Emu Adavana Ena Mase Haheaukalaia Dalana

BAIBEL ia gwau: Tau ese ena ‘hahine do ia lalokau henia, sibona ia lalokau henia hegeregerena. Hahine danu ese iena tau do ia matauraia bada.’ Idia ruaosi be “tauanina tamona” bamona gau ibounai do idia karaia hebou. (Efe. 5:33; Gen. 2:23, 24) Nega ia hanaia lalonai, idia ruaosi edia hetura karana bona lalokau be ia goada. Unai be idia tubu hebou au rua edia ramuna hegeregerena. Edia headava idia moalelaia tau bona hahine be idia lalokau heheni.

To, bema tau o hahine ia mase be edena bamona? Edia hetura karana bona lalokau goadana be ia boio. Nega momo vabu o dogae be ia daradoko, sibona ia noho dainai ia lalohisihisi, bona reana ia badu o ia laloa iena kerere dainai adavana ia mase. Daniella ena headava lagani 58 lalodiai, ia be vabu bona dogae momo ia diba.a To, ena adavana ia mase murinai ia gwau: “Unai bamona daradoko hemami be guna lau mamia lasi. Unai hemami be do oi lalopararalaia lasi ela bona oi dekenai ia vara.”

IA ORE DIBA LASI LALOHISIHISI

Tahua gaukara idia karaia taudia haida idia gwau, vabu bona dogae edia lalometau be bada herea. Momo be unai hereva idia abia dae. Millie be lagani 25 lalonai ia headava murinai, ena adavana ia mase dainai ia lalohisihisi bada, bona ia gwau: “Lau mamia lau be aena dika hahinena ta bamona.”

Guna Susan ia laloa vabu haida ese lagani momo lalonai edia adavana totona idia taitai be anina lasi. To, lagani 38 murinai, Susan ena adavana ia mase bona ena be lagani 20 idia hanaia vadaeni, to ia gwau: “Lau ese dina ta ta ai ia lau laloa.” Ia tai momo badina ena adavana ia laloa noho.

Baibel ese ia hahedinaraia vabu bona dogae be nega daudau lalonai do idia lalohisihisi. Hegeregere, Sara ia mase neganai, “Aberahamo be ruma dekenai ia raka vareai, Sara totona ia taitai.” (Gen. 23:1, 2) Ena be Aberahamo ese toreisi lou helarona ia abidadama henia, to ena adavana ia mase neganai ia lalohisihisi bada. (Heb. 11:17-19) Iakobo ena adavana Rahela ia mase neganai, Iakobo ese ia laloaboio haraga lasi. Ena natuna memerodia dekenai Rahela ena kara namodia ia herevalaia.—⁠Gen. 44:27; 48:7.

Unai Baibel sivaraidia amo dahaka ita dibaia? Vabu bona dogae be lagani momo lalonai do idia lalohisihisi. To, namo lasi ita laloa idia taitai bona lalohisihisi badina idia dekenai helaro be lasi. Unai bamona idia taitai badina edia lalokau adavana idia haboioa. Bona reana idia ura nega daudau lalonai idia do ita durua bona hagoadaia.

DINA TA TA AI UNAI LAU KARAIA

Vabu bona dogae edia mauri be do ia auka, guna idia singul negana bamona lasi. Tau bona hahine be lagani momo idia headava neganai, nega momo tau ia diba edena dala ai adavana ia hagoadaia bona ia durua bema ia lalometau o badu. To tau ia mase neganai, iena lalokau bona hebogahisi karadia hahine dekenai be do idia boio danu. Unai hegeregerena, hahine danu be ia diba edena dala ai adavana do ia naria bona hamoalea. Ena adavana ia dogoatao dalana, ena hereva namodia, bona adavana ena ura gaudia ia karaia dalana be gau ta ese ia hereaia lasi. Unai dainai, hahine ia mase neganai, tau do ia mamia ena mauri be anina lasi. Unai dainai, vabu bona dogae haida be vaira negana idia daradaralaia. Baibel lalonai edena hakaua herevadia ese unai bamona taudia do idia durua lalomaino ai idia noho totona?

