Iehova ese Ia Abia Hidi Dalana Lau Abia Dae mai Moale Ida

ULYSSES V. GLASS ESE IA SIVARAILAIA

Unai be nega idauna momokani. Kosi idia haorea klas dekenai be stiuden taudia 127 sibona idia noho, to mai edia moale ida gabu idauidau amo idia mai taudia be 126,387. Unai be July 19, 1953 ai, Watchtower Bible School of Gilead ena klas namba 21 edia kosi haorea negana, New York City ena Yankee Stadium dekenai. Dahaka dainai unai be mai anina bada negana egu mauri lalonai? Mani lau ese egu mauri lau herevalaia sisina.

LAU be February 17, 1912 ai lau vara, Vincennes, Indiana, U.S.A. dekenai, lagani rua idia do noho bena Apokalupo 12:1-5 ese ia gwauraia Mesia Basileiana ia vara. Lagani gunana ai, lauegu tama sina be Baibel bona Studies in the Scriptures bukadia idia stadilaia matamaia. Sunday daba ibounai, Tamagu ese ruma bese ibounai dekenai unai buka ta ia duahia, bena ai herevalaia.

Sinagu ese ia dibaia gaudia ia gaukaralaia ena natudia edia lalohadai ia hamaoromaoroa totona. Ia be hahine namona​—ena kara be namo herea, ia ura dikadika heduru ia henia. Ai natudia ibounai be hani, to Sinagu ese emai dekena taudia edia natudia danu ia lalokau henia. Ia ese ena nega ia henia ai dekenai. Ia ese ai dekenai Baibel sivaraidia gwauraia karana bona ane abia karana ia moalelaia.

Ia ese danu aiemai ruma dekenai ful-taim hesiai gaukara idia karaia taudia ia boiria mai. Dina ta o rua idia noho, nega momo aiemai ruma dekenai hebou idia karaia bona hereva haida idia henia. Ai dekenai haheitalai bona sivarai idia gwauraia taudia ai ura henia bada. Nega ta lagani 1919 ai, tanobada ibounai tuarina ginigunana ia ore bena lagani ta ia ore murinai, ia vadivadi tadikakana ese ia gwauraia herevana be ai natudia totona. Ia ese gwauhamata ia herevalaia, bona ai ia durua do ai lalo-parara edena bamona aiemai mauri lalonai unai be mai anina bada. Gabeai unai hanuaboi ai lau mahuta gwauraia neganai, lau ese egu guba Tamana lau guriguri henia bona lau hamaoroa lau ura ia do lau hesiai henia hanaihanai.

To, lagani 1922 murinai, mauri lalonai gau idauidau dainai unai ura be ia maragi ia lao. Gabu ta amo ai lao ma gabu ta bona Iehova ena taunimanima edia kongregesen danu ai hebamo lasi. Tamagu be ia noho lasi badina trein ia heau dalana dekenai ia gaukara. Aiemai Baibel stadi be ai karaia hanaihanai lasi. Lau ese sikuli kosi haida lau karaia badina lau ura hoihoi gaudia edia laulau penia gaukarana lau karaia bona lau ese palani lau karaia iunivesiti namona ta dekenai lau lao totona.

Mauri Lalonai Lau Tahua Gauna Lau Haidaua

Lagani 1935 bamona ai, tanobada ibounai lalonai do ia vara tuarina ia kahirakahira. Ai be Cleveland, Ohio dekenai ai noho neganai, Iehova ena Witness tauna ta be aiemai iduara dekenai ia mai. Ai maragi neganai ai dibaia gaudia ai laloa namonamo matamaia. Egu kakana badana, Russell, be lalona hadaia haraga tauna, bona ia bapatiso guna. Lau be idau, to February 3, 1936 ai, lau danu be bapatiso lau abia. Iehova dekenai egu mauri lau gwauhamatalaia ena anina dekenai egu lalo-parara ia bada ia lao, bona Iehova ese ia abia hidi dalana abia dae karana lau dibaia noho. Unai lagani tamona ai lauegu taihuna ruaosi, Kathryn bona Gertrude, idia bapatiso danu. Ai ibounai ese ful-taim painia gaukara ai karaia.

