Sivarai Gwauhamata Tanona Amo

Umui Mai Galilea Gohuna Vadivadi Henia Totona!

BAIBEL duahiduahi taudia momo be Galilea Gohuna idia laloa haraga diba. To namona be emu matadia oi koudia bona unai ranu korikori davarana oi laloa; oi be mai anina bada gabudia, hegeregere Ioridane Sinavaina ena ranu ia vareai bona ia raka lasi gabudia oi itaia diba, eiava Kaperanauma bona Tiberia gabudia oi itaia diba, a?

Henunai ia noho laulauna be atai gabuna amo idia abia, namona be oi itaia namonamo, bona paragraf lalonai ai torea namba amo gabudia oi davaria diba. Mai edia namba gabudia edia ladana hida oi diba? Idia momo oi diba neganai, oi duahia Baibel sivaraidia momo be mai anina oi dekenai. Unai dainai, namona be nega sisina lalonai unai tano dekenai do ita loaloa bona emu diba oi habadaia.

Notist ena atai gabuna amo inai laulau idia abia. Namona be namba 1 ita laloa. Unai be edena kahana gohu dekenai? Oibe, unai be ena saut kahana, Ioridane sinavai be Galilea Gohuna amo ia aru matamaia gabuna, bona ia aru lao Samaria bona Gilead huadiai bona Tadi Gohuna dekenai ia vareai. Laurina kahana dekenai unai gohu ena kahana ta oi itaia namonamo diba, danu unai bamona laulau namona ta be lagani 1993 Calendar of Jehovah’s Witnesses dekenai ia noho.

Galilea Gohuna be Rift Valley lalonai, unai be 200 mita Davara Badana ena maka henunai. Unai laulau oi itaia neganai, namona be ena ist kahana konena dekenai (namba 7 kahirakahira) idia gini ororo oi itadia. Ia kahirakahira west kahana konena dekenai danu ororo maragidia bona badadia idia noho, unai amo ita diba ororo ese unai gohuna idia gegea ahu, ena lata be 21 kilomita bona ena lababa be 12 kilomita bamona. Ena kone kahana dekenai gabu idia noho hanua bona siti, hegeregere Tiberia, idia haginidia totona (namba 2). Oi laloatao, Iesu ese hoa karana amo taunimanima 5,000 ia ubudia neganai, Tiberia amo idia mai taudia be bouti amo unai gohu idia hanaia.​—Ioane 6:​1, 10, 17, 23.

Tiberia oi rakatania bona not kahana dekenai oi lao neganai, tano namona ladana Genesareta do oi hanaia (namba 3).a Unai gabu dekenai Iesu ese ororo dekena amo ia haroro, bona reana kahirakahira konena dekenai Petero bona ma taunimanima toi ia boiridia “taunimanima haoda henia” gaukarana do idia karaia totona, iniseniai laulau ese ia hahedinaraia bamona. (Mataio 4:​18-22) Oi raka lao, bena oi davaria gabuna be Kaperanauma (namba 4), unuseniai Iesu ese gaukara bada ia karaia, idia gwauraia “ena hanua korikori.” (Mataio 4:​13-17; 9:​1, 9-11; Luka 4:​16, 23, 31, 38-41) Gohu ena ist kahana dekenai oi rakaia gegea lao neganai, unai gabu dekenai (namba 5) atai kahana amo Ioridane sinavaina ia aru diho, bona (henuai) ia noho gohuna dekenai ia vareai gabuna oi davaria. Oi raka lao bona Betesaida gabuna oi davaria (namba 6).

Unai gabu haida sibona laloa karana ese ia hahedinaraia bema oiemu diba Galilea Gohuna dekenai oi habadaia, unai ese oi ia durua bena Baibel ena sivarai be emu lalona matana amo do oi itadia diba. Betesaida gabuna dekenai Iesu ese taunimanima 5,000 ia ubudia murinai, idia be pavapava ta ai idia halaoa toho, bona ena aposetolo taudia be bouti amo ia siaidia lao Kaperanauma dekenai. Gohu dekenai idia lao neganai, ororo dekena amo lai-gubana ia toa bona davara ena hurehure idia bada idia lao, bona aposetolo taudia idia gari bada herea. To, Iesu be gohu latanai idia ia raka henidia, ia ese lai-gubana ia hadokoa bona bero lasi dekenai Genesareta kahirakahira dekenai idia ginidae. (Mataio 14:​13-34) Tiberia amo idia mai taudia be gohu idia hanaia lou Kaperanauma do idia lao henia totona.​—Ioane 6:​15, 23, 24.

Gohu ena ist kahana ai oi raka noho neganai, oi hanaia gabuna be reana idia gwauraia “Gadara [eiava Gadara taudia edia] tano.” Oi laloatao, unai gabu dekenai Iesu ese tatau rua dekena amo demoni ia luludia. Mai dagedage danu unai demoni be boroma momo herea lalodiai idia vareai, bena idia iboudiai be ororo amo idia roho diho. Murinai, tau ta ese kahirakahira ia noho Hanua Gwauta edia Greek gado taudia dekenai ia vara sivaraina ia gwauraia. Iesu be unai gabu ai ia ginidae bona ia rakatania totona ia ese bouti ia guia bona Galilea Gohuna ia hanaia.​—Mataio 8:​28–9:1; Mareko 5:​1-21.

Gohu ena diho kahanai oi raka henia neganai, oi ese sinavai badana ta oi hanaia (ena ladana be Yarmuk), ia be henuai ia noho Ioridane Sinavaina ena ranu ia habadaia.

Galilea Gohuna dekenai idia vara sivaraidia haida be idia vara gabuna korikorina, Baibel ese ia gwauraia lasi, hegeregere, Iesu ia mase murinai, (henuai) Petero bona aposetolo taudia ma haida be idia haoda neganai ia hedinarai gabuna. Reana oi laloa unai be Kaperanauma kahirakahira ai, a? Edeseniai ia vara be herevana, to unai mai anina bada gohuna oi diba be gau badana, badina oi ia durua emu lalona matana amo unai gabu oi itaia totona.

[Footnotes]

[Pictures on page 24]

1

2

3

4

5

6

7

N

S

E

W

[Picture Credit Line on page 24]

Pictorial Archive (Near Eastern History) Est.

[Picture Credit Line on page 24]

Pictorial Archive (Near Eastern History) Est.

[Picture Credit Line on page 24, 25]

Garo Nalbandian

[Picture Credit Line on page 25]

Pictorial Archive (Near Eastern History) Est.