Dirava ese dina ta ta ai oi do ia durua, emu lalohisihisi oi haheaukalaia totona

Baibel ia gwau: “Kerukeru totona umui lalohekwarahi lasi, badina kerukeru danu be mai ena lalohekwarahi. Dina ta ena metau be unai dina sibona ena.” (Mat. 6:34) Unai siri ai Iesu be tauanina durua gaudia ia herevalaia, to unai ese vabu bona dogae ia durua edia lalohisihisi idia haheaukalaia totona. Charles ena adavana ia mase bona hua haida murinai, ia gwau: “Lau be Monique lau do laloa noho bona nega haida egu lalohisihisi ia bada. To, lau laloparara unai be vaia ia vara gauna bona nega ia hanaia lalonai do ia ore.”

Charles be “nega ia hanaia lalonai” ena lalohisihisi ia haheaukalaia. Edena dala ai unai ia karaia? Ia gwau: “Iehova ena heduru dainai, dina ta ta ai unai lau karaia.” Ena be Charles ia lalohisihisi to ia lalomanoka lasi, bona unai ese ena mauri ia biagua lasi. Bema oi be vabu o dogae, namona be dina ta ta ai oi hekwarahi emu lalohisihisi oi haheaukalaia totona. Badina oi diba lasi kerukeru be dahaka hagoadaia o heduru do oi davaria.

Mase be Dirava ena palani ginigunana hegeregerena lasi. To, ia be “Diabolo ena gaukara” dalana ta. (1 Ioa. 3:8; Roma 6:23) Satani ese mase bona mase gari henia lalohadaina ia gaukaralaia taunimanima ia biagua bona edia helaro ia hadikaia totona. (Heb. 2:14, 15) Satani ia moale bema ia itaia, ta ese hari bona Dirava ena tanobada matamatana ai moale korikorina do ia abia ena helaro ia dadaraia. Oibe, Adamu ena kara dika bona Satani ena gwau-edeede karana ese mase ia havaraia. Unai dainai, vabu bona dogae be edia adavana idia mase neganai idia lalohisihisi bada. (Roma 5:12) To, Iehova be Satani ese ia havaraia hekwakwanai do ia hamaoromaoroa bona mase do ia haorea vaitani. Unai dainai, vabu, dogae bona taunimanima ma haida be Satani ese ia gaukaralaia mase gari henia lalohadaina amo Dirava ese do ia ruhadia.

Tanobada matamatana ai idia toreisi lou taudia edia mauri be do ia idau. Hegeregere, eda tama sina, tubudia, idaunegai idia mase taudia bona natu maragidia idia toreisi lou neganai, idia be goevadae taudia ai do idia lao. Taunimanima do idia buruka lasi. Reana, matamata taudia ese edia tubudia do idia matauraia, hari inai negai bamona lasi. Unai ese taunimanima edia mauri do ia hanamoa.

Reana toreisi lou karana dekenai henanadai momo ita henia diba. Hegeregere, bema ta ena adavana rua o ma haida be idia mase, idia dekenai dahaka do ia vara? Sadukea taudia ese idia henia henanadai ta lalonai, idia gwau hahine ta ena adavana ginigunana ia mase, iharuana ia mase, bena unai bamona ia vara ela bona tau namba seven ia mase. (Luka 20:27-33) Toreisi lou ai, unai hahine be daika ena adavana ai do ia lao? Unai ita diba lasi dainai, ita lalohekwarahilaia be anina lasi. Gau badana be Dirava do ita abidadama henia. Badina ita diba, Iehova ese vaira negana ai do ia karaia gaudia ibounai be namo herea.

TOREISI LOU HELARONA ESE ITA IA HAGOADAIA

Dirava ena Hereva ese ia hahedinaraia gauna ta be, mase taudia be do idia toreisi lou. Baibel ai toreisi lou taudia edia sivarai ese idia hamomokania, “guria gabuna lalonai idia noho taudia ibounai ese [Iesu] ena gadona do idia kamonai, bona do idia raka-lasi.” (Ioa. 5:28, 29) Unai negai, momo be do idia moale badina edia lalokau taudia be do idia toreisi lou. Toreisi lou taudia danu be do idia moale bada.

