“Inaina Ginigabena” Do Ia Darere!

OI MARAGI neganai, reana dibura garina oi gari. Reana sivarai dikadia o gori haida dainai oi gari. To oi mahuta gwauraia neganai, ema sinana o tamana ese lamepa ta be oi badinai ia atoa dainai, emu gari ia doko, ani?

Taunimanima momo be mase garina idia gari danu. To ena anina bema idia diba, reana do idia gari lasi.

Emu Inaina Oi Diba

Aonega Pavapavana Solomon ia gwau: “Mauri taudia idia diba do idia mase; to mase taudia be gau ta idia diba lasi.” (Kohelete 9:5) Unai hereva Baibel lalonai be Dirava ena amo ia mai, bona ena anina be mauri be idau, mase be idau. Mase taudia be gau ta idia laloa diba lasi.

Keristen aposetolo Paulo ese mase ia hereva henia, ia gwau: “Mase e, oiemu kwalimu be edeseni? Mase e, oiemu hisihisi siahuna be edeseni?” (1 Korinto 15:​55, 56; Hosea 13:14) Unai hisihisi siahuna ena badina be dahaka? Paulo ia gwau: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina be ibounai be mai edia kara dika.” (Roma 5:12) Paulo ese unai “tau tamona” ena ladana ia gwauraia, ia gwau: “Taunimanima ibounai Adam dainai idia mase.” (1 Korinto 15:22) Iseda tubuna roboana, Adam, ena gwau-edeede dainai, ita ibounai ese mase ena hisihisi siahuna ita mamia diba.​—Genese 3:​1-19.

Bema ita gorere lasi bona iseda ruma bese ese ita idia lalokau henia bona iseda noho gabuna be namo, ita ta ese mase do ia abia hidi lasi. To, Baibel ia gwau “nega bona kara be idia vara kava” dainai reana do ita mase. (Kohelete 9:11) Momokani, ita diba lasi kerukeru do ita mase eiava lasi. (Iakobo 4:14) Ita diba gauna be, ita ibounai be eda tubuna roboana ena amo kara dika bona mase ita abidia. Unai dainai, eda inai tauna bamona mase ese ita ia tahua bona ita ia abia.

Emu Lalokau Tauna Ena Mase Haheaukalaia Dalana

Mase ese iseda lalokau tauna ta ia abia neganai, momokani ia be iseda inaina. Hahine ta ia diba ena gorere dainai do ia mase, unai dainai ena adavana ia hamaoroa, ia gwau, “Hisihisi do oi ania, to lau be lasi.” Unai bamona ia hereva, badina be Baibel ia gwau: “Oi lao henia gabuna, Sheol [mase taudia edia guri], lalonai be gaukara ta lasi, lalohadai ta lasi, lalo-parara ta lasi, bona aonega ta lasi.” (Kohelete 9:10) Mase taudia ese hisihisi idia ania lasi. To edia varavara bona edia turadia, idia do mauri noho taudia, edia lalodia idia hisihisi. Unai hisihisi hamaragia dalana ia noho a?

Lalona hagoadaia herevadia momo be Baibel lalonai idia noho. Salamo herevadia duahidia bona lalodia karana ese iseda lalodia ia hagoadadia diba. Lalona hagoadaia herevana ta be inai: “Iehova ita hanamoa, badina be dina iboudiai iseda maduna ia huaia, ia be ita ia hamauria Diravana momokanina.”​—Salamo 68:19.

Keristen kongregesen danu ese iseda lalodia ia hagoadadia. Aposetolo Paulo ia gwau: “Vabu taudia do oi durua, bema idia be vabu korikori. To vabu ta, bema ia be mai ena natuna o mai ena tubuna [kohu amo idia durua diba taudia], idia ese edia sinana bona tubuna idia durua be namo. . . . Vabu edia ladana torea pepa dekenai, be inai bamona vabu sibona ena ladana do oi torea: Vabu iena mauri lagani be 60 vadaeni, bona tau tamona ia adavaia, iena kara namodia dainai be taunimanima ese idia hanamoa. Ia ese iena natuna ia naridia namonamo. Ia ese idau taudia dekenai aniani ia henia. Ia ese Dirava ena taudia edia aena ia huria. Ia ese hisihisi taudia ia durua, bona kara namodia ibounai ia goadalaia.” (1 Timoteo 5:​3, 4, 9, 10) Hari inai negai Iehova ena Witness taudia ese unai bamona kamonai taudia idia durudia bona edia lalodia idia hagoadadia.

