Headava Varodia Ha-Aukadia Dalana

TAU ta ese ena adavana ia negea diba bema ia ura neganai, o bema mai badina a?’ Farisea taudia ese Iesu Keriso idia dibagania neganai unai bamona idia nanadaia. Ia haere henidia neganai headava ginigunana ia gwauraia, ia gwau: “Dirava ese ia hakapua taudia, be taunimanima ese do idia hapararaia lasi.”

Farisea taudia idia gwau, Mose ese dala ia karaia ta ese ena adavana do ia negea totona, ia gwau “negea totona pepa do ia torea.” To Iesu ia gwau: “Emui lalona idia auka dainai Mose ia hereva umui dekenai, ia gwau, ‘Umui emui adavana do umui rakatania.’ To hamatamaia neganai be unai bamona lasi. To lau ese umui lau hamaoroa, bema ena adavana ia heudahanai lasi, to adavana ia rakatania, vadaeni hahine ta ma ia adavaia, unai tauna be heudahanai tauna.”​—Mataio 19:​3-9.

Matamanai, headava be noho hanaihanai gauna. Dirava ese headava taudia ginigunadia ruaosi ia karadia neganai idia goevadae, mai edia dala do idia mauri hanaihanai. To, idia kara dika bena unai ese headava ia hadikaia. Taunimanima edia inaina, mase, ese headava taudia ia hapararadia. Baibel ia gwau mase ese headava ia hadokoa: “Hahine ese iena adavana do ia badinaia ela bona tau ena mauri dokona. To bema iena tau ia mase neganai unai hahine ese ia ura henia tauna do ia adavaia diba, taravatu lasi.” (1 Korinto 7:39) Hindu taudia edia kara gunana be idau; tau ia mase neganai ena hahine ena lalona idia ania, sibona do ia gabua bena ena adavana ida do idia noho hebou mauri gabena ai.

Mose ena Taravatu

Dirava ese taravatu be Mose ia henia neganai, headava idia dika idia lao vadaeni bona Israel taudia edia lalodia idia auka, unai dainai headava hadokoa dalana ia henidia. (Deuteronomi 24:1) Ia ura lasi unai taravatu do idia gaukaralaia kerere, edia adavadia be kerere maragidia dainai do idia negedia totona; ia haganidia edia bamodia do idia lalokau henidia, sibodia idia lalokau henidia hegeregerena. (Levitiko 19:18) Ena adavana negea totona pepa ia torea tauna ese ena adavana ia negea haraga diba lasi, badina be siahu taudia do ia herevalai henidia guna, bena idia ese hatamodia lou dalana do idia tahua. Dirava ese unai taravatu ia henidia lasi, ta ese badina idauidau dainai ena adavana do ia negea diba totona.​—Mataio 19:3.

To Israel taudia ese unai taravatu ena anina korikorina idia laloa lasi, bona idia gaukaralaia kerere, sibodia edia ura kava hegeregeredia edia adavadia do idia negedia totona. Lagani 500 B.C.E. murinai, edia adavadia be badina idauidau dainai idia negedia dainai, Iehova ese ia hamaorodia adavana negea karana ia inai henia. (Malaki 2:​14-16) Unai hegeregerena, Iesu ese Israel taudia be iena negai edia adavadia idia negedia karana ia gwauraia dika.

Badina Maorona Tamona

To Iesu ese headava hadokoa karana ena badina maorona tamona ia gwauraia: heudahanai unai. (Mataio 5:​31, 32; 19:​8, 9) Greek gado herevana be inai hereva “heudahanai” ida idia hahegeregerea ena anina be kara bodagadia: tau be hahine ida idia karaia karadia, tatau rua idia kara heheni karadia, bona animal sihari henia karadia danu.

To Iesu ia gwau lasi, bema ta ia heudahanai ena adavana ese do ia negea be namo. Ena adavana ese sibona ena lalona do ia hadaia namonamo, do ia negea eiava lasi. Baibel ena hereva hegeregerena edia adavadia idia negedia gwauraia hahinedia ese Dirava ena hereva, hahine ginigunana Eva be ia kara dika murinai ia hamaoroa herevana, idia laloa be namo. Ia gwau: “Oiemu adavana do oi ura henia noho, bona ia ese oi do ia biagua.” (Genese 3:16) Commentary on the Old Testament, C. F. Keil bona F. Delitzsch ese idia torea bukana, ia gwau unai ‘ura-heni’ be “gorere ta bamona.” Momokani, hahine haida edia ura-heni ia bada momokani lasi, to kerere lasi hahinena ta ese ena adavana negea karana ia lalohadailaia neganai, namona be ia ese Eva ena amo hahine iboudiai ediai ia hanai urana be ia laloa namonamo. To, haida edia adavadia idia heudahanai dainai idia laloa do idia negedia be namo, pokese gorerena o AIDS gorerena be idia edia amo do idia abia garina.

