Hekwakwanai Naria Kara Dekenai

ISEDA ura gaudia abia totona ita naria be hekwakwanai badana ta taunimanima dekediai. Natudia maragidia edia kara be gau idia ura abia haraga. Idia itaia gaudia idia ura, bona idia ura harihari idia abia! To sedira oi davaria vadaeni, ita ura gaudia iboudiai be haraga ita abia diba lasi. Iseda ura gau namodia danu ita abia totona, namona be nega maorona ita naria ita abia totona. Momo be unai idia diba; ma haida be unai idia diba lasi momokani.

Dirava idia ura hamoalea taudia idia naria be mai edia badina. Keristen nega be do lasi neganai Iehova ia hesiai henia tauna ta, Ieremia, be unai ia gwauraia bada, ia gwau: “Iehova ena hahemauri ita naria, regerege lasi, unai be namo.” Gabeai, Keristen hahediba tauna Iakobo ia gwau: “Unai dainai, lauegu varavara e, do umui haheauka noho ela bona Lohiabada do ia giroa mai.”​—Rohe-Ahu Bukana 3:26; Iakobo 5:7.

Iehova be mai ena sediual iena ura ia hagugurua totona. Bema iena nega gau haida karaia totona ita naria diba lasi, do ita lalohisihisi bona do ita badu, unai ese moale do ia koua. Bema Dirava ena hesiai tauna ta ia moale lasi, lauma dalana ai do ia manoka, Nehemia be iena bese taudia ia hamaorodia hegeregerena, ia gwau: “IEHOVA moalelaia karana be emui goada gauna.”​—Nehemia 8:10.

Naria be Aonega Karana

Headava lasi taudia idia ura headava eiava natudia lasi headava taudia idia ura natudia idia havaraia be vaia taunimanima edia ura gauna. Ma danu, tanobada kohu haida eiava ma gau haida ita tahua be kerere lasi. To, Keristen momo idia diba, hari inai nega be do ia doko bona idia diba do ia mai tanobada matamatana dekenai Dirava be ‘iena imana do ia kehoa bona mauri gaudia iboudiai edia ura do ia henia,’ unai dainai idia laloa do idia naria bena nega maorona dekenai edia ura gaudia do idia abia diba.​—Salamo 145:16.

To unai mai badina namona Keristen helarona idia abia lasi taudia do idia ura lasi gabeai totona idia naria. “Gau namodia ibounai, bona harihari gaudia namodia momokani ibounai” be Iehova ena amo idia mai, to idia abidadama henia lasi, unai dainai idia daradara, idia laloa gabeai negana dekenai idia ura gaudia be sedira do idia abia lasi, idia laloa idia naria be aonega karana lasi. Edia lalohadai be inai: “Ita aniani bona ita inuinu, badina be kerukeru do ita mase.”​—Iakobo 1:17; 1 Korinto 15:32; Isaia 22:13.

Kohu momo tanodia dekenai kohu hoihoilaia advertisement karaia bisinesi taudia idia diba taunimanima idia ura gau idia abia haraga, unai dainai unai ura idia veria momo. Taunimanima idia hagoadadia, sibodia idia lalodia momo totona. Hoihoi taudia idia ura inai bamona ita laloa: hari inai nega ai ita abia kohu bona heduru gaudia be mauri durua bada gaudia. Idia gwau, dahaka dainai unai gaudia ita abia lasi, badina hari ita be abitore kadi amo, sisina sisina moni ita henia karana amo, eiava “hari oi abia​—gabeai moni oi henia” dalana amo oi abia diba, unai dainai gau iboudiai be hari oi abia diba, ani? Ma danu inai bamona idia hereva, ‘Oi be gau namo hereadia oi abia be namo; oi sibona oi hebogahisi henia! Inai oi laloa, harihari oi moalelaia badina reana gabeai do oi moalelaia diba lasi!’ Hoihoi herevadia momo be unai bamona.

