King ta ese Iehova Ena Gabu Helagana Ia Hadikaia
“Edia Dirava idia diba taudia be do idia kwalimu bona edia kara ena anina do ia vara.”—DANIEL 11:32.
1, 2. Taunimanima edia histori dekenai dahaka tuari badana ia noho lagani 2,000 lalodiai?
IDIA tuari pavapavadia rua idia hepapahuahu ta ese ta ia hereaia totona. Unai lagani 2,000 lalodiai idia hepapahuahu neganai, nega haida ta ia goada, ma gabeai ta ia goada. Iseda nega lalonai unai hepapahuahu be mai anina taunimanima kahirakahira iboudiai dekenai tanobada ibounai dekenai, bona Dirava ena bese taudia edia abidadama ia tohoa. Hepapahuahu ia doko dalana be unai pavapava rua idia diba lasi. Unai histori ena sivarai be gunaguna ia perovetalaia idaunegai peroveta tauna Daniel dekenai.—Daniel, karoa 10 ia lao 12.
2 Unai peroveta hereva ese not kahana ena king bona saut kahana ena king edia hepapahuahu ia herevalaia bona “Your Will Be Done on Earth” bukana lalonai ena hereva iboudiai idia gwauraia namonamo.a Unai buka lalonai ia hahedinaraia, guna not kahana ena king be Suria, Israel ena amo not kahanai ia noho. Gabeai, Roma ese unai dagi ia abia. Gunaguna momokani, saut kahana ena king be Aigupito.
Dokona Negana Ena Hepapahuahu Ta
3 Daniel dekenai unai hereva ia hahedinaraia aneruna ia gwau: “To oi, Daniel, hari hereva oi hunidia bona buka oi koua momokani, ela bona dokona negana. Momo do idia loaloa, bona diba momokani do ia bada.” (Daniel 12:4) Oibe, unai peroveta ese dokona negana ia herevalaia—unai nega be 1914 ai ia matamaia. Unai negana ai, taunimanima momo be Revareva Helagadia lalonai “do idia loaloa,” bona lauma helaga ena heduru amo, diba momokanina, Baibel ena peroveta hereva dekenai lalo-parara danu, be do ia bada. (Hereva Lada-isidia 4:18) Unai nega ia heau noho, bona Daniel ena peroveta herevadia momo edia anina idia gwauraia hedinarai vadaeni. Unai dainai, 1993 lalonai not kahana ena king bona saut kahana ena king perovetalaidia herevana dekenai dahaka ita laloa, badina be lagani 35 gunanai unai buka “Your Will Be Done on Earth” idia halasia?
4, 5. (a) Daniel ese not kahana ena king bona saut kahana ena king ia perovetalaidia herevana dekenai, lagani 1914 be edena bamona ita makaia diba? (b) Aneru ena hereva hegeregerena, dahaka do ia vara 1914 neganai?
4 Dokona negana ia matamaia 1914 neganai, bona tanobada ibounai tuarina ginigunana bona ma tanobada hisihisidia haida amo unai nega ia makaia, Iesu ese guna ia gwauraia hegeregerena. (Mataio 24:3, 7, 8) Unai lagani be Daniel ena peroveta hereva dekenai ita makaia diba, a? Oibe. Dokona negana ia matamaia negana be Daniel 11:29 dekenai “ia gwauraia guna negana.” (“Your Will Be Done on Earth” bukana, rau 269-70 itaia.) Daniel ena nega lalonai, Iehova ese unai nega ia gwauraia guna, badina ia be Daniel karoa 4 ese ia perovetalaia herevadia lalonai lagani 2,520 edia dokonai ia mai negana.