To, unai ese ma gau haida do ai laloa karana ia koua lasi. Lauegu nakimi ese kekeni mai hairaina ladana Ann ia herevalaia neganai lau kamonai namonamo. Ia gwau hereva momokani ia kamonai bona “mai ena ura bada ida ia abia dae” bona aiemai ruma dekenai hebou totona do ia mai. Unai negai Ann be seketere gaukara ia karaia legal opesi ta ai, bona lagani ta ia do ore lasi neganai ia bapatiso. Headava totona lau palani lasi, to Ann ese ia hahedinaraia hereva momokani ia ura henia dikadika. Ia ura Iehova ena gaukara lalonai ia vareai momokani. Ia gwau lasi, “Do lau karaia diba, a?” To, ia henanadai, “Edena be dala namona do lau karaia totona?” Bona ena lalona ia hadaia ia badinaia totona. Unai laloa maoromaoro karana ese lau ia veria. Unai sibona lasi, ia be mai ena hairai bada, bona ia do hairai noho. Ia be lauegu adavana ai ia lao, bona nega sisina murinai painia gaukara ai lau ia bamoa.

Ai Painia Neganai, Treinini Namona Ai Abia

Ai be painia dainai, moni ia bada bona ia maragi neganai danu ai moale noho dalana ai dibaia. (Filipi 4:​11-​13) Dina ta kahirakahira adorahi neganai, ai be ai do aniani lasi. Ai dekenai be 5 cents sibona ia noho. Ai lao vamu idia hoia sitoa ta dekenai, bona lau henanadai, “Umui ese ai dekenai 5 cents ena davana hegeregerena sosisi oi henia diba, a?” Ia ese ai ia itaia bena kahana hani ia utua. Lau diba ena davana ese 5 cents ia hanaia, bona unai ese aiemai tauanina ia durua.

Aiemai hesiai gaukara ai karaia neganai, dagedage karadia dikadia ai davaria momo. New York ai, Syracuse kahirakahira ai ia noho taoni ta dekenai, pablik hebouna ta dekenai taunimanima ai boiridia totona dala dekenai boiboi pepadia ai hariharilaia bona emai tauanina dekenai saini maragidia ai atoa. Tauanina bada tatau rua ese lau idia abia bona idia kara auka henia. Idia ta be pulisi opesa ta, to ia ese ena unifom ia karaia lasi, bona iena kadi lau ura itaia neganai be ia hahedinaraia lasi. Bena, Brooklyn Betele tauna Grant Suiter be ia mai bona ia gwau pulisi steiseni dekenai do ai lao bona unai gauna do ai hamaoromaoroa. Bena Society ena opesi Brooklyn dekenai ia rini henia, bona idia gwau unai dina tamona ai lau bona Ann be saini maragidia bona boiboi pepadia danu ma do ai lao lou, bena do ai itaia dahaka do ia vara. Ai laloa do ia vara gauna ia vara, pulisi ese ai idia abia. To, ai ese pulisi ai hamaorodia do ai kota henidia, badina ai idia abia kava, bena ai idia ruhaia.

Dina iharuana ai, pris tauna ta ena hereva dainai, edia kara be dika mauri lagani 13 ia lao 19 matamata taudia haida ese aiemai hebouhebou gabuna dekenai idia vareai, bona pulisi taudia be idia noho lasi. Unai matamata taudia dikadia ese beisibolo bate idia abia bona au amo idia karaia foloa idia botaia, kamonai taudia haida be edia helai gaudia amo idia negea diho, bona platfom dekenai idia lao, unuseniai America ena pepe idia abia isi bona idia boiboi idia gwau, “Umui saluti henia! Umui saluti henia!” Bena idia ese “Beer Barrel Polka” anena idia abia. Idia ese hebou idia hadikaia momokani. Ai ese Iesu ia gwauraia gauna ai mamia momokani, ia gwau: “Umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.”​—⁠Ioane 15:⁠19.

