“Dirava E, Lau Oi Tahua”

“Dirava e, lau oi tahua, bona lauegu lalona oi diba. . . . Noho hanaihanai dalana ai lau oi hakaua.”​—SALAMO 139:​23, 24.

1. Iehova ese ena hesiai taudia edena bamona ia kara henidia?

ITA ibounai ita ura ita ia kara henia tauna do ia hebogahisi, iseda noho dalana do ia laloa, do ita kerere neganai ita do ia durua, bona eda diba ia hanaia karana be ita do ia hadualaia lasi. Iehova ese ena hesiai taudia unai bamona ia kara henidia. Salamo 103:14 ia gwau: “Ita ia karaia dalana ia diba namonamo, ia laloatao ita be tano kahuna mo.” Bona Iesu Keriso, iena Tamana ia tohotohoa goevagoeva tauna, be ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”​—Mataio 11:​28-30.

2. Iehova ena lalohadai bona taunimanima edia be edena bamona idia idau (a) Iesu Keriso enai, bona (b) Keriso ena orea taudia ediai?

² Nega momo Iehova ena lalohadai iena hesiai taudia ediai be idau, taunimanima edia hegeregeredia lasi, badina be idia diba lasi gaudia be ia ese ia lalodia. Iesu Keriso be tanobada ai ia noho neganai, “taunimanima ese idia dadaraia bona idia rakatania.” Ia idia abidadama henia lasi taudia idia laloa “ia be anina lasi.” (Isaia 53:3; Luka 23:​18-21) To, Dirava ese ia hereva henia, ia gwau: “Oi be lauegu Natuna, lauegu lalokau, lau moale oi dekenai.” (Luka 3:22; 1 Petero 2:4) Iesu ena orea taudia haida be taunimanima ese idia dadaraidia, badina be idia ogogami bona hisihisi momo idia ania dainai. To, Iehova bona ena Natuna vairadiai, unai bamona taudia be reana mai edia taga. (Roma 8:​35-39; Apokalupo 2:9) Dahaka dainai idia ruaosi edia lalohadai be idau?

3. (a) Dahaka dainai nega momo Iehova ena lalohadai taunimanima ediai be taunimanima edia lalohadai hegeregeredia lasi? (b) Dahaka dainai gau badana be eda lalodia do ita tahudia?

³ Ieremiah 11:20 ia gwau: “Iehova ese . . . taunimanima edia nadinadi bona edia lalodia ia dibadia.” Ia ese eda lalodia, taunimanima ese idia itadia diba lasi gaudia, be ia itadia. Ia dibadia negadiai, ia lalodia bada gaudia be inai: ita be ia ida do ita hetura heheni diba daladia, iseda namo do idia havaraia hanaihanai daladia unai. Unai ita diba neganai, unai eda diba ese iseda lalodia ia hagoadadia, bona ita ia hadibaia, gau badana be siboda eda lalodia do ita tahudia namonamo, bena taunimanima namodia ai do ita lao, bona Iehova ena tanobada matamatana ai ita do ia abia dae. Iena Hereva ese ita ia durua, eda lalodia unai bamona do ita tahudia totona.​—Heberu 4:​12, 13.

Dirava Ena Lalohadai be Goevadae!

⁴ Dirava be ena hesiai taudia ia dibadia goevagoeva dalana bona ia durudia diba daladia hereadaedia be David ese ia lalodia murinai, ia be ma ia gwau: “Emu lalohadai be goevadae egu ai!” (Salamo 139:17a) Unai lalohadai, Dirava ese ena Buka Helaga lalonai ia hahedinaraidia gaudia, ese taunimanima edia lalohadai idia hereadia vaitani. (Isaia 55:​8, 9) Dirava ena lalohadai ese ita idia durua, gau mai edia anina bada do ita lalodia bada bona iena hesiai do ita lao henia goadagoada. (Filipi 1:​9-11) Dirava ese gau ia lalohadailaidia daladia ita idia hadibalaia. Ita idia durua, siboda eda lalodia do ita tahudia mai eda momokani ida. Emu lalona ia hegeregere unai bamona do oi karaia a?

5. (a) Baibel ese ita ia sisiba henia, dahaka do ita “gimaia namonamo”? (b) Kain sivaraina ese ita edena bamona ia hanamoa diba? (c) Ena be ita be Mose ena Taravatu henunai lasi, to ia ese Dirava hamoalea dalana edena bamona ita ia hadibalaia?

