Herevahereva Hebou—Hereva Mo Sibona Lasi

NAMONA be loaloa taudia hutuma be hairai gabuna ena toana idia raraia karana oi laloa. Ena be unai taudia hutuma be unai gabu idia raraia, to idia ta ta iboudiai idia itaia gaudia be idauidau. Badina be dahaka? Badina idia ta ta idia gini gabuna be idauidau. Ma danu, idia ta ta idia raraia gaudia unai gabu dekenai be idauidau. Idia ta ta edia lalona idia veria gaudia be idauidau.

Unai be hegeregere headava lalonai danu. Ena be headava lalonai tau bona hahine idia noho namo, to hereva eiava gau haida dekenai edia lalohadai be idia tamona lasi. Edia lalona ena goada, idia natuna maragi neganai idia dekenai idia vara gaudia, bona edia ruma bese ese idia veridia dainai, edia lalohadai be tamona lasi. Edia lalohadai idia idau dainai, idia huanai hepapahuahu dikana ia vara diba. Aposetolo Paulo ia gwau: “Headava taudia be inai tanobada ena metau bada do idia abia.”​—1 Korinto 7:​28.

Herevahereva hebou karana ena anina danu be idia ura lasi edia lalohadai idia idau to idia ura idia lalo-tamona. Unai ia vara totona gau badana be nega idia atoa idia herevahereva hebou totona. (Rau 7 ai maua itaia.) To ma kara haida idia karaia danu be gau badana.

Lalo-Parara Hahedinaraia

Baibel ena aonega herevana ta ia gwau: “Aonega tauna ena kudouna ese ena uduna amo lalo-parara ia hahedinaraia, bona iena bibina ese taunimanima edia lalona ia veria.” (Hereva Lada-isidia 16:23) Heberu gado ai unai hereva “lalo-parara hahedinaraia” ena anina be gau ta karaia kava lasi, to lalohadailaia namonamo. Unai dainai, uduna lasi, to kudouna be gau badana herevahereva hebou karana ia karaia namonamo totona. Herevahereva hebou karana ia namo totona ia hereva mo sibona lasi, to namona be mai hebogahisi ia kamonai danu. (Iakobo 1:19) Namona be ena adavana ena lalohadai bona idia vara gaudia ia diba, bena do ia lalo-parara ena kara ena badina be dahaka.​—Hereva Lada-isidia 20:5.

Edena bamona unai oi karaia diba? Nega haida hepapahuahu ia vara ena badina oi tahua diba. Oiemu adavana be lalona dekenai eiava tauanina dekenai ia hekwarahi bada, a? Oiemu adavana ia gorere dainai hepapahuahu ia havaraia, a? Baibel ia gwau: “Haere maorona ia henia tauna ese ena hereva ia moalelaia.” (Hereva Lada-isidia 15:​23) Vadaeni, ena kara ena badina oi diba neganai, lalo-parara karana amo oi kara namo henia diba.​—Hereva Lada-isidia 25:11.

To, nega momo, kara gunana ta dainai hepapahuahu ia vara to unai ita diba lasi.

Guna Idia Vara Gaudia Oi Diba

Ita maragi neganai idia vara gaudia be ita bada neganai iseda lalohadai dalana idia hakaua. Headava taudia be ruma bese idaudia amo idia mai dainai, edia lalohadai kara haida dekenai idia idau.

Baibel lalonai ia vara karana ta ese unai ia haheitalaia. Ierusalem dekenai gwauhamata mauana idia abia lao lou neganai, David be taunimanima vairadiai ena moale ia hahedinaraia. To ena adavana, Mikala, ena kara be edena bamona? Baibel ia gwau: “Saulo natuna hahinena Mikala be uindo amo ia raraia diho, bena Pavapava David ia itaia, ia mavaru roho-isi roho-isi Iehova vairanai; bena ena lalona dekenai ia dadaraia.”​—2 Samuel 6:​14-16.

Mikala be ena kara maoromaoro lasi tamana ena kara ia tohotohoa, ia abidadama lasi. Baibel ena anina idia tahua taudia, C. F. Keil bona F. Delitzsch, idia gwau Mikala ena kara dainai reana siri 16 dekenai ia gwauraia “Saulo ena natuna hahinena,” ia gwau lasi ia be David ena adavana. To unai be herevana, murinai idia huanai ia vara hepapahuahu karana ese ia hahedinaraia goevagoeva David bona Mikala edia lalohadai unai moale karana dekenai be idia idau.​—2 Samuel 6:​20-23.

