Lohia Badana Mikael Ia Kwalimu Negana Dokona

“Unai neganai Mikael do ia toreisi, ia be lohia badana ta; emu taunimanima edia natuna maruanedia totona ia gini noho tauna.”​—DANIEL 12:1.

1. Tanobada lohia taudia be Iehova ena lohia dalana dekenai edena bamona idia laloa, bona edena dala ai not kahana ena king danu be unai bamona?

“IEHOVA be daika? Badina dahaka iena hereva dohore lau kamonai? Israela taudia lauegu imana dekena amo dohore lau negea, badina be dahaka?” (Esodo 5:2) Farao be unai hereva amo Mose ia hevaseha henia. Farao ia ura lasi ia gwau Iehova be Dirava hereana, Farao ia ura hesiai dekenai Israel taudia ia guidia noho. Lohia taudia ma haida be unai bamona, Iehova idia dadaraia, bona Daniel ese ia perovetalaidia king taudia danu be unai bamona. (Isaia 36:​13-20) Not kahana ena king ese unai kara dekenai ma kara haida ia karaia danu. Aneru ia gwau: “Sibona do ia abia isi, sibona do ia heagi, dirava iboudiai ataiai bona hoa herevadia do ia gwauraia, dirava edia Dirava latanai. . . . Ena sene taudia edia dirava do ia kamonai henia lasi; bona hahine lalokau henia eiava dirava idauna ta do ia kamonai henia lasi, badina be sibona do ia abia isi, iboudiai edia ataiai.”​—Daniel 11:​36, 37.

2, 3. Not kahana ena king be edena dala ai “ena sene taudia edia dirava” ia dadaraia idau “diravana” ta ia tomadiho henia totona?

² Unai peroveta herevadia ia hagugurudia neganai, not kahana ena king ese “ena sene taudia edia dirava” ia dadaraidia, unai be Roma edia dirava koikoidia eiava Kerisendom ena Toi Tamona diravadia. Hitler ese Kerisendom ia gaukaralaia sibona ena ura karaia totona, to ena gabu dekenai ia ura Germany dubu matamatana ta ia haginia. Hitler ena dagi ia abia gavamanina ese dirava ia noho lasi tomadihona ta ia gwauraia bada. Unai dainai not kahana ena king be sibona ia gwauraia ia be dirava ta, ‘iboudiai ataiai sibona ia abia isi.’

³ Unai peroveta hereva ma ia gwau: “Gabu aukadia diravana be ena gabu dekenai do ia hanamoa; ena sene taudia idia diba lasi diravana be golo bona siliva, dava bada nadidia bona dava bada herahera gaudia amo do ia hanamoa.” (Daniel 11:38) Not kahana ena king be hari inai nega ena tuari karana saiens dalana dekenai, “gabu aukadia diravana,” ia abidadama henia. Dokona negana ia matamaia ela bona ia doko neganai, ia be unai ‘dirava’ amo hahemauri ia tahua, bona unai boubou patana dekenai taga bada ia henia.

4. Not kahana ena king be edena dala ai ia kwalimu?

⁴ “Gabu auka hereadia do ia negea, dirava idauna ta ena heduru dainai. Daika ese ia abia dae do ia hanamoa bada, bona hutuma edia lohia ai do ia halaoa; bona tano be mai davana ida do ia haria.” (Daniel 11:39) Tuari “dirava idauna” ia tabekau henia dainai, not kahana ena king be “karana ta ia karaia,” ia hamomokania “nega dokonai” ia be tuari siahu bada lohiana ta. (2 Timoteo 3:1) Iena lalohadai idia abia dae taudia be politikol dalanai, moni dalanai, bona nega haida tuari dalanai, ia durudia.