Hekwakwanai Ia Matamaia Dalana

Taunimanima ginigunadia ruaosi ese Dirava idia kara dika henia dainai, taunimanima be edia lalodia idia ha-aukadia. (Roma 5:12) Unai neganai ruma bese ai dika ia matamaia. Gaigai ese hahine ginigunana, Eva, ena lalona ia ania Dirava ese ia taravatua au huahuana do ia ania neganai, ia ania. Gaigai ese ia hamaorolaia herevana be ena adavana ia hamaorolaia guna lasi. (Genese 3:6) Oibe, ena adavana ena lalohadai ia tahua guna lasi. Hari inai negai ruma bese momo edia hekwakwanai edia badina be unai​—edia lalohadai idia herevalai heheni lasi.

Gabeai, Dirava ese edia kerere ia nanadailaidia neganai, Adam bona Eva idia gwau kerere be idia edia lasi. Hari inai negai hekwakwanai idia vara negadiai, tau bona hahine momo be unai bamona idia hereva. Adam ia gwau ena adavana bona Iehova be idia kerere, ia gwau: “Oi ese oi karaia lau dekenai hahine be unai au huahua ia henigu, bona lau ania.” Bona hahine ia gwau: “Gaigai ese lau dekenai ia koikoi, bona lau ania.”​—Genese 3:​12, 13.

Iehova ena hahemaoro herevana ese gabeai do idia vara hekwakwanaidia ma haida edia badina ta ia hahedinaraia. Ia ese Eva ia hamaoroa ena adavana ese “do ia biagua.” Hari inai negai tatau momo ese edia adavadia idia biagudia mai edia hebogahisi lasi, hereva ginigunana ai ai gwauraia tauna Isao ia karaia bamona. To, hahine momo idia do ura bada edia adavadia ese do idia lalodia. Edia adavadia ese unai ura idia hagugurua lasi neganai, reana idia doridia toho do idia lalodia totona, bona sibodia edia ura idia tahua reana. Tatau momo ese edia adavadia idia biagudia, bona hahine momo idia ura bada edia adavadia ese do idia lalodia dainai sibodia edia ura idia tahua, bona maino ia boio. Ripoti ta ladana “How to Analyze Today’s Divorces” lalonai Shunsuke Serizawa ia gwau: ‘Hekwakwanai ena badina korikorina, ta ese sibona ena ura tahua guna karana, bema ita laloa lasi, headava hadokoa karana be hari inai negai do ita tahua diba lasi.’

To iena Hereva ai Iehova ese sisiba ia henia, idia badinaia taudia ena be idia goevadae lasi to edia headava do idia moalelaia totona. Isao ese Dirava ena sisiba ia badinaia bona hari iena ruma bese taudia idia moale. Baibel ena hereva ese taunimanima na edia headava varodia ha-aukadia totona ia durudia dalana be hari do ita tahua.

Herevahereva

Headava momo ai, tau bona hahine idia hereva heheni lasi, idia gwau kerere be sibodia edia lasi, bona ta ta ena ura ena ura idia tahua, unai dainai edia lalodia edia mamina idia diba heheni be auka. Caryl S. Avery ia gwau: “Ruaosi do idia hetura heheni totona, idia abidadama heheni dainai edia lalodia edia mamina do idia herevalai heheni be namo. To hari inai negai abidadama be bada lasi.” Bema tau bona ena adavana idia herevahereva hebou, edia lalodia edia mamina do idia diba heheni bada bena unai ese edia abidadama do ia habadaia.

Hereva Lada-isidia 20:5 ia gwau: “Taunimanima ta ena lalohadai be ranu dobuna bamona, to lalo-parara tauna ese do ia veria daekau.” Namona be headava taudia ese edia adavadia edia lalohadai dobudia do idia veridia daekau mai edia lalo-parara ida. Bema emu adavana ia lalohisihisi, oi gwau lasi: “Hari dina lau danu lau lalo-hekwarahi bada,” to mai emu hebogahisi ida oi gwau: “Madi, hari dina oi lalo-hekwarahi bada a? Dahaka ia vara?” Emu nega taina be unai dala amo do oi haorea be namo bona mai moalena, ena hereva do oi kamonai lasi bena unai dainai do ia badu dikadika bona emu nega bada be ena lalona hakerua karana ai do oi haorea be dika.

