Umui Naria, ta ese Emu Kara Namodia Ia Hadikaia Garina

“Umui laloa kerere lasi. Bema kara dika taudia danu umui turana karaia neganai idia ese emui kara namona do idia hadikaia.”​—1 KORINTO 15:33.

1, 2. (a) Aposetolo Paulo be edena bamona ia laloa Korinto Keristen taudia dekenai, bona badina be dahaka? (b) Edena sisiba do ita laloa?

TAMA sina taudia ese natudia idia lalokau henidia karana be mai ena siahu! Unai kara dainai tama sina taudia be sibodia edia ura idia dadaraia momo, idia hadibadia bona idia sisiba henidia. Aposetolo Paulo be reana mai ena natuna korikoridia lasi, to ia be Korinto ena Keristen taudia ia torea henidia, ia gwau: “Umui laloa: Bema Keriso ena mauri dalana umui dekenai idia hadibaia taudia ibounai be 10,000, inai be gau ta lasi. Umui emui tamana be tamona sibona. Oibe, Keriso Iesu ena mauri dalana diba totona umui emui tamana be lau sibona. Lau ese Sivarai Namona umui lau haroro henia dainai umui be lauegu natuna.”​—1 Korinto 4:15.

² Guna, Paulo be Korinto dekenai ia lao, unuseniai Iuda taudia bona Greek taudia ia haroro henidia. Korinto taudia ia durudia kongregesen ta idia haginia totona. Ma revareva ta lalonai Paulo ia gwau ia be natuna ia ubua sinana bamona ia ese ia naridia, to Korinto taudia dekenai ia be tamana bamona. (1 Tesalonika 2:7) Lalokau tamana korikorina ta bamona, lauma dalanai Paulo be iena natudia ia sisiba henidia. Sedira Korinto Keristen taudia dekenai tamana bamona sisiba ia henidia, bona iena hereva ese oi do ia durua diba: “Umui laloa kerere lasi. Bema kara dika taudia danu umui turana karaia neganai idia ese emui kara namona do idia hadikaia.” (1 Korinto 15:33) Dahaka dainai Paulo be Korinto taudia dekenai unai hereva ia torea? Edena dala ai unai sisiba ita badinaia diba?

Sisiba Idia Bona Ita Dekenai

³ Lagani 1 ia lao 99 C.E. neganai, tano bona gabu ai edia toana ia gwauraia Greek tauna Strabo ia torea, ia gwau: “Korinto idia gwauraia ‘taga gabuna’ badina ia be hoihoi gabuna, ia be bouti kamokau gabudia rua edia huanai tanona dekenai ia noho, bona unai gabudia rua ia biagudia, unai gabu amo bouti be maoromaoro idia lao diba Asia dekenai bona Italy dekenai; bona unai tanodia rua ida hoihoi dalana ia durua.” Lagani rua rua lalodiai taunimanima momo be Isthmian Gadara dainai idia mai Korinto dekenai.

3, 4. Lagani 1 ia lao 99 C.E. ai ia noho Korinto hanuana dekenai bona unai hanua taudia dekenai dahaka ita diba?

⁴ Unai hanua dekenai gavamani taudia idia noho bona Aphrodite tomadiho henia lebulebu kara dikana idia karaia momo, to unai hanua taudia be edena bamona? Profesa T. S. Evans ia gwau: “Sedira hanua taudia 400,000 bamona idia noho. Unai taudia be gau idauidau dekenai edia diba ia bada, to mauri ena kara goeva taravatudia idia badinaia momo lasi, edia kara be dika momokani. . . . Achaïa ena Greek taudia be dala idauidau amo edia lalona idia veria bona hereva matamatadia idia tahua goadagoada. . . . Edia hekokoroku dainai idia be orea maragimaragidia dekenai idia parara momo.”