5 Unai lagani 2,520 lalodiai, Ierusalem hadikaia ore negana 607 B.C.E. ai, Daniel be tau matamatana negana amo ela bona 1914 C.E. neganai, idia gwauraidia “idau bese edia nega.” (Luka 21:24) Unai nega ia doko neganai dahaka politikol karadia do idia vara? Aneru ta ese Daniel dekenai unai ia hahedinaraia. Aneru ia gwau: “Ia gwauraia guna negana ai [not kahana ena king] be do ia lao lou, bona saut kahana ai do ia mai; to inai negana ai be nega gunana hegeregerena ai do ia vara lou lasi.”—Daniel 11:29.
Unai King be Tuari ta Lalonai Ia Kwalimu Lasi
6 Germany be 1914 neganai not kahana ena king dagina ia abia, edia lohia be Kaiser Wilhelm. (“Kaiser” be Roma dagina “Kaisara” amo idia abia.) Europe dekenai tuari maragidia idauidau idia vara neganai, unai be not kahana ena king bona saut kahana ena king edia hepapahuahu toana. Unai neganai, Britain ese saut kahana ena king dagina ia abia, idia be haraga herea Egypt idia dogoatao, guna unai be saut kahana ena king lohia gabuna. Unai tuari ia lao noho lalonai, Britain be heduru ia abia United States of America amo, guna Britain ese unai gabu ia lohiaia. Saut kahana ena king be Anglo-America Tanobada Siahuna ai ia lao, unai be histori dekenai ia siahu bada herea gavamanina.
7, 8. (a) Tanobada ibounai tuarina ginigunana lalonai, edena dala ai gau iboudiai be ‘nega gunana hegeregerena ai idia vara lasi’? (b) Tanobada ibounai tuarina ginigunana be dahaka ia havaraia, to peroveta herevana hegeregerena, not kahana ena king be edena bamona ia karaia?
7 Unai king rua be guna idia hepapahuahu neganai, Roma Gavamanina be not kahana ena king dagina ia abia neganai, nega momo ia kwalimu. Unai neganai, ‘nega gunana hegeregerena ai idia vara lasi.’ Badina be dahaka? Badina not kahana ena king be unai tuari lalonai ia kwalimu lasi. Badina ta be “Kitim lagatoidia” be not kahana ena king dekenai idia mai tuari totona. (Daniel 11:30) Unai lagatoi be dahaka? Daniel ena nega lalonai, Kitim be Cyprus, bona tanobada ibounai tuarina ginigunana ia matamaia murinai, Britain ese Cyprus ia dogoatao. Ma danu, The Zondervan Pictorial Encyclopedia of the Bible bukana ia gwau unai ladana Kitim “be W[est] ena kahana momo ia gwauraia, to anina badana be lagatoi momo idia gaukaralaidia W[est] kahana tanodia.” New International Version bukana ia gwau “Kitim lagatoidia” be “west kahana edia kone tano lagatoidia.” Tanobada ibounai tuarina ginigunana lalonai, Kitim lagatoidia be Britain ena bouti, idia be Europe ena west kahana konedia dekenai idia noho. Gabeai Britain ena Navy be ia goada ia lao badina west kahana ai ia noho North America tanona amo bouti idia mai.
8 Unai tuari lalonai, not kahana ena king do ia “gari” bona 1918 neganai ia gwau tuari do ia hadokoa. To ia ore lasi. “Mai baduna ida do ia lao lou, gwauhamata helagana hadikaia karana do ia karaia. Do ia lao lou bona gwauhamata helagana idia rakatania taudia do ia kamonai henidia.” (Daniel 11:30) Aneru be unai bamona ia peroveta, bona unai bamona ia vara.
King be Kara ta Ia Karaia
9 Tuari murinai, lagani 1918 neganai, England bona America ida idia kwalimu gavamanidia be Germany dekenai maino karaia totona gwaubouna ta idia karaia, to ena hereva lalonai Germany idia panisia bamona, idia ura ela bona ta ia gwauraia lasi negana ai Germany taudia do idia hitolo. Unai dainai, lagani momo hisihisi bada dekenai idia noho murinai, Germany taudia edia noho ia hegeregere Adolf Hitler be siahu ia abia totona. Lagani 1933 neganai siahu badana ia abia bona maoromaoro ia be “gwauhamata helagana” ia hadikaia toho, unai be Iesu Keriso ena horoa tadikakadia. Unai ia karaia neganai ia be abidadama Keristen taudia dekenai karana ta ia karaia momokani, idia momo be mai dagedage bada ida ia hahisidia.
