Keristen Ahuna Idauna Ta

BLOSSOM BRANDT ESE INAI SIVARAI IA GWAURAIA

Lau vara dinana, January 17, 1923 ai, sinou ia diho San Antonio, Texas ai. Ruma murimurinai be paraka, to egu Keristen tamana sinana, Judge bona Helen Norris, ese lau idia abia dae mai edia lalokau siahuna ida. Lau laloatao, lau maragi negana amo egu tamana sinana edia kara iboudiai edia badina be Iehova Dirava tomadiho henia karana.

LAGANI 1910 ai, Sinagu ena lagani be 8 neganai, ena tamana sinana be Alvin, Texas ai idia lao, unuseniai idia noho. Idia moale, badina be edia dekena tauna ta ese Baibel ena hereva momokani ia hadibalaidia. Sinagu be ena mauri laganidia oredia ai Basileia helarona be taunimanima ia hamaorolaidia toho. Lagani 1912 ai, Houston, Texas idia lao murinai, bapatiso ia abia.

Watch Tower Bible and Tract Society ena presiden ginigunana, Charles T. Russell, be edia kongregesen ai ia vadivadi neganai, Sinagu bona ena tamana sinana be ia ida idia hedavari. Nega momo Society ena laolao taudia idia boiridia, idia ida do idia aniani hebou. Lagani haida murinai, Sinagu mai ena tamana sinana ida be Chicago idia lao, unuseniai idia noho, bona Tadikaka Russell ese unai kongregesen danu ia vadivadi henia.

Lagani 1918 ai, egu tubuna hahinena be Spanish flu gorerena ese ia hagorerea bada dainai, doketa idia gwau siahu gabuna ai do ia noho be namo. Unai dainai lagani 1919 ai egu tubuna maruanena be ena gaukara ai ia transfe, ruaosi be Texas idia lou lao. Unuseniai, San Antonio hanuana ai, Sinagu ese kongregesen ai ia gaukara goada tauhauna ta ladana Judge Norris ia hedavari henia. Idia heura heheni, bena gabeai idia headava bena lau idia havaraia.

Tamagu ese Baibel Ena Hereva Momokani Ia Dibaia

Tamagu ia vara neganai, ena tamana ese ia itaia negana ginigunana ai, ia gwau: “Inai beibi ena vairana ena toana be diadi ta ena hegeregerena,” bena ena ladana ia hatoa Judge [Diadi]. Lagani 1917 ai, Tamagu ena lagani be 16 neganai, ta ese pepapepa rua ia henia, edia ladadia be Where Are the Dead? bona What Is the Soul? Watch Tower Bible and Tract Society ese ia printaia pepadia. Ena tamana be lagani rua gunanai ia mase dainai, mase taudia ia henandailaidia, bona unai pepapepa ese ena henanadai idia haerelaidia. Nega sisina murinai Bible Students (unai be Iehova ena Witness taudia) edia hebou ia lao henidia matamaia.

Maoromaoro Tamagu ia ura haroro gaukarana do ia karaia. Teritori ta ia abia, bena sikuli negana murinai ena basikele ai ia gui, unuseni ia lao, pepapepa hariharilaidia totona. Basileia helarona harorolaia gaukarana ia goadalaia momokani, bena March 24, 1918 ai bapatiso ia abia.

Lagani 1919 ai Sinagu be San Antonio ia lao bena unuseniai ia noho. Tamagu ese ia itaia neganai ia ura henia. Nega sisina murinai idia gwau idia ura headava. Sinagu ena tamana sinana edia gwaumaoro idia abia haraga lasi, to April 15, 1921 ai idia headava. Idia ruaosi idia ura pioneer gaukarana do idia karaia.

Haroro Gaukarana, Lau Maragi Neganai

Lagani 1922 ai, Sinagu bona Tamagu be Cedar Point, Ohio ena hebouhebou idia lao gwauraia neganai, Sinagu ia davaria ia rogorogo. Lau vara, bena nega sisina murinai, Tamagu ena lagani be 22 sibona neganai, Society ese ia na kongregesen ena haroro gaukarana naria tauna ai idia halaoa. Lauegu pura be haida mo sibona neganai, Sinagu ia haroro negadiai, lau ia abia loaloa ruma ta ruma ta ai. Egu tubuna danu idia ura lau idia abia loaloa haroro gaukarana ai.