Mase taudia bilioni idia toreisi lou neganai, taunimanima ibounai be do idia moale bada herea! (Mar. 5:39-42; Apok. 20:13) Vaira negai do idia vara gaudia laloa dobu karana ese vabu bona dogae do ia hagoadaia.

Toreisi lou neganai ta do ia lalohisihisi, a? Lasi. Isaia 25:8 ia gwau, Iehova ese “mase do ia haorea momokani ela bona hanaihanai.” Anina be mase dainai idia vara lalohisihisi ibounai do ia kokia. Isaia ma ia gwau: “Lohiabada danu ese tai ena ranu be taunimanima ibounai edia matadia dekena amo do ia dahua ore.” Bema oi lalohisihisi badina emu adavana ia mase, toreisi lou helarona ese oi do ia hamoalea.

Iehova ese tanobada matamata ai do ia karaia gaudia ibounai be ta ese ia lalopararalaia diba lasi. Iehova ia gwau: “Guba be tanobada ena ataiai daudau herea hegeregerena, lauegu dala be emui dala edia ataiai idia noho, bona egu laloa be emui laloa edia ataiai idia noho.” (Isa. 55:9) Iesu ena gwauhamata toreisi lou karana dekenai ese dala ia kehoa Iehova ita abidadama henia, Aberahamo bamona. Hari, Keristani taudia ta ta ese Dirava ena ura idia karaia be mai anina bada. Bema unai bamona ita karaia, Dirava ena vairanai do ita hegeregere toreisi lou taudia ida, tanobada matamatana ai ita noho totona.—⁠Luka 20:35.

HELARO ENA BADINA

Bema toreisi lou helarona oi laloa noho, oi do ia durua vaira negana totona do oi gari lasi. Momo idia diba lasi vaira negana ai dahaka do ia vara. To, Iehova ese ita dekenai gwauhamata namona ta ia henia. Ena be ita diba lasi edena dala ai Iehova ese eda dabu bona ura gaudia do ia henia, to namona be ita abia dae momokani ia ese unai do ia karaia. Aposetolo Paulo ia gwau: “Bema ta ese ia naria noho gauna ia itaia, vadaeni unai gauna ia naria noho be anina lasi, ani? To bema ita itaia lasi gauna ita naria noho, mai ura bada bona haheauka ida unai gauna totona do ita naria noho.” (Roma 8:24, 25) Dirava ena gwauhamata ita abidadama henidia neganai, do ita haheauka diba. Bema oi haheauka, Iehova ese vaira negana ai “oi ura henia gaudia oi dekenai do ia henia.” Oibe, Ia ese “mauri gaudia ibounai edia ura gaudia do ia henia.”—⁠Sal. 37:4; 145:16, NW; Luka 21:19.

Iehova ena gwauhamata vaira nega namona totona oi abidadama henia noho

Iesu ena mase ia kahirakahira neganai iena aposetolo taudia be idia lalohisihisi, gari bona daradara. To, Iesu ese idia ia hagoadaia: “Emui lalona idia hekwarahi lasi be namo. Dirava do umui abidadama henia, bona lau danu do umui abidadama henia.” Ma ia gwau: “Umui do lau rakatania lasi. Lau be umui dekenai do lau mai.” (Ioa. 14:1-4, 18, 27) Iena hereva ese lagani momo lalodiai iena horoa tadikaka dekenai helaro ia henia, bona idia ia durua idia haheauka totona. Idia ura edia lalokau taudia do idia toreisi lou idia itaia taudia danu be do idia daradara lasi be namo. Badina Iehova bona ena Natuna ese idia do idia rakatania lasi. Namona be oi abia dae, unai do ia vara momokani.

a Ladana ai haidaua.

Idia Lalohisihisi Vabu Bona Dogae Hagoadaia

Keristani tau o hahine ta ia mase murinai, reana nega sisina daudau lalonai momo ese iena adavana do idia hagoadaia bona durua. Hegeregere, vabu be ena famili bona turadia edia heduru do ia laloa bada. To, iena lalohisihisi be do ia ore haraga lasi bona reana nega daudau lalonai do ia ura heduru ia abia. Baibel ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.”—⁠Aon. 17:17.