10. Heduru ia tahua neganai, Hitler ese daidia ia tura henidia, bona dahaka ia vara?
10 Hitler be moni gaukaralaia dalana ai ia goada bona gavamani ma haida danu gaukara hebou karadia momo ia karaia, unai daladia ai anina bada karadia ia karaia danu. Lagani haida sibona lalodiai, ia ese Germany ia hagoadaia lou ia be siahu badana ai ia lao totona, unai kara dekenai “gwauhamata helagana idia rakatania taudia” ese idia durua. Idia be daidia? Ia hedinarai idia be Kerisendom ena gunalaia taudia, idia gwau Dirava ida gwauhamata ta idia karaia to nega daudau lalonai idia be Iesu Keriso ena hahediba taudia idia rakatania vadaeni. Hitler be “gwauhamata helagana idia rakatania taudia” ia boiridia idia heduru totona. Rome ena pope be ia ida gavamani bona dubu kontraka ia karaia; bona Hitler ena lagani 12 dagedage lohia negana lalonai Roman Katolik Dubuna, bona Germany ena Protestan dubudia danu, ese Hitler idia durua.
11. Not kahana ena king be edena dala ai ‘dubu ia hamiroa’ bona “idia henia loulou gauna, do idia abia oho”?
11 Hitler ia goada bada dainai tuari ia karaia, aneru be guna ia perovetalaia maoro hegeregerena. “Bona iena tuari oreadia haida do idia hedinarai, dubu bona ruma aukana do idia hamiroa, bona gole-oho boubouna, idia henia loulou gauna, do idia abia oho.” (Daniel 11:31a) Idaunegai Israel dekenai, ruma helagana be Ierusalem dubuna kahana ta. To, Iuda taudia ese Iesu idia dadaraia neganai, Iehova ese idia bona edia dubu ia dadaraidia. (Mataio 23:37–24:2) Keristen ginigunadia edia negana amo, Iehova ena dubu be lauma dalanai dubuna ta, ena helaga herea gabuna be guba dekenai bona lauma dalanai dubu ena ariara be tanobada dekenai, unuseniai Hahelaga Tauna Badana, Iesu, ena horoa tadikakadia idia hesiai. Lagani 1930 murina amo, hutuma bada be horoa orena taudia ida idia tomadiho hebou; unai dainai, ita gwau diba ‘Dirava ena dubu lalonai’ idia hesiai. (Apokalupo 7:9, 15; 11:1, 2; Heberu 9:11, 12, 24) Tanobada dekenai unai dubu ena ariara ia miro badina not kahana ena king ese ia lohiadia gabudia ai horoa orena taudia bona edia turadia be dagedage bada idia abia. Unai dagedage bada dainai idia henia loulou gauna—Iehova ena ladana hahelagaia haroro gaukarana—idia abia oho. (Heberu 13:15) To, histori ia hahedinaraia, ena be mai abidadama horoa Keristen taudia, bona “mamoe idaudia” danu, be hisihisi bada idia abia, to hehuni dekenai idia haroro noho.—Ioane 10:16.