5. Korinto tadikakadia ese dahaka hekwakwanai idia abia diba?

⁵ Gabeai kongregesen lalonai danu haida be hekokoroku dekenai sibodia edia lalohadai idia gwauraia kava bona idia parara. (1 Korinto 1:​10-31; 3:​2-9) Hekwakwanai badana ta be haida idia gwau: “Mase taudia do idia toreisi lou lasi.” (1 Korinto 15:12; 2 Timoteo 2:​16-18) Herevana dahaka idia abia dae (eiava idia abia dae lasi), to namona be Paulo ese edia lalohadai ia hamaoromaorodia goevagoeva bona ia hahedinaraia Dirava ese Keriso be “mase dekena amo ia hatorea isi.” Unai dainai, Keristen taudia idia abidadama diba Dirava be “Lohiabada Iesu Keriso ena siahu dainai Dirava ese ita ia hagoadaia, vadaeni ita kwalimu.” (1 Korinto 15:​20, 51-57) Bema unai neganai oi noho, oi danu unai hereva dekenai oi hekwakwanai, a?

6. Paulo ena sisiba 1 Korinto 15:33 dekenai be mai anina bada daidia dekenai?

⁶ Mase taudia be do idia toreisi lou ia hamomokania neganai, Paulo ese ia hamaorodia, ia gwau: “Umui laloa kerere lasi. Bema kara dika taudia danu umui turana karaia neganai idia ese emui kara namona do idia hadikaia.” Unai sisiba be mai anina kongregesen taudia dekenai, toreisi lou hahediba herevana idia abia dae lasi taudia unai. Idia lalo-parara lasi dainai idia daradara, a? (Luka 24:38 itaia danu.) Lasi. Paulo ia torea neganai ia gwau “umui haida umui gwau mase taudia do idia toreisi lou lasi,” unai dainai unai taudia idia gwau unai hereva idia abia dae lasi, idia be hereva momokani dadaraia taudia bamona idia lao. Paulo ia diba momokani haida edia kara namona bona lalohadai idia hadikaia diba.​—Kara 20:30; 2 Petero 2:1.

7. Edena gabu ta dekenai 1 Korinto 15:33 ita badinaia diba?

⁷ Edena dala ai Paulo ena sisiba hebamo karana dekenai ita badinaia diba? Ia gwau lasi kongregesen lalonai ta ese Baibel siri ta eiava hahediba ta ia lalo-pararalaia lasi neganai ita durua lasi. Iuda 22, 23 ese ita ia hagoadaia daradara momokani taudia be hebogahisi dekenai ita durudia. (Iakobo 5:​19, 20) To, ta ese Baibel ena hereva momokani ia dadaraia momo neganai eiava hereva idaudia ia gwauraidia noho neganai, Paulo be tamana bamona ita ia henia sisibana ita badinaia. Ita naria namonamo unai bamona tauna ita bamoa garina. Momokani, bema ta be hereva momokani ia dadaraia momokani, lauma dalana ai mamoe naria taudia ese kara ta do idia karaia mamoe do idia dika garina.​—2 Timoteo 2:​16-18; Tito 3:​10, 11.

8. Ta ese Baibel ena hahediba ta ia abia dae lasi neganai edena bamona mai laloa namonamo ida ita kara be namo?

⁸ Bema kongregesen murimurinai idia noho taudia ese hahediba koikoidia idia gwauraia neganai ita be 1 Korinto dekenai Paulo be tamana bamona ita ia henia sisibana ita badinaia diba. Edena dala ai ita bamodia kerere diba? Haida ita durudia diba hereva momokani idia abia totona, to ma haida be idia ura hahediba koikoi idia habadaia sibona, to edia lalona ita diba lasi bona ita bamodia kerere. Inai bamona, iseda haroro gaukara dekenai, sedira hereva ta ia abia dae lasi tauna ita davaria to ia ura ita herevalaia noho. (Kara 17:​32-34) Unai sibona be hekwakwanai gauna lasi, badina mai moale ida Baibel hereva momokani ita gwauraia hedinarai diba bema ta ia ura momokani ia diba neganai, bona sedira ita giroa diba ia dekenai hamomokania hereva ita gwauraia totona. (1 Petero 3:15) To, haida idia ura momokani lasi Baibel ena hereva momokani idia diba.