“Dokona Neganai”

⁵ Daniel 11:40a ia gwau: “Dokona neganai saut kahana ena king be ia danu do idia doria heheni.” Haida idia gwau unai siri bona murina siridia edia guguru negana be gabeai. To, bema inai siri dekenai “dokona neganai” ena nega be Daniel 12:​4, 9 ena nega hegeregerena, namona be inai herevadia hagugurua negana be dina gabedia edia nega lalonai ita tahua. Saut kahana ena king be hari inai nega lalonai not kahana ena king ia “doria,” a? Oibe, ia doria. Tanobada ibounai tuarina ginigunana murinai, unai not kahana ena king ia panisia maino karaia gwauhamatana be “doria” karana, unai king do ia badu lou totona. Tanobada ibounai tuarina iharuana dekenai ia kwalimu murinai, saut kahana ena king be ena inai tauna dekenai hagaria bada niuklia tuari kohudia ia poinidia, bona tuari orea mai siahuna, NATO, ia haginia unai king ia koua totona. Lagani idia lao noho neganai, iena “doria” karana dekenai mai paua masinidia ida unai king ia spai henia, bona politikol bona tuari karadia amo ia inai henia.

5, 6. Saut kahana ena king be edena dala ai “doria” karana ia karaia, bona not kahana ena king be dahaka ia karaia?

⁶ Not kahana ena king be edena bamona ia karaia? “Not kahana ena king ese do ia heau henia, lai bada herea bamona, mai ena kariota bona ena hosi guia taudia bona ena lagatoi momo danu; tano haida lalodiai do ia vareai, abata bamona do ia koua, ma do ia hanai.” (Daniel 11:40b) Dina gabedia edia histori dekenai, kara badadia be not kahana ena king ese ena lohia gabuna ia habadaia. Tanobada ibounai tuarina iharuana neganai, Nazi “king” be sibona ena tano hetoana ia hanaia ma tanodia haida dekediai. Unai tuari ena dokona ai, iena dagi ia abia “king” be ena tano ena murimuri ai lohia gabuna badana ia abia. America bona Russia edia huanai politikol tuari neganai, not kahana ena king be unai dala amo ena inai tauna ia tuari henia Africa, Asia, bona Latin America dekenai: unai tanodia edia bese idia durudia edia tuari eiava edia gavamani gwau-edeede karadia dekenai. Ia ese Keristen korikoridia ia dagedage henia, bona edia gaukara ia koudia sisina (to idia hadokoa lasi). Tuari dainai bona politikol karadia dainai tano momo ia biagudia. Unai be aneru ese ia perovetalaia hegeregerena, ia gwau: “Tano hereadaena ai [lauma dalana ai Dirava ena bese taudia edia noho dalana] do ia mai, bona tano momo do idia hekwakwanai.”​—Daniel 11:41a.

7. Not kahana ena king ese ia lohiaia gabuna habadaia karana ena dokona be edeseniai?

⁷ Oibe, ena be not kahana ena king ena inai tauna ia laloa ia be dika bada do ia karaia diba, to ia be tanobada ibounai ia lohiaia lasi. “Inai bese be ena imana amo do idia roho mauri: Edom bona Moab bona Amono besena kahana badana.” (Daniel 11:41b) Idaunegadia ai, Edom, Moab, bona Amono, be Aigupito bona Suria edia huanai idia noho. Unai tano be not kahana ena king ia lohiadia toho, to ia karaia diba lasi, bona hari inai negai unai tano be bese bona orea idia laulaulaia.

“Aigupito Tanona Do Ia Roho Mauri Lasi”

⁸ Aneru be ma ia gwau: “Tano idauidau hadikaia totona ena imana do ia negea; bona Aigupito tanona do ia roho mauri lasi. Aigupito ena dava bada gaudia, golo bona siliva gaudia, bona gau namo hereadia iboudiai, edia biaguna ai do ia lao. Bona Libia bona Etiopia taudia ese ia do idia gavaia.” (Daniel 11:​42, 43) Not kahana ena king ese sibona ena lohia gabuna ia habadaia neganai, saut kahana ena king, “Aigupito,” ia roho mauri lasi. Hegeregere inai bamona, Vietnam dekenai ia kwalimu lasi neganai, ia hisihisi. Bona “Libia bona Etiopia taudia” be edena bamona? Idaunegai unai besedia be Aigupito ena dekena besedia, bona hari inai negai idia be hari inai nega “Aigupito” ena dekena taudia; nega haida idia be not kahana ena king ena murinai idia lao, “idia gavaia.”