Tau bona hahine do idia abidadama heheni totona, namona be ‘hereva momokani do idia gwauraia’ bona edia lalodia edia mamina do idia gwaurai hedinarai heheni goevagoeva mai edia lalo-parara ida. (Efeso 4:25) Bema hahine ia laloa ena adavana ese ena hereva ia kamonai lasi, ia do hereva henia lasi neganai, namona be inai ia laloa: “Ia hereva momo lasi tauna be mai ena diba, bona lalo-parara tauna be ia badu haraga lasi.” (Hereva Lada-isidia 17:27) Namo lasi ia ese ena adavana ia badu henia, ia gwau, “Egu hereva oi kamonai lasi, lasi vaitani!” To ia do badu lasi bona ia do lalohisihisi lasi neganai, ena lalona ena mamina be manau dalanai ia gwauraia be namo. Reana inai bamona ia gwauraia diba: “Lau diba oi be mai emu gaukara momo, to bema oi be mai emu nega lau ida do ita herevahereva, do lau moale.”

“Herevahereva be lasi neganai taunimanima edia lalohadai gaudia idia tubu namonamo lasi.” (Hereva Lada-isidia 15:22) Emu hahine ese oi ia lalokau henia, to emu lalona ena mamina bema oi hamaorolaia lasi, do ia diba lasi. Namona be hemataurai dalanai do oi hamaorolaia. Unai ese umui ruaosi do ia durua, mai emui lalokau ida emui kara do umui haidaua, maino ena igui ai lauma ena lalo-tamona do umui dogoatao totona.​—Efeso 4:​2, 3.

Kazuo ena sivarai mani oi laloa. Nega ibounai ia bedi karaia, bona ena adavana ese ia gwaugwau henia loulou. Iena abitorehai davana ibounai ese kina 300,000 ia hanaia. Moni ia abia torehai lou unai davana haloua totona, bona unai ese ia hametaua bada herea. Bena Baibel ia stadilaia matamaia, bena ia ese ena adavana na ena hekwakwanai ia hamaorolaia. Ena lalona ia hegeregere ena badu do ia haheaukalaia. To, ia hoa maragi lasi badina be iena adavana, Baibel ia stadilaia matamaia guna hahinena, be mai ena manau ida ia gwau: “Vadaeni, unai davana haloua dalana do ita tahua be namo.”

Bena kerukeru idia lao bona unai moni idia haloua matamaia; edia ruma idia hoia danu. Lagani tamona bamona ai ibounai idia haloua vadaeni. Dahaka ese ena adavana, Kimie, ena kara ia haidaua? Ia gwau: “Filipi karoa 4, siri 6 bona 7 edia hereva be momokani. ‘Gau ta umui lalo-hekwarahilaia lasi, to gau iboudiai guriguri ai, noinoi ai, bona hanamoa karana ai, emui ura be Dirava umui hamaorolaia; bena Dirava ena maino . . . ese emui lalodia bona emui daradia do ia gimadia, Keriso Iesu dainai.’ ” (NW) Ma ia gwau: “Egu turana ta be lau ida Baibel ai stadilaia matamaia, badina be ia itaia ena be ai hekwarahi bada to lau moale, bona unai ia hoalaia.” Kazuo bona ena adavana be hari idia bapatiso vadaeni bona edia headava idia moalelaia.

Ai sivarailaidia taudia be edia adavadia ida idia abidadama heheni badina be hereva momokani idia gwauraia, bona headava havaraia Diravana idia hereva henia danu, unai dainai edia hekwakwanai edia headava ai idia hanaidia diba. Ena be tau mai ena adavana be mai edia lalo-hekwarahi bona mai edia hekwakwanai, to, bema edia diba hegeregerena Dirava ena hahegani idia badinadia toho bona Dirava idia naria, iena maino do ia henidia. Gau badana be ruaosi do idia guriguri hebou. Namona be tau ese guriguri ia gunalaia bona ‘ena lalona ena anina be Dirava vairanai ia hahedinaraia,’ bona iena hahekau ia tahua, edia hekwakwanai hanaidia totona. (Salamo 62:8) Momokani, Iehova Dirava ese unai bamona guriguridia do ia kamonaidia.

Oibe, headava varodia ha-aukadia dalana be ia noho. Ena be ta ia goevadae lasi bona hari be nega dikana, to headava taudia be moale idia davaria diba. Sisiba herevadia ma haida be buka ta ladana Emu Ruma Bese Hamoalea Dalana lalonai oi davaria diba; Watchtower Bible and Tract Society of New York, Inc. ese ia karaia. Bona, tau mai adavana ida bema mai edia momokani ida Baibel ena hahegani idia badinadia toho, edia helaro be lalokau ena igui ai do idia noho, Dirava ese kahirakahira do ia karaia tanobada oromana matamatana ai.