9. Iseda abidadama dainai idia ura ita ida idia hepapahuahu neganai, dahaka ita karaia be namo?

⁹ Taunimanima momo be hora momo, wiki momo dekenai, do idia hepapahuahu, to idia be hereva momokani idia tahua lasi. Idia ura ma ta ena abidadama idia hadikaia noho bona sibodia edia diba Heberu, Greek, eiava evolusen ena saiens herevana dekenai idia heagilaia. Unai taudia idia davaria neganai, Witness haida idia ura idia abia dae herevana idia hamomokania, bena gabeai unai taudia idia bamodia momo bona idia be tomadiho hahediba koikoi herevadia, lalohadai, eiava saiens kererena idia kikilaia momo. Ita laloa, ena be tomadiho gunalaia taudia be Heberu bona Greek dekenai idia sikuli bona Iesu be hepapahuahu dekenai ia kwalimu diba, to ia be unai bamona ia karaia lasi. Idia ura idia hepapahuahu neganai, Iesu be haere kwadogina ia henia, bena manau taudia, mamoe momokani taudia ia hereva henidia.​—Mataio 22:​41-46; 1 Korinto 1:​23–2:2.

10. Dahaka dainai mai edia kompiuta Keristen taudia bona mai edia dala electronic bulletin boards dekenai hereva idia karaia diba taudia idia naria namonamo?

¹⁰ Hari inai negai kompiuta dainai dala ma haida idia kehodia hebamo dikana dekenai. Bisinesi haida be dala idia karaia taunimanima be kompiuta bona telefon amo hereva idia siaidia lao electronic bulletin boards dekenai; unai dala dekenai ta be sivarai ta ia siaia kompiuta dekenai bona ura taudia be kompiuta amo unai sivarai idia duahia diba. Unai amo hari idia be tomadiho gaudia dekenai hepapahuahu idia karaia diba electronic masinidia dekenai. Sedira Keristen ta be unai hepapahuahu dekenai ia vareai diba bona hora momo lalonai ia be hereva momokani dadaraia tauna ta, reana ia be kongregesen murimurinai idia atoa tauna ta ia bamoa. Paulo be tamana bamona ia henia sisibana 2 Ioane 9-11 dekenai ese hebamo dikadia dadaraia karana ia gwauraia bada.a

Umui Laloa Kerere Lasi

¹¹ Ita herevalaia vadaeni hegeregerena, Korinto be bisinesi gabu badana, mai ena sitoa bona hoihoi gabudia momo. (1 Korinto 10:25) Isthmian Gadara totona idia mai taudia momo be palai rumadia dekenai idia noho, bona unai negana ai hoihoi taudia be idia abia loaloa haraga diba hoihoi patadia amo idia hoihoi. (Kara 18:​1-3 itaia danu.) Unai dainai Paulo be gaukara ia davaria diba unuseniai palai rumadia ia turia totona. Bona gaukara gabuna dekenai sivarai namona ia harorolaia momo diba. Profesa J. Murphy-O’Connor ia torea, ia gwau: “Hoihoi taudia momo maketi sitoa dekenai . . . taunimanima momo be dala dekenai idia loaloa, bona Paulo be ia ida idia gaukara taudia bona sitoa dekenai idia mai hoihoi taudia sibodia lasi, to murimuri dekenai idia loaloa taudia danu ia hereva henidia diba. Gaukara momo lasi negadia ai, ia be iduara dekenai ia gini diba, bona ia laloa haida do idia kamonai neganai ia hereva henidia . . . Ita laloa iena kara goadana bona abidadama goadana dainai unai gabu dekenai ‘taunimanima ese idia herevalaia momo,’ bona unai be loa kava taudia sibodia lasi to diba idia tahua momokani taudia danu ia veridia. . . . Headava hahinedia bona edia hesiai taudia be iena sivarai idia kamonai dainai, idia gwau idia mai hoihoi totona to ia idia vadivadi henia totona idia mai. Hekwarahi negadia ai, dagedage eiava dika havaraia taudia idia mai neganai, abidadama taudia idia do mai diba bona idia gwau diba idia be hoihoi taudia. Gaukara gabuna dekenai ia be hanua ena lohia taudia danu ia davaridia diba.”

