Ladana Hereadaena Hunia Karana Ia Ore

Inai gau namona oi laloa, Muslim buka, Koran buka, bona Keristen taudia edia Baibel, ese unai ladana hereadaena idia gwauraia hedinarai. Inai sivarai amo unai ladana hereadaena ena anina, bona ia be gau badana, ia hahedinaraia. Danu, dahaka dainai unai ladana be mai anina taunimanima iboudiai dekenai, bona iseda dina vairai maurina dekenai, ia hahedinaraia.

TATAU bona hahine milion momo be inai tanobada dekenai guna idia mauri bona idia mase vadaeni. Kahirakahira idia iboudiai idia mase murinai edia ladadia idia boio, bona taunimanima ese idia lalodia tao lasi. To taunimanima ese ladana bada taudia haida idia lalodia tao​—hegeregere Avicenna, Edison, Pasteur, Beethoven, Gandhi, bona Newton. Taunimanima ese unai taudia edia ladana idia lalodia tao badina aonega karana ta eiava gau ta idia karaia dainai.

To, ma ladana ta ese taunimanima iboudiai edia ladana ia hereaia. Gunaguna bona hari, guba bona tanobada ibounai lalonai, idia vara kara namodia iboudiai idia vara unai ladana dainai. Oibe, unai ladana dainai, taunimanima be mai edia helaro moale dekenai do idia mauri daudau totona!

Taunimanima momo be unai ladana idia ura diba. Unai ladana idia tahua bona idia henanadailaia, to idia davaria lasi. Idia dekenai ia be hunia gauna ta. Oibe, bema unai tauna ese taunimanima dekenai Sibona ena ladana ia hahedinaraia lasi neganai, idia ta do idia diba lasi. To moale gauna be inai: unai ladana hereadaena hunia karana ia ore. Dirava ese unai hunia karana ia kokia badina ia ura ia idia abidadama henia taudia be iena kara do idia diba namonamo. Adam dekenai, bena murinai Abraham, Mose, bona Iena idaunegai abidadama hesiai taudia ma haida dekenai, ena ladana ia hahedinaraia.

Ladana Hereadaena Tahua Karana

Koran bukana lalonai ia gwau tau ta be “Revareva Helagadia ia diba momo.” (27:40) Unai siri ena anina gwauraia neganai, toretore ta ladana Tafsīr Jalālayn ia gwau: “Barkhiyā natuna Asaf be kara maoromaoro tauna. Dirava ena ladana hereadaena ia diba, bona ia boiboilaia neganai, haere ia davaria.” Unai hereva dainai Baibel ena toretore tauna ta Asaf ita laloa, Salamo 83:18 dekenai ia gwau: “Oi hadibadia, bona do idia diba, oiemu ladana be Iehova; oi sibona be Atai Momokani tanobada ibounai ataiai.”

Koran bukana 17:​2 ai, ita duahia, ia gwau: “Revareva be ai henia Mose dekenai bona idia be hakaua gaudia Israel bese taudia totona.” Unai Revareva lalodiai, Mose ese Dirava ia hereva henia, ia gwau: “Lau be dohore lau lao Israela taudia dekenai. Dohore lau hamaoroa idia dekenai, lau gwau, ‘Umui emui tamadia ena Dirava ia siaia lau umui dekenai.’ Vadaeni dohore idia henanadaia lau dekenai, idia gwau, ‘Iena ladana be daika?’ Lau be edana bamona dohore lau haere idia dekenai?” Dirava ese Mose ia haere henia, ia gwau: “Israela taudia dekenai dohore oi hamaoroa, oi gwau, ‘Iehova, umui emui sene taudia edia Dirava, Aberahamo ena Dirava, Isako ena Dirava, Iakobo ena Dirava, ia siaia lau umui dekenai.’ Lauegu ladana be inai, ia lao hanaihanai.”​—Esodo 3:​13, 15.