To, kohu bada lasi tanodia dekediai taunimanima milion momo be mauri durua gaudia haida sibona idia abia​—haida be durua gaudia momo lasi momokani. Unai ese taunimanima edia politikol bona moni gaukaralaia daladia edia kerere bada ia hahedinaraia momokani, ani?

Ita itaia diba naria karana be aonega karana badina taunimanima milion momo idia ura lasi idia naria​—eiava idia laloa idia naria ena badina be lasi​—unai dainai abitore bada idia abia edia ura gaudia be harihari idia abia totona. Gau haida totona idia hegaegae diba lasi, hegeregere gorere eiava moni gaukara lasi negadia, bona unai neganai idia be sedira dika bada idia davaria diba. Germany niuspepa Frankfurter Allgemeine Zeitung ia gwau Germany dekenai taunimanima milion tamona edia ruma be lasi: “Nega momo, ruma lasi taudia be guna edia moni gaukara idia haboioa eiava edia abitore be bada herea.”

Edia abitore moni idia henia lou diba lasi dainai, unai taudia be, madi, edia ruma bona edia kohu idia haboiodia. Nega momo, unai hekwarahi ese ruma bese ena hekwarahi ia habadaia. Edia headava idia goada momokani lasi taudia idia parara. Nega momo taunimanima idia lalo-metau momo bona ma gorere haida idia abia. Keristen taudia be sedira lauma dalana ai idia manoka diba, bona unai ese lalohadai kerere bona kara kerere ia havaraia diba. Aonega lasi dainai gau iboudiai idia tahua taudia be reana gabeai gau lasi momokani dekenai idia noho.

Momo Dekenai, Tahua Gauna Matamatana Ta

Iesu ia hahedinaraia namonamo, ita naria be namo badina “tanobada gaudia dekenai laloa momo, bona kohu ura henia bada, bona ura dika idauidau dainai, hereva ena tubu dala idia koua.” (Mareko 4:19) Namona be ita diba politikol dalana ta lasi ese Iesu ia herevalaia lalo-hekwarahi gaudia, moni davaria lasi karana danu, ia kokidia diba.

Eastern European tanodia be hari Komiunis dalana idia dadaraia; guna, Gavamani ese ia biagua moni gaukaralaia dalana amo gau iboudiai idia hahegeregerea toho. Unai dala gunana idia badinaia tanodia dekenai taunimanima be moni dekenai idia noho namo sisina, to hari, gavamani ese ia koua momo lasi bisinesi tanodia be unai bamona lasi. To, Iesu ese ia herevalaidia lalo-hekwarahi gaudia be guna idia noho danu, badina taunimanima idia tahua kohudia be nega momo idia noho lasi bona edia mauri daladia momo idia koudia.

Hari, unai tanodia momo edia taunimanima dekenai dala matamatadia idia kehoa, unai daladia ai taunimanima haida be kohu idia hoihoilaia diba bona haida be kohu idia hoia diba. Vanegai sivarai ta ia gwau: “Idia be tanobada ena kara dekenai idia diba momo lasi bona idia ura haraga west kahana ai idia noho taudia bamona kohu momo idia abia.” To unai idia karaia totona, “Germany ena ist kahana ena Länder ai idia noho taudia momo be ia noho hanaihanai abitore dalana ai idia vareai.” Unai sivarai be ma ia gwau: “Guna idia koudia momo lasi dainai moni gaukaralaia dalana matamatana dainai idia moale bada, to hari, gari bona lalona ia ore karana ia bada ia lao.” Lalo-hekwarahi momo gaudia idia do noho, to hari unai be kohu tahua momo mauri dalana dekenai ia hedinarai.

Politik bona moni gaukaralaia daladia momo idia kehoa dainai, taunimanima be sibodia edia moni idia habadaia diba. Unai dainai, taunimanima momo idia ura sibodia edia bisinesi idia hamatamaia, eiava ma tano ta dekenai idia lao bona moni gaukara namona idia abia.