Egu lagani be rua neganai, Dallas, Texas ai lao, bena lagani toi murinai egu tamana sinana ese pioneer gaukarana idia karaia matamaia. Hanuaboi ai idia be dala badinai idia mahuta bona lau be motuka lalonai lau mahuta. Unai lau moalelaia, to daudau lasi murinai ia hedinarai idia do hegeregere lasi pioneer taudia bamona do idia noho. Unai dainai Tamagu ese bisinesi ta ia hamatamaia. Gabeai, motuka ese ia veria loaloa kalaga rumana ta ia karaia. Ia hegaegae pioneer gaukarana do idia karaia lou.

Lau do sikuli lasi neganai, Sinagu ese duahiduahi bona toretore lau ia hadibalaia. Nega ibounai lau ia durua, diba do lau abia totona. Mereki ia huridia negadiai, sea latanai lau ia haginia do lau dahudia totona, bena Baibel siridia bona Basileia anedia abidia karana be lau ia hadibalaia.

Dirava Ena Hesiai Lau Lao Henia Egu Tamana Sinana Ida

Lagani 1931 ai, hebouhebou ta ai lao, Columbus, Ohio ai; unuseniai inai lada Iehova ena Witness taudia ai abia. Ena be egu lagani be 8 sibona, to lau laloa unai lada be mai hairaina bada. Bena nega sisina murinai, lahi ese Tamagu ena bisinesi ia araia ore. Unai dainai Tamagu bona Sinagu idia laloa “Lohiabada ena ura” be pioneer gaukarana do idia karaia matamaia lou. Vadaeni, lagani 1932 ai unai bamona idia karaia, bena lagani momo lalodiai unai gaukara ai moalelaia.

Egu tamana sinana be Texas ihuanai pioneer gaukarana idia karaia, badina be idia ura Sinagu ena tamana sinana kahirakahira dekenai do idia noho. Society ese edia pioneer gabuna be nega momo ia haidaua dainai, sikuli idauidau ai lau sikuli. Witness taudia haida idia laloa namonamo lasi, idia gwau, “Gabu tamona ai do umui noho hanaihanai be namo, bena emui natuna do ia noho namo.” To aiemai noho dalana lau moalelaia, bona lau laloa Tamagu bona Sinagu lau durudia edia haroro gaukarana ai. To gau be, lau idia hadibaia bona idia hahegaegaea, pioneer hahinena ai do lau lao totona.

Hua momo lalodiai Tamagu bona Sinagu lau hamaorodia lau ura bapatiso, bona lau ida ai herevalaia loulou. Idia ura do lau diba goevagoeva bapatiso be mai anina bada. Vadaeni, December 31, 1934 ai egu bapatiso dinana ia ginidae. To guna, December 30 ena hanuaboi ai, Tamagu ese lau ia nanadaia, Iehova lau guriguri henia vadaeni eiava. Bena kara namona ta ia karaia. Ia gwau ai toiosi do ai tui diho, bena ia guriguri. Iehova ia hamaoroa, ia moale bada badina be ena natuna maragina ese ena mauri ia gwauhamatalai henia. Unai hanuaboi do lau laloaboio diba lasi!

Tubugu ese Lau Idia Hadibaia

Lagani 1928 ela bona 1939 padadiai, egu tubudia lau vadivadi henidia momo San Antonio ai. Idia edia kara be egu tamana sinana edia kara hegeregeredia. Tubugu hahinena be guna regular pioneer gaukarana ia karaia bena gabeai heduru pioneer gaukarana ia karaia. December 1929 ai egu tubuna maruanena be pioneer tauna ai idia halaoa, unai dainai dina dina iboudiai haroro gaukarana ia karaia.