Unai pablik tok be J. F. Rutherford, unai negai ia be Watch Tower Society ena presiden, ena hereva ta rekoda amo idia hahedinaraia gauna. Lau bona Ann be dina haida unai taoni dekenai ai noho bona taunimanima ai vadivadi henidia edia ruma dekenai unai hereva idia kamonai diba totona. Idia haida idia ura unai idia kamonai.

Tano Idauna ai Hesiai Gaukara Totona Ai Volantia

Gabeai, hesiai gaukara totona dala matamatadia idia kehoa. Lagani 1943 ai, lauegu kakana, Russell, bona ena adavana, Dorothy, idia boiridia Gilead Sikuli ena klas ginigunana dekenai, bena Cuba dekenai idia siaidia lao misinari gaukara idia karaia totona. Lauegu taihuna Kathryn be klas ihahanina ai ia vareai. Ia danu be Cuba dekenai idia siaia. Gabeai iena gabu idia haidaua bena ia lao Dominican Republic dekenai bena Puerto Rico dekenai. Lau bona Ann be edena bamona?

Gilead Sikuli ena sivarai bona Society ia ura misinari taudia ia siaia ma tano haida dekenai ai kamonai neganai, ai ura ai sibona ai henia tano idauna ai hesiai gaukara ai karaia totona. Guna, ai laloa reana ai sibona be Mexico dekenai do ai lao. To gabeai ai laloa reana do ai naria be namo bona Gilead Sikuli murinai Society ese ai do ia siaia. Ai lalo-parara unai be Iehova ese ia gaukaralaia dalana.

Ai idia boiria Gilead Sikuli ena klas ihahanina dekenai. To kahirakahira kosi do ai hamatamaia neganai, N. H. Knorr, unai negai ia be Watch Tower Society ena presiden, be Ann ia maragi neganai polio gorere ia abia dainai ia karaia diba lasi gaudia ia dibaia. Ia ese lau dekenai unai ia herevalaia bona ia gwau ma tano ta dekenai hesiai gaukara ai karaia totona ai idia siaia be aonega karana lasi.

Lagani rua murinai, lau be hebouhebou hegaegaelaia gaukarana lau karaia neganai, Tadikaka Knorr ese lau ia itaia lou bona ia henanadai bema ai ese Gilead ai do laloa noho. Ia ese lau ia hamaoroa tano ma ta dekenai do ai lao lasi; to ia ese gaukara ma ta ai totona ia laloa noho. Unai dainai, February 26, 1947 ai, klas namba 9 taudia idia regista neganai, ai danu ai noho.

Unai dinadia Gilead dekenai be do ai laloa boio diba lasi. Lauma dalanai unai kosi ese heduru bada ia henia. Emai mauri dinadia ibounai lalonai do ai hetura henia taudia ai davaria. To lauegu gaukara unai sikuli dekenai be unai sibona lasi.

Washington Bona Gilead Huanai

Gilead Sikuli be ia do matamata. United States ena gavamani be unai sikuli ia diba namonamo lasi dainai, henanadai momo idia vara. Society ia ura Washington, D.C. dekenai gwaukau tauna ta do ia noho. Gilead sikuli ai haorea bena hua haida murinai ai be unuseniai idia siaia lao. Lau ese tano haida amo Gilead dekenai idia mai taudia edia visa do lau abia bona gavamani ena pepa haida do lau abia sikuli idia haorea taudia be ma tano haida dekenai ai siaia misinari gaukara idia karaia totona. Gavamani taudia haida be lalo-parara taudia bona heduru idia henia. Haida be Witness taudia idia ura henia lasi. Idia haida, politikol idia laloa bada taudia, idia laloa ai be idia ura henia lasi taudia haida danu ai gaukara hebou.