“Gau Dika Rohorohona”
12 Tanobada ibounai tuarina iharuana be kahirakahira ia doko neganai, ma gau ta ia vara. “Gau dika rohorohona, gabu ibounai ia hadikaia gauna do idia haginia.” (Daniel 11:31b) Idia diba unai “gau dika rohorohona,” Iesu ese ia gwauraia vadaeni gauna, be League of Nations; Apokalupo ia gwau unai be kakakaka dagedage gauna bona guri dobuna dekenai ia diho. (Mataio 24:15; Apokalupo 17:8; Light, Buka Iharuana, rau 94 itaia.) Unai ia vara Tanobada Ibounai Tuarina Iharuana ia matamaia neganai. To, Iehova ena Witness taudia edia 1942 Tanobada Matamatana Tiokratik Hebouhebouna dekenai, Watch Tower Bible and Tract Society ena presiden ihatoina, Nathan H. Knorr, ese Apokalupo 17 ena peroveta herevana ia gwauraia bona ia gwau unai dagedage gauna be guri dobuna amo do ia daekau lou.
12, 13. “Gau dika rohorohona” be dahaka, bona hesiai tauna mai ena kamonai bona mai ena kara maoromaoro oreana ese ia gwauraia guna hegeregerena, edena negai bona edeseniai unai gauna ia daekau lou?
13 Histori ese iena hereva ia hamomokania. August bona October 1944 huanai, Dumbarton Oaks rumana United States dekenai, United Nations edia taravatu idia torea hamatamaia. Bese 51 ese unai taravatu idia abia dae, guna idia gwauraia Soviet Union danu ese ia abia dae, bona October 24, 1945 ai, unai taravatu idia haginia neganai, ia ore vadaeni League of Nations be guri dobuna amo ia daekau lou bamona.
14. Edena negai bona edena dala ai not kahana ena king dagina ia idau?
14 Germany be tanobada ibounai tuaridia rua negadia ai ia be saut kahana ena king ena inai tauna badana. Tanobada Ibounai Tuarina Iharuana murinai, Germany ena kahana ta be saut kahana ena king ena kahana dekenai ia hanai. To Germany ena kahana ta be ma gavamani siahuna ta ena kahana dekenai ia hanai. Komiunis gavamanidia, unai be Germany kahana ta danu, be Anglo-America bona edia turadia idia inai henidia, bona king rua edia hepapahuahu be America bona Russia edia huanai politikol tuarina ai ia lao.—“Your Will Be Done on Earth” bukana, rau 264-84 itaia.
King Bona Gwauhamata
15 Aneru ia gwau: “Gwauhamata herevana idia hadikaia taudia be digara herevadia amo do ia hakaudia kerere, to edia Dirava idia diba taudia be do idia kwalimu bona edia kara ena anina do ia vara.” (Daniel 11:32a) Gwauhamata herevana idia hadikaia taudia be daidia? Idia be Kerisendom ena gunalaia taudia, idia gwau idia be Keristen to edia kara ese ia hahedinaraia idia be Keristen ladana idia hamiroa. Tanobada ibounai tuarina iharuana lalonai, “Soviet Gavamani taudia ese Dubu taudia edia heduru idia tahua, idia ura edia bese naria totona kohu bona lalona hagoadaia heduruna idia abia.” (Religion in the Soviet Union, Walter Kolarz ese ia torea) Tuari murinai, ena be not kahana ena king dagina ia abia gavamanina ia gwau Dirava ia noho lasi, to dubu gunalaia taudia idia ura unai taudia ida idia turana noho.b Unai dainai, Kerisendom be tanobada gauna ai ia lao momokani—Iehova ena matana dekenai unai be hereva momokani dadaraia kara dika rohorohona.—Ioane 17:14; Iakobo 4:4.
16, 17. “Aonega taudia” be daidia, bona not kahana ena king henunai edia noho be edena bamona?
16 To, Keristen momokanidia be edena bamona? “Edia Dirava idia diba taudia be do idia kwalimu bona edia kara ena anina do ia vara. Aonega taudia taunimanima bogaragidiai idia noho ese lalo-parara be taunimanima momo do idia henia. Bona tuari kaia bona lahi dainai, guia bona dadidadi dainai do idia hekwakwanai, dina haida lalodiai.” (Daniel 11:32b, 33) Ena be not kahana ena king henunai idia noho Keristen taudia be ‘gavamani idia kamonai henia,’ to idia be tanobada ena kahana lasi. (Roma 13:1; Ioane 18:36) Idia naria namonamo Kaisara ena gau be Kaisara dekenai idia henia totona, to “Dirava ena gau be Dirava dekenai [idia] henia.” (Mataio 22:21) Unai dainai, edia abidadama ia tohoa.—2 Timoteo 3:12.