Hanuaboi ai egu tubuna maruanena ese lau ia rosia bona hisiu edia ladadia lau ia hadibalaia. Ane be lau dekenai ia gwauraidia danu. Tereini ai ia gaukara negadiai, nega momo ena laolao ai lau bamoa. Lau be mai egu lalo-hekwarahi negadiai, ena heduru lau tahua diba; egu lalona ia hagoadaia bona egu mata ranuna ia dahua oho. To, egu kara kerere dainai matahakani lau abia negadiai, ia dekenai lau lao egu lalona do ia hagoadaia totona, to lau ia hamaoroa, ia gwau: “Tubugu, kara kerere tauna ena dala ia auka.”

Dagedage Laganidia

Lagani 1939 ai, Tanobada Ibounai Tuarina Iharuana ia matamaia, bena Iehova ena orea taudia ese dagedage idia davaria bona aru hebou taudia ese idia heatu henidia. Lagani 1939 ena dokonai, Sinagu ia gorere bada dainai opereisen ia abia be namo, unai dainai San Antonio ai lou lao.

San Antonio ena dala ai magasin gaukarana ai karaia negadiai, taunimanima idia aru hebou. To pura iboudiai, emai bese taudia ta ta be ena gabu ena gabu ai ai gini. Nega momo lau itaia, Tamagu be pulisi siteiseni idia laohaia.

Ena be Sinagu ese pioneer gaukarana ia rakatania, to Tamagu ese ia karaia noho toho. To, ena pat-taim gaukarana amo ia abia monina be hegeregere lasi, unai dainai ia danu ese pioneer gaukarana ia rakatania. Lagani 1939 ai sikuli lau rakatania, bena lau danu ese moni gaukarana lau karaia.

Unai lagani lalodiai Tamagu ena ladana Judge (Diadi) be heduru gauna. Dina ta Witness taudia haida be taoni ta San Antonio ena not kahanai idia lao haroro totona, bena pulisi biaguna ese Witness taudia 35, idia rua be egu tubudia, be ia dogodia tao bena dibura ai ia koudia. Hereva idia siaia Tamagu dekenai, bena motuka ai unai taoni ia heau henia. Pulisi biaguna ena opesi ai ia raka vareai, bena ia gwau: “Lau be Judge Norris, San Antonio amo.”

Pulisi biaguna ia gwau: “Namo Sir, Judge, edena bamona oi lau durua diba?”

Tamagu ia gwau: “Lau mai, inai taunimanima be dibura rumana amo ruhadia dalana karaia totona.” Bena pulisi biaguna ese ia ruhadia, beil monina ia gwauraia lasi bona ia henanadai lou lasi!

Tamagu ia ura opesi rumadia ai ia haroro, bona ia ura bada diadi bona loea taudia ia itadia. Vaia ena kara risepsen hahinena ia hamaoroa, ia gwau: “Lau be Judge Norris, lau mai Diadi Danu itaia totona.”

Bena, diadi ta ia hedavari henia neganai, ia gwau guna: “Lau mai ena badina lau do gwauraia lasi neganai, lau ura oi lau hamaoroa lauegu Judge negana ese oiemu ia hanaia. Egu mauri laganidia iboudiai lau be Judge.” Bena ia hamaoroa dahaka dainai ena tamana sinana ese ena ladana idia hatoa Judge. Unai dala amo diadi ia gado namo henidia, bona momo ese idia abia dae.

Egu Tamana Sinana Lau Taniku Henidia Edia Hahekau Dainai

Unai neganai lau be haneulato matamatana, bona lau diba nega momo Tamagu bona Sinagu ese egu kara idia lalo-hekwarahilaia. Vaia memero kekeni edia kara hegeregerena, nega momo lau ese Tamagu bona Sinagu lau tohodia, lau noidia gwaumaoro do idia henigu, kara ta do lau karaia eiava gabu ta do lau lao, herevana lau diba vadaeni do idia henigu lasi. Nega haida lau tai. To bema nega ta do idia gwau, “Oi sibomu emu ura oi karaia. Ai laloa lasi,” do lau lalohisihisi bada.