Ena opesi dekenai lau lao tauna ta, ese ai ia gwauraia dika momokani, badina ita ese pepe ita saluti henia lasi bona tuari dekenai ai lao lasi. Nega sisina unai gauna dainai mai badu danu ia hereva murinai, lau gwau: “Lau ura oi diba, bona oi diba, Iehova ena Witness taudia be tanobada dekenai idia noho taudia ta danu idia tuari lasi. Ai be tanobada ena gaudia lalonai ai vareai lasi. Ai be edia tuari, bona edia politikol gaudia lalonai, ai vareai lasi. Ai gini siri momokani. Ai ese umui davaria hekwakwanai ai hanaia vadaeni; aiemai orea lalonai ai lalo-tamona. . . . Vadaeni, umui ura dahaka do ai karaia? Umui ura ai ese emai noho dalana do ai rakatania bona emui noho dalana dekenai do ai giroa, a?” Unai murinai gau ta ia gwauraia lasi.

Pura ta lalonai dina rua ibounai lau atoa, gavamani edia opesi dekenai lau karaia gaukarana totona. Danu nega tamona, spesel painia gaukara ai karaia. Unai nega lalodiai, anina be hua ta ta hora 175 lalonai haroro gaukara ai karaia (gabeai idia haidaua hora 140), unai dainai nega momo ai gaukara ela bona hanuaboi. Ai ese nega namona ai abia. Ai ese ruma bese momo danu stadi namodia ai karaia, bona lauma dalanai idia tubu namonamo. Lau bona Ann be emai lalona ai hadaia natudia do ai abia lasi, to lauma dalanai, ai be natudia sibona lasi to tubudia momo herea danu bona idia danu be mai edia natudia. Idia ibounai ese emai kudouna idia hamoalea momokani!

Lagani 1948 ena dokona kahana ai, ma gaukara ta lau abia. Tadikaka Knorr ese lau ia hadibaia, Tadikaka Schroeder, Gilead Sikuli ena rejistra bona hadibaia tauna ta, be mai anina bada gaukarana ta dainai do ia bisi, unai dainai lau idia noia bema nega haida Gilead klas do lau hadibaia. Mai gari ida, December 18 ai, lau bona Ann be Gilead dekenai South Lansing, New York dekenai ai ginidae. Matamanai, Gilead dekenai nega ta ta pura haida ai noho, bena Washington dekenai ai giroa lou. To, dokonai, Gilead dekenai nega bada lau haorea to Washington dekenai lasi.

Unai nega lalonai, guna lau hereva hegeregerena, New York ena Yankee Stadium dekenai, Gilead ena klas namba 21 ese edia sikuli idia haorea. Lau be hadibaia tauna ta dainai, hahenamo lau abia bona edia kosi haorea program lalonai kahana ta lau karaia.

Hedikwota Dekenai Ai Gaukara

February 12, 1955 ai, ai totona hesiai gaukara ma ta ia matamaia. Iehova ena tanobada oreana ena hedikwota dekenai Betele famili ena memba taudia ai ai lao. Ena anina be dahaka? Anina be idia henia gaukara ai karaia mai emai ura ida dainai, ma haida ida gaukara idauidau ai karaia hebou. Momokani, guna unai bamona ai karaia vadaeni, to hari ai be grup badana huanai do ai gaukara​—hedikwota ena Betele famili unai. Mai moale ida unai hesiai gaukara matamatana ai abia dae badina ai diba ia be Iehova ese ia abia hidi dalana.

Lauegu gaukara ena kahana badana be nius halasia taudia danu lau gaukara. Nius halasia taudia edia ura be sivarai idauna idia halasia dainai bona Iehova ena Witness taudia idia lalo-dika henia kava taudia amo sivarai koikoi idia abia dainai, Iehova ena Witness taudia idia herevalaia sivarai dikadia idia torea. Ai hekwarahi unai gauna ai hamaoromaoroa totona.