Idaunegai, Israel taudia be Dirava ena ladana hereadaena idia diba. Unai ladana ena leta haida be edia ladana ta ta dekenai idia gaukaralaia. Hari, idia gwauraia ladana ta be Abdullah, bona ena anina be “Dirava ena Hesiai Tauna,” idaunegai Israel taudia idia gwauraia ladana ta be Obadia, bona ena anina be “Iehova ena Hesiai Tauna.” Peroveta tauna Mose ena sinana ena ladana be Iokebed, bona reana ena anina be “Iehova be Hairai.” Ioane ena anina be “Iehova be Harihari Bada Ia Hahedinaraia Vadaeni.” Bona peroveta tauna Elia ena ladana ena anina be “Egu Dirava be Iehova.”

Peroveta taudia be unai ladana hereadaena idia diba bona mai hemataurai ida idia gaukaralaia. Revareva Helagadia lalonai nega 7,000 bona ma haida oi davaria diba. Iesu Keriso, Maria ena natuna, be unai ladana ia gwauraia bada Dirava ia guriguri henia neganai, ia gwau: “Tanobada dekenai oi henia lau dekenai taudia be oiemu ladana lau hadibaia vadaeni idia dekenai . . . bona do lau hadibaia noho, vadaeni lau dekenai oi henia lalokau badana be idia edia lalona dekenai do ia noho.” (Ioane 17:​6, 26) Unai tau Bayḍāwī ia torea bukana lalonai, Koran 2:​87, ena anina dekenai ia gwau, Iesu ese “Dirava ena ladana hereadaena amo mase taudia ia hamauridia.”

Vadaeni, dahaka ia vara dainai, unai ladana be hunia gauna ai ia lao? Unai ladana be ita ta ta ibounai eda dina vaira ena helaro dekenai ena anina be dahaka?

Unai Ladana be Hunia Gauna ai Ia Lao Dalana be Dahaka?

Taunimanima haida idia laloa Heberu gado ai “Iehova” ena ladana be “Allah” (Dirava). To unai ladana “Allah” be Heberu herevana ʼElo·himʹ hegeregerena, bona inai hereva ʼelohʹah (dirava) ena hairai be nega rua amo ia habadaia. To gari kava karana ia vara, bona Iuda taudia idia gari unai ladana hereadaena, Iehova, do idia gwauraia totona. Unai dainai, Revareva Helagadia idia duahidia neganai, bema unai ladana Iehova idia itaia, vaia edia kara idia gwau ʼAdho·naiʹ, unai hereva ena anina be “Lohiabada.” Gabu haida dekenai, idia ese Heberu hereva korikorina idia haidaua, “Iehova” idia torea lasi, to ʼAdho·naiʹ idia torea.

Kerisendom tomadiho edia gunalaia taudia ese unai kara idia tohotohoa. Iehova ena ladana idia kokia bona ena gabu dekenai “Dirava” (“Allah,” Arabic gado ai) bona “Lohiabada” idia torea. Unai kara dainai Toi Tamona hahediba koikoina ia vara dalana ia durua, bona unai hahediba be Revareva Helagadia dekenai ia noho lasi. Unai hahediba koikoi dainai taunimanima milion momo idia laloa kerere, idia ese Iesu bona lauma helaga idia tomadiho henidia bona idia laloa idia be Dirava danu idia hegeregere.a

Vadaeni, taunimanima momo be unai ladana hereadaena idia diba lasi be Iuda bona Kerisendom tomadiho edia gunalaia taudia edia kerere danu. To Dirava ia peroveta, ia gwau: “Lauegu ladana badana do lau hahelagaia, . . . bona bese idauidau do idia diba lau be Iehova.” Oibe, Iehova ese tanobada ena bese taudia iboudiai dekenai ena ladana do ia hahedinaraia. Dahaka dainai? Badina ia be Iuda taudia eiava bese ma haida eiava taunimanima ta ta edia Dirava mo sibona lasi. Iehova be taunimanima iboudiai edia Dirava.​—Esekiel 36:23; Genese 22:18; Salamo 145:21; Malaki 1:11.

