“Umui Sibona ese Hari Dina Umui Abia Hidi Daika Do Umui Hesiai Henia”

1. Ita moale totona dahaka ita karaia be namo, bona dahaka dainai? (Isaia 48:17, 18)

ISEDA guba Tamana be ita ia lalokau henia bada, bona ia ura hari bona nega vaira ai iseda mauri ita moalelaia. (Had. 3:12, 13) Ia ese ita dekenai diba ia henia gau namodia haida ita karaia totona, to diba ia henia lasi ita sibona ita lohiaia eiava dahaka be maoro bona dahaka be kerere ita abia hidi totona. (Had. 8:9; Ier. 10:23) Iehova ia diba moale korikori ita davaria totona, namona be ia ita hesiai henia bona iseda mauri ai ena taravatu ita badinaia.—Isaia 48:17, 18 duahia.

2. Satani ia ura dahaka ita abia dae, bona Iehova be dahaka ia karaia Satani ena hereva ia hakoikoia totona?

² Satani ia ura ita abia dae ena be Iehova ita badinaia lasi, to sibona ita lohiaia diba. (Gen. 3:4, 5) Iehova ese Satani ena hereva ia hakoikoia totona, nega ia henia taunimanima be sibona idia lohiaia totona. To ita itaia diba, taunimanima be sibona idia lohiaia dainai dika momo idia vara. To, Baibel lalonai Iehova idia hesiai henia tatau bona hahine momo edia sivarai idia noho, idia be edia mauri idia moalelaia. Idia ibounai amo Iesu Keriso be ia moale bada. Ginigunana be, mani ita itaia dahaka dainai Iesu be abia hidi ia karaia Iehova ia hesiai henia totona. Bena, do ita itaia dahaka dainai iseda guba Tamana ita tomadiho henia be namo. Dokona be, Iehova ita hesiai henia ena badina haida do ita herevalaia.

IESU ESE IEHOVA IA HESIAI HENIA ENA BADINA

3. Satani ia ura Iesu dekenai gaudia ia henia, bona Iesu be dahaka abia hidi ia karaia?

³ Iesu be tanobada ai ia noho neganai, abia hidi ia karaia daika ia hesiai henia totona. Iesu ia bapatiso bona daudau lasi murinai, Satani ese ia tohoa. Satani ese ia hamaoroa bema nega tamona sibona ia tomadiho henia, tanobada ena basileia ibounai do ia henia. Iesu ia haere: “Satani, oi siri! Badina Toretore Helagadia ia gwau: ‘Iehova oiemu Dirava oi tomadiho henia be namo, bona ia sibona do oi hesiai henia.’” (Mat. 4:8-10) Dahaka dainai Iesu be unai abia hidi ia karaia? Mani badina haida ita herevalaia.

4-5. Dahaka badina haida dainai Iesu ese abia hidi ia karaia Iehova ia hesiai henia totona?

⁴ Iesu ese Iehova ia hesiai henia ena badina badana be, ena Tamana Iehova ia lalokau henia bada. (Ioa. 14:31) Ma danu, Iesu ese Iehova ia hesiai henia badina unai be kara maorona. (Ioa. 8:28, 29; Apok. 4:11) Ia diba Iehova be mauri ena Badina, ia kara momokani, bona gau namodia ia henia. (Sal. 33:4; 36:9; Iam. 1:17) Iehova be nega ibounai Iesu dekenai hereva momokani ia gwauraia bona gau ibounai ia henia. (Ioa. 1:14) To Satani be idau. Ia ese kara dika bona mase ia havaraia. Ia be koikoi tauna bona ia mataganigani bona sibona ena namo ia laloa. (Ioa. 8:44) Unai dainai Iesu ia ura lasi Satani do ia tohotohoa bona Iehova do ia gwau-edeede henia.—Fili. 2:5-8.

⁵ Iesu ese Iehova ia hesiai henia ena badina ma ta be ena badinaia karana ese gau namodia momo do ia havaraia. (Heb. 12:2) Ia diba ena Tamana ia badinaia noho neganai, Tamana ena ladana do ia abia isi bona Satani ese ia havaraia hisihisi ibounai do ia kokia.

IEHOVA ITA TOMADIHO HENIA BE MAORO

6-7. Dahaka dainai momo be Iehova idia hesiai henia lasi, to dahaka dainai ia ita tomadiho henia be maoro?

