Jehova Dekenai Oi Roho Mauri
“Iehova e, oi dekenai lau roho mauri vadaeni.”—SALAMO 31:1.
1. Salamo 31 ia torea tauna be edena bamona ia hahedinaraia ia laloa Iehova ese ia hamauria diba?
GADO namona ta ese tau ta ia anelaia; ena be ena lalona bona ena tauanina edia goada ia ore, to Iehova dekenai ia tabekau, bena ena abidadama dainai ia kwalimu. Ia idia dagedage henia taudia edia amo ia roho mauri, Siahu Ibounai Diravana ena imana lalodiai. Ia gwau: “Iehova e, oi dekenai lau roho mauri vadaeni. Hemarai be nega ibounai lau do ia abia lasi. Emu kara maoromaoro ai lau oi hamauria.”—Salamo 31:1.
2. (a) Dahaka du ruaosi dainai ita diba momokani Iehova be eda gabu aukana? (b) Iehova be edena bamona Diravana?
2 Salamo torea tauna be mai ena roho-mauri gabuna namo hereana. Momokani, Iehova be iena hahemauri gabuna aukana. Iena lalo-goada be du aukadia rua latadiai ia noho. Ta be iena abidadama, Iehova ese do ia hahemaraia lasi gauna, bona iharuana be Iehova ena kara maoromaoro, anina be nega ibounai Iena hesiai tauna do ia rakatania vaitani lasi. Iehova ese ena hesiai taudia mai edia kamonai ia hahemaraidia lasi; ena gwauhamata ia utudia lasi. To ia be hereva momokani Diravana, bona ia idia abidadama henia momokani taudia edia abidadama ena davana be dokona ai do ia henidia. Do idia roho mauri!—Salamo 31:5, 6.
3. Salamo torea tauna ese Iehova edena bamona ia hanamoa?
3 Ena miusik amo salamo torea tauna ese ena lalohisihisi bona ena abidadama ia hahedinaraidia neganai, lalo-goada ia davaria. Iehova ia hanamoa, iena lalokau dainai. Ia gwau: “Iehova do ita hanamoa, badina be ena hebogahisi be lau dekenai ia hahedinaraia vadaeni.”—Salamo 31:21.
Basileia Anelaia Taudia Hutuma Bada Herea
4 Hari inai negai, unai salamo ena hereva edia anina be bada. Iehova hanamolaia anedia be kara dika taudia bona hisihisi badadia idauidau ese idia koudia diba lasi. Momokani, Iehova ena hebogahisi iena orea taudia dekediai be bada. Hesiai laganina gunanai, tanobada hegegemadai, orea badana ta, ia lalonai be taunimanima 4,709,889, tano 231 ai, ese Dirava ena Basileia sivaraina idia anelaia. Iehova ena guba gavamanina Keriso Iesu ena imana ai be edia roho-mauri gabuna; ia dainai do idia lalohisihisi lasi. Lagani gunanai, kongregesen 73,070 lalodiai idia ese hora 1,057,341,972 haroro gaukarana lalonai idia haoredia. Unai dainai taunimanima 296,004 be bapatiso idia abia, Dirava idia henia gwauhamatana ena toana. Bona August 1993 ai, Kiev, Ukraine ai, Dirava Ena Hahediba Intenesenel Hebouhebouna ai idia hebou taudia iboudiai be idia hoa bada, Keristen taudia momokanidia hutuma bada be bapatiso idia abia be idia itadia neganai! Isaia 54:2, 3 ia peroveta bamona, Dirava ena orea taudia idia momo daekau haraga, guna be inai bamona lasi.
4, 5. (a) Dahaka orea badana ese Iehova idia hanamoa, bona hesiai laganina gunana ai edena bamona idia hanamoa? (Ripoti itaia rau 12-15 ai.) (b) Memorial ai idia hebou taudia edia momo ese edena bamona ia hahedinaraia ma haida danu edia lalodia be hegeregere Basileia do idia anelaia? (Ripoti itaia.) (c) Daidia oiemu kongregesen lalonai be reana idia hegaegae do idia harorolaia?
5 To, Dirava ena Basileia idia ura henia taudia ma haida be idia naria noho, ela bona idia danu do idia anelaia. Lagani gunanai, taunimanima 11,865,765 idia hebou, Iesu ena mase laloa totona. Iseda ura be idia momo do idia hegeregere, hari hesiai laganina lalonai Basileia anena be ruma ta ruma ta ai do idia abia. Unai ese hereva momokani ia inai henia tauna, Satana Diabolo, do ia habadua momokani!—Apokalupo 12:12, 17.
