Basileia Haroro Ripoti
Mauri Hahelagaia Karana Idia Matauraia
BAIBEL ese ia hahedinaraia rara be gau badana Dirava vairanai, unai dainai rara gaukaralaia kerere karana ia gwauraia dika. (Levitiko 17:14; Kara 15:19, 20, 28, 29) Baibel ena taravatu dainai, Iehova ena Witness taudia ese rara atoa hanai karana idia abia dae lasi.
Doketa taudia bona hospital ai idia gaukara taudia durudia totona bena Iehova ena Witness taudia edia tomadiho unai kara dekenai idia lalo-pararalaia, bona do idia diba Witness taudia idia ura heduru haida idia abia, Watch Tower Society oreana ese tano idauidau ai Hospital Liaison Committees (HLC) [Gorere Taudia Durua Komiti] momo idia hegaegaelaidia. Unai komiti ena memba taudia ese hospital idia vadivadi henia bona medikal gaukara idia karaia taudia ida idia herevahereva. Vanegai, Poland ena siti 12 ai, hebou 200 bona ma haida idia karaia, idia hebou doketa taudia be 500 bona ma haida, idia be hospital edia biagudia eiava hospital wodi edia naria taudia. Hospital ta idia vadivadi henia neganai inai ekspiriens ta ia vara:
“Hebou ta Cardio-Surgical Clinic, Zabrze ai, idia abia neganai, gau namona ta ia vara. Lagani 1986 amo unai hospital ena doketa taudia ese iseda tadikaka idia ivaia neganai rara idia gaukaralaia lasi. Ema bona hari, unai bamona ivaia karadia idauidau 40 idia karaia. Unai hospital ese Poland ena gabu ibounai amo bona ma gabu haida amo gorere taudia idia abia dae. Miniti 50 idia herevahereva hebou murinai, hospital biaguna ia durua tauna ese gorere taudia haida dekenai Gorere Taudia Durua Komiti ia gwauraidia hedinarai, bona ia gwau: ‘Inai taudia be Iehova ena Witness taudia. Idia be aiemai hospital taudia danu idia gaukara hebou, bona ai idia durua. Witness taudia sibodia lasi, to hospital ai idia gorere taudia iboudiai idia durua. Iehova ena Witness taudia edia heduru dainai, hari gorere taudia edia kudou ai ivaia neganai, rara ai gaukaralaia lasi.
“ ‘Hegeregere, unai hahine ai ivaia neganai, [gorere hahine ta ia dudui henia] rara ai gaukaralaia lasi, bona Monday ai ena ruma dekenai do ia giroa lao. Lau ura hahedinaraia, hari rara ai gaukaralaia momo lasi, badina dika ia havaraia diba. Rara ese HIV gorerena bona hepatitis gorerena ia havaraia diba, bona gorere taudia idia namo haraga lasi.
“ ‘Lau be Katolik tauna, to aiemai ruma dekenai taunimanima ma haida edia lalohadai tomadiho dekenai ai gwauraia dika lasi. Nega ta ai, lau bona egu natudia ai raka lao Slaski Stadium dekenai. Guna, unai steidiam idia naria namonamo lasi, to ai itaia neganai ena toana ia idau momokani. Unuseniai ia gaukara tauna ta lau henanadai henia, edena bamona unai gabu ena toana ia idau. Ia gwau, steidiam biagudia idia laloa dala be lasi steidiam idia hanamoa totona, to Iehova ena Witness taudia ese idia rentalaia, bona idia hanamoa.
“ ‘Unai dainai, inai taudia edia amo gau momo ita diba. Lau laloa inai wodi dekenai tomadiho idauna ita lalo-namo henia be namo.’ Bena, murinai do idia ivaia Witness hahine ta ia dudui henia, bona ia gwau: ‘Inai hahine be Iehova ena Witness hahinena ta, bona ia do ai ivaia to rara do ai gaukaralaia lasi.’ ”
Iehova ena Witness taudia ese taunimanima idia doridia lasi edia tomadiho idia abia dae totona, to aposetolo taudia edia haheitalai idia tohotohoa, bona “Dirava [idia] kamonai henia be namo, taunimanima [idia] kamonai henia be dika.” (Kara 5:29) Unai be mai anina rara matauraia karana dekenai danu. Haida ese edia tomadiho ena abidadama unai hereva dekenai idia matauraia neganai, idia moale.