Lau diba lau doridia diba lasi edia taravatu do idia haidaudia totona. Unai dainai, memero kekeni ese moale karadia kereredia totona lau idia boiria neganai, lau dadaraidia be haraga. Lau hamaorodia, lau gwau: “Egu tamana ese gwaumaoro do ia henigu lasi.” Lau be 16 neganai, Tamagu ena heduru amo, motuka taria dalana lau dibaia bona laiseni lau abia. Bona, ruma ena ki ia henigu danu. Lau moale, lau ia abidadama henia dainai. Mamina lau abia lau lo vadaeni, bona lau laloa namona be do lau raka namonamo bona edia abidadama lauegu ai do lau hadikaia lasi.

Unai neganai Society ese headava ia sisibalaia momo lasi, to Tamagu be ia diba Baibel ia gwau ta ese “ekalesia tauna sibona” ia adavaia be maoro. (1 Korinto 7:39) Lau ia hamaoroa goevagoeva, murimuri merona ta bema lau hakaua mai ruma ai, eiava ta bema lau tura henia gwauraia, ena lalona do ia hisihisi bada. Lau diba ena hereva be maoro, badina be lau itaia, ‘ekalesia hahinena’ ia adavaia dainai, edia headava ai idia moale bona idia lalo-tamona.

Lagani 1941 ai, egu lagani be 18 neganai, lau ese tauhau ta kongregesen ai lau ura henia bada. Ia be pioneer, bona ia sikuli noho, loea tauna ai do ia lao totona. Lauegu tamana sinana ai hamaorodia ai ura do ai headava neganai, ai idia koua lasi, to idia gwau: “Blossom e, ai ura gau tamona oi ai noia. Ai laloa emu lagani be hegeregere lasi, unai dainai oi ai noia, do oi naria ela bona lagani ta do ia ore. Hari tauhau bema oi lalokau henia momokani, lagani tamona do oi naria be gau ta lasi.”

Lau moale, edia sisiba lau badinaia dainai. Unai lagani lalonai egu lalona ia lo sisina, bena lau itaia hari tauhau ena kara be hegeregere lasi headava tauna namona ai do ia lao. Gabeai Iehova ena orea ia rakatania, bona headava dikana lau reaia. Egu tamana sinana aonegadia edia lalo-parara lau abidadama henia diba be namo herea!

Headava Bona Sekit Gaukarana

Lagani 6 lalodiai pioneer gaukarana bona pat-taim moni gaukarana lau karaia, bena lagani 1946 ai tauhau namo hereana be emai Kingdom Hall ai ia raka vareai. Ena ladana be Gene Brandt; Society ese ia duanaia emai sekit naria tauna do ia bamoa. Ia bona lau ai heura heheni, bena August 5, 1947 ai ai headava.

Nega sisina, Tamagu bona Gene ese akaun bisinesina idia hamatamaia. Tamagu ese Gene ia hamaoroa, ia gwau: “Bema nega ta inai bisinesi dainai hebou ta do ita reaia eiava Dirava ena gaukara ta do ita karaia diba lasi, iduara do lau lokaia bena ki do lau negea.” Lauma gaudia ia tahudia guna dainai, Iehova ese ia hanamoa, bena edia bisinesi amo ai abia monina be hegeregere, bona ai be mai emai nega, pioneer gaukarana do ai karaia. Tamagu bona Gene bema idia ura neganai, edia bisinesi amo idia taga bada diba, to unai idia tahua lasi.

Lagani 1954 ai, Society ese Gene idia boiria, sekit naria gaukarana do ia karaia. Unai ese emai noho dalana ia haidaua vaitani. Egu tamana sinana be vaia edia kara sibodia edia namo idia tahua lasi, to Dirava ena Basileia bona ai ruaosi emai namo lauma dalanai idia tahua. Nega ta lasi idia gwau: “Dahaka dainai emui bese umui havaraia lasi? Ai be tubuna lasi.” To idau, nega ibounai idia gwau: “Edena dala amo umui ai durua diba, ful-taim haroro gaukarana ai?”