Ta ena adavana ia mase murinai ena noho ia idau. Ena adavana be lagani rua gunanai ia mase tauna ta ia gwau: “Egu hahine lau lalokau henia bada. Ena mase lau lalohisihisilaia bada. Lau haheauka be auka herea.” Nega taina daudau ia headava tauna be unai nega ai ena adavana ida idia noho, tauanina tamona bamona. Ena adavana ia mase neganai, ena darana ia doko. Daika dekenai heduru ia tahua diba?

Unai bamona negadiai, iena Keristen bamodia namodia ese idia hagoadaia diba. Hereva Lada-isidia 17:17 ia gwau: “Tau ta ena turana korikorina ese nega iboudiai ia lalokau henia, bona ena tadikakana be dika negana totona ia vara.” Vabu o dogae edia bamodia ese do idia durudia momokani be namo. Lalohisihisi tauna ena turana mai aonegadia ese ena lalona do idia veria do ia hereva totona, herevana unai neganai do ia tai. Keristen tauna ta, ena adavana be guna ia mase dainai unai lalohisihisi ena mamina ia abia vadaeni tauna, ese do ia gado namo henia diba. Baibel ia gwau: “Lalo-metau taudia umui gado namo henidia bona umui hagoadadia.” (1 Tesalonika 5:​14, NW) To vabu bona dogae ese edia adavadia edia hebamo idia reaia, unai dainai namona be do idia naria namonamo, idia bona edia lalohisihisi idia hamaorolaidia taudia danu do idia kara goeva noho totona.​—1 Petero 2:12.

Mase dainai ia vara hisihisina hamaragia dalana namona be lalohisihisi tauna ese haida durudia karana ia goadalaia. Bema ia laloa haida ese ia idia durua be namo, unai do ia karaia be auka! Bema ta ese sibona ena namo ia tahua lasi, to haida edia namo ia tahua bona ia durudia, unai ese ena lalohisihisi do ia hamaragia, badina be Iesu ia gwau: “Henia kara ena moale be bada, abia kara ena moale be maragi.”​—Kara 20:35.

Mase Hadarerea

Nanigo ena hekori ese hisihisi bada ia havaraia, bona taunimanima ia hamasea diba. Bema nanigo ena isena be emu kopina amo oi kokia, unai ese hisihisi ia hamaragia diba. To dahaka ese mase ena hekori hisihisina ia hamaragia bona ia haorea diba?

Paulo ia gwau mase ena hekori be kara dika, bena ia gwau: “Dirava ita hanamoa! Lohiabada Iesu Keriso ena siahu dainai Dirava ese ita ia hagoadaia, vadaeni ita kwalimu.” (1 Korinto 15:57) Iesu be sibona ia gwauraia, ia gwau: “Taunimanima ena Natuna bamona, ia mai . . . iena mauri do ia henia, taunimanima ibounai hamauria totona.” (Mataio 20:28) Oibe, Dirava ena Natuna, Iesu Keriso, idia abidadama henia bona Iehova ese iena amo ia henia boubou gauna idia abia dae taudia be Adam ena amo idia abia masena dainai do idia mase hanaihanai lasi.​—Ioane 3:16.

Iseda lalodia hagoadadia herevana Iesu ena amo be inai: “Nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.”​—Ioane 5:​28, 29.

Dirava ena peroveta tauna Isaia be guna ia gwau: “[Iehova Dirava] ese mase do ia haorea ela bona hanaihanai, bona Pavapava Badana Iehova ese mata ranudia be vaira iboudiai amo do ia dahudia oho.” (Isaia 25:8) Bona Apokalupo 21:4 ia gwau: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” Unai Baibel herevadia idia abidia dae taudia be mai edia helaro, edia lalodia ia hagoadadia helarona; unai dainai, edia lalokau tauna ta ia mase neganai idia dara doko lasi, helaro lasi taudia bamona.​—1 Tesalonika 4:13.