Unai idia karaia be sibodia edia ura hegeregerena. Keristen tauna be sibona ena moni habadaia toho be kerere lasi. Sedira ia ura iena ruma bese ia naridia, badina ia diba “bema tau ta ese iena varavara ia naria lasi, o iena ruma taudia ia ubua lasi neganai ia ese iena abidadama Keriso dekenai ia negea vadaeni. Iena dika ese ekalesia lasi murimuri tauna ena dika ia hanaia vadaeni.”​—1 Timoteo 5:8.

Unai dainai, ma haida ese idia abia hidi daladia ita maumauraia be maoro lasi. To unai idia karaia neganai, namona be Keristen taudia idia laloatao, moni lasi ena metau idia kokia toho totona, idia ia hamorua diba abitore badana idia karaia be aonega dalana lasi. Unai hegeregerena, moni lasi ena metau kokia totona lauma dalana ai edia maduna bona edia gaukara idia laloaboio be kerere.

Ma Haida amo Diba Abia

Tanobada Ibounai Tuarina Iharuana murinai laganidia lalodiai, Germany taudia tausen momo be tuari ese ia hadikaia Europe tanodia idia rakatania bona ma tano haida dekenai idia lao, idia momo be Australia bona Canada dekenai idia lao. Unai dala amo, idia momo be moni dalana ai edia mauri idia hanamoa diba, to idia haida be Iesu ese ia herevalaia lalo-hekwarahi gaudia idia davaria. Moni lasi ena metau idia kokia totona inai hekwakwanai haida idia havaraia​—idia rakatania tanona idia laloaboio lasi dainai idia lalohisihisi, gado idauna ta, aniani matamatadia, kastom idaudia, turadia matamatadia ida idia noho hebou, eiava lalohadai idaudia idia manadalaidia.

Unai tano matamatadia ai idia lao taudia haida be Iehova ena Witness taudia. Namo herea badina idia momo be herevana tano matamatana ai idia lao dainai hekwakwanai idia davaria, to unai ese edia goada lauma dalana ai ia koua lasi. To haida idia manoka. Taga ena koikoi siahuna ese haida ia abidia. Idia be moni dalana ai idia goada idia lao to tiokratik dalana ai idia goada lao lasi.

Unai ese ia hahedinaraia aonega dalana be iseda noho ita lalohadailaia namonamo guna, bena gabeai dala namona ita abia hidi diba. Moni ita tahua momo karadia dainai, Keristen ese idia abia hahediba karaia gaukarana dekenai ita do ia hametaua bona ita gaukara namonamo lasi. Herevana edeseniai ita noho unai be momokani, badina tano iboudiai dekenai taunimanima be moni dekenai idia lalo-hekwarahi momo.

Heau Helulu Namona Heaulaia

Paulo be inai bamona Timoteo ia sisiba henia: “Kara maoromaoro, Dirava badinaia kara, abidadama, lalokau, haheauka, laloa manau, inai gaudia do oi tahua be namo. Keriso ia abidadama henia tauna be heau helulu lalonai ia heau tauna bamona. Vadaeni, mai oiemu goada ibounai abidadama ena heau helulu do oi heaulaia, bona kwalimu ahuna, mauri hanaihanai do oi davaria. Badina be inai bamona mauri totona Dirava ese oi ia boiria.” Korinto Keristen taudia dekediai ia gwau: “Unai dainai, lauegu varavara taudia e, lauegu lalokau, do umui gini goada, do umui marere lasi. Nega ibounai Lohiabada ena gaukara do umui karaia goadagoada.”​—1 Timoteo 6:​11, 12; 1 Korinto 15:58.

Unai sisiba namona badinaia karana be dala namona kohu tahua momo karana koua totona, bona Keristen ena gaukara be bada herea! Basileia harorolaia taudia be momo lasi tanodia ai, taunimanima momo be hereva momokani sisina sibona idia kamonai. Iesu ese ia perovetalaia maoro, ia gwau: “Uiti ena anina abia negana ia ginidae vadaeni, to utua taudia be momo lasi.”​—Mataio 9:37.

