Dekena Taudia Lalokau Henidia Dalana Ia Noho

IESU KERISO be Samaria tauna parabole herevana amo ia ese dekena tauna lalokau henia momokani karana ia hahedinaraia. (Luka 10:​25-37) Danu, Iesu ia hadibaia herevana be inai: “ ‘[Iehova] oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.’ Inai be taravatu bada herea momokani. Ia be ginigunana. Iharuana be inai, ginigunana hegeregerena, ‘Oiemu badibadinai tauna dekenai oi lalokau henia, oi sibona oi lalokau henia bamona.’ ”​—Mataio 22:​37-39.

Reana oi be taunimanima momo bamona, emu dekena tauna be oiemu bese amo ia idau dainai oi lalokau henia be ia auka, a? Reana unai bamona ia vara badina guna, bese idau taudia ese oi idia dadaraia bona oi dekenai idia kara maoromaoro lasi dainai. Reana bese idau taudia ese oi eiava emu lalokau taudia idia dagedage henidia.

Iesu ia gwau Dirava ena taravatu ta be iseda dekena taudia ita lalokau henidia, unai dainai bese idaudia dadaraia karana ena lalohadai ita koua diba. Unai ita karaia totona, gau badana be taunimanima ita lalodia Dirava bona Keriso ese idia lalodia bamona. Unai kara dekenai namona be Iesu bona idaunegai Keristen taudia edia kara ita lalodia.

Iesu Ena Kara be Haheitalai Namona

Keristen ginigunadia edia negai, Iuda taudia be Samaria taudia idia ura henidia lasi, Samaria taudia be Iudea bona Galilea padadiai idia noho. Nega ta ai, Iesu idia inai henia Iuda taudia be mai badu danu Iesu dekenai idia gwau: “Aiemai hereva be ia maoro lasi, a, ai gwau oi be Samaria tauna bona lauma dika oiemu lalona dekenai ia noho?” (Ioane 8:48) Idia ese Samaria taudia idia ura henidia lasi momokani dainai, idia haida be taunimanima vairadiai bona dubu lalonai idia gwau dika henidia, bona Samaria taudia be mauri hanaihanai do idia abia lasi gurigurina idia karaia.

Iesu ia diba edia inai karana be nega daudau ia noho, unai dainai, parabole herevana amo henaohenao taudia be Iuda tauna idia dadabaia bona dekena tauna ia lalokau henia momokani Samaria tauna ese ia durua sivaraina ia gwauraia. Iesu be edena bamona ia haere diba Mose ena Taravatu ia diba bada Iuda tauna be Iesu dekenai ia henanadai, ia gwau: “Lauegu badibadinai tauna be daika?” (Luka 10:29) Iesu be inai bamona ia haere henia diba: ‘Emu dekena taudia be Iuda taudia sibona lasi, to idau taudia, Samaria taudia danu.’ To, Iuda taudia ese unai hereva idia abia dae be ia auka. Unai dainai, parabole herevana amo mai ena hebogahisi Samaria tauna be Iuda tauna ia durua sivaraina ia gwauraia. Unai amo Iesu ese kamonai Iuda taudia ia durudia, bena idia lalo-parara dekena taudia lalokau henia karana ena anina be Iuda lasi taudia idia lalokau henidia danu.

Iesu be Samaria taudia ia inai henidia lasi. Nega ta ai, ia be Samaria lalonai ia loaloa neganai, laga-ani totona ranu guri ta badinai ia helai, bena ena hahediba taudia be hanua kahirakahira dekenai idia lao aniani idia abia totona. Samaria hahine ta be ranu utua totona ia mai neganai, Iesu ia gwau: “Ranu sisina oi henia lau dekenai.” Iuda taudia be Samaria taudia idia hereva henidia lasi dainai, hahine ia gwau: “Badina be dahaka? Oi be Iuda tauna, lau be Samaria hahine, ma lau dekenai ranu oi noia, a?” Unai neganai Iesu be ia dekenai ia haroro, ia hamaoroa ia be Mesia tauna. Hahine be ena hereva ia kamonai murinai, ia lao hanua dekenai bona taunimanima ia boiboi henidia do idia mai unai tau ena hereva idia kamonai henia totona. Dahaka ia vara? “Samaria taudia momo herea unai hanua lalonai Iesu idia abidadama henia.” Iesu be ena bamona Iuda taudia momo edia lalohadai ia abia dae lasi dainai, unai kara namona ia vara!​—Ioane 4:​4-42.