Unai ia vara guna sivaraina ese ia hahedinaraia tau bona ena adavana edia lalohadai kara ta dekenai idia idau badina idia maragi neganai idia hadibaia dalana be idia idau dainai. Unai be ia momokani ena be idia ruaosi be lalo-tamona dekenai Iehova idia hesiai henia. Inai bamona, bema hahine ena maragi negana lalonai ena lalona idia hagoadaia lasi, ia hahine bada neganai reana taunimanima idia lalo-namo henia bona idia hagoadaia noho karana ia tahua noho. Reana unai ia ura dainai ena tau do ia daradara. Reana ia gwau: “Bema nega handred momo lau hamaoroa lau lalokau henia, to ia dekenai unai be do ia hegeregere lasi momokani!”

Bema unai bamona, herevahereva hebou karana ia namo totona gau badana be “haida edia namo do umui tahua, to umui emui namo sibona do umui tahua lasi.” (Filipi 2:4) Herevahereva hebou karana ia namo totona, namona be tau ese sibona ena lalohadai kara ta dekenai do ia laloa lasi, to iena hahine ena lalohadai unai kara dekenai do ia laloa. Bona, namona be hahine be unai bamona ia laloa ena tau dekenai danu.​—1 Korinto 10:24.

Bema Guna Dika Idia Davaria Neganai

Headava tauna eiava hahine be ia maragi neganai bema ta ese ia hadikaia, hari ena adavana ia hebogahisi henia be gau badana​—madi, unai dika karana ia bada ia lao hari inai nega lalonai. Inai oi laloa, bema kekeni neganai tau ta ese ia hadikaia, reana hari ia headava vadaeni hahine be ena adavana danu idia mahuta hebou neganai, guna ia vara karana ia laloaboio diba lasi dainai, ia laloa ena adavana be hahine hadikaia tauna bona ia laloa ia hadikaia unai. Bema tau ese ena hahine ena lalohadai unai kara dekenai ia laloa lasi, do ia badu diba.​—1 Petero 3:8.

Ena be guna ia vara karana oi haidaua diba lasi eiava ia vara lalohisihisina oi kokia vaitani diba lasi, to kara idauidau oi karaia diba emu adavana ena lalo-hekwarahi oi hamaragia totona. (Hereva Lada-isidia 20:5) Edena dala amo? Petro ia gwau: “Tatau e, umui danu, emui adavana danu umui noho hebou ena dala do umui laloa namonamo.” (1 Petero 3:​7) Guna oiemu adavana dekenai ia vara gaudia oi diba be gau badana umui herevahereva hebou karana do ia namo totona. Bema hebogahisi oi hahedinaraia lasi, oiemu hereva be anina lasi.

Ena be taunimanima edia gorere ia abia lasi, to Iesu be gorere taudia ia itadia neganai idia dekenai ia ‘hebogahisi.’ (Mataio 14:14) Unai hegeregerena, ena be oiemu hahine ia davaria kara dikana oi davaria lasi, to namo lasi ena lalohisihisi mamina oi gwauraia ia be maragi karana, namona be guna ia dekenai ia vara gauna oi laloatao bona oi durua. (Hereva Lada-isidia 18:13) Paulo ia gwau: “Ita abidadama goada taudia be namo manoka taudia ita durudia edia abidadama do ia gini totona. Ita sibona iseda moale do ita tahua lasi.”​—Roma 15:1.

Badu Karana ese Ia Guidia

Headava be davana bada urona ta bamona. Heudahanai karana ese headava dekenai dika bada ia havaraia diba. (Hereva Lada-isidia 6:32) Momokani, bema kerere lasi tauna ese ena adavana ena kerere ia gwauatao neganai, herohemaino karana amo edia headava do ia namo lou diba. To uro bamona makohia gabudia idia do noho, bona hepapahuahu negadiai, reana guna ia vara gauna do ia gwauraia hedinarai lou, adavana botaia bamona totona.

Headava lalonai ta ia heudahanai neganai badu ia havaraia. To bema oiemu adavana ena kerere oi gwauatao, namona be oi naria namonamo, namo lasi oi badu noho, badina unai ese emu gwauatao hereva ena namo do ia hadikaia. Bema emu lalona dekenai oi badu noho, eiava emu badu oi hahedinaraia noho, unai badu noho karana ese headava tau bona hahine do ia hadikaia momokani. Dahaka dainai? Doketa ta ia gwau: “Bema oiemu adavana ena kara dainai oi lalohisihisi, unai ena anina be ia oi do laloa bada. Unai dainai, bema ia oi dadaraia eiava ia dekenai davana oi henia, ia oi haberoa sibona lasi, to oi sibona oi kara dika henia danu. Ena be oi ura headava namona umui abia, to unai kara amo headava ena dika oi habadaia.”

