ita ia koua totona, to abidadama amo Iehova ita hesiai henia neganai, iseda gini-auka karana be iseda abidadama tadikakadia do ia hagoadadia diba.​—Filipi 1:​12-14.

Lauma dalana ai uiti ita gogoa bona moale bona lalo-namo ita abia dainai ita ura abidadama amo Iehova ita hesiai henia. Iesu be taunimanima durudia karana amo, lauma dalana dekenai danu, moale ia davaria. Mataio 9:​35-38 ia gwau: “Iesu be hanua badadia bona hanua maragidia dekenai ia loaloa, edia dubu lalonai ia hadibaia karaia, Basileia ena Sivarai Namona ia harorolaia, gorere taudia bona hisihisi taudia ibounai ia hanamoa. Taunimanima hutuma ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona. Vadaeni ia ese ena diba tahua taudia dekenai ia hamaoroa, ia gwau, ‘Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.’ ” Bema uiti gogoa nega ena daudau be ita laloa nega ena daudau ia hanaia, unai ese dala ia kehoa ma haida be lauma dalana dekenai ita durudia totona, bona iseda moale bona lalo-namo ia habadaia. Unai danu be dala namona iseda dekena tauna ita lalokau henia totona, bona unai ita karaia be namo.​—Mataio 22:39.

Dahaka Dainai Dirava Oi Hesiai Henia?

Abidadama amo Iehova ita hesiai henia ena badina namodia haida sibona ita lalodia vadaeni. Namona be ita ta ta ibounai be guriguri dekenai ita laloa dahaka dainai Dirava ita hesiai henia, badina ita ta ta ibounai eda kara do ia tahua. (Roma 14:12; Heberu 4:13) Bona sibodia edia ura sibona idia tahua noho hesiai henia taudia be Dirava ena amo hahenamo do idia davaria lasi.

Bema ita sibona eda ura ita tahua guna lasi to Dirava ita hesiai henia mai helaga danu, bona Iehova ena ladana hahelagaia karana ita laloa bada, dahaka do ita davaria diba? Iehova be ita bona iseda hesiai gaukarana do ia hanamoa! (Hereva Lada-isidia 10:22) Mauri hanaihanai do ita davaria danu badina abidadama dekenai Iehova ita hesiai henia.

[Picture Credit Line on page 8]

SIX SERMONS, by George Storrs (1855)

[Picture on page 9]

Japan dekenai taunimanima tausen momo be Iehova idia hesiai henia

[Picture on page 10]

Iehova hesiai henia Côte d’Ivoire ai