Dirava ese Taunimanima Toana Ia Laloa Lasi

Dirava ia ura Iesu be Iuda taudia dekenai ia haroro momo, idia be “Israela besena ena mamoe idia boio” taudia. (Mataio 15:24) Unai dainai, iena hahediba taudia ginigunadia be Iuda taudia. To, Pentekoste 33 C.E. ai, lauma helaga ia diho murinai, lagani toi idia hanaia murinai, Iehova ese ia hahedinaraia ia ura kamonai Iuda taudia be edia hahediba gaukara do idia habadaia, do idia lao Idau Bese taudia dekenai haroro totona.

Iuda taudia edia lalohadai dainai, Samaria tauna lalokau henia sibona idia lalokau henia bamona ena kara be ia auka. To, edia kopina idia utua lasi Idau Bese taudia idia lalokau henidia be auka momokani, Iuda bona Samaria taudia edia kara be idau sisina, to Iuda bona Idau Bese taudia edia kara be idau herea. Iuda taudia edia kara Idau Bese taudia dekenai ia herevalaia neganai, The International Standard Bible Encyclopaedia bukana ia gwau: “Ita davaria, T[aravatu] M[atamatana] torea negana lalonai, ura lasi momokani, hevaseha, bona inai karadia be bada. Idia laloa [Idau Bese] taudia idia goeva lasi, bona bema mai moale danu idia kara henidia neganai idia be taravatu idia utua. Idia be Dirava bona Iena taunimanima edia inai taudia, bona Dirava dekenai diba idia abia diba lasi, Iuda tomadiho taudia ai idia lao neganai sibona unai diba idia abia; idaunegai hegeregerena, gaukara haida idia karaia diba lasi. Iuda taudia ese idia sisiba henidia be mai taravatuna, bona bema Dirava ena kara haida idia henanadailaia neganai, idia hereva dika henidia.”

Ena be taunimanima momo be unai lalohadai idia abia, to Iehova ena siahu amo aposetolo Petero be mata-hanai ia abia, unai mata-hanai lalonai Petero ia kamonai herevana ia gwau “Dirava ese ia hagoevaia vadaeni gaudia, oi gwauraia lasi miro.” Bena Dirava ese ia hamaoroa Idau Bese tauna Korenelio ena ruma dekenai ia lao totona. Petero ese Korenelio, ena ruma bese taudia, bona Idau Bese taudia ma haida dekenai Keriso ena sivarai ia harorolaia. Petero ia gwau: “Hari lau diba momokani Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.” Petero ia haroro henidia noho lalonai, idia kamonai matamaia taudia dekenai lauma helaga ia diho, bena bapatiso idia abia bona idia be Keriso abia dae Idau Bese taudia ginigunadia ai idia lao.​—Kara, karoa 10.

Iuda hahediba taudia ese unai kara idia abia dae, idia diba Iesu ena hahegani “bese ibounai be diba tahua taudia do umui halaoa” ena anina be Iuda bese taudia dekenai sibona lasi, to ia be mai anina Idau Bese taudia dekenai danu. (Mataio 28:​19, 20; Kara 11:18) Bema guna Idau Bese taudia idia dadaraia idia ese unai kara idia koua, bona mai edia goada ida idia hegaegae idau besedia dekenai idia lao haroro bona hahediba taudia ai idia halaodia totona. Murinai, lagani 30 idia do ore lasi neganai, idia gwau diba sivarai namona be “tanobada ibounai dekenai” idia harorolaia.​—Kolose 1:23.