⁵ Taunimanima momo ese edia oromadia idia lalodia bada, to Baibel ia gwau: “Oiemu lalona oi gimaia namonamo.” (Hereva Lada-isidia 4:23) Hahegani bona haheitalai amo, Baibel ese ita ia durua, unai bamona do ita karaia. Ita ia hamaoroa, Kain ese boubou gaudia Dirava ia henia neganai, ena lalona ai ia ese ena tadina Abel ia mama henia bena ia inai henia, ma Baibel ese ita ia sisiba henia, ia hegeregerena do ita kara lasi. (Genese 4:​3-5; 1 Ioane 3:​11, 12) Ia lalonai Mose ena Taravatu ese ia hahedinaraia Dirava idia tomadiho henia taudia ese do idia kamonai henia sibona lasi, to do idia lalokau henia danu, mai edia lalodia, edia daradia, edia mauri, bona edia goada ibounai ida, bona edia dekena taudia do idia lalokau henidia, sibodia idia lalokau henia bamona.​—Deuteronomi 5:​32, 33; Mareko 12:​28-31.

6. Hereva Lada-isidia 3:​1 ena anina ita laloa neganai, ita be sibona edena bamona ita henanadai be namo?

⁶ Hereva Lada-isidia 3:1 ese ita ia sisiba henia, Dirava ena hahegani badinadia karadia ai iseda lalodia edia ura korikori do ita hahedinaraidia. Namona be ita ta ta be sibona do ita henanadai, do ita gwau, ‘Lau ese Dirava ena hahegani unai bamona lau badinadia, eiava?’ Bema ita diba eda ura eiava eda lalohadai be kerere, namona be ma do ita henanadai, do ita gwau, ‘Inai kerere be edena bamona lau hamaoromaoroa toho noho?’​—Hereva Lada-isidia 20:9; 1 Ioane 1:8.

7. (a) Iesu ese Mataio 15:​3-9 ai Farisea taudia ia gwau henidia herevadia ese ita edena bamona idia durua, iseda lalodia naridia karana ai? (b) Reana dahaka dahaka dainai eda daradia bona eda lalodia do ita biagudia be namo?

⁷ Iesu ese Farisea taudia ia gwau henidia, ia gwau idia be koikoi taudia bona edia tomadiho be anina lasi, badina be Dirava hanamoa koikoi karana amo sibodia edia namo idia tahua dainai. (Mataio 15:​3-9) Iesu be ma ia gwau, bema taunimanima vairadiai ita kara maoromaoro, to hegahusi ena mamina moalelaia totona bema matabodaga karadia ita lalodia, eda lalodia ia itadia Diravana ita hamoalea diba lasi. Reana namona be eda daradia bona eda lalodia do ita biagudia mai eda goada ida. (Hereva Lada-isidia 23:12; Mataio 5:​27-29) Iseda moni gaukarana dainai, o edukeisini amo ita tahudia gaudia dainai, o iseda moale karadia dainai, bema tanobada ita tohotohoa, namona be eda daradia bona eda lalodia be unai bamona do ita biagudia. Namona be do ita laloaboio lasi, sibodia na Dirava ena orea taudia idia gwauraidia to tanobada tura henia urana idia ura taudia be Iakobo ese ia gwauraidia “heudahanai hahinedia.” Badina be “Satani ese tanobada taudia ibounai ia gunalaia noho.”​—Iakobo 4:​4, NW; 1 Ioane 2:​15-17; 5:19.

8. Dirava ena lalohadai goevadaedia ese ita do idia hanamoa vaitani totona, dahaka do ita karaia be namo?

⁸ Dirava ena lalohadai ese ita do idia hanamoa vaitani totona, namona be nega do ita atoa, duahidia o kamonaidia totona. Bona namona be do ita stadilaidia, do ita herevalaidia, bona do ita lalodia namonamo danu. Gima Kohorona duahia taudia momo be Iehova ena Witness taudia edia hebou idia lao loulou, unuseniai Baibel idia herevalaia hebou. Unai bamona idia karaia totona, edia kara idaudia ai idia haorea negana idia hakwadogia. (Efeso 5:​15-17) Bona unai amo idia abia davana ese moni bona kohu ia hereadia momokani. Oi be unai bamona oi laloa, ani?

