Duahia Taudia Edia Henanadai

Idaunegai hahelaga tauna ladana Melkisedek be taunimanima korikorina ta; vadaeni, dahaka dainai Baibel ia gwau ‘iena iduhu be lasi’?

Unai hereva be Heberu 7:3 ai. Ia vairanai bona murinai herevadia mani oi lalodia:

“Inai Melkisedek be Salem ena king, bona ia be Ataiai Momokani Diravana ena boubou helaga karaia tauna. Gunaguna Aberahamo ese king haida ia tuari henia, ia aladia mase. Vadaeni iena hanua dekenai ia giroa lou neganai, Melkisedek be ia danu idia hedavari. Unai neganai Melkisedek ese Aberahamo ia hanamoa henia. Unai neganai Aberahamo ese iena kohu ia haria, kahana 10, vadaeni kahana ta Melkisedek dekenai ia henia. Melkisedek ena ladana ena anina gunana be ‘Kara Maoromaoro ena King,’ ma iena ladana ta be ‘Maino Lohiana,’ badina ia be Salem ena king. Salem ena anina be ‘Maino.’ Iena tamana, iena sinana bona iena iduhu edia ladana be idia torea lasi. Iena vara dinana be lasi, bona iena mauri dokona danu be lasi. Ia be Dirava ena Natuna bamona ia noho, ia be boubou helaga karaia tauna ela bona hanaihanai.”​—Heberu 7:​1-3.

Melkisedek be taunimanima korikorina ta, ia hedavari henia tauna Abraham hegeregerena. (Genese 14:​17-20; Heberu 7:​4-10) Unai dainai Melkisedek be mai ena tamana sinana, bona reana ia be mai ena natuna danu. Ia be taunimanima ta, unai dainai ia be mai ena iduhu. Bona ena mauri be mai dokona danu. Aposetolo Paulo ena hereva Roma 5:​12, 14 ai hegeregerena, Melkisedek be ia mase. To ia mase bona ena hahelaga dagina ia doko negana be ita diba lasi.

Heberu lalonai, Paulo ese Melkisedek ia gwauraia, Iesu Keriso ena dagi hereadaena, Hahelaga Tauna Badana dagina, ia herevalaia neganai. Melkisedek ese Iesu ia laulaulaia iena hahelaga dagina ai. Paulo ia gwau: “Iesu . . . be Boubou Helaga Karaia Tauna Badana ia halaoa vadaeni. Ia be Melkisedek ena orea tauna.”​—Heberu 6:20.

Paulo ia diba Melkisedek ena iduhu sivaraina​—ena tubu tamadia bona ena natuna edia sivarai​—be Baibel ai ia noho lasi. Baibel ese unai sivarai ia gwauraia lasi. Paulo ia diba gaudia bona ita diba gaudia hegeregeredia, Paulo ena hereva ia maoro, Melkisedek be ‘iduhu lasi’ tauna ia gwauraia neganai.

Edena dala ai Iesu be unai bamona? Momokani, ita diba Iesu ena Tamana be Iehova Dirava bona ena sinana tanobada ai be Maria, Iuda iduhuna hahinena. To, dala ta ai Melkisedek bona Iesu be hegeregere. Iesu be Levi iduhuna tauna lasi, Israel besena ena hahelaga taudia edia iduhu unai. Ia ese hahelaga tauna dagina be ena iduhu ena amo ia abia lasi. Melkisedek danu be unai bamona, hahelaga tauna dagina ia abia “taunimanima edia rarana o edia taravatu dekena amo lasi”; anina be, ia be hahelaga taudia edia iduhu ai ia vara lasi. (Heberu 7:​15, 16) “Dirava ese Iesu ia gwauraia Boubou Helaga Karaia Tauna Badana, Melkisedek ena orea lalonai”; unai dagi be tanobada tauna ta, guna ia danu be hahelaga dagina ia abia tauna, ena amo ia abia lasi.​—Heberu 5:10.

Ma inai danu, Iesu be natuna lasi, unai dainai iena gabuna ai iena hahelaga dagina do idia abia taudia be lasi. Unai dala ai danu iena iduhu be lasi. Iena hahelaga gaukarana ta, ia amo taunimanima ia durudia bona ia hadibadia gaukarana, do ia karaia ela bona hanaihanai. Paulo ia gwau:

“Iesu be ia noho hanaihanai, unai dainai ena hahelaga dagina be ta ese iena gabunai do ia abia lasi. Unai dainai ia be mai ena siahu, iena ladana ai Dirava kahirakahira idia lao taudia do ia hamauridia guguru, badina be ia noho hanaihanai, bona idia dainai ia noinoi hanaihanai.”​—Heberu 7:​24, 25, NW.

Paulo ena hereva Heberu 7:3 ai ena anina ita davaria vadaeni dainai, namona be do ita laloatao sibona lasi, to Iehova Dirava do ita tanikiu henia danu, badina be lalokau ai dala ia lailaia, iseda kara dika do ia gwauatao ela bona hanaihanai bona heduru bona hahekau do ita abia hanaihanai totona.