Tadikaka Knorr ia ura ai ibounai be do ai gaukara goadagoada, unai dainai gaukara ma haida ia henia danu. Unai gaukara haida lalonai hoihoi gaudia edia laulau penia gaukarana totona guna lau abia dibana, lau gaukaralaia diba. Gaukara haida be Society ena reidio steiseni, WBBR, dekenai lau karaia. Society ese ia halasia muvini piksa totona gaukara lau karaia. Gilead kosi ena kahana ta be tiokratik sivaraina idia hadibaia, to hari gaukara haida idia karaia Iehova ena orea taudia be hari ia noho tiokratik oreana idia dibaia totona, bona unai be taunimanima ma haida dekenai idia hadibaia danu. Gilead treinini ena kahana ma ta be taunimanima vairanai hereva henia karana, bona kongregesen lalonai taunimanima edia vairanai hereva idia henia daladia haida be tadikaka dekenai hadibaia totona gaukarana ai karaia. Unai dainai gaukara bada ia noho.

Gilead Dekenai Lau Gaukara Hanaihanai

Lagani 1961 ai, loaloa naria taudia bona brens komiti taudia edia treinini be gabeai do idia karaia dainai, Gilead Sikuli idia abia lao Brooklyn, Watch Tower Society ena opesi badadia idia noho gabuna dekenai. Lau be klasrum dekenai lau giroa lou​—hari lau be nega ta ta sibona hadibaia gaukara do lau karaia lasi to hanaihanai unai gabu dekenai hadibaia gaukara do lau karaia. Unai be hahenamo badana momokani! Lau abia dae momokani Gilead Sikuli be harihari gauna ta Iehova amo, bona unai harihari gauna ese ena tanobada oreana ibounai ia hanamoa.

Brooklyn ai Gilead sikuli taudia ese idia abia hahenamodia be guna idia sikuli taudia amo idia idau. Idia vadivadi hereva henia taudia be momo bona Hakaua Oreana taudia bona hedikwota ena Betele famili danu idia hebamo diba. Danu, idia sikuli taudia ese opesi gaukaradia, Betele haheaua gaukaradia, bona faktori ena gaukara idauidau idia dibaia diba.

Lagani idia lao lalonai sikuli taudia edia namba ia idauidau, bona hadibaia taudia edia namba danu be ia idau. Sikuli gabuna danu nega momo ia idau. Hari ia be Patterson, New York, dekenai gabu hairaina ai ia noho.

Sikuli Taudia Danu Lau Gaukara

Unai klas lau hadibadia be hahenamo badana ta! Inai taunimanima matamatadia be idia ura lasi inai tanobada ena oromana gunana lalonai idia gaukara. Idia ese edia ruma bese, edia turadia, edia ruma, bona idia danu gado tamona idia herevalaia taudia idia rakatania. Siahu bona keruma, aniani​—⁠gau ibounai be do idia idau. Do idia lao tanona danu be idia diba lasi momokani, to edia tahua gauna be misinari gaukarana do idia karaia. Oi ese unai bamona taudia edia lalona do oi doria lasi.

Klasrum ai lau vareai neganai, hanaihanai lau tahua gauna be sikuli taudia ese hemami namona idia abia. Hekwakwanai bona lalo-hekwarahi neganai ta ese diba do ia abia namonamo lasi. Momokani, lau be hadibaia tauna, to sikuli taudia edia hemami lau diba. Guna lau be unai helai gaudia dekenai lau helai danu. Momokani, Gilead dekenai idia stadi goadagoada bona gau momo idia diba, to lau ura nega namona idia abia danu.

Lau diba edia gaukara gabuna dekenai idia lao neganai, idia kwalimu totona gau haida idia abia be namo. Abidadama goadana idia abia be namo. Idia manau be namo​—manau momokani. Ma haida danu gaukara hebou, noho dala idauidau abia dae, bona dika gwauatao haraga karadia idia diba be namo. Bona danu idia ese lauma ena huahua idia hahedinaraia noho be namo. Idia ese taunimanima idia lalokau henidia bona do idia karaia gaukarana idia lalokau henia danu be namo. Sikuli taudia be Gilead dekenai idia noho neganai, unai gaudia be edia vairanai lau gwauraia hedinarai loulou.