9. Dahaka dainai Keristen heboudia idia lao taudia haida ese oredia idia gunalaidia?

⁹ To, hebou idia lao taudia haida be lauma dalanai idia goada idia lao haraga, oredia idia gunalaidia. Hereva momokani idia badinaia momokani. Nega momo, badina be sibodia edia stadi idia goadalaia. Idia diba ita be aniani sibona amo do ita mauri lasi, to dina iboudiai lauma anianina danu do ita ania be mai anina bada. (Mataio 4:4; Heberu 5:14) Unai dainai dala idia tahua, dina iboudiai Baibel o Baibel idia gwauraia bukadia do idia duahidia. Kongregesen heboudia totona idia hegaegae; leseni idia stadilaidia guna bona Baibel siridia idia duahidia. Hereva idia duahia sibona lasi, to ena anina sibodia edia mauri lalodiai be idia laloa namonamo danu. Lauma dalanai idia tubu noho lalonai, edia lalohadai be salamo torea tauna ena hegeregerena ai ia lao; ia gwau: “Emu taravatu lau ura henia dikadika! . . . Emu hahediba herevadia be namo herea.”​—Salamo 1:​1-3; 119:​97, 129.

¹⁰ Bema Dirava ena lalohadai ita lalodia bada, herevana ita be Dirava ena Hereva na lagani tamona, o lagani 5, o lagani 50 ita stadilaia vadaeni, ita hesikulaia lasi. Herevana hereva hida be Baibel amo ita dibadia vadaeni, momo be ita do diba lasi. David ia gwau: “Dirava e, idia be dahaka hutuma! Bema lau duahidia toho, idia be momo herea, miri ena momo idia hereaia.” Dirava ena lalohadai iboudiai ita duahidia diba lasi. Bema dina ibounai ita duahidia ela bona ita mahuta, kerukeru do ita noga neganai, momo do idia noho. Unai dainai David ia gwau: “Lau noga vadaeni, to lau be do oi ida.” (Salamo 139:17, 18) Iehova bona ena dala iboudiai do ita diba vaitani lasi, ela bona hanaihanai.​—Roma 11:33.

Iehova ese Ia Inai Henidia Gaudia be Ita Inai Henidia

¹¹ Dirava ena Hereva ita stadilaia be gau momo do ita dibadia totona sibona lasi. Iena lalohadai ita abidia dae neganai, iena lalona ena mamina ita abia danu. Unai be mai anina bada! Badina be, bema ita abia lasi, bena ena be Baibel ena hereva ita gwauraidia lou diba, to ia taravatulaia gaudia do ita ura henidia reana, o reana do ita laloa ena hahegani be maduna metaudia. Momokani, ena be dika ita inai henia, to reana do ita hekwarahi badina be ita goevadae lasi. (Roma 7:15) To bema eda lalodia ita hamaoromaorodia toho momokani lasi, Iehova, “taunimanima edia lalodia tahudia Diravana” be ita hamoalea diba lasi, ani?​—Hereva Lada-isidia 17:3.

12. Lalokau maorona bona dika inai henia karana edia anina be ede badana?

¹² Lalokau maoro tauna ese kara maoromaoro ia moalelaia; unai hegeregerena, dika ia inai henia tauna ese kara dika ia dadaraia be haraga. (1 Ioane 5:3) Baibel ese ita ia sisiba henia loulou, lalokau bona dika inai henia karana danu do ita goadalaidia. “Iehova umui lalokau henia taudia e, dika umui inai henia.” (Salamo 97:10) “Dika do umui negea momokani, to namo do umui dogoatao momokani.” (Roma 12:9) Ita be unai bamona ita karaia a?

13. (a) David ese kara dika taudia hamasedia ore karana edena bamona ia gurigurilaia dainai, ita be ia ida ita lalo-tamona? (b) David ese Dirava ia noia edena kara dika taudia do ia haoredia?

¹³ Iehova ia gwauhamata vadaeni, kara dika taudia be tanobada amo do ia ragadia oho bena tanobada matamatana do ia havaraia, unuseniai be kara maoromaoro do ia noho. (Salamo 37:​10, 11; 2 Petero 3:13) Kara maoromaoro idia ura henia taudia idia ura unai nega do ia ginidae. Idia be David ida idia lalo-tamona; ia guriguri, ia gwau: “Dirava e, kara dika taudia bema oi aladia mase be namo! Bena rara bubua taudia ese lau do idia rakatania; edia lalohadai hegeregerena oi idia herevalaia; emu ladana idia hatoa kava​—emu inai taudia be unai.” (Salamo 139:​19, 20) David ia ura lasi ia sibona ese unai kara dika taudia do ia aladia mase. Iehova ia noia, ia ese edia davana do ia henidia. (Deuteronomi 32:35; Heberu 10:30) Idia ese David sibona idia hadikaia lasi, to Dirava idia gwauraia koikoi, ena ladana idia hatoa kava. (Esodo 20:7) Mai edia koikoi ida idia gwau iena hesiai idia lao henia, to iena ladana idia hatoa sibodia edia lalohadai hagugurudia totona. David ese Dirava idia inai henia taudia ia lalokau henidia lasi.

