Sivarai Gwauhamata Tanona Amo

Gilead—Gari Lasi Taudia Gabuna

ISRAEL taudia be Ioridane Sinavaina idia hanaia bona Gwauhamata Tanona idia vareai nega sisina vairanai, Mose ese ia hagoadadia, ia gwau: “Umui boga-auka bona umui goada. . . . Iehova, emui Dirava, ese umui ia bamoa.”​—Deuteronomi 31:6.

Mose ese Reuben bona Gad iduhudia bona Manase ena iduhu kahana ia hagoadadia danu. Idia itaia ‘Gilead tanona be namo herea mamoe seri ubudia totona,’ unai dainai idia noinoi Gilead tanona dekenai idia noho totona.​—Numera 32:​1-40.

Gilead be Ioridane unukahanai, east kahanai, ia noho. Ena bada be east kahana ibounai, Tadi Gohuna ena north kahana amo ia lao Galilea Gohuna dekenai. Unai gabu be Ioridane Kourana dekenai ia matamaia bona ia daekau ranu bada kouradia, bona kuboru ororodia dekenai. Unai dainai Gilead be tano namona uiti hatubua bona animal idia ubudia totona. Atai laulauna amo oi itaia diba Gilead ena kahana ta ena toana be edena bamona. To dahaka dainai unai gabu namona ita herevalaia neganai gari lasi karana danu ita herevalaia?

Gilead dekenai idia noho iduhudia be unai gabu idia abia hidi badina idia gari lasi. Guna idia gwau Ioridane do idia hanaia bona Gwauhamata Tanona dekenai edia inai taudia do idia tuari henidia. Bona Gilead dekenai idia giroa neganai, edia gari lasi karana idia hagoadaia be namo. Badina be dahaka? Idia be tano ena hetoana dekenai idia noho, bona diho tanona east kahana amo Amono taudia bona north kahana amo Suria taudia idia mai tuari. Bona unai taudia be tuari totona idia mai.​—Iosua 22:9; Hahemaoro Taudia 10:​7, 8; 1 Samuel 11:1; 2 Hanua Pavapavadia 8:28; 9:14; 10:​32, 33.

Unai taudia idia mai tuari neganai Israel taudia idia gari lasi be gau badana. Hegeregere, Amono taudia ese Gilead taudia idia hahisidia negana lalonai Iehova ese ia koudia lasi, to unai murinai Dirava ena bese taudia idia helalo-kerehai bona gunalaia tauna ta idia tahua, “tuari tauna mai goadana,” iena tamana ladana be Gilead danu. Unai goada, eiava gari lasi, tauna be Iefeta. Taunimanima momo be iena sivarai idia diba badina ia be gwauhamata ta ia karaia, unai ese ia hahedinaraia, ena be ia gari lasi to ia ese Dirava ena hakaua bona heduru ia tahua. Iefeta ia gwauhamata bema Dirava ese ia durua dagedage Amono taudia ia kwalimu henidia totona, vadaeni iena ruma amo ia raka mai guna tauna be ‘araia gauna ai do ia lao,’ eiava boubou gauna ta, Dirava dekenai do ia lao.a Unai be Iefeta ena natuna tamona sibona, iena natuna kekenina, bena gabeai Dirava ena dubu dekenai ia lao hesiai totona. Oibe, Iefeta, bona dala idauna ta dekenai, iena natuna kekenina danu, ese gari lasi karadia idia hahedinaraia.​—Hahemaoro Taudia 11:​1, 4-40.

Taunimanima momo idia diba lasi, to Saulo ena nega lalonai gari lasi karana ta ia vara. Namona be ita laloa, Saulo be king ai ia lao neganai, Amono taudia idia gwau Iabese-gilead tataudia iboudiai edia matana idibana do idia kokia; reana Iabese-gilead be Ioridane ai idia lao ororodia edia huanai ia noho hanuana. Saulo be haraga herea tuari oreana ta ia haginia Iabese ia hagoadaia totona. (1 Samuel 11:​1-11) Unai sivarai ita laloa neganai, namona be Saulo ia lohia negana ena dokona ita laloa bona ita itaia edena dala ai gari lasi karana ia hedinarai.

Sedira oi laloatao Saulo bona iena natu memerodia toi be Filistia taudia idia tuari henidia neganai idia mase. Edia inai taudia ese Saulo ena kwarana idia utua oho bona idia kwalimu dainai Saulo bona iena natu memerodia edia mase tauanidia be Bete-sana ena magu dekenai idia atodia. (1 Samuel 31:​1-10; idibana kahana dekenai, oi itaia Bete-sana be guna ia noho gabuna ena orena idia geia.) Iabese dekenai, Ioridane ena kahanai idia noho Gilead ororodia dekenai, unai sivarai idia kamonai. Gilead taudia be dahaka idia karaia diba, badina inai taudia edia siahu be bada herea dainai Israel ena king dekenai idia kwalimu vadaeni?

Namona be mapu umui itaia. “Maoromaoro tuari taudia goadadia idia toreisi bona hanuaboi lalonai Saulo bona natudia edia tauanidia be Bete-sana ena magu amo idia abia diho, bona Iabese dekenai idia mai bona unuseniai idia gabudia.” (1 Samuel 31:12) Oibe, hanuaboi dekenai inai taudia edia hanua goadana ai idia vareai. Unai dainai oi lalo-parara diba dahaka dainai Baibel ese ia gwauraidia goada, eiava gari lasi, taudia.

Gabeai, iduhu ten be sibodia idia gini siri bona Israel ena north kahana basileia idia haginia, unai be Gilead taudia danu. Idia badinai idia noho bese taudia, Suria taudia bona Asuria taudia, be Ioridane ena east kahanai ia noho tano kahana haida idia abia. Unai dainai, herevana guna idia be gari lasi kara haida idia karaia, to Gilead taudia be tano ena hetoana dekenai idia noho dainai dika haida idia davaria.​—1 Hanua Pavapavadia 22:​1-3; 2 Hanua Pavapavadia 15:29.

[Footnotes]

[Picture Credit Line on page 8]

Pictorial Archive (Near Eastern History) Est.

[Picture Credit Line on page 9]

Pictorial Archive (Near Eastern History) Est.

[Map on page 8]

GALILEA GOHUNA

TADI GOHUNA

Ioridane Sinavaina

Bete-sana

Ramoto-gilead

Iabese

GILEAD

[Credit Line]

Based on a map copyrighted by Pictorial Archive (Near Eastern History) Est. and Survey of Israel.