Unai haroro gaukara ia gunalaia tauna be aposetolo Paulo, ia be Iuda Keristen tauna. Keriso murinai ia do raka lasi neganai, ia be Farisea tomadiho orea ena memba goadana ta. Unai orea taudia be Idau Bese taudia sibodia lasi, to sibodia edia hanua taudia danu idia lalodia bada lasi. (Luka 18:​11, 12) To Paulo be unai bamona lalohadai ena hekwakwanai ia hanaia, ia be dekena taudia ia lalokau henidia. Oibe, ia be ‘idau bese taudia dekenai ia haroro,’ ena mauri ibounai lalonai ia ese Mediterranean tanodia dekenai taunimanima be hahediba taudia ai ia halaodia gaukarana ia karaia.​—Roma 11:13.

Ena haroro gaukarana lalonai, Paulo be nadi amo idia hodoa, idia dadabaia, bona dibura rumana dekenai idia atoa. (Kara 14:19; 16:​22, 23) Idau bese bona gado idauidau taudia amo unai dika ia davaria dainai ia badu bona ia laloa unai gabu haida dekenai ia hekwarahi kava, a? Lasi. Ia diba iena nega lalonai idia noho idau bese momo edia taunimanima huanai kudou-maoro taudia haida idia noho.

Paulo ese Dirava ena dala idia ura diba Idau Bese taudia ia davaridia neganai, idia dekenai ena lalokau ia bada ia lao. Hegeregere, Tesalonika taudia dekenai ia gwau: “Ai be Keriso ena aposetolo taudia dainai umui dekenai kohu haida ai noia diba, to umui huanai ai be manau, iena natuna ia ubua hahine bamona. Umui ai lalokau henia bada dainai ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada.” (1 Tesalonika 2:​7, 8) Unai hebogahisi herevadia ese idia hahedinaraia Paulo be Idau Bese Tesalonika taudia ia lalokau henidia momokani, bona ena moale hebamo karana idia dekenai idia hadikaia diba gaudia ia dadaraidia.

Dekena Taudia Lalokau Henia Karana

Keristen ginigunadia edia negai hegeregerena, hari inai negai, Keristen kongregesen lalonai idia vareai taudia ese idau bese taudia iboudiai lalokau henidia karana idia habadaia. Unai kara dekenai Dirava ena lalohadai idia abia neganai, bona taunimanima dekenai Basileia ena sivarai namona idia harorolaia neganai, Keristen momokani taudia ese edia diba idau bese taudia dekenai idia habadaia, bema kongregesen lalonai idia vareai lasi, reana unai diba idia abia lasi. Tadikaka bamona idia lalokau henidia. (Ioane 13:​34, 35) Oi be unai bamona lalokau oi davaria diba danu.

Ena be Iehova ena Witness taudia be tano idauidau 229 dekenai idia noho, bona idia be “bese idauidau, iduhu idauidau, kopina idauidau, bona gado idauidau” taudia, to idia ese unai bamona lalokau idia hahedinaraia. (Apokalupo 7:9) Tanobada hegegemadai, lalo-tamona dekenai idia be Iehova tomadiho henia tadikaka oreana, bese idauidau edia tuari bona edia hepapahuahu karana lalonai idia vareai lasi, bona bese idauidau taudia dadaraia karana idia karaia lasi, badina unai karadia ese taunimanima hetura heheni karana ia hadikaia.

Witness taudia oi bamodia, bona do oi itaia bese idauidau taudia iboudiai amo taunimanima be Dirava ena ura idia karaia. Dirava ena Basileia ena sivarai namona idia harorolaia neganai, dekena taudia lalokau henia karana do oi itaia. Oibe, bona edia kongregesen lalodiai, mai edia hebogahisi, bona mai edia abidadama taudia do oi davaridia, edia mauri lalonai idia hahedinaraia dekena taudia idia lalokau henidia momokani karana idia diba.

[Picture Credit Line on page 4]

Arrival of the Good Samaritan at the Inn/The Doré Bible Illustrations/Dover Publications, Inc.

[Picture on page 6]

Iehova ena Witness taudia edia kongregesen lalodiai, mai edia moale bese idauidau taudia oi davaridia diba