14. Kara dika taudia haida do ita durudia diba a? Edena bamona?

¹⁴ Taunimanima bilion bilion be Iehova idia diba lasi. Iena Hereva ese ia gwauraidia dika karadia be idia momo ese edia lalo-duhu ai idia karaia noho. Bema idia hodokoa lasi, hisihisi bada hereana ai do idia mase. To Iehova ese kara dika taudia edia mase ia moalelaia lasi, bona namona be ita moalelaia lasi. (Esekiel 33:11) Nega ia do noho lalonai, unai bamona taudia do ita durudia toho, Dirava ena dala do idia dibadia bona idia badinadia totona. To Iehova idia inai henia dikadika taudia be edena bamona?

15. (a) David ese daidia na iena “inai taudia korikoridia” ia gwauraidia? (b) Edena bamona ita hahedinaraia diba Iehova idia gwau-edeede henia taudia ita “inai henidia”?

¹⁵ David ese ia gwauraidia, ia gwau: “Iehova e, oi idia inai henia dikadika taudia be lau inai henidia ani? Oi idia gwau-edeede henia taudia be egu lalona ai lau dadaraidia ani? Lau inai henidia mai egu lalona ibounai ida. Lau gwau idia be lauegu inai taudia korikoridia.” (Salamo 139:​21, 22) David be ena lalona ai ia dadaraidia, badina be Iehova idia inai henia dikadika dainai. Tomadiho momokani idia negea taudia danu ese Iehova idia inai henia dainai, idia gwau-edeede henia. Idia haida idia gwau Dirava idia diba bona ena hesiai idia lao henia, to hahediba herevadia bona hahegani Baibel lalonai ia hahedinaraidia be idia ese idia dadaraidia. Ma haida idia gwau Baibel idia abia dae, to Iehova ena orea idia dadaraia bona ena gaukara idia koua toho. Dala maorona idia diba murinai, bema unai dika idia abia hidi bena idia manadalaia ela bona edia kara korikori ai idia halaoa, namona be Keristen taudia momokanidia ese do idia inai henidia, Iehova ese ia inai henidia hegeregerena. Idia ura lasi edia lalohadai do idia dibadia. Sibodia na Dirava ena inai taudia ai idia halaoa taudia be idia ese ‘edia lalodia ai idia dadaraidia,’ to idia naria ela bona Iehova ese edia davana do ia henidia.​—Iobu 13:16; Roma 12:19; 2 Ioane 9, 10.

Dirava ese Ita Ia Tahua Neganai

¹⁶ David ia ura lasi kara dika taudia hegeregeredia ai do ia lao. Taunimanima momo ese edia lalodia idia hunidia toho, to David ia guriguri mai ena manau ida, ia gwau: “Dirava e, lau oi tahua, bona lauegu lalona oi diba. Lau oi tohoa, bona egu lalo-hekwarahi oi dibadia; oi itaia, hisihisi dalana ta lauegu lalona ai ia noho eiava, bona noho hanaihanai dalana ai lau oi hakaua.” (Salamo 139:​23, 24) Namona be ita danu ita ura Dirava ese iseda lalodia do ia tahudia, do ia itaia ita be mai eda ura dikadia bona lalohadai dikadia eiava lasi. (Salamo 26:2) Iehova ese ita ta ta ia noia, ia gwau: “Natugu e, oiemu lalona lau oi henia, bona emu matana ese sibogu egu dala do idia moalelaidia.”​—Hereva Lada-isidia 23:26.

17. (a) Namona be eda lalo-hekwarahi ita hunia lasi, to edena bamona ita karaia be namo? (b) Ura dikadia be eda lalodia ai ita davaridia be ita hoalaia be maoro a, bona edena bamona do ita kara henidia be namo?