8, 9. Not kahana ena king ena siahu be edena bamona, bona ena inai tauna badana danu be edena bamona ia mamia?

⁹ Not kahana ena king ese “Aigupito ena dava bada gaudia” ia lohiadia, a? Ia ese saut kahana ena king ia kwalimu henia lasi, bona ela bona 1993 neganai, tanobada dekenai idia vara gaudia ese idia hahedinaraia sedira unai bamona do ia vara lasi. To ia be mai ena siahu bada saut kahana ena king ena moni gaukaralaia dalana dekenai. Ena inai tauna ia gari henia dainai, saut kahana ena king be lagani ta ta iboudiai moni bada herea ia negea ia be ami, tuari bouti, bona tuari peleini, ia naridia totona. Unai dala dekenai ita gwau diba not kahana ena king ese saut kahana ena king ena taga bada gaukaralaia dalana ia ‘lohiaia,’ ia biagua.

Not Kahana Ena King Ena Tuari Dokona

¹⁰ Unai king rua edia hepapahuahu do ia lao ela bona hanaihanai, a? Lasi. Aneru ese Daniel ia hamaoroa, ia gwau: “To dina ia daekau gabuna amo bona not kahana amo sivarai haida ese ia [not kahana ena king] do ia hagaria, bona mai ena badu badana danu do ia raka lasi, hutuma do ia aladia ore bona do ia hadikadia ore totona. Bona ena kalaga hereadia be davara badana bona ororo helagana mai hairaina edia padadiai do ia haginidia; bona ena dokona negana do ia ginidae, unai neganai ta ese do ia durua lasi.”​—Daniel 11:​44, 45.

11, 12. Vanegai dahaka politikol karadia be mai anina not kahana ena king bona saut kahana ena king edia hepapahuahu dekenai, bona ma dahaka gaudia do ita diba be namo?

¹¹ Unai gaudia be gabeai do idia vara, unai dainai ita gwau diba lasi edena dala maragimaragidia ai unai peroveta hereva do ia guguru. Vanegai, unai king rua edia politikol karana ia idau. United States bona Eastern European tanodia edia badu ia keru ia lao. Ma danu, Soviet Union oreadia be 1991 neganai idia haoredia bona hari ia noho lasi.​—Gima Kohorona, March 1, 1992 gauna, rau 4, 5 itaia.

¹² Unai dainai, hari inai negai not kahana ena king be daika? Ia be gunaguna Soviet Union tanona ta, a? Eiava nega momo, guna ia karaia bamona, ena toana ia haidaua, a? Ita gwau diba lasi. Daniel 11:​44, 45 do ia guguru neganai, not kahana ena king be daika? Unai king rua do idia badu heheni lou, a? Bona unai tanodia ai idia do noho niuklia kohudia be edena bamona? Gabeai sibona unai henanadai edia haere do ita diba.

13, 14. Ita diba unai king rua dekediai dahaka do ia vara?

¹³ To gau tamona ita diba. Nega sisina murinai, not kahana ena king be tuari ta do ia havaraia badina “dina ia daekau gabuna amo bona not kahana amo sivarai haida ese ia do ia hagaria.” Unai tuari do ia vara bena maoromaoro iena dokona negana do ia ginidae. Bema Baibel ena peroveta herevadia ma haida ita lalodia unai “sivarai” dekenai iseda diba ita habadaia.