Oibe, bema oi badu noho, emui headava dekenai idia vara hekwakwanai umui haoredia diba lasi. Unai dainai, badu lasi negana lalonai, emu adavana dekenai emu lalohadai oi gwauraia hedinarai. Oi hamaoroa dahaka dainai oi lalohisihisi, bona dahaka ese emu lalona do ia hamoalea, bona dahaka oi ura karaia emui headava ia namo totona. Hepapahuahu dekenai do oi kwalimu totona, guna ia vara gauna ta oi gwauraia hedinarai lasi.

Inuinu Kekero Eiava Drag Ania Dainai Herevahereva Hebou Karana Ia Hadikaia

Headava lalonai ta be ia inuinu kekero eiava drag ia ania neganai unai ese headava ia hadikaia bada. Unai bamona ia davaria hahine ta be Abigail, Baibel ese ena sivarai ia gwauraia. Iena adavana Nabala be ia “kekero dikadika” neganai, Abigail ia hekwarahi bada iena aonega lasi karana ia hamaoromaoroa totona. (1 Samuel 25:​18-31, 36) Headava lalonai bema headava tauna eiava hahinena be inuinu kekero eiava drag ania kara dainai ia hekwarahi, bona ena adavana ia durua noho ena kara do ia haidaua totona, unai be Nabala bona Abigail ena ruma bese dekenai ia vara bamona.a

Momokani, ta ese inuinu kekero eiava drag ania karana ia rakatania bona ia namo ia lao neganai, moale bada ia vara. To unai be kara ginigunana sibona. Namona be hanua maragina dekenai lai badana ia toa oi laloa. Ruma idia moru, au be tano amo ia ragaia, telefon uaia be tano dekenai idia moru. Unai lai badana ia ore neganai taunimanima idia moale. To hari gaukara bada ia noho gau ibounai hanamoa totona. Headava tauna be dika karana ta ia rakatania be unai bamona. Edia hebamo heheni karana ia dika bona hari idia hanamoa lou be gau badana. Abidadama bona kara maoromaoro idia haginidia lou be gau badana. Herevahereva hebou karana idia haginia lou be gau badana. Inuinu kekero eiava drag ania karana ia rakatania tauna be sisina sisina ia namo ia lao neganai, ia be “mauri matamata” dalana ia badinaia, Baibel ia gwau Keristen taudia ese unai dala idia badinaia be gau badana. Unai mauri matamata atoa ena anina be “emui laloa bona emui kudouna do umui hamatamataia be gau badana.”​—Efeso 4:​22-24.

Baibel stadi ese Leonard bona Elaine ia durudia drag ania karana idia rakatania totona, to siahu ese edia laloa bona edia kudouna ia do doria namonamo lasi.b Gabeai idia manadalaia kara dikadia ma haida idia hedinarai. Elaine ia gwau: “Lagani 20 lalodiai Baibel ena taravatu ai badinadia toho emai headava ia namo totona, to ai hegeregere lasi karaia totona. Unai kara dikadia be nega daudau ai manadalaia vadaeni dainai. Stadi eiava guriguri karadia ese unai kara ai dekenai idia kokia diba lasi.”

Leonard bona Elaine ese heduru idia tahua idia manadalaia kara dikadia edia badina idia lalo-pararalaia totona. Nega korikori dekenai, “hesiai tauna mai ena kamonai bona mai ena kara maoromaoro” oreana idia halasia heduru herevadia, natudia dagedage henia, inuinu kekero, bona hahine matauraidia karadia ese ia durudia bada.c (Mataio 24:​45-47) Elaine ia gwau: “Heduru ai abia emai kerere ai hamaoromaoroa totona bona emai hebamo karana ia namo lou totona.”

Hekwakwanai Hanaidia Dalana

Rebeka be ena natuna Esau ena adavadia dainai ia lalohisihisi bada. Ia gari badina ia laloa ena natuna Iakobo be ena kakana ena kara do ia tohotohoa, unai dainai Rebeka be mai badu danu ena adavana Isako dekenai ia gwau: “Lau hesiku vadaeni inai Het hahine taudia totona. Iakobo ese inai Het taudia edia natuna inai tano dekenai idia noho ta do ia adavaia, lauegu noho be dohore edana bamona?”​—Genese 27:46.

