Moni Ena Hekwakwanai Hamaoromaoroa Dalana Ta Ia Noho, A?

Tano ta ta dekenai taunimanima be dala ai idia protest, badina moni ena hekwakwanai idauidau idia davaria noho. COVID-19 pendemik gorerena ese edia hekwakwanai ia habadaia. Lockdown ia vara neganai, taunimanima be edia noho dalana dainai idia moale lasi, bona edia helt totona heduru namona be lasi, unai ese ia hahedinaraia haida be idia taga bona ma haida idia ogogami.

Tanobada ai idia vara moni ena hekwakwanai be nega ta do ia ore, a? Oibe. Baibel ai Dirava ese ita davaria hekwakwanai do ia haorea dalana ia herevalaia.

Moni ena hekwakwanai be Dirava ese do ia hamaoromaoroa

Hekwakwanai: Taunimanima ese moni haheaua dalana ta idia haginia lasi ibounai durua totona.

Hamaoromaoroa dalana: Dirava ese taunimanima edia gavamani do ia haorea, bona iena gavamani, Dirava ena Basileia unai, do ia haginia. Guba amo tanobada ibounai do ia lohiaia.—Daniela 2:44; Mataio 6:10.

Anina namona: Dirava ena Basileia ese tanobada ibounai do ia lohiaia dainai, tanobada ibounai dekenai gaukara do ia haheaua namonamo. Taunimanima be ogogami maurina o moni ena hekwakwanai do idia davaria lou lasi. (Salamo 9:7-9, 18) To edia gaukara ena anina namona dainai, edia famili ida mauri do idia moalelaia. Baibel ia gwau: “Ruma do idia haginia bona do idia noholaia, bona vain umadia do idia karaia bona edia huahua do idia ania. Ruma do idia haginia lasi, ma ta ese ia noholaia totona, eiava do idia hadohado lasi, ma ta ese ia ania totona.”—Isaia 65:21, 22.

Hekwakwanai: Taunimanima be idia vara hisihisi amo idia heau mauri be auka bona mauri durua gaudia dekenai idia dabu.

Hamaoromaoroa dalana: Dirava be ena Basileia amo, gari idia havaraia gaudia ibounai do ia kokia vaitani.

Anina namona: Taunimanima be edia mauri durua totona idia abia gaudia idia haboioa o haida ese idia hadikaia noho, to Dirava ena henari henunai inai karadia do idia vara lou lasi. Hegeregere, tuari, aniani be lasi, bona pendemik be gau gunadia ai do idia lao. (Salamo 46:9; 72:16; Isaia 33:24) Dirava ia gwau: “Egu taunimanima be maino gabuna ta dekenai do idia noho, bona dika do idia davaria lasi bona gabu namona ai do idia noho.”—Isaia 32:18.

Hekwakwanai: Nega momo mataganigani taudia ese haida edia kohu be koikoi dalanai idia abia bona idia hahisia.

Hamaoromaoroa dalana: Dirava ena Basileia henunai idia noho taudia ese haida lalokau henia bona edia namo atoa guna karana do idia dibaia.—Mataio 22:37-39.

Anina namona: Dirava ena Basileia henunai, ibounai ese Dirava ena lalokau karadia hegeregere, ‘sibona edia namo ia tahua lasi’ karana do idia tohotohoa. (1 Korinto 13:4, 5) Baibel ia gwau: “Egu ororo helagana ai ta do idia hadikaia lasi eiava dika ta do ia vara lasi, badina tanobada be Iehovaa dibaia karana dekenai do ia honu, ranu ese davara ia koua bamona.”—Isaia 11:9.

Baibel ia gwau, ita be inai nega oromana ena dina gabedia lalonai ita noho, bona kahirakahira Dirava ese ena gwauhamata do ia hagugurua, ia ese moni ena hekwakwanai do ia haorea.b (Salamo 12:5) Bona unai ia vara totona ita naria lalonai, Baibel ena hakaua herevadia ese oi ia durua diba hari oi davaria noho moni ena hekwakwanai oi hanaia totona. Hegeregere, inai atikol “Moni Sisina Gaukaralaia Namonamo Dalana” bona “A Balanced View of Money” oi itaia.

Lalohadai Kereredia Baibel bona moni dekenai

Lalohadai Kererena: Ogogami maurina be do ia ore lasi, badina Iesu ia gwau: “Ogogami taudia be hanaihanai umui ida do idia noho.”—Mataio 26:11.

Lalohadai Maorona: Iesu ese do idia vara momokani karana ta ia herevalaia: Inai tanobada ai kara gageva do ia bada dainai, unai ese ogogami maurina do ia havaraia noho. To Iesu ena hereva be “sivarai namona” “ogogami taudia dekenai,” danu ia gwauhamata Dirava ena Basileia ese ogogami do ia haorea momokani.—Luka 4:18, 43.

Lalohadai Kererena: Dirava idia ura hamoalea taudia be idia ogogami be namo, badina Iesu ia gwau: “Oi lao emu kohu oi hoihoilaia bona moni be ogogami taudia dekenai oi henia.”—Mataio 19:21.

Lalohadai Maorona: Iesu ese unai hereva be taravatu ta bamona ia gwauraia lasi. To taga tauna matamata ia hadibaia dahaka ia karaia be namo. Unai tauna ia hagoadaia kohu momo lasi maurina do ia abia dae, unai amo Iesu murinai ia raka.

Lalohadai Kererena: Dirava ese ta dekenai taga ia henia, badina Baibel ia gwau: “Iehova ena hanamoa dainai ita be mai iseda kohu momo.”—Aonega Herevadia 10:22.

Lalohadai Maorona: Baibel ai inai hereva “Iehova ena hanamoa” anina be, Dirava tomadiho henia karadia hegeregere; mauri mai ena anina namona, Dirava tura henia namonamo karana, bona vaira nega ena helaro namona ia herevalaia. (Salamo 25:14; Ioane 17:3) Dirava ese ena hesiai taudia haida dekenai taga ia henia, to danu Keristani taudia momo be taga lasi maurina idia noholaia. (Genese 24:34, 35; Iamesi 2:5) Iesu Keriso danu be kohu momo lasi maurina ia noholaia.—Mataio 8:20.

Lalohadai Kererena: Baibel ese komiunis bamona lalohadaina ia hadibaia, , Keristani ginigunadia dekenai ia gwau: idia be “edia gau ibounai be ta ta ida idia haria, bona edia tano bona edia kohu ibounai idia hoihoilaia.”—Kara 2:44, 45.

Lalohadai Maorona: Inai Baibel siri be Keristani ai idia lao taudia ginigunadia ese nega kwadogina ai tauanina dalanai heduru totona do idia karaia gaudia ia herevalaia. Unai amo idia ese bapatiso matamata taudia idia durua. Badina unai taudia be Iuda edia Pentekoste aria totona Ierusalema dekenai idia lao. (Kara 2:5) To, Keristani taudia ai idia lao neganai, nega daudau Ierusalema dekenai idia noho, unai amo edia abidadama matamata durua totona diba ma haida idia abia. Unai dainai edia Keristani tadikaka totona volantia dalanai aniani bona noho gabuna idia henia.—Kara 2:41, 42, 46, 47.

a Iehova be Dirava ena ladana Baibel ai ia noho.—Salamo 83:18.

b Baibel oi tabekau henia ena badina oi diba totona inai atikol itaia, “Baibel—Diba Maorona Ena Badina.”