6, 7. Kamonai tauna ta ese lauma dikadia edia siahu edena bamona ia dadaraia diba?
6 Satana ese ma haida do ia koudia toho, idia danu be unai ane do idia abia garina. Thailand ai, pablisa ese idia davaria lauma dikadia ese taunimanima momo idia hadikadia. To Iehova ena heduru amo idia ese lalo-momokani taudia momo idia ruhadia nege. Tau ta ese babalau tauna ta ia vadivadi henia kava, bena unai murinai lauma dikadia ese lagani 10 lalodiai idia biagua. Haroro tauna ta ena heduru amo edia siahu ia dadaraia toho, to ia hegeregere lasi. Bena Baibel stadi amo Iehova ena Witness tauna ta, pioneer tauna, ese lauma dikadia edia siahu amo roho-mauri dalana tamona ia hadibalaia; dalana be hereva momokani do ia dibaia maoromaoro, Iehova Dirava do ia abidadama henia, bona do ia guriguri henia.—1 Korinto 2:5; Efeso 4:6, 7; 1 Timoteo 2:3, 4.
7 Unai idia herevalaia, bena hanuaboi ai unai tau ese ena tamana masena ia nihilaia. Ena tamana ese ia hamaoroa bema rohe karadia do ia karadia lou lasi do ia hadikaia. Bena ena famili ese hisihisi idia ania matamaia. To ena lalona ia goada; Baibel ia stadilaia noho bona hebou ia lao henidia matamaia. Ena stadi ta lalonai pioneer tauna ese ia hamaoroa babalau gaudia ese dala idia kehoa lauma dikadia edia, edia siahu amo idia roho mauri toho taudia do idia hadikadia. Hari tau ia laloa ia be mai ena oela, guna babalau karadia ai ia iusilaia. Ia diba do ia negea be namo. Ia negea murinai, lauma dikadia ese idia hahekwarahia lou lasi. (Efeso 6:13; Iakobo 4:7, 8 itaia.) Hari ia bona ena adavana ese edia stadi idia goadalaia, bona hebou idia lao loulou Baibel dibaia totona.
8, 9. Basileia harorolaia taudia haida ese dahaka hekwakwanai idia hanaidia?
8 Ma gau haida ese sivarai namona ena regena idia koua sisina reana. Ghana ai, gaukara taudia momo idia hasakidia bona aniani ena davana be ia bada daekau momokani, unai dainai moni idia hekwarahilaia. Iehova ena Witness taudia be idia hegeregere, badina be idia be sibodia idia abidadama henia lasi, to Dirava idia abidadama henia dainai. Dina ta tau ta ese revareva udaia gauna ta branch opesi ena risepsen patana ai ia rakatania, ia lalonai be K200, unai be leiba tauna ta be hua toi lalodiai ia abia davana hegeregerena. Sibona ena ladana ia torea lasi; ia torea herevana be inai mo: “Lau idia hasakia, to Iehova ena heduru dainai gaukara lau davaria lou. Lau ese ia bona ena Natuna, Keriso Iesu, lau taniku henidia. Lauegu harihari gauna maragina be inai. Mani umui abia dae, Basileia sivaraina namona harorolaia gaukarana durulaia totona.”—2 Korinto 9:11 itaia.
9 Hebou karadia ese Iehova hanamolaia anedia idia abia taudia idia hadibadia. (Salamo 22:22 itaia.) Honduras ena saut kahanai, kongregesen ta ladana El Jordán lalonai, pablisa 19 ese hebou karadia idia goadalaidia. Pura iboudiai idia 12 ese sinavai badana ta idia hanaia, hebou idia lao henidia negadiai. Medu lasi negadiai idia hanaia be haraga, to medu negadiai be idau, badina be sinavai ena abata be bada herea. Unai dainai unai tadikaka bona taihu be idia nahu goadagoada diba be namo. Idia hanai gwauraia neganai, edia hebou dabuadia be tina (tabu) ta lalonai idia udadia, bena plastik baege ta amo idia koua. Bena goada herea tauna ese tina ia dogoatao bona ia gunalaidia. Sinavai unai kahanai idia ginidae neganai, edia tauanidia idia hakaukaudia, edia dabua idia hahedokilaidia, bena unai murinai Kingdom Hall ai idia ginidae, mai edia moale bona mai edia goeva ida!—Salamo 40:9.