Inai oi laloa, ena be Rebeka ese ena lalohadai ia hahedinaraia, to Isako danu ia hepapahuahu lasi. Ia gwau lasi, “Inai be oiemu kerere!” eiava ia gwau lasi, “Bema guna oi naria namonamo inai kara do ia vara diba lasi!” To, ena hemami unai hekwakwanai dekenai ia hahedinaraia neganai, Rebeka ia gwau “Lau hesiku.” Unai bamona ia hereva dainai, Isako ese ia hebogahisi henia, bona ena hahine ese ia hahemaraia lasi dainai, dala ia tahua lasi sibona ena ladana ia hanamoa totona. Ia dekenai ia hepapahuahu lasi dainai, Isako be Rebeka ena noinoi ia kamonai henia bona haraga herea kara ta ia karaia unai hekwakwanai hamaoromaoroa totona.​—Genese 28:​1, 2.

Headava tatau bona edia adavadia be Rebeka ena haheitalai namona amo diba idia abia. Headava taudia emui lalohadai idia idau neganai, hekwakwanai umui hanaia toho, namo lasi umui hepapahuahu. Rebeka bamona, namona be emu hemami unai hekwakwanai dekenai oi hahedinaraia. Reana namona be oi gwau, “Lau badu badina . . .” eiava, “Lau lalohisihisi badina . . .” Namo lasi oi gwau, “Lau oi habadua!” eiava, “Lauegu lalohadai oi diba momokani lasi!”

Haheauka Mo Sibona Lasi

Taunimanima ginigunadia, Adam bona Eva, edia headava be lagani handred momo lalonai ia noho, bona natudia memero bona kekeni idia havaradia. (Genese 5:​3-5) To ita gwau diba lasi edia headava ita tohotohoa be namo. Badina haraga herea idia be gwau-edeede karana idia hahedinaraia, bona edia Haravaia Diravana ena taravatu idia hamakohia dainai edia headava idia hadikaia.

Unai hegeregerena, hari inai negai, ena be haida idia headava daudau, to reana idia herevahereva hebou namonamo lasi. Reana idia manadalaia lalohadai karana bona edia maoro lasi lalohadai bona kara haida idia rakatanidia be namo. (Korinto Iharuana 10:​4, 5 itaia danu.) Unai kara kerere be sisina sisina idia kokidia lao noho. To unai bamona idia hekwarahi neganai namo do idia davaria. Iehova Dirava be headava Havaraia Tauna dainai, headava ia laloa bada. (Malaki 2:​14-16; Heberu 13:4) Unai dainai, headava lalonai ita kara maoromaoro toho neganai, ita diba Dirava ese iseda hekwarahi do ia itaia, bona herevahereva hebou karana bema ia dika sisina neganai, ita dekenai aonega bona goada do ia henia unai kara do ita hanamoa totona.​—Salamo 25:​4, 5; 119:​34 itaia danu.

[Footnotes]

[Box on page 6]

“Momoru laloa ena nega be ia bada!”

TAU ta mai ena adavana be edia headava lalonai hekwakwanai momo idia davaria, idia dekenai henanadai idia henia, idia gwau pura ta ta lalonai ruma ena momoru murimuri ai umui atoa idia laohaia totona, umui halusia ena nega ena bada be dahaka? Idia haere, pura tamona lalonai miniti 35 bamona, eiava dina ta ta ai miniti 5 bamona idia negea. Murinai idia henanadai henidia, idia herevahereva hebou karana dekenai idia halusia ena nega ena bada be dahaka? Tau be ia hoa. Ia gwau: “Momoru laloa ena nega be ia bada!” Ma ia gwau: “Sibona ita koia bema ita laloa miniti ima be ia hegeregere headava ia noho namo totona. Unai nega ena bada be ia hegeregere lasi headava ia tubu goada totona.”

[Box on page 7]

Taravatu Atoa

◻ Hereva tamona nega tamona umui kikilaia (1 Korinto 14:​33, 40)

◻ Lalohadai hahedinaraia; samani hereva gwauraia lasi (Genese 27:46)

◻ Heatu lasi (Efeso 5:​28, 29)

◻ Ladana hadikaia hereva gwauraia lasi (Hereva Lada-isidia 26:20)

◻ Maino tahua, kwalimu dalana tahua lasi (Genese 13:​8, 9)

[Picture on page 4]

Emui lalohadai idia idau neganai, umui hepapahuahu lasi, to hekwakwanai umui hanaia toho

[Picture on page 8]

Emui lalohadai hahedinaraia; to samania herevana gwauraia lasi