¹⁷ Bema eda ura kereredia o eda kara kereredia ita lalohisihisilaidia o ita lalo-hekwarahilaidia, momokani ita ura Iehova ese ita do ia durua, unai kerere do ita hamaoromaorodia totona. Nao gado Baibel ta ai, inai hereva “hisihisi dalana” ena gabunai “dala kererena ta” idia torea, bona ma ta ai “oi [Dirava] emu lalona ia hahisia dalana ta” idia torea. Reana iseda lalo-hekwarahi ita lalo-pararalaia lasi dainai, Dirava do ita hamaorolaia dalana be ita diba lasi, to iseda lalo-hekwarahi ia diba. (Roma 8:​26, 27) Bema ura dikadia be eda lalodia ai idia noho, unai ita hoalaia lasi be namo. To, namona be ita gwau lasi unai be eda kerere lasi. (Genese 8:21) Namona be Dirava ena heduru do ita tahua, do ita ragadia totona. Bema Iehova bona ena dala ita ura henidia momokani, unai heduru do ita noilaia diba mai eda lalo-goada ida, badina be ita diba “iseda lalona ena diba be Dirava ena diba ese ia hanaia, bona gau ibounai ia diba.”​—1 Ioane 3:​19-21.

18. (a) Iehova ese ita na noho hanaihanai dalana ai edena bona ia hakaua? (b) Bema Iehova ita kamonai henia noho, ia ese ita edena bamona do ia hanamoa?

¹⁸ David ese Iehova ia noia, noho hanaihanai dalana ai do ia hakaua. Unai hegeregerena, Iehova ese ena hesiai taudia mai edia manau bona mai edia kamonai ia hakaudia. Ia hakaudia dalana ena anina be mauri daudauna, badina be kara dika dainai do ia hamasedia lasi, to mauri hanaihanai lao henia dalana ai ia hakaudia danu. Ita ia hadibaia goevagoeva, eda dika do ia gwauatao dalana tamona be Iesu ena boubou gauna amo. Iena Hereva bona ena orea amo ita ia hadibaia dainai, iena ura ita karaia diba. Ita ia hadibaia, gau badana be ena heduru do ita abia dae, eda lalodia do idia maoromaoro totona. (Salamo 86:11) Bona mauri hanaihanai gwauhamatana amo iseda lalodia ia hagoadadia; kara maoromaoro tanobadana matamatana lalonai ita ese unai mauri goevadaena be ia, Dirava momokanina tamona, ena hesiai gaukarana ai do ita gaukaralaia. Bema ia ita kamonai henia noho, ia ese ita do ia hereva henia, iena Natuna ia hereva henia bamona, do ia gwau: “Lau moale oi dekenai.”​—Luka 3:22; Ioane 6:27; Iakobo 1:12.

Emu Haere be Dahaka?

◻ Dahaka dainai nega momo Iehova ena lalohadai iena hesiai taudia ediai be taunimanima edia hegeregeredia lasi?

◻ Dahaka ese ita ia durua diba, Dirava ese eda lalodia ia tahudia neganai ia davaridia gaudia do ita diba totona?

◻ Edena bamona stadina ese ita ia durua, hereva dibadia totona bona eda lalodia naridia totona?

◻ Dahaka dainai gau badana be Dirava ena hereva do ita diba sibona lasi, to ena lalona ena mamina do ita abia danu?

◻ Dahaka dainai namona be ita ta ta do ita guriguri, do ita gwau: “Dirava e, lau oi tahua, bona lauegu lalona oi diba”?

4. (a) Dahaka dainai David ia gwau Dirava ena lalohadai be goevadae ia enai? (b) Dahaka dainai do ita lalodia bada be namo?

10. (a) Namona be Dirava ena Hereva do ita stadilaia ela bona edena negai? (b) Baibel ese unai edena bamona ia hahedinaraia?

11. Dahaka dainai gau badana be Dirava ena lalohadai ita diba sibona lasi, to ena lalona ena mamina ita abia dae danu?

16. (a) Dahaka dainai David ia ura Iehova ese do ia tahua? (b) Namona be Dirava ena heduru ita noia, dahaka iseda lalodia ai do ita dibaia totona?

[Picture on page 16]

Oi stadi neganai, Dirava ena lalohadai bona ena lalona ena mamina oi abidia dae toho

[Picture on page 18]

Iehova ena lalohadai be momo herea, “miri ena momo idia hereaia”

[Credit Line]

Pictorial Archive (Near Eastern History) Est.