Duahia Taudia Edia Henanadai

Ita gwau diba tanobada helarona idia abia Keristani taudia hari inai negai ese Dirava ena lauma idia abia ena bada be lauma amo idia horoa Keristani taudia ese idia abia ena bada hegeregerena, a?

Inai henanadai be matamata lasi. Unai hereva tamona be The Watchtower, April 15, 1952, gauna lalonai, “Duahia Taudia Edia Henanadai” kahana ai idia herevalaia. Unai nega amo momo be Witness taudia ai idia lao vadaeni, unai dainai inai henanadai do ita laloa diba bona unai hereva gunadia do ita laloa lou danu.

Mai badina dainai haere be, oibe, mai edia abidadama mamoe idaudia tadikaka bona taihu be horoa taudia idia abia lauma helaga ena bada hegeregerena idia abia diba danu.​—⁠Ioane 10:⁠16.

To momokani, ena anina be ita gwau lasi taunimanima ta ta dekenai lauma ia gaukara dalana be tamona. Dirava ena lauma idia abia momokani hesiai taudia mai edia abidadama, Keristani negana do lasi lalonai, mani oi laloa. Lauma ena siahu idia abia dainai, idia haida ese dagedage animal idia alaia, gorere idia hanamoa, bona mase taudia idia hatorea isi danu. Bona idia ese Baibel lalonai lauma amo idia vara bukadia idia torea totona, lauma ena heduru idia abia be namo. (Gunalaia Taudia 13:​24, 25; 14:​5, 6; 1 King Taudia 17:​17-​24; 2 King Taudia 4:​17-37; 5:​1-​14) The Watchtower ia gwau: “Ena be idia be horoa oreana taudia lasi, to lauma helaga amo idia honu.”

Ma dala ta amo ita laloa neganai, mani Keristani ginigunadia edia nega ai idia horoa tatau bona hahine, lauma dalanai Dirava ena natuna taudia ai idia lao bona guba helarona idia abia taudia, ita laloa. Iboudiai be horoa taudia, to do ita gwau lasi ena anina be lauma ena gaukara dalana idia ibounai dekenai be tamona. Korinto Ginigunana karoa 12 ese unai ia hahedinaraia goevagoeva. Unuseniai aposetolo Paulo be lauma ena harihari gaudia ia herevalaia. 1Kor 12 Siri 8, 9, bona 11 ai inai ita duahia: “Tau ta dekenai hereva mai aonega ena diba ia henia. Bona unai Lauma Helaga tamona ese, ma tau ta dekenai hereva mai diba bada ena goada ia henia. Ma unai Lauma Helaga tamona ese tau ta dekenai abidadama ia henia, ma ta be gorere hanamoa siahuna ia henia. . . . Unai kara bona diba ibounai be Lauma Helaga tamona ese taunimanima edia lalona dekenai ia havaraia. Ia ese, iena ura hegeregerena, harihari gaudia taunimanima ta ta dekenai ia henia.”

Ia hedinarai, unai nega ai idia noho horoa taudia ibounai lasi be lauma ena harihari gaudia, hoa karadia dekenai, idia abia. Korinto Ginigunana karoa 14 ai, Paulo be kongregesen hebouna ta ia herevalaia, bona unuseniai ia gwau ta be idau momokani gadodia ai ia hereva diba, to idia ta lasi be gado ia hahanaia diba. To herevana, idia ta ta be nega ta ai lauma helaga amo Dirava ese ia horoa vadaeni. Do ita gwau idau momokani gadodia ai ia hereva diba tadikakana be lauma helaga taina bada ia abia bona idia noho taudia oredia be sisina, a? Lasi. Unai horoa taudia oredia be unai ese edia dala ia koua lasi, hegeregere Baibel idia lalo-pararalaia namonamo lasi ia ese ia lalo-pararalaia bamona eiava hetoho idia haheaukalaia diba lasi bamona. Lasi, to lauma helaga be idau momokani gadodia ia herevalaia tadikakana dekenai dala idauna ai ia gaukara. To, gau badana be ia bona idia be Iehova kahirakahira ai idia noho bona Paulo ia torea bamona, ‘Lauma Helaga dekena amo do idia honu’ noho.​—⁠Efeso 5:⁠18.

Orena taudia hari inai negai danu be Dirava ena lauma idia abia. Nega ta idia dekenai dala idauna ta ai ia gaukara​—⁠Dirava ese idia ia horoa bena lauma dalana ai iena natuna ai idia lao neganai. Unai murinai idia be ‘Lauma Helaga amo idia honu’ noho, unai amo bema Baibel ena anina idia ura lalo-pararalaia namonamo, haroro gaukara idia gunalaia, eiava sibodia edia o edia orea ena hetoho idia haheaukalaia totona, ena heduru do idia abia.

“Mamoe idaudia” taudia danu be dala idauidau ai lauma helaga ena heduru idia abia, ena be Dirava ese idia ia horoa lasi. The Watchtower, April 15, 1952, gauna ia gwau:

“Hari ‘mamoe idaudia’ be orena taudia hegeregerena, haroro gaukarana tamona idia karaia, hetoho negadia hegeregeredia lalonai, bona abidadama bona kara maoromaoro tamona idia hahedinaraia. Lauma ariana tamona lalonai idia aniani, aniani tamona idia ania, hereva momokani tamona idia abia hebou. Idia be tano do idia abia taudia dainai, bona tanobada helarona idia abia bona tano gaudia idia laloa momo dainai, reana idia ese tanobada matamatana ena oromana idia herevalaia siridia do idia laloa bada; to horoa taudia be guba helarona idia abia bona idia ta ta be lauma gaudia idia laloa bada dainai, Dirava ena hereva lalonai unai bamona gaudia do idia stadilaia goadagoada. . . . To ita hakoikoia diba lasi herevana be unai orea ruaosi ese hereva momokanidia tamona bona lalo-parara tamona idia abia hebou, bona unai be idia ta ta edia stadi dalana ese edia lalo-parara ena bada, guba gaudia bona tano gaudia dekenai, do ia hahedinaraia. Orea ruaosi ese Lohiabada ena lauma idia abia ena bada ia hegeregere diba, bona ruaosi be aonega bona lalo-parara idia henidia hegeregere, bona idia abia totona dala be hegeregere.”