Unai tanodia ai, Iehova ena Witness taudia idia ura lasi moni lalo-hekwarahilaia dainai edia gaukara lauma dalana ai idia laloaboio, to idia be dala iboudiai lauma dalana ai gaukara idia habadaia toho. Idia momo be moni gaukara idia karaia lasi negadiai edia haroro gaukara idia habadaia. Edia haroro gaukara ese Iehova hanamoa karana ia habadaia sibona lasi, to moale ia henidia bena idia goada diba edia hekwakwanai idia haheaukalaia totona.

Unai Witness taudia be haroro gaukara idia atoa guna, bona moni abia hekwarahina be gabeai idia atoa. Tanobada hegegemadai tadikaka oreana dekenai unai ese ia hahedinaraia Iehova idia tabekau henia diba bona idia diba ia ese do ia naridia. Iena gwauhamata be inai: “Iena Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.”​—Mataio 6:33.

Tomadiho momokani be 1919 lalonai idia haginia lou negana amo, Iehova be iena taunimanima edia raka dalana ia hagoadaia. Dagedage dikana lalonai ia naridia, bona gabu haida dekenai idia be hehuni idia gaukara neganai, lagani momo lalodiai ia durudia. Iehova ena Witness taudia edia lalohadai goadana be inai: Diabolo be dagedage amo idia dekenai ia kwalimu lasi bona kohu tahua karana ena hehuni idoa amo idia dekenai do ia kwalimu lasi danu!

Dala Iboudiai Dekenai Idia Naria

Kingdom Hall badadia, moni bada saun masini, Assembly Hall gabudia, bona Betele ruma hairaidia ese Dirava ena ladana idia hanamoa bona regeregere lasi dalanai unai ese ia hamomokania iena taunimanima ia hanamodia. Nega daudau lalonai edia gaukara idia koua tanodia ai, Iehova ena Witness taudia be sedira idia laloa edia gaukara be bada ma tano haida bamona idia hegeregere totona. To gau badana momokani be lauma dalana ai idia hegeregere. Gabeai, Dirava ese kohu dalana ai ia hanamodia be do ia hedinarai.

Namona be Iehova ena bapatiso hesiai taudia idia naria namonamo, badina sibodia edia gau idia laloa neganai, idia laloa kohu haida be nega daudau idia abia lasi dainai, namona be hari idia abia. Moni lasi ena hekwarahi bona taunimanima edia noho dala dikadia edia hekwarahi idia ura idia rakatania be namo, to Iehova ena taunimanima idia laloaboio lasi Dirava ena hesiai taudia iboudiai be hekwarahi ena dokona idia tahua. Mata-kepulu taudia idia ura idia itaia lou, nega momo idia gorere taudia idia ura tauanina goadana idia abia, lalo-metau taudia idia ura lalohadai goada gabeai negana dekenai idia abia, bona edia mase lalokau taudia varavaradia idia ura mase taudia idia itaia lou.

Edia noho dalana dainai, Keristen taudia iboudiai be dala haida dekenai hekwakwanai idia hanaia totona namona be Iehova ena tanobada matamatana idia naria. Namona be unai dainai ita sibona ita henanadai henia, ‘Bema lau be mai egu aniani bona dabua neganai, namona be moni dekenai lau laloa momo lasi, bona moni hekwakwanai ia ore negana totona do lau naria be namo, ani?’​—1 Timoteo 6:8.

Iehova idia abidadama henia momokani Keristen taudia idia diba bema idia naria, edia ura namodia iboudiai bona edia dabu gaudia iboudiai be do idia abia. Edia naria karana be anina do ia havaraia. Paulo ena hereva ita gwauraia lou diba, ia gwau: “Do umui gini goada, do umui marere lasi. Nega ibounai Lohiabada ena gaukara do umui karaia goadagoada. Badina be umui diba emui gaukara Lohiabada totona be umui hekwarahi kava lasi.”​—1 Korinto 15:58.

Unai dainai, oi laloa oi naria be hekwakwanai gauna badana lasi, ani?

[Picture on page 10]

Naria karana ese oi ia hamauria diba