17 Dahaka ia vara? Nega tamona lalonai idia “kwalimu” bona idia “hekwakwanai.” Idia hekwakwanai badina dagedage idia abia bona idia hisihisi bada, haida idia mase danu. To idia kwalimu badina idia momo idia abidadama noho. Oibe, tanobada dekenai idia kwalimu, Iesu ese tanobada ia kwalimu henia hegeregerena. (Ioane 16:33) Ma danu, herevana dibura rumana lalonai eiava tuari neganai dibura kamepa dekenai idia noho, to edia haroro idia hadokoa lasi. Idia karaia neganai, ‘lalo-parara be taunimanima momo idia henia.’ Ena be dagedage idia abia, to not kahana ena king ese ia lohiadia tanodia ai, Iehova ena Witness taudia edia namba ia bada daekau. “Aonega taudia” edia abidadama dainai, hari unai tanodia dekenai “hutuma bada” taudia edia namba ia bada noho.—Apokalupo 7:9-14.
18. Not kahana ena king henunai idia noho horoa orena taudia be dahaka “heduru sisina” idia abia?
18 Dirava ena bese taudia idia abia dagedage ia herevalaia neganai, aneru ia gwau: “To idia hekwakwanai neganai heduru sisina do idia abia.” (Daniel 11:34a) Edena bamona unai ia vara? Gau tamona be, tanobada ibounai tuarina iharuana dekenai saut kahana ena king ia kwalimu dainai, ena inai tauna ena henunai idia noho Keristen taudia edia hisihisi bada ia ore. (Apokalupo 12:15, 16 itaia danu.) Gabeai, not kahana ena king dagina idia abia gavamanidia ese idia dagedage henidia taudia be nega haida hisihisi idia abia lasi, bena America bona Russia huanai ia noho politikol tuarina ia ore ia lao neganai, politikol lohia taudia momo idia lalo-parara abidadama Keristen taudia ese idia do idia hadikaia lasi bona unai dainai gwaumaoro idia henidia edia tomadiho idia karaia totona.c Danu, edia namba ia bada noho hutuma bada taudia ese horoa taudia idia durudia, abidadama dekenai idia haroro henidia dainai bona idia mai heduru totona, Mataio 25:34-40 ese ia gwauraia bamona.
Dirava Ena Bese Taudia Hagoevaia Karana
19 To unai neganai idia gwau idia ura Dirava hesiai henia taudia haida edia ura ia kerere. Aneru ena sisiba be inai: “Hutuma be idia dekenai do idia lao mai edia digara herevadia ida. Bona aonega taudia haida do idia hekwakwanai, idia namo bona idia goeva bona idia kurokuro totona, ela bona nega dokona; badina idia gwauraia guna negana ia do mai lasi.”d (Daniel 11:34b, 35) Haida be hereva momokani idia ura henia, to idia ura lasi Dirava idia hesiai henia totona gwauhamata korikorina ta idia karaia. Haida edia kara be sivarai namona idia abia dae bamona, to idia be spai taudia, lohia taudia ese idia siaidia hehuni taudia. Tano ta amo ripoti ta ia gwau: “Unai kara kerere taudia haida be Komiunis goada taudia, idia be Lohiabada ena orea dekenai idia vareai bona gaukara goadagoada toana idia karaia koikoi, idia be dagi badadia idia abia danu.”
20. Orea dekenai idia vareai koikoi taudia dainai, abidadama Keristen taudia haida idia “hekwakwanai” neganai, badina be dahaka Iehova ese unai kara ia koua lasi?