Lau diba namonamo lasi stiuden hida lau hadibaia vadaeni. To lauegu hemami idia dekenai be lau diba. Hua ima idia danu klasrum dekenai lau gaukara neganai, idia lau ura henidia bada. Bena sikuli idia haorea bona edia kwalimu pepana idia abia totona platfom amo idia raka hanaia lau itaia neganai, lau diba idia ese mai kwalimu danu edia kosi idia haorea bona nega sisina murinai do idia lao. Ia be hegeregere, egu ruma bese ena kahana ta ia lao. Mai edia ura danu sibodia idia henia bona do idia karaia gaukara idia ura karaia matamata taudia amo emu lalokau karana oi koua diba lasi, ani?

Lagani haida murinai, idia giroa mai vadivadi totona neganai, edia hesiai gaukara lalonai idia abia moalena idia gwauraia, bona lau diba idia lao tanodia dekenai idia do noho, bona idia abia treinini hegeregerena gaukara idia karaia noho. Unai ese dahaka hemami lau dekenai ia havaraia? Ia be hemami namona momokani.

Vaira Negana Lau Laloa

Hari lauegu matana idia itaia namonamo lasi, bona unai ese ia havaraia hisihisina lau davaria noho. Gilead klasrum ai hadibaia gaukarana lau karaia noho lasi. Matamanai, unai bamona egu mauri ia idau be ia auka, to egu mauri ibounai lalonai lau ese mauri dala idauidau lau abia dae bona lau noholaia. Nega momo lau ese aposetolo Paulo bona ia abia “ginigini” lau laloa. Nega toi Paulo ese Lohiabada ia noia unai gauna ia kokia totona, to Lohiabada ese ia hamaoroa: “Lauegu hariharibada be oi dekenai ia hegeregere momokani vadaeni. Badina be lauegu siahu be manokamanoka tauna lalonai ia hedinarai momokani.” (2 Korinto 12:​7-10) Paulo be unai ia haheaukalaia. Bema ia karaia diba, lau tohoa be namo. Ena be hari klas lau hadibaia lasi, to dina ibounai lau ese sikuli taudia idia loaloa lau itadia dainai lau moale bada. Nega haida idia danu lau herevahereva diba, bona idia hahedinaraia lalohadai namona ese egu kudouna ia hamoalea.

Vaira negana ai do idia vara gaudia be namo herea. Harihari ena badina idia atoa. Gilead ese kahana bada ia karaia. Hisihisi badana murinai, Apokalupo 20:12 ese ia gwauraia toretoredia idia kehoa neganai, lagani 1,000 lalonai edukeisen ma haida Iehova ena dala dekenai do ita abia. (Isaia 11:⁠9) To unai be dokona lasi. Ia be hamatamaia negana sibona. Ela bona hanaihanai, gau momo do ita diba Iehova dekenai bona gau momo do ita karaia ena ura ia hedinarai neganai. Lau abia dae momokani Iehova ese ia karaia gwauhamata badadia ibounai do ia hagugurua, bona lau ura do lau noho Iehova ese ita dekenai ia abia hidi dalana do lau abia dae totona.

[Picture on page 26]

Lagani 1953 ai, New York ena Yankee Stadium ai Gilead sikuli haorea program

[Picture on page 26]

Gertrude, lau, Kathryn, bona Russell

[Picture on page 26]

N. H. Knorr danu lau gaukara (laurina kahanai) bona M. G. Henschel danu hebouhebou ai hegaegaelaia

[Picture on page 26]

WBBR reidio steiseni lalonai

[Picture on page 29]

Gilead klasrum lalonai

[Picture on page 31]

Ann ida vanegai sibona