12, 13. Gaukara gabuna dekenai 1 Korinto 15:33 ita badinaia be edena bamona ia maoro?

¹² To Paulo be ia diba gaukara gabuna dekenai ‘hebamo dikadia’ ia davaridia diba. Unai ita laloa danu be namo. Paulo ese edia kara badana ta ia gwauraia: “Ita aniani bona ita inuinu, badina be kerukeru do ita mase.” (1 Korinto 15:32) Maoromaoro unai hereva murinai ia be tamana bamona sisiba ia henia: “Umui laloa kerere lasi. Bema kara dika taudia danu umui turana karaia neganai idia ese emui kara namona do idia hadikaia.” Gaukara gabuna bona moale tahua karana be edena dala ai dika idia havaraia diba?

¹³ Keristen taudia idia ura gaukara taudia ida idia gaukara hebou namo, bona ekspiriens momo ese idia hahedinaraia unai be dala namona ta haroro henia totona. To, sedira, gaukara turana ida umui gaukara hebou namo dainai, ia laloa oi ura umui moale hebou karaia danu. Sedira ia ese oi do ia boiria umui aniani hebou totona, eiava gaukara murinai umui lao inuinu totona, eiava Saturday eiava Sunday neganai umui spot gadara hebou. Unai tau eiava hahine ena toana be sedira ia hebogahisi bona ia namo, bona sedira oi ia boiria neganai ia be dika ia tahua lasi. To, Paulo ese ita ia sisiba henia, ia gwau: “Umui laloa kerere lasi.”

¹⁴ Keristen haida idia laloa kerere. Idia be metairametaira gaukara turadia idia bamodia. Sedira ia hamatamaia dalana be gadara ta idia moalelaia hebou. Eiava gaukara gabuna dekenai, Keristen lasi gaukara turana be hebogahisi tauna bona oi ia laloa bada, unai amo oi bamoa negana ia bada ia lao, bena sedira oi ura ia danu oi bamoa momo to kongregesen taudia haida oi ura lasi oi bamodia momo. Unai hebamo karana dainai sedira hebou tamona oi reaia. Sedira hanuaboi ta umui lao mahuta haraga lasi dainai dina gabena ai oi lao lasi haroro. Sedira Keristen taudia momo ese idia dadaraia muvini piksa eiava video oi raraia. Reana ita laloa, ‘Lau dekenai unai bamona do ia vara lasi.’ To idia laloa kerere taudia momo be reana guna unai bamona idia hereva. Namona be ita sibona ita henanadai henia, ‘Paulo ena sisiba lau ura momokani lau badinaia, a?’

15. Iseda dekena taudia dekenai, edena bamona ita laloa namonamo?

¹⁵ Ita herevalaia gaudia be mai anina danu iseda dekena taudia bamodia karana dekenai. Momokani, idaunegai Korinto Keristen taudia be mai edia dekena taudia. Hanua haida dekenai dekena taudia tura henidia momo bona durudia karana ia goada. Gunika gabudia ai taunimanima be momo lasi dainai nega momo dekena taudia idia heduru heheni bada badina ma haida ese idia durudia diba lasi. Unai gabudia ai varavara edia hebamo karana ia goada, unai dainai nega momo idia boiridia idia aniani hebou totona. Iesu ese ia hahedinaraia bamona, lalohadai namonamo dalana be gau badana. (Luka 8:​20, 21; Ioane 2:12) Dekena taudia bona varavara taudia ita kara henidia neganai, Keristen taudia ai ita do lao lasi neganai ita karaia bamona ita karaia noho, a? Namona be unai kara gunadia ita lalodia bona dala ita karaia dala maorodia sibona ita badinaia totona, ani?