Magu Aukana Ita Noholaia Diba
10 Lauma dikadia eiava gau idaudia ese oi idia hahekwarahia negadiai, Iehova be emu magu aukana ai ia lao diba. Guriguri amo oi boi henia. Ia ese ena orea taudia edia ganagana maragidia danu ia hakala henidia. Salamo torea tauna ese unai ia hamomokania, ia gwau: “Oi igo diho, lau oi hakala henia. Lau oi hamauria haraga. Egu komu nadina ai oi lao, egu kohoro ai oi lao, lau oi hamauria totona. Badina be oi be egu nadi-gini bona egu kohoro; oiemu ladana dainai lau do oi gunalaia bona do oi hakaua. Lau idia abia totona idia atoa tarapuna amo lau do oi hamauria, badina be egu magu aukana be oi.”—Salamo 31:2-4.
11. Dahaka dainai Iehova be magu aukana hanaihanai?
11 Iehova be magu aukana, ia lalonai ena orea taudia be nega ibounai idia noho namonamo diba. Ia hakaudia namonamo, bona ena siahu amo ia ese Satana bona ena orea edia koikoi karadia edia anina ia haorea diba. (Efeso 6:10, 11) Iehova ita abidadama henia momokani dainai, Satana ena tarapu amo ita do ia veria oho. (2 Petero 2:9) Idia hanai laganidia 4 lalodiai, Iehova ena Witness taudia ese edia haroro gaukarana be ma tano 35 lalodiai idia hamatamaia. Bona, tano haida ai tano taudia edia noho daladia dainai o moni o politik dainai, sivarai namona harorolaia be auka, to mamoe bamona taudia haida be tano idaudia idia lao, unuseniai Witness taudia ese idia davaridia diba. Unai bamona tanona ta be Japan.
12. Pioneer ta Japan ai ese Iehova be iena magu aukana ai edena bamona ia halaoa?
12 Idau bese taudia momo be Japan lalonai idia vareai gaukara totona, bona edia kongregesen momo idia haginidia. Tadikaka ta Japan gadona kongregesen ta lalonai ena sivarai ese ia hahedinaraia unai idau gado taudia haroro henidia gaukarana ese anina bada ia havaraia. Ena be ia be Baibel stadi 10 ia karadia noho, to ia ura heduru ai idia dabu gabuna ta do ia lao. Ena turana ta ia hevaseha, ia gwau: “Heduru ai idia dabu gabuna bema oi lao, Baibel stadi 20 do oi karadia be namo!” Vadaeni, Society ese idia siaia lao Hiroshima. To hua 4 idia ore murinai, ia be mai ena Baibel stadi tamona mo. Dina ta ia ese Brazil tauna ta ia davaria, Portugal gado mo ia diba. Ia hereva henia diba lasi dainai, unai gado hahedibalaia bukana ta ia hoia. Hereva haragadia haida ia dibadia, bena unai tau ia vadivadi henia lou. Portugal gado ai ia hereva henia neganai, ia hoa bena ena ruma lalonai ia abia dae mai ena moale ida. Baibel stadi idia hamatamaia. Nega daudau lasi hari tadikaka ese stadi 22 ia karadia; 14 be Portugal gado ai, 6 be Spain gado ai, bona 2 be Japan gado ai!
Idia Haroro mai Edia Goada Ida
13 Iehova ena orea taudia ese Basileia anena idia abia mai edia lalo-goada ida, badina be idia laloa Iehova be edia hahemauri gabuna. (Salamo 31:14) Do idia hemarai lasi—Iehova ese do ia hahemaraidia lasi, badina be ena hereva do ia hamomokania. (Salamo 31:17) Diabolo bona ena lauma dikadia do idia hemarai. Iehova ese ena orea taudia ia haganidia do idia harorolaia herevana be hemarai gauna lasi; idia harorolaia be haida ese idia hahemaraidia dainai lasi. Iehova bona ena Natuna ese taunimanima unai bamona idia ha-uradia lasi, Ia do idia tomadiho henia totona. Edia lalodia be abidadama ai idia honu bona Iehova ena namo bona ena hebogahisi idia lalodia bada neganai, edia lalo-namo dainai edia ududia idia hereva. (Luka 6:45) Herevana ita be hua ta ta ai hora hida haroro gaukarana ai ita haoredia, unai be namo, bona ita hemarailaia lasi be namo; bona inai be mai anina bada, eda diba hegeregerena ita gaukara namonamo neganai. Iesu bona ena Tamana ese vabu ta ena moni maragina idia laloa bada, ani?—Luka 21:1-4.