¹⁴ To, namona be oi laloa, not kahana ena king ese unai karadia ia karaia lasi saut kahana ena king dekenai. Iena inai tauna badana ese do ia mailaia lasi ena “dokona negana” dekenai. Unai hegeregerena, not kahana ena king ese saut kahana ena king ia hadikaia ore lasi. “[Taunimanima] imana lasi” to Dirava ena Basileia ese saut kahana ena king ia hadikaia ore (ma peroveta herevadia dekenai dagedage gauna ta ena doana ginigabena amo unai king ia laulaulaia). (Daniel 7:26; 8:25) Aramagedono tuarina dekenai Dirava ena Basileia ese tanobada ena king iboudiai do ia hadikadia ore, bona ia hedinarai unai ia vara not kahana ena king dekenai. (Daniel 2:44; 12:1; Apokalupo 16:​14, 16) Daniel 11:​44, 45 ese unai tuari dokona ia do mai lasi negana dekenai idia vara gaudia ia herevalaia. Ita hoa lasi not kahana ena king be ena dokona negana ai ia mai neganai “ta ese do ia durua lasi”!

15. Dahaka henanadai badadia idia do noho?

¹⁵ Not kahana ena king ese ia kamonai “sivarai” dainai ia lao “hutuma do ia aladia” totona; unai dainai, dahaka peroveta herevadia ma haida amo unai sivarai dekenai ita lalo-parara diba? Bona ia ura do ia aladia “hutuma” be daidia?

Dina Daekau Gabuna amo Sivarai Ta

¹⁶ Tuari ginigabena, Aramagedono, ia do vara lasi neganai, tomadiho momokani ena inai badana do ia hadikaia ore guna be namo​—unai be ariara hahinena Babulono Badana, tanobada ibounai dekenai tomadiho koikoi oreana. (Apokalupo 18:​3-8) Dirava ena badu be laulau Eufrate sinavaina dekenai ia bubua karana amo iena hadikaia ore dalana idia perovetalaia. Unai sinavai ia kaukau “dina daekau kahana dekena amo king do idia mai dalana ia kehoa” totona. (Apokalupo 16:12) Unai king be daidia? Idia be Iehova Dirava bona Iesu Keriso!a

17. (a) Babulono Badana hadikaia ore karana dekenai Baibel ese ita dahaka ia hadibaia? (b) Sedira “dina ia daekau gabuna amo” do ia mai sivarai be dahaka?

¹⁷ Babulono Badana hadikaia ore negana be Apokalupo bukana dekenai ia hahedinaraia goevagoeva: “Dagedage gauna [dagedage gauna kakakakana, United Nations oreana ia laulaulaia gauna] mai ena doana 10 [dokona negana ai idia lohia ‘king’], oi itaia vadaeni gaudia ese ariara hahine do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.” (Apokalupo 17:16) Momokani, tanobada besedia ese ‘vamu momo idia hadikaia ore’! (Daniel 7:5) To dahaka dainai lohia taudia, not kahana ena king danu, be Babulono Badana do idia hadikaia ore? Badina ‘Dirava ese iena palani be edia lalona dekenai do ia atoa.’ (Apokalupo 17:17) “Dina ia daekau gabuna amo” ia mai sivarai be sedira unai kara, Iehova ena, ia herevalaia, ia ura dalana ai tanobada lohiadia edia kudou dekenai palani ia atoa idia be tomadiho dalanai ariara hahine badana idia hadikaia ore totona.​—Daniel 11:44.

Not Kahana amo Sivarai Ta

¹⁸ To not kahana ena king be ma ta dekenai ia badu. Aneru ia gwau “kalaga hereadia be davara badana bona ororo helagana mai hairaina edia padadiai do ia haginidia.” (Daniel 11:45) Daniel ena nega lalonai, davara badana be Mediterranean, bona ororo helagana be Siona, guna Dirava ena dubu be unuseniai. Unai dainai, peroveta hereva do ia guguru neganai, not kahana ena king ia badu dainai Dirava ena bese taudia ia tuari henidia! Hari inai nega ai, lauma dalana dekenai, “davara badana bona ororo helagana mai hairaina edia padadiai” gabuna be Dirava ena horoa taudia edia noho dalana lauma dalana dekenai, idia be Dirava idia diba lasi taudia edia “davara” amo idia mai, bona edia helaro be Iesu Keriso ida guba Siona Ororona dekenai do idia lohia.​—Isaia 57:20; Heberu 12:22; Apokalupo 14:1.