Ai rakatanidia dinana ai, hagoadaia herevadia sibodia idia gwauraidia bona emai gaukara matamatana idia moalelaia. Ai idia maumauraia lasi, to ai idia imudaia. Ai rakatanidia murinai, ma lagani 10 lalodiai pioneer gaukarana idia karaia. Tamagu be taoni naria tauna ai idia halaoa, San Antonio ai, bena lagani 30 lalodiai unai gaukara ia karaia. Ia moale, badina be ia itaia, lagani 1920 ai unai taoni ai kongregesen be tamona, to ia do mase lasi neganai, lagani 1991 ai, idia be 71.

Emai mauri lalonai Gene bona lau ese moale bada ai davaria, badina be provinsi 31 lalodiai tadikaka bona taihu edia hesiai ai lao henia, bona lagani 1957 ai Watchtower Bible School of Gilead lalonai ai vareai. Sikuli murinai laolao gaukarana ai karaia lou. Lagani 1984 ai, Gene be sekit bona distrik naridia gaukarana be lagani 30 lalodiai ia karaia vadaeni murinai, Society ese sekit naria gaukarana San Antonio ai ia henia, badina be egu tamana sinana edia lagani be 80 mai kahana, bona idia gorere danu.

Egu Tamana Sinana Lau Naridia

Ai be San Antonio ai lou lao, bena lagani ta mai kahana murinai Sinagu be ia mase. Ia mase haraga dainai, lau be dala lasi egu ura herevadia do lau hamaoroa. Unai dainai lau diba namona be lau be Tamagu ida do ai herevahereva momo. Ruaosi be lagani 65 idia headava, unai dainai Sinagu ia mase murinai Tamagu ena lalona ia hisihisi bada, to ai be ia dekenai ai noho dainai ena lalona ai hagoadaia diba.

Tamagu be Keristen heboudia ia lao, ia stadi, bona haroro gaukarana ia karaia nega ibounai, ela bona ia mase. Duahiduahi ia moalelaia bada. Ai haroro negadiai, ia sibona be ruma ai ia noho, to ai lou mai neganai lau nanadaia, lau gwau, “Oi sibona oi noho neganai oi lalohisihisi a?” Ia gwau, buka ia duahia bona ia stadi dainai unai ia laloa lasi.

Ai hadokoa lasi karana ta be inai: Tamagu be nega ibounai ia gwau emai ruma bese do ai aniani hebou, bona unai be mai anina bada, dina ena Baibel sirina be dabai ai herevalaia hebou negadiai. Taravatu ia atoa, lau be ruma do lau rakatania diba lasi ela bona unai siri ai herevalaia. Nega haida lau gwau: “Tamagu, bema harihari lau lao lasi, sikuli (o gaukara) ai do lau leiti.”

Bena ia gwau: “Dina ena siri dainai do oi leiti lasi, to oi toreisi haraga lasi dainai.” Bena lau ia koua, dina ena siri do lau kamonai guna totona. Unai haheitalai namona ia hahedinaraia ela bona ia mase. Lau ia henia ahuna namona ma ta be unai.

Tamagu ena darana ia namo ela bona ia mase. Lau naria neganai, lau ia hahekwarahia lasi, ia maumau lasi. Nega haida ena roki gorerena ia gwauraia, to lau hamaoroa ena gorere be “Adam gorerena,” bena ia kiri. November 30, 1991 ai, Gene bona lau be ia badinai ai helai neganai, ia mase.

Ena be hari egu lagani be 70, to egu Keristen tamana sinana lalokaudia edia haheitalai namona dainai namo lau do davaria noho. Bona lau guriguri egu ahuna do lau gaukaralaia namonamo ela bona hanaihanai, unai amo do lau hamomokania lau laloa bada.​—⁠Salamo 71:​17, 18.

[Picture on page 5]

Sinagu bona lau

[Pictures on page 7]

1. Egu hebouhebou ginigunana: San Marcos, Texas, September 1923

2. Tamagu ena hebouhebou ginigabena: Fort Worth, Texas, June 1991 (Tamagu ia helai)

[Picture on page 9]

Gene bona Blossom Brandt