Gabeai Dirava ese taunimanima dekediai do ia karaia karadia, Baibel lalonai ia gwauraidia karadia, mani oi lalodia. Kahirakahira do ia vara hisihisina badana ese inai tanobada oromana dikana do ia haorea. (Apokalupo 7:14) Tomadiho koikoi idia badinaia taudia do idia mase. Politikol bona bisinesi taudia mai edia mataganigani, hitolo bona tuari idia havaradia taudia unai, be do idia ore. Iesu Keriso ese Satana Diabolo, taunimanima momo edia mase ia havaraia tauna, be guri dobu masemasena ai do ia koua, bena lagani 1,000 lalodiai do ia lohia bona ena boubou gauna amo taunimanima do ia durudia. Mase taudia do idia toreisi lou, bona Dirava ena Hereva ena diari bada ese lalohadai kereredia iseda inaina, mase, dekenai do ia haoredia. Unai neganai do idia noho taudia iboudiai be mai edia dala, Dirava ena dala maoromaorodia do idia dibadia bona do idia badinadia.​—Hereva Lada-isidia 4:18; Kara 24:15; Heberu 2:​14, 15; Apokalupo 18:​4-8; 19:​19-21; 20:​1-3.

Paulo ia gwau unai murinai dokona do ia ginidae. Unai neganai Keriso ese basileia be ena Tamana Dirava do ia henia. Do ia lohia ela bona Dirava ese ena inai taudia iboudiai be iena aena henudiai do ia atodia. Ena inaina ginigabena, mase, do ia haorea danu. (1 Korinto 15:​24-26) Adam ena kara dika dainai idia vara gaudia dikadia iboudiai do idia ore. Hetoho ginigabena do ia vara, bona Dirava idia lalokau henia taudia do idia kwalimu. (Apokalupo 20:​4-10) Do idia goevadae, bona do idia mauri ela bona hanaihanai. Dirava ese ena Natuna lalokauna ena amo ia henidia gauna unai!​—Roma 6:23.

Vadaeni, lagani hida do oi mauri diba? Do oi mauri diba ela bona hanaihanai. “Dokona negana” ai oi noho dainai, reana do oi mase lasi. (Daniel 12:4; Ioane 11:​25, 26; 17:3) Dirava ena ura bema oi karaia, reana do oi mauri noho bena Dirava ese ia gwauhamatalaia tanobadana matamatana ai do oi vareai.​—2 Petero 3:13.

Momokani, bema oi buruka momokani, namona be oi diba reana do oi mase guna. To, toreisi-lou helarona ese moale ia havaraia. Nega matamatana ai Iehova ese ruma bese edia noho oromana edena bamona do ia karaia be oi laloa reana. Namona be unai oi laloa momo lasi, badina be Iehova idia badinaia hanaihanai taudia be moale hanaihanai do idia davaria dalana be ia ese do ia karaia.

Satana ena nega dikana ena dina gabedia idia ore idia lao neganai, namo lasi mase garina oi gari dainai Iehova ena hesiai oi lao henia lasi. (2 Timoteo 3:1) Bema emu lalokau tauna ta ia mase, emu lalona do ia goada totona oi laloa do ia mase hanaihanai lasi. (Apokalupo 20:​13, 14) Toreisi-lou helarona oi abia dae. Bena, herevana hisihisi badana amo do oi roho mauri dainai eiava mase amo do oi toreisi lou dainai nega matamatana ai do oi vareai, to oi diba momokani, Dirava ena gwauhamata hegeregerena, iseda inaina ginigabena, mase, do ia haorea.​—Apokalupo 7:​9, 14.

[Picture on page 5]

Lalohisihisi taudia edia Keristen bamodia namodia ese lauma dalanai idia hagoadadia diba

[Picture on page 7]

Lalohisihisi tauna ese haida durudia karana bema ia goadalaia, unai ese ena hisihisi do ia hamaragia