19. Esekiel ena peroveta hereva hegeregerena, Gog ia doria ia tuari totona sivaraina be edena bamona ita diba? (Futnot itaia.)

¹⁹ Daniel ena negai ia noho tauna Esekiel danu be “dina gabedia ai” Dirava ena bese taudia tuari henia karana ta ia perovetalaia. Ia gwau Gog Magog ese Satana Diabolo ia laulaulaia, ia ese unai tuari do ia havaraia. (Esekiel 38:16) Gog be laulau dalana ai edeseni amo ia mai? Iehova be Esekiel amo ia gwau: “Emu gabu amo do oi mai, not kahana ena daudau gabudia amo.” (Esekiel 38:15) Unai dainai, sedira “not kahana amo” anina be Satana ese ia havaraia hadikaia herevadia be not kahana ena king bona king iboudiai ia doridia Iehova ena bese taudia idia tuari henidia totona.b​—Apokalupo 16:​13, 14; 17:14 itaia danu.

20, 21. (a) Dahaka dainai Gog ese tanobada besedia, not kahana ena king danu, do ia veridia Dirava ena bese taudia idia tuari henidia totona? (b) Iena tuari dekenai do ia kwalimu, a?

²⁰ Gog ese unai tuari ia havaraia badina “Dirava ena Israela” edia taga ia bada, bona idia bona mamoe idaudia edia hutuma bada be tanobada ena kahana lasi. (Galatia 6:16; Ioane 10:16; 17:​15, 16; 1 Ioane 5:19) Gog be mai badu ida ia itaia “bese iboudiai amo taunimanima idia mai, idia be [lauma dalana dekenai] taga bona tano idia haboua.” (Esekiel 38:12; Apokalupo 5:9; 7:9) Unai hereva hagugurudia totona, Iehova ena bese taudia edia noho ia namo ia lao momokani. Europe, Africa, bona Asia tanodia ai, guna edia gaukara idia taravatua gabudia, be hari edia tomadiho karana idia karaia diba. Lagani 1987 bona 1992 edia huanai, “kohu namodia” milion tamona bona ma haida be bese idauidau amo idia mai Iehova ena tomadiho momokani rumana ai. Lauma dalana ai, idia be taga bada bona maino taudia.​—Hagai 2:7; Isaia 2:​2-4; 2 Korinto 8:9.

²¹ Lauma dalana ai Keristen taudia edia taga bada ia itaia neganai, Gog ia laloa do ia hekwarahi lasi “maino dekenai idia noho namonamo taudia” ia kwalimu henidia totona, bona Gog ia gaukara bada unai orea ia haorea totona badina ia idia koua taunimanima iboudiai ia biagudia karana dekenai. (Esekiel 38:11) To ia karaia diba lasi. Tanobada edia king be Iehova ena bese taudia idia tuari henidia neganai, ‘edia dokona negana ai do idia mai.’ Edena dala ai?

King Ihatoina Ta

²² Esekiel ia gwau Gog ese ia tuari henidia neganai, Iehova Dirava be iena bese totona do ia toreisi, bona “Israel ororodia dekenai” Gog ena tuari oreadia do ia hadikadia ore. (Esekiel 38:18; 39:4) Unai kara dainai aneru ena hereva Daniel dekenai ita laloa, ia gwau: “Unai neganai Mikael do ia toreisi, ia be lohia badana ta; emu taunimanima edia natuna maruanedia totona ia gini noho tauna. Hekwakwanai negana ta do ia vara; unai bamona nega be nega gunadia ta ai ia vara lasi bese ta ia do matamaia lasi negana amo ema bona hari ela bona unai nega do ia ginidae. Bona unai negai emu bese taudia do idia roho mauri, edia ladana be buka ai idia torea taudia iboudiai.”​—Daniel 12:1.

