Duahia Taudia Edia Henanadai

Korinto Ginigunana 14:37 dekenai, inai hereva “Lauma Helaga ese harihari gauna idauna ta ia henia” ena anina be ta ese lauma helaga amo ia horoa, eiava anina be lauma helaga dainai hoa karana ta ia karaia diba?

New World Translation of the Holy Scriptures dekenai, unai siri ia duahia, ia gwau: “Bema ta ia laloa ia be peroveta tauna eiava lauma helaga ese harihari gauna ia dekenai ia henia, namona be umui dekenai lau torea gaudia ia abia dae, badina idia be Lohiabada ena hahegani.”​—1 Korinto 14:37.

Sedira duahia tauna ia laloa diba unai hereva “Lauma Helaga ese harihari gauna ia henia” anina be lauma helaga ese Keristen ginigunadia ia horodia bona lauma dalana ai Dirava ena natudia ai idia lao. Eiava ita gwau diba unai hereva ena anina be ta be lauma helaga dainai hoa karana ta ia karaia diba. Sedira unai hereva anina iharuana be momokani, unai hereva ena sivarai ese unai do ia hahedinaraia.

Aposetolo Paulo be iniseniai unai Greek herevana pneu·ma·ti·kosʹ ia gaukaralaia, ena anina be “lauma helaga dekena amo, lauma gauna.” Idia gaukaralaia daladia haida be inai hereva haida dekenai idia karaia: “lauma anina gauna,” “lauma durua,” “Lauma Helaga ena diba,” bona “Lauma Helaga ena ruma.”​—1 Korinto 15:44; Efeso 1:3; Kolose 1:9; 1 Petero 2:5.

Unai siridia dekenai, Baibel ese ia hahedinaraia ia herevalaia “lauma” gauna be dahaka (tauanina, hahenamo, diba, ruma). To ma siri haida dekenai, idia badinai siridia amo idia herevalaia “lauma” gauna ena anina ita abia. Hegeregere inai bamona, 1 Korinto 2:​14, 15 ese taunimanima ta ena kara bona ho pneu·ma·ti·kosʹ ia hahegeregeredia, unai hereva anina be “Lauma gaudia ia laloa tauna.”

Korinto Ginigunana karoa 12 ia lao 14 ese lauma helaga dainai idia karaia diba hoa karadia ia herevalaidia. Dirava be Keristen ginigunadia haida dekediai unai siahu haida ia henidia, badina ia ura ia hahedinaraia Israel besena ia gaukaralaia noho lasi to hari ia ese “Dirava ena Israela” Keristen taudia ia hahenamo henidia. (Galatia 6:16) Paulo be unai harihari gaudia ia torelaidia, ia gwau: “Lauma ena harihari gaudia be idauidau, to Lauma tamona sibona ese idia ia henia.” (1 Korinto 12:4) Lauma helaga ese ia henia harihari gaudia haida be aonega badana, diba, bona abidadama; danu, ma gau haida be peroveta karana, gado idauidau ai hereva karana, bona gado herevadia edia anina gwauraia hedinarai karana.​—1 Korinto 12:​8-11.

Paulo ese ia tore henidia Korinto Keristen taudia be horoa idia abia Dirava ena lauma helaga amo. Paulo ia gwau: “To Dirava ese umui emui kara dika ia huria vadaeni, ia ese helaga taudia umui ia halaoa vadaeni. Bona hari Dirava ena vairana dekenai umui be maoromaoro, Lohiabada Iesu Keriso dainai bona Dirava ena Lauma dainai.” (1 Korinto 6:11; 12:13) Oibe, idia iboudiai be ‘Lauma Helaga . . . ia henia, toana bamona. Idia diba iena gwauhamata gaudia ibounai dohore idia abia.’ (2 Korinto 5:5) To, idia haida sibona be lauma helaga amo harihari gauna ta idia abia. Bona idia momo be gado idauidau hereva karana idia ura henia, bona idia laloa kerere, idia laloa unai be anina bada gauna. Paulo ese ia tore henidia edia lalohadai ia hamaoromaoroa totona, bona ia hahedinaraia gado idauidau dekenai hereva karana be taunimanima momo do ia durudia lasi, to peroveta karana ese momo do ia durudia. Karoa 12 ena dokona kahanai, Paulo be Korinto taudia ia sisiba henidia, ia gwau: “Namona be umui ese harihari gaudia herea momokani do umui ura henia bada.”​—1 Korinto 12:​28-31.

Bena, karoa 14 ena hamatamaia gabuna ai, ia hagoadadia, ia gwau: “Lalokau ena dala umui tahua goadagoada be namo. Mai emui lalona ibounai danu [ta pneu·ma·ti·kaʹ] ena harihari gaudia danu do umui tahua. To harihari gauna namona momokani be Dirava ena hereva gwauraia hedinarai siahuna. Inai do umui abia be namo.” Dahaka idia tahua? Unai Keristen taudia be lauma helaga amo horoa karana idia tahua lasi, badina idia abia vadaeni. Paulo ena hereva anina be lauma helaga ena “harihari gauna,” karoa 12 ena dokona kahanai ia hereva bamona, ia hagoadadia unai gaudia idia tahua. Unai dainai, New World Translation of the Holy Scriptures lalonai, 1 Korinto 14:1 be inai bamona idia hahanaia: “Lauma helaga ese ia henia harihari gaudia umui tahua goadagoada.” Ma Baibel haida be unai hereva ta pneu·ma·ti·kaʹ idia hahanaia “lauma ena harihari gaudia” eiava “Lauma Helaga ese ia henia harihari gaudia.”

Unai hereva ena sivarai ita diba dainai, ita itaia karoa 14 ena dokona kahirakahira ai, Paulo be peroveta karana bona pneu·ma·ti·kosʹ ia herevalaidia hebou. Siri 1 dekenai hegeregerena, unai siri ma haida ese idia hahedinaraia iena hereva anina be lauma ena amo harihari gaudia idia abia. The New Testament in Modern Speech, R. F. Weymouth ese ia torea, be inai bamona ia hahanaia: “Bema ta ia laloa ia be peroveta tauna eiava mai ena harihari gauna lauma helaga amo, namona be ia diba lau torea gauna be Lohiabada ena hahegani.”

Oibe, Keristen iboudiai, herevana idia be peroveta karana ena harihari gauna eiava lauma helaga ena harihari gauna ma ta idia abia, to namona be Paulo ese ia torelaia sisiba gaudia, edena dala ai kongregesen dekenai idia karaia, idia abia dae bona idia badinaia be namo.