20 Orea dekenai idia vareai koikoi taudia be siahu taudia dekenai abidadama taudia haida idia henidia. Badina be dahaka Iehova ese unai kara ia koua lasi? Idia namo bona idia goeva totona. Iesu be ‘ia abia hisihisina amo Dirava kamonai henia dalana ia diba’ hegeregerena, unai abidadama taudia be edia abidadama tohoa karana amo haheauka idia diba. (Heberu 5:8; Iakobo 1:2, 3; Malaki 3:3 itaia danu.) Unai dainai idia ‘namo, idia goeva, bona idia kurokuro.’ Gwauraia guna negana ia mai neganai, edia haheauka dainai davana namona do idia abia abidadama taudia be do idia moale bada herea. Unai do ita itaia Daniel ena peroveta hereva ma haida ita itaia neganai.
[Footnotes]
a Watchtower Bible and Tract Society of New York, Inc. ese idia printaia, bona English gado ai idia halasia 1958 neganai, Iehova ena Witness taudia edia “Dirava Ena Ura” Intenesenel Hebouhebou dekenai.
b November 1992 ena World Press Review magasin lalonai, The Toronto Star niuspepa amo sivarai ta idia abia, ia gwau: “Idia hanai lagani haida lalodiai, Russia taudia idia itaia edia tano ena histori dekenai hereva momo be koikoi. To dubu bona komiunis lohia taudia idia gaukara hebou momo sivaraina dekenai idia hoa bada.”
c The Watchtower, July 15, 1991 gauna, rau 8-11 itaia.
d “Ela bona nega dokona” ena anina ta be reana “dokona negana lalonai.” Iniseniai, unai hereva “ela bona” be Daniel 7:25, Aramaic Baibel lalonai, bona ena anina be “lalonai” eiava “dekenai.” Unai hereva ena anina be Heberu Baibel 2 Hanua Pavapavadia 9:22, Iobu 20:5, bona Hahemaoro Taudia 3:26 lalodiai edia anina hegeregerena. To Baibel momo lalonai, Daniel 11:35 idia hahanaia neganai idia torea “ela bona,” bema unai be lalohadai maorona, iniseniai “ela bona dokona negana” anina be ela bona Dirava ena bese taudia edia haheauka negana ia ore.—“Your Will Be Done on Earth” bukana, rau 286 itaia danu.
Oi Laloatao, A?
◻ Badina be dahaka hari inai nega lalonai Daniel ena peroveta herevana dekenai iseda diba ia bada be namo?
◻ Not kahana ena king be edena dala ai ‘ia badu bona karana ta ia karaia’?
◻ Hesiai oreana taudia be edena dala ai “gau dika rohorohona” ia daekau lou dalana idia gwauraia guna?
◻ Horoa orena taudia be edena dala ai idia ‘hekwakwanai, idia kwalimu, bona heduru sisina idia abia’?
3. Aneru ia gwau not kahana ena king bona saut kahana ena king perovetalaidia herevana dekenai edena negai lalo-parara do idia abia, bona edena bamona do idia abia?
6. Lagani 1914 neganai, not kahana ena king be daika, bona saut kahana ena king be daika?
9. Dahaka ia vara dainai Adolf Hitler ese siahu ia abia, bona dahaka “karana ta ia karaia”?
15. “Gwauhamata herevana idia hadikaia taudia” be daidia, bona not kahana ena king ida edena bamona idia turana karaia?
19. (a) Edena dala ai haida be idia dekenai “idia lao mai edia digara herevadia ida”? (b) “Ela bona nega dokona” herevana ena anina be dahaka? (Futnot itaia.)
[Picture on page 15]
Saut kahana ena king ese 1918 neganai not kahana ena king ia kwalimu henia, to Hitler ena lohia henunai, not kahana ena king be siahu ia abia lou momokani
[Picture on page 16]
Kerisendom ena gunalaia taudia be not kahana ena king ida idia turana henia
[Credit Line]
Zoran/Sipa Press