22, 23. Gog be tuari ia hamatamaia neganai, daidia be Dirava ena bese taudia totona do idia gini, bona dahaka do ia vara?

²³ Lagani 1914 neganai, Iesu​—guba tuari tauna Mikael​—be Dirava ena guba Basileia ena King ai ia lao. (Apokalupo 11:15; 12:​7-9) Ema bona unai neganai, ia be ‘Daniel ena bese taudia totona’ ia gini noho. To, nega sisina murinai, ia be Iehova ena ladana dekenai do ia “toreisi”, ia be ta ese ia kwalimu henia diba lasi Tuari Pavapavana, bona “Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia.” (2 Tesalonika 1:8) Tanobada besedia iboudiai, Daniel ese ia perovetalaidia king danu, be “do idia tai.” (Mataio 24:30) ‘Daniel ena bese taudia’ dekenai edia lalohadai idia dika dainai, idia be ‘lohia badana Mikael’ ena imana amo do idia mase ela bona hanaihanai.​—Apokalupo 19:​11-21.

24. Daniel ena peroveta hereva hari ita stadilaia dainai dahaka ita karaia be namo?

²⁴ Ita ura bada unai neganai Mikael bona iena Dirava, Iehova, edia kwalimu negana do ita itaia, ani? Idia kwalimu neganai, Keristen momokanidia do idia “roho mauri” diba. (Malaki 4:​1-3 itaia danu.) Unai dainai, gabeai negana be mai iseda ura bada ida ita naria dainai, ita be aposetolo Paulo ena hereva ita laloa, ia gwau: “Sivarai Namona do oi harorolaia goadagoada, nega namodia neganai, bona nega dikadia neganai danu.” (2 Timoteo 4:2) Namona be mauri ena Hereva ita dogoatao namonamo, bona nega ia do namo noho lalonai Iehova ena mamoe taudia ita tahudia goadagoada. Ita be mauri ena heau helulu ena dokona kahana ai ita noho. Davana abia negana ia kahirakahira. Namona be ita ibounai ita ura bada ita haheauka ela bona dokona bona unai amo roho mauri taudia ai do ita lao.​—Mataio 24:13; Heberu 12:1.

[Footnotes]

Oi Lalo-Parara, A?

◻ Dokona negana lalonai saut kahana ena king be edena dala ai not kahana ena king ia doria?

◻ Unai king rua edia hepapahuahu ese ia havaraia gaudia dekenai ma dahaka do ita diba danu be namo?

◻ Aramagedono ia do vara lasi neganai dahaka gau rua be not kahana ena king dekenai do idia vara?

◻ ‘Lohia badana Mikael’ be edena dala ai Dirava ena bese taudia do ia naridia?

◻ Daniel ena peroveta hereva ita stadilaia dainai namona be dahaka ita karaia?

10. Aneru be edena dala ai unai king rua edia hepapahuahu ia doko karana ia herevalaia?

16. (a) Aramagedono ia do vara lasi neganai dahaka gau badana do ia vara guna? (b) “Dina daekau kahana dekena amo” do idia mai king taudia be daidia?

18. Not kahana ena king be daika dekenai ia badu danu, bona ena dokona negana ia ginidae neganai ia be edeseniai?

[Pictures on page 19]

Not kahana ena king ese ena sene taudia edia dirava taudia lasi to idau dirava taudia ia tomadiho henidia

[Credit Line]

Top left and middle: UPI/Bettmann; bottom left: Reuters/Bettmann; bottom right: Jasmin/Gamma Liaison