⁶ Momo be Iehova idia hesiai henia lasi, badina iena kara namodia idia diba lasi bona idia dekenai ia karaia gau namodia idia do diba lasi. Paulo ese Atena dekenai ia haroro henia taudia be unai bamona, idia danu be Dirava idia diba lasi.—Kara 17:19, 20, 30, 34.

⁷ Paulo be ena kamonai taudia dekenai ia gwauraia hedinarai, Dirava momokanina “ese taunimanima ibounai dekenai mauri, laga bona gau ibounai ia henia.” Ma ia gwau: “Ia dainai ita mauri, ita raka loaloa bona ita noho.” Dirava be Havaraia Tauna, “ia ese tau tamona amo bese ibounai taudia ia karaia,” unai dainai ia be mai ena maoro ia ita tomadiho henia totona.—Kara 17:25, 26, 28.

8. Iehova be dahaka do ia karaia lasi? Herevalaia.

⁸ Iehova be Havaraia Tauna bona iunives ena Lohia Tauna Badana, unai dainai taunimanima ia doria diba ia idia hesiai henia totona. To, Iehova be unai bamona do ia karaia diba lasi. Ia ese ita dekenai gau momo ia henia, unai amo ia hamomokania ia be ia noho bona ita ta ta ia lalokau henia bada. Ia ura taunimanima momo be ena tura namodia ai do idia lao ela bona hanaihanai. (1 Tim. 2:3, 4) Unai dainai Iehova ese ita ia treinia noho ma haida dekenai iena ura ita hadibaia bona idia ita hamaoroa ia ese taunimanima totona gau namodia momo do ia karaia. (Mat. 10:11-13; 28:19, 20) Ia ese kongrigeisen ta ta dekenai ita ia haria bona dala ia karaia elda taudia ese ita idia naria totona.—Kara 20:28.

9. Iehova ese ena lalokau be edena dala ai ia hahedinaraia?

⁹ Ena be taunimanima haida idia laloa Dirava be ia noho lasi, to Dirava be idia ia kara henia dalana amo ena lalokau ia hahedinaraia. Mani inai oi laloa: Lagani momo lalonai, taunimanima bilioni momo be dahaka be maoro bona dahaka be kerere dekenai sibona edia abia hidi idia karaia. To, Iehova be mai ura ida idia dekenai edia mauri durua gaudia ia henia bona idia moalelaia. (Mat. 5:44, 45; Kara 14:16, 17) Ia ese dala ia karaia edia turadia ida mai lalokau ida idia noho, natudia idia havaraia, bona edia gaukara goadagoada karana ena ahuna idia moalelaia totona. (Sal. 127:3; Had. 2:24) Hamomokania gaudia ese idia hahedinaraia iseda guba Tamana ese taunimanima ibounai ia lalokau henia. (Eso. 34:6) Hari mani Iehova ita hesiai henia ena badina haida ita laloa lou bona ita ia durua daladia haida ita herevalaia.

IEHOVA ITA HESIAI HENIA ENA BADINA

10. (a) Iehova ita hesiai henia ena badina badana be dahaka? (Mataio 22:37) (b) Iehova ena haheauka karana amo dahaka namo oi davaria? (Salamo 103:13, 14)

¹⁰ Iesu hegeregerena, Iehova ita hesiai henia ena badina badana be ia ita lalokau henia. (Mataio 22:37 duahia.) Iehova ena kara namodia ita dibaia karana ese ita ia durua ia ita tura henia totona. Hegeregere, Iehova be ita dainai ia haheauka karana mani ita laloa. Israela taudia be idia gwau-edeede neganai, idia ia noia, ia gwau: “Mani emui kara dikadia amo umui giroa.” (Ier. 18:11) Iehova ia laloatao ita be kahu sibona bona goevadae lasi taudia. (Salamo 103:13, 14 duahia.) Iehova ena haheauka karana bona ena kara namodia oi laloa dobu neganai, oi ura hanaihanai ia oi hesiai henia, a?