Vabu o dogae oi hedavari henia neganai, edena bamona oi hereva henia be namo? Baibel ia gwau: “Namona be umui ibounai umui lalotamona, ta ta emui hemami umui laloa, emui tadikaka umui lalokau henia, umui hebogahisi heheni.” (1 Pet. 3:8) Keristani tau o hahine be ena adavana ia mase murinai, do ia lalohisihisi bada. Unai dainai, reana inai bamona herevadia, “Oi namo, a?” ese ia do ia hagoadaia lasi. Ia lalohisihisi tauna be reana do ia laloa, ‘Oi be egu hemami oi diba lasi!’ o ‘Egu adavana be ia mase, edena bamona egu hemami do ia namo?’ Unai dainai, inai hereva namodia ita gwauraia diba: “Lau moale oi lau itaia dainai,” o “Hebou ai oi lau itaia neganai, goada lau abia.”

Reana vabu o dogae oi boiria umui aniani hebou, eiava gabu ta dekenai umui loaloa hebou totona. Dogae ta, Marcos, be ena turadia edia vadivadi karana ese ia hagoadaia bada. Dahaka idia herevalaia? Marcos ia gwau: “Lauegu hekwakwanai idia herevalaia momo lasi, to lau dekenai hagoadaia gaudia ma haida idia herevalaia.” Vabu ta, Nina, ia gwau: “Egu tura namodia be nega maorodia ai hereva maorodia idia gwauraia. Nega haida gau ta idia gwauraia lasi, to lau badinai idia helai sibona.”

Bema vabu o dogae ta ia ura adavana ena mase sivaraina ia herevalaia, namona be mai emu ura bona haheauka ida oi kamonai. Anina lasi henanadai oi henia lasi be namo. Ia oi hahemaoro henia lasi. Namo lasi ia oi hamaoroa ia be nega daudau ia lalohisihisi vadaeni, bona unai ia hadokoa be namo. Danu, bema ia gwau ia ura lasi ta ia hereva henia, namo lasi unai ese emu hemami ia hadikaia. Nega ma ta ai ia oi vadivadi henia diba. Ia dekenai lalokau oi hahedinaraia noho.—⁠Ioa. 13:34, 35.

Vaira Negana Oi Daradaralaia, A?

Nega haida ita be Iehova ese ena gwauhamata do ia hagugurua daladia ita daradaralaia. Dirava be Aberahamo dekenai ia gwauhamata natuna ta do ia henia dainai, nega momo Aberahamo be unai ia laloa. To, Iehova ese ia hagoadaia do ia haheauka. Aberahamo be ia lalohisihisi lasi, badina Iehova ese ena gwauhamata ia hagugurua.—⁠Gen. 15:2-5; Heb. 6:10-15.

Iakobo be Iosepa ena mase sivaraina ia kamonai neganai, ia lalohisihisi bada. To lagani momo murinai, Iakobo be ena natuna dainai ia lalohisihisi noho, badina ia laloa ia mase vadaeni. To, Iakobo ia diba lasi Iehova ese vaira negana ai hahenamo badana ta do ia henia. Gabeai, Iakobo be Iosepa ida ia hedavari lou bona ena tubudia ia itaia dainai ia moale bada. Iakobo ia gwau: “Guna lau laloa be oiemu vairana do lau itaia lou lasi. To Dirava ia bogahisihisi lau dekenai, unai dainai oi bona oiemu natudia lau itaia vadaeni.”—⁠Gen. 37:33-35; 48:11.

Unai sivarai rua amo dahaka ita dibaia diba? Namba 1, namona be ita abia dae gau ta ese Siahu Ibounai Diravana do ia koua lasi ena ura ia hagugurua totona. Namba 2, bema iena ura hegeregerena ita guriguri bona kara, hari ita do ia naria bona vaira negana ai iseda ura gaudia do ia henia. Paulo ia gwau: “Dirava ena siahu be iseda lalona ai ia gaukara noho, unai siahu amo, Dirava ese ita noia eiava lalohadailaia gaudia sibona lasi, to unai gaudia idia hereaia gaudia ia henia diba. Vadaeni namona be kongrigeisen bona Keriso Iesu amo hairai do ia abia, bona uru ibounai lalonai unai bamona do idia karaia ela bona hanaihanai. Amen.”—⁠Efe. 3:20, 21.