14. Pioneer gaukarana mani oi herevalaia. (Ripoti danu itaia.)
14 Lagani gunana ai, pablisa 890,231 ese edia tomadiho idia goadalaia dainai, pioneer gaukarana idia karaia! Bema pioneer taudia idia momo daekau noho, reana edia momo ese 1,000,000 do ia hanaia. Taihu ta Nigeria ai be pioneer ai ia lao dalana be ia ese ia gwauraia, ia gwau: “Haisikuli amo lau doko gwauraia neganai, Iehova ena Witness taudia edia pioneer sikuli taudia edia aniani nadua gaukarana ai lau heduru neganai, lau be taihu rua ida ai hedavari; idia vara guna, egu tubuna be gabeai. Lau laloa, ‘Bema ruaosi be pioneer gaukarana idia karaia diba, dahaka ese lau ia koua?’ Unai dainai, sikuli amo lau doko murinai lau danu be regular pioneer ai lau lao.”
15. Ita hedavari henidia taudia haroro henidia karana ese Iehova dekenai do idia roho mauri dalana edena bamona ia lailaia diba?
15 Haida mo be pioneer gaukarana idia karaia diba, to iboudiai idia haroro diba. Belgium ai, taihu ta, ena lagani be 82 hahinena, be sitoa ta lalonai sitoa ena biaguna ena adavana ena hereva ia kamonai, ia laloa momo badina be vanegai heiriheiri bada be politik ai ia vara dainai. Unai dainai, taihu ese ia hoia vamuna ena davana be hahine ia henia neganai, pepapepa ta ladana Dahaka Hereva be Iehova ena Witness Taudia ese Idia Abia Dae? be moni ida ia henia. Gabeai, sitoa ai ia vareai lou neganai, hahine ese maoromaoro ia nanadaia, Baibel ese tanobada ibounai tuarina ihatoina edena bamona ia gwauraia. Taihu ese buka ta ladana Maino bona Noho Namona—Daika Amo Ia Mai? ia henia. Dina haida idia ore murinai, taihu be sitoa ai ia vareai lou neganai, unai hahine be mai ena henanadai ma haida. Taihu ese ia bogaia hisi dainai, Baibel stadi ia hamaorolaia, bena ia abia dae. Hari ia ura bapatiso do ia abia. Ena adavana ese unai pepapepa ia duahia vadaeni bona ia danu ese Baibel ia stadilaia noho.
‘Hahenamo Bada Herea’
16 Inai dina gabedia dikadia lalodiai, Iehova ese “ena hebogahisi” be ia dekenai idia roho mauri taudia dekediai ia hahedinaraia vadaeni, ani? Tama lalokauna ta bamona, Iehova ese hahenamo momo ia abidia hegaegae, ena natuna tanobada ai edia. Herarai taudia iboudiai vairadiai ia hamoaledia, salamo ena hereva hegeregerena: “Emu hahenamo be bada herea, oi abia hegaegae, oi idia gari henia taudia edia, bona oi karaia, oi dekenai idia roho mauri taudia edia, taunimanima natudia vairadiai oi karaia.”—Salamo 31:19, 21.
17-19. Ghana ai, dahaka namo ia vara, tau burukana ta ese ena headava ia hamaoromaoroa dainai?
17 Unai dainai, tanobada taudia ese Iehova idia tomadiho henia taudia edia kara maoromaoro idia itaia bona idia hoalaia. Ghana ai, tau burukana ta, ena lagani be 96 bona ia be lagani 70 lalodiai hahine ta ida idia noho, ese gavamani tauna ta ia noia ena headava do ia rejistalaia. Opesa ia hoa; ia nanadaia, ia gwau: “Hari oi buruka neganai, oi be momokani oi ura inai bamona do oi karaia, a?”
18 Hari tau ia gwau: “Lau ura Iehova ena Witness tauna ai do lau lao, bona tanobada ena dokona ia do ginidae lasi neganai, gaukara mai anina bada, Dirava ena Basileia sivaraina namona harorolaia gaukarana, do lau karaia. Inai gaukara ese mauri hanaihanai ia havaraia. Iehova ena Witness taudia ese gavamani ena taravatu idia badinaia, headava rejistalaia taravatuna danu. Unai dainai egu headava mani oi rejistalaia.” Vadaeni opesa ese ia rejistalaia, bena tau burukana ia moale, ena headava be gavamani vairanai ia hamaoromaoroa vadaeni dainai.—Roma 12:2 itaia.