11. Dahaka badina haida dainai, abia hidi ita karaia iseda guba Tamana ita hesiai henia totona?

¹¹ Danu ita ese Iehova ita hesiai henia badina unai be kara maorona. (Mat. 4:10) Ma danu, ita diba bema Iehova ita badinaia noho, gau namodia momo do idia vara. Iehova ita badinaia dainai, iena ladana ita hahelagaia, bona iseda Tamana ita hamoalea. Bona bema hari abia hidi ita karaia Iehova ita hesiai henia totona, ia do ita hesiai henia ela bona hanaihanai diba!—Ioa. 17:3.

12-13. Jane bona Pam edia sivarai amo dahaka ita dibaia?

¹² Ita do matamata neganai, Iehova dekenai iseda lalokau ia bada ia lao diba, bona ita buruka ita lao neganai, unai lalokau be do ia goada noho. Ruma bese ta lalonai, taihu rua Jane bona Pam edia haheitalai mani ita laloa.a Jane ena mauri lagani be 11 bona Pam ena mauri lagani be 10 neganai, Baibel stadi idia matamaia. Ena be edia tama sina idia ura lasi Baibel idia stadilaia, to idia dekenai maoro idia henia Witnes taudia idia bamoa, bona wiken ai edia tama sina ida edia dubu dekenai idia lao. Jane ia gwau: “Witnes taudia ese Baibel amo lau idia durua dainai, unai ese lau ia durua drag ania karana bona kara mirodia lau dadaraia totona.”

¹³ Unai kekeni rua be idia bada neganai, pablisa ai idia lao. Gabeai, painia gaukara idia karaia bona edia buruka tama sina idia naria. Jane be edia ekspiriens ia laloa lou neganai, ia gwau: “Lau dibaia gauna be Iehova be ena turadia ia naria, 2 Timoteo 2:19 hegeregerena, ‘Iehova be ena taunimanima ia diba.’” Ita diba momokani, Iehova be ia idia lalokau henia bona hesiai henia taudia ia naria!

14. Edena dala ai ita hahedinaraia diba ita ura Iehova ena ladana namona ita gimaia? (Laulau itaia danu.)

¹⁴ Ita ura taunimanima ita durua, unai amo do idia diba Iehova totona idia gwauraia hereva koikoidia be momokani lasi. Mani inai haheitalai ita laloa: Oi be mai emu tura namona ta, ia be kara namo tauna, heabidae karana ia hahedinaraia, bona dika gwauatao tauna. Dina ta, oi kamonai ta ia gwau emu tura namona be dagedage bona koikoi tauna. Dahaka do oi karaia? Do oi ura iena ladana namona oi gimaia. Unai hegeregerena, Satani bona ia idia badinaia taudia idia ura Iehova ena ladana namona idia hadikaia neganai, ita ura Ia totona hereva momokani ita gwauraia, bona Iena ladana ita gimaia. (Sal. 34:1; Isa. 43:10) Ita hahedinaraia ita ura iseda hereva bona kara amo mai kudouna ibounai ida Iehova ita hesiai henia.

15. Aposetolo Paulo be ena mauri ai senisi haida ia karaia dainai, dahaka hahenamo ia abia? (Filipi 3:7, 8)

¹⁵ Mai ura ida iseda mauri lalonai senisi haida ita karaia, unai amo Iehova ena hesiai gaukara lalonai iseda gaukara ita habadaia diba. Hegeregere, aposetolo Paulo be ena hanua ai ladana bada tauna, to unai ia dadaraia badina ia ura Keriso ia badinaia bona Iehova ia hesiai henia. (Gal. 1:14) Unai ia karaia dainai, ena mauri lalonai hahenamo idauidau ia abia bona hahenamo ta be Iesu ida guba ai ia lohia. Iehova ia hesiai henia totona ia karaia abia hidi dainai ia lalohisihisi lasi, ita danu bema Iehova ita hesiai henia, do ita lalohisihisi lasi.—Filipi 3:7, 8 duahia.