Ladana Hereadaena Bona Iseda Helaro

Baibel ia gwau: “Dirava ena ladana idia noinoi henia taudia ibounai be mauri do idia davaria.” (Roma 10:13) Hahemaoro dinana dekenai hahemauri do ita abia totona Dirava ena ladana ita diba be gau badana. Iena ladana ita diba ena anina be iena lalohadai, kara, bona ura ita diba, bona iseda mauri lalonai ia gwauraia taravatu namodia do ita badinadia. Hegeregere, Abraham be Dirava ena ladana ia diba bona unai ladana dekenai ia guriguri. Unai dainai, Dirava dekenai ia hetura namonamo, ia abidadama henia, ia dekenai ia tabekau, bona ena hereva ia badinaia. Unai dala amo Abraham be Dirava ena turana ai ia lao. Unai hegeregerena, Dirava ena ladana ita diba neganai, unai ese ita ia veria Dirava kahirakahira dekenai, bona ita ia durua ia ita tura henia namonamo totona, bona iena lalokau dalana ita dogoatao auka.​—Genese 12:8; Salamo 9:10; Hereva Lada-isidia 18:10; Iakobo 2:23.

Baibel lalonai ita duahia, ia gwau: “Iehova garina idia gari taudia be idia hereva heheni, bona Iehova ese ia hakala henidia bona edia hereva ia kamonai, bona Iehova garina idia gari taudia bona iena ladana idia laloa taudia edia ladana ia laloatao totona buka ta idia torea.” (Malaki 3:16) Unai ladana hereadaena ita ‘laloa’ ena badina be dahaka? Iehova ena ladana ena anina be “Ia ese Ia Havaraia.” Unai hereva ese ia hahedinaraia Iehova be Ia sibona ia hasiahua ia be gwauhamata Hagugurua Tauna ai ia lao totona. Hanaihanai ia ese ena ura ia hagugurudia. Ia be siahu ibounai Diravana, ia sibona be gau ibounai Havaraia Diravana, bona ia dekenai namo karadia iboudiai idia noho. Hereva tamona sibona amo Dirava ena lalohadai bona kara hereadaedia ita gwauraidia hedinarai diba lasi. To Dirava ese sibona ena ladana hereadaena ia abia hidi​—Iehova—​unai ladana ese iseda lalona ia veria iena kara, bona gaukara iboudiai ita lalodia totona.

Revareva Helagadia lalonai, Dirava ese iena ura taunimanima dekenai ia hahedinaraia. Iehova Dirava ese taunimanima ia havaradia mai moale danu mauri hanaihanai Paradaiso dekenai do idia abia totona. Iena ura be taunimanima iboudiai be bese tamona ai do idia lao, lalokau bona maino dekenai do idia lalo-tamona. Nega ia daudau lasi bena lalokau Diravana ese iena ura do ia hagugurua.​—Mataio 24:​3-14, 32-42; 1 Ioane 4:​14-21.

Taunimanima ese hisihisi idia davaria ena badina bona hahemauri do idia abia diba dalana ia hahedinaraia. (Apokalupo 21:4) Salamo 37:​10, 11 ai, ita duahia hereva be inai: “Nega sisina murinai, kara dika tauna do ia noho lasi; ena gabu do oi tahua, to do oi davaria lasi. To manau taudia ese tanobada do idia abia, bona maino bada dainai do idia moale dikadika.”​—Koran 21:105 itaia danu.

Oibe, taunimanima be Dirava ena ladana hereadaena do idia diba. Bese iboudiai do idia diba ia be Iehova. Unai ladana hereadaena ita diba, ita gwauraia hedinarai, bona ia dekenai ita tabekau be hahenamo badana! Unai dala amo, ita ta ta ibounai dekena amo Dirava ena moale gaukarana do ia hagugurua, ia gwau: “Ia ese lau ia lalokau henia dainai, lau ese do lau hamauria. Lau ese do lau naria badina be lauegu ladana ia diba. Lau dekenai do ia boiboi, bona lau ese do lau haere henia. . . . Mauri dinadia momo do lau henia, bona ia dekenai lauegu hahemauri do lau hahedinaraia.”​—Salamo 91:​14-16.

[Footnotes]

[Picture on page 5]

Ia araia au dekena amo Iehova ese Mose dekenai ia hedinarai, ia gwau ia be ‘Iehova, Abraham ena Dirava’

[Credit Line]

Moses and the Burning Bush, by W. Thomas, Sr.