19 Unai murinai, unai opesa ese ia kamonai gaudia ia lalodia. “Iehova ena Witness taudia . . . gaukara mai anina bada . . . tanobada ena dokona . . . Dirava ena Basileia . . . mauri hanaihanai.” Unai ibounai ena anina tau burukana ta dekenai be ia daradaralaia dainai, Witness taudia ia tahudia, do ia dibalaia totona. Baibel stadi ia abia dae bena ia goada ia lao haraga. Hari inai negai, ia be bapatiso Witness tauna. Unai hegeregerena, ita be haida ese gau maragidia idia gwauraidia gaudia lalodiai Iehova ita kamonai henia neganai, reana namo bada do ita davaria, bona eda kara ese idia itaia taudia do ia hanamodia bada danu reana.—1 Petero 2:12 itaia.
20. Myanmar ai, taihu ta be ena kara maoromaoro dainai edena bamona ia haroro diba?
20 Hereva momokani idia badinaia taudia ese kara maoromaoro na memero bona kekeni idia haheitalaidia, inai koikoi tanobadana ai. Myanmar ai, Witness kekenina ta be famili ogogamina lalonai. Ia, mai ena tadikaka bona taihu ida, iboudiai be 10. Ena tamana, pensen ia abia tauna, be regular pioneer ta. Dina ta sikuli ai, hari taihu ese daimon rini ta ia davaria, bena maoromaoro ia laohaia ena tisa dekenai. Kerukeru, tisa ese ena kara sivaraina be klas ibounai ia hamaorolaidia. Bena ia ese ia noia, klas vairanai do ia gini bona rini ia haloua ena badina do ia gwauraia hedinarai. Ia gwau ia be Iehova ena Witness kekenina ta bona ena Dirava ese henaohenao bona koikoi ia ura henidia lasi. Sikuli taudia iboudiai ese unai sivarai idia kamonai dainai, ia be mai ena dala namona, tisa bona memero kekeni danu do ia haroro henidia.
21. Memero kekeni ese Iehova idia abidadama henia neganai, edia kara ese ena namo edena bamona idia hahedinaraia?
21 Belgium ai, tisa ta ese ena klas kekenina ta, Witness kekenina, ena kara ia itaia murinai, klas lalonai ia gwau: “Egu lalohadai Iehova ena Witness taudia dekediai be lau haidaua vadaeni. Guna lau laloa idia be idau tomadiho taudia idia haheauka henidia lasi. To idia ese idia haheauka henidia bada; gau tamona, idia lalodia bada taravatudia idia utudia lasi.” Lagani ta ta iboudiai tisa taudia ese edia klas taudia namo hereadia kwalimu ahudia idia henidia. Unai kwalimu ahudia ta be kara maoromaoro daladia kosina ena. Lagani toi lalodiai unai kwalimu ahudia be Iehova ena Witness taudia edia natudia idia henidia. Iehova idia abidadama henia bona idia badinaia taudia momo dekediai unai bamona ia vara.—Salamo 31:23.
22. Salamo 31 ena dokona ai be dahaka, bona unai ese ita edena bamona ia durua, inai dina gabedia lalodiai?
22 Salamo 31 ena dokona ai be inai kwalimu herevana: “Umui goada, umui boga auka, Iehova umui naria taudia iboudiai.” (Salamo 31:24) Unai dainai, Satana ena tanobada dikana ena dina gabedia ai, Iehova ese ita do ia rakatania lasi, to ita kahirakahira do ia mai bona ena siahu be ita lalonai do ia udaia. Iehova be momokani bona ia lusi lasi. Ia be iseda roho mauri gabuna; ia be iseda kohoro.—Hereva Lada-isidia 18:10.
Oi Laloatao A?
◻ Dahaka dainai Iehova be eda roho-mauri gabuna ai ita halaoa diba?
◻ Dahaka ese ia hahedinaraia orea badana ese Basileia idia anelaia mai edia boga-auka ida?
◻ Dahaka dainai ita diba Satana ena tarapu ese Iehova ena orea taudia do ia tarapudia lasi?
◻ Iehova ese dahaka hahenamo ia abia hegaegae, ia dekenai idia roho mauri taudia edia?
10. Dahaka dainai hekwarahi negadia lalodiai Iehova ita noia diba?
13. Dahaka dainai Iehova ena hesiai do ita lao henia totona ta ese ita do ia hahemaraia be dika?
16. Iehova ese hahenamo bada edena bamona ia abia hegaegae, iena orea taudia edia?
[Chart on page 12-15]
IEHOVA ENA WITNESS TAUDIA EDIA LAGANI 1993 ENA HARORO RIPOTI
(See bound volume)
[Pictures on page 16, 17]
Iehova dekenai idia roho mauri taudia hutuma bada ese Basileia idia harorolaia—iboudiai be 4,709,889!
1. Senegal
2. Brazil
3. Chile
4. Bolivia