16. Julia ena sivarai amo dahaka ita dibaia? (Laulau itaia danu.)

¹⁶ Bema iseda mauri ai Iehova ena hesiai gaukara ita laloa bada, ia ese ita do ia hanamoa hari bona vaira nega ai danu. Mani taihu ta ladana Julia ita laloa. Julia be kekeni maragi bona hereva momokani ia do diba lasi neganai, ia be ena dubu ena ane grup ta dekenai ane ia abia. Ane abia dalana ia diba namonamo tauna ta ese unai ia itaia dainai ia dekenai ane abia dalana ia hadibaia. Gabeai Julia be ladana bada ia abia bona miusiki rumadia dekenai ane ia abia. Julia ena sikuli ai, ena klas turana ta be ia dekenai Dirava bona ena ladana, Iehova ia herevalaia. Julia be wiki tamona lalonai nega rua Baibel ia stadilaia. Gabeai, ena lalona ia hadaia ena mauri ai Iehova ia hesiai henia totona, bona ena miusiki gaukara ia rakatania. Unai abia hidi ia karaia be auka. Ia gwau: “Taunimanima momo be lau idia hamaoroa lau ese gau namona ta lau dadaraia, to lau ura egu mauri ibounai lau gaukaralaia Iehova lau hesiai henia totona.” Lagani 30 gunanai ia karaia abia hidi dainai hari ena hemami be edena bamona? Ia gwau: “Lau be lalomaino lau abia, bona lau diba vaira nega ai Iehova ese egu ura gaudia ibounai do ia henia.”—Sal. 145:16.

IEHOVA ITA HESIAI HENIA NOHO

17. Inai nega dokona ai, Dirava idia hesiai henia taudia bona idia do hesiai henia lasi taudia be dahaka idia karaia be namo?

¹⁷ Ita be inai tanobada ena oromana ena dokona ai ita noho. Aposetolo Paulo ia gwau: “‘Nega sisina lalonai,’ bona ‘do ia mai tauna be do ia ginidae bona do ia leiti lasi.’” (Heb. 10:37) Unai dainai dahaka ita karaia be namo? Namona be abia hidi ita karaia Iehova ita hesiai henia totona, badina nega be kwadogi. (1 Kor. 7:29) Bona bema ita be abia hidi ita karaia vadaeni Iehova ita hesiai henia totona, ita diba hahetoho ita haheaukalaia be namo, unai be “nega sisina sibona.”

18. Iesu bona Iehova idia ura dahaka ita karaia?

¹⁸ Iesu be ena hahediba taudia ia hagoadaia ia do idia badinaia bona ia murinai do idia raka noho. (Mat. 16:24) Unai dainai bema lagani momo lalonai Iehova ita hesiai henia vadaeni, namona be ita hesiku lasi. Namona be ita karaia abia hidi ita badinaia bona Iehova ita hesiai henia noho. Ena be unai ita karaia totona be mai ena hekwarahi, to hahenamo idauidau do ita abia bona do ita moale!—Sal. 35:27.

19. Gene ena sivarai amo dahaka ita dibaia?

¹⁹ Haida idia mamia Iehova idia hesiai henia neganai, gau momo do idia dadaraia. Bema oi be mero o kekeni ta, oi mamia Iehova oi hesiai henia neganai, gau haida do oi reaia, a? Tadikaka matamata ta ladana Gene ia gwau: “Lau mamia Iehova ena Witnes tauna ai oi lao neganai, taravatu be momo. Toana be lau ida idia tubu hebou matamata taudia be pati idia lao, mai edia gelfren eiava boifren, eiava dagedage vidio gadara idia gadaralaia, to lau be nega ibounai kongrigeisen hebou ai eiava haroro gaukara ai lau noho.” Gene be unai lalohadai ia abia dainai dahaka ia vara? Ia gwau: “Matamata taudia ese idia karaia kara dikadia haida lau karaia matamaia, bona nega sisina lalonai unai gaudia lau moalelaia. To moale korikorina lau abia lasi. Baibel ena taravatu badinaia karana ena namo lau laloa lou bona egu lalona lau hadaia mai kudouna ibounai ida Iehova lau hesiai henia totona. Unai nega amo ia mai hari, Iehova ese egu guriguri ibounai ia haerelaia.”

20. Namona be iseda lalona ita hadaia dahaka ita karaia totona?

²⁰ Salamo torea tauna be Iehova dekenai ane ia abia, ia gwau: “Oi abia hidi bona hakaua mai tauna be ia moale, emu dubu helaga ena ariara lalonai ia noho totona.” (Sal. 65:4) Namona be iseda lalona ita hadaia Iehova ita hesiai henia noho totona. Iosua bamona, do ita gwau: “Lau bona egu ruma bese be Iehova do ai hesiai henia.”—Ios. 24:15.