16. Iesu ena hereva Mataio 13:​3, 4 dekenai be edena bamona ita laloa be namo?

¹⁶ Nega ta Iesu ia gwau Basileia sivaraina be uhe bamona, “dala dekenai idia moru, vadaeni manu idia roho mai, idia ania ore.” (Mataio 13:​3, 4, 19) Unai neganai, taunimanima momo be dala dekenai idia loaloa neganai edia aedia ese tano idia ha-aukaia. Taunimanima momo be unai bamona. Edia mauri lalonai dekena taudia, varavara, bona ma haida idia mai bona idia lao, idia dainai idia gaukara momo. Unai be hegeregere edia kudou ena tano idia ha-aukaia, bena hereva momokani ena uhe ramudia idia tubu lasi. Keristen ai ia lao vadaeni tauna dekenai unai bamona ia vara diba danu.

17. Dekena taudia bona ma haida ita bamodia neganai, edena dala ai unai ese iseda kara ia haidaua diba?

¹⁷ Ena be iseda dekena taudia bona varavara taudia be sedira ita dekenai idia moale bona idia heduru, to nega momo lauma gaudia idia laloa lasi bona kara maoromaoro idia ura henia lasi. (Mareko 10:​21, 22; 2 Korinto 6:14) Keristen taudia ai ita lao dainai, ita gwau lasi idia dekenai ita moale lasi, eiava ita durudia lasi. Iesu ena sisiba be ma haida edia namo ita tahua. (Luka 10:​29-37) To Dirava ena amo ia mai hereva badana ma ta be Paulo ena sisiba, ia gwau iseda hebamo karana ita naria. Ita be unai sisiba gunana ita badinaia dainai, namo lasi gabeai ia mai sisibana ita laloaboio. Bema unai hahegani rua ita laloaboio, iseda kara do idia dika diba. Kara momokani bona Kaisara ena taravatu badinaia kara dekenai, emu kara bona emu dekena taudia eiava varavara taudia ida oi hahegeregerea neganai, be edena bamona? Hegeregere, sedira idia laloa takisi henia neganai, ia namo idia abia monina eiava bisinesi profit haida idia gwauraidia lasi, bema lasi, sedira bisinesi do ia dika. Sedira kofi umui inua hebou neganai eiava vadivadi kwadogina neganai edia lalohadai oi dekenai idia hadibaia emu lalona idia ania totona. Edena dala ai unai ese emu lalohadai bona kara momokani ia haidaua diba? (Mareko 12:17; Roma 12:2) “Umui laloa kerere lasi. Bema kara dika taudia danu umui turana karaia neganai idia ese emui kara namona do idia hadikaia.”

Matamata Taudia Edia Kara Danu

¹⁸ Matamata taudia be idia itaia gaudia bona idia kamonai gaudia dainai edia kara idia haidaua. Oi itaia natudia edia kara be tama sina eiava edia kakana bona taihudia bamona, ani? Unai dainai, ita hoa lasi edia gadara turadia eiava sikuli turadia edia kara idia tohotohoa. (Mataio 11:​16, 17 itaia danu.) Bema oiemu natuna mero eiava kekeni idia bamoa taudia be edia tama sina idia matauraidia lasi herevadia idia gwauraia momo, namo lasi oi laloa oiemu natudia edia kara do idia haidaua diba lasi. Edena bamona bema nega momo matamata taudia ma haida edia hereva mirodia idia kamonai? Edena bamona bema sikuli dekenai eiava emui dekena matamata taudia be tamaka sitailo matamata eiava ageva idia moalelaia momo? Ita laloa Keristen matamata taudia edia kara be do idia idau lasi, a? Paulo ia gwau 1 Korinto 15:33 dekenai ia gwauraia herevadia be mai anina lagani bada taudia sibodia dekenai, a?

19. Namona be tama sina be dahaka lalohadai idia hadibaia edia natudia dekenai?

¹⁹ Bema oi be tama eiava sina ta, oiemu natudia edia dala oi abia hidi bona oi hereva henidia neganai, unai sisiba oi laloa, a? Sedira heduru namona ta be emu natuna oi hadibaia umui noho gabuna ai eiava sikuli dekenai idia bamodia memero kekeni haida idia dika lasi. Idia haida idia namo, emu dekena taudia, varavara, bona gaukara turadia haida hegeregeredia. Namona be emu natudia oi durudia unai idia diba totona bona do idia lalo-parara oi lalohadai namonamo, bona oi ura tamana bamona ena aonega, Paulo ena sisiba herevana Korinto taudia dekenai oi badinaia. Gau iboudiai oi hahegeregerea dalana idia itaia neganai, unai ese do ia durudia oiemu kara idia tohotohoa totona.​—Luka 6:40; 2 Timoteo 2:22.

20. Matamata taudia e, dahaka do umui karaia be namo?

²⁰ Umui do matamata taudia e, namona be umui laloa edena dala ai Paulo ena sisiba oi badinaia diba, badina umui diba unai be anina bada Keristen taudia iboudiai dekenai, matamata taudia bona buruka taudia danu. Unai be mai ena hekwarahi, to namona be umui goada karaia umui kwalimu totona, ani? Namona be oi laloa, ena be umui maragi negana amo unai natudia haida oi diba, to danu oi diba idia be emu kara idia hadikaia diba, oi be Keristen mero o kekeni dainai oiemu kara idia hadikaia diba.​—Hereva Lada-isidia 2:​1, 10-15.

Iseda Kara Namodia Ita Naria Totona Ita Karaia Diba Gaudia

²¹ Ita ibounai be hebamo karana ita ura. To ita naria namonamo, badina ita bamoa taudia ese iseda kara idia haidaua diba, namo ita karaia eiava dika ita karaia totona. Adam dekenai bona unai negana amo taudia iboudiai dekenai unai ia momokani. Inai oi laloa, Iehosafat, Iuda ena pavapava namona ta, ia dekenai Iehova ia moale bona ia hanamoa. To iena natuna kekeni be Israel ena King Ahab dekenai ia henia ia adavaia totona, unai murinai Iehosafat ese Ahab ia bamoa. Unai hebamo dikana dainai Iehosafat be kahirakahira iena mauri ia haboioa. (2 Hanua Pavapavadia 8:​16-18; 2 Sisiga 18:​1-3, 29-31) Bema aonega dalana amo ita bamoa taudia ita abidia hidi lasi, unai be dika ia havaraia diba danu.

22. Dahaka ita ura momokani, bona badina be dahaka?

²² Unai dainai, namona be 1 Korinto 15:33 dekenai Paulo ese ia henia lalokau sisibana ita badinaia. Unai hereva ita kamonai momo bona iseda kwarana amo ita gwauraia diba, to idia be hereva sibona lasi. Idia hahedinaraia tamana bamona Paulo ese iena Korinto tadikaka bona taihu ia lalokau henidia, bona unai amo ita danu ia lalokau henia. Bona ita daradara lasi unai be iseda guba Tamana ese ia henia sisibana badina ia ura iseda gaukara be anina ia havaraia.​—1 Korinto 15:58.

[Footnotes]

Oi Laloatao, A?

◻ Dahaka dainai Paulo ese 1 Korinto 15:33 ia torea?

◻ Gaukara gabuna dekenai edena dala ai Paulo ena sisiba ita badinaia diba?

◻ Dekena taudia be edena bamona ita lalodia be namo?

◻ Dahaka dainai 1 Korinto 15:33 be sisiba namona matamata taudia dekenai?

11. Korinto hoihoi karana dekenai dahaka ia vara diba?

14. Hebamo dalana dekenai edena dala ai Keristen taudia haida idia laloa kerere?

18. Dahaka dainai matamata taudia danu be 1 Korinto 15:33 ena hereva idia badinaia be namo?

21. (a) Hebamo dekenai dahaka ita ura? (b) Edena bamona ita diba momokani hebamo haida idia dika?

[Picture on page 17]

Paulo be gaukara gabuna dekenai sivarai namona ia harorolaia

[Picture on page 18]

Matamata taudia ma haida be emu Keristen kara namodia idia hadikaia diba