Basileia Ai Tahua Guna

OLIVE SPRINGATE ESE IA SIVARAILAIA

Emai Sinana ese emai guriguri ia kamonai murinai, kandolo iahabodoa bona daiutu ia rakatania. Egu taihuna maragina be maoromaoro lau ia nanadaia, ia gwau: “Olive e, haba be biriki amo idia karaia, to edena dala ai Dirava be ita ia itaia bona kamonai henia diba?”

LAU HAERE, lau gwau: “Iseda Sinana ia gwau, herevana dahaka gau, to Ia be gau ibounai ia itaia diba, iseda kudouna lalonai danu.” Emai Sinana be Dirava ia gari henia hahinena ta bona Baibel ia duahia momo, bona ai natudia ia hadibaia momo Dirava bona Baibel ena hahegani ai matauraidia bada totona.

Emai tamana bona sinana be Anglican Dubu taudia, gabu ladana Kent County ena taoni maragina, Chatham, England dekenai. Ena be Sinagu be hanaihanai ia lao dubu, to ia laloa Keristen be pura ibounai nega tamona ai dubu lalonai hereva ia kamonai sibona be hegeregere lasi. Danu, ia laloa Dirava be mai ena dubu momokanina tamona sibona.

Baibel Ena Hereva Momokanidia Ia Ura Bada

Lagani 1918 ai, egu lagani be 5 neganai, Sinagu ese Studies in the Scriptures buka ia abidia; Charles T. Russell, Watch Tower Bible and Tract Society ena presiden ginigunana, ese unai buka ia toredia. Lagani haida murinai, Wigmore hanua maragina dekenai ai noho neganai, Iehova ena Witness taudia ese Sinagu idia davaria, unai neganai idia gwauraidia Bible Student taudia. Baibel stadilaia bukana The Harp of God ia abia, bona unai buka amo iena Baibel henanadai momo edia haere ia davaria. Pura ta ta iboudiai, pos opesi mauana dekenai unai buka ena karoa ta ta edia henanadai be pink kadi dekenai idia siaia mai. Danu, unai kadi ese ia hahedinaraia haere be edeseniai unai buka lalonai ia davaria diba.

Lagani 1926 lalonai, egu tamana bona sinana, egu tadina maragi Beryl, bona lau be Anglican Dubuna ai rakatania, badina ai badu dubu be politik lalonai ia vareai, bona ena hahediba hereva momo idia kerere dainai. Edia hahediba hereva badana ta be Dirava ese hel ena lahi lalonai taunimanima ia hahisidia ela bona hanaihanai. Egu sinana be Baibel ena hereva momokanina ia tahua momokani dainai, ia laloa Anglican Dubuna be tomadiho momokanina lasi.

Nega sisina murinai, Sinagu ia guriguri goadagoada dainai, Bible Student ta, Mrs. Jackson, ese ai ia vadivadi henia. Kahirakahira hora rua lalodiai, lau bona Sinagu be ia ida ai hereva hebou, emai henanadai momo be Baibel amo ia haerelaidia. Ai moale bada herea badina ai davaria gauna ta be Iesu Keriso ena Tamana, Iehova Dirava, ai guriguri henia be namo, namo lasi Toi Tamona hehuni gauna dekenai ai guriguri. (Salamo 83:18; Ioane 20:17) To lau laloaboio diba lasi henanadaina be Sinagu ese ia gwauraia, ia gwau: “Basileia tahua guna ena anina be dahaka?”​—Mataio 6:33.

Baibel ena amo ia haere be mai anina bada emai mauri dekenai. Unai pura murinai, Bible Student taudia edia hebou iboudiai dekenai ai lao, bona ma haida dekenai ai kamonai gaudia ai harorolaia. Ai laloa hereva momokani ai davaria momokani. Hua haida murinai, lagani 1927 lalonai, Sinagu be Iehova dekenai ia gwauhamata bona bapatiso ia abia, bona lagani 1930 lalonai, lau danu be bapatiso lau abia.

Pioneer Hesiai Gaukara Dekenai Lau Vareai

Emai ruma bese be Gillingham Kongregesen dekenai ai lao henia, unai neganai ai be taunimanima 25. Idia haida be ful-taim haroro gaukarana idia karaia, idia gwauraidia pioneer taudia, bona iboudiai be guba helarona idia abia. (Filipi 3:​14, 20) Edia gaukara goadagoada Keristen karadia ese ai idia hasiahua. Lauegu lagani be 18 neganai, lagani 1931 ai, Belgium dekenai nega sisina lau pioneer. Unai dainai lau ura momokani ma Basileia gaukara haida lau karaia. Unai neganai, dubu gunalaia taudia iboudiai dekenai The Kingdom, the Hope of the World buklet ai henidia.

Gabeai, egu tamana ese emai Keristen gaukarana ia inai henia momo. Unai bona ma badina haida dainai, lagani 1932 ai, London dekenai lau lao, koledi ai lau lao totona. Gabeai, lagani hani lalodiai, sikuli tisa gaukara lau karaia, bona unai negana lalonai Blackheath Kongregesen dekenai lau lao; unai neganai, London ena kongregesen be hani sibona. Unai neganai, ai kamonai matamaia Hitler ena Germany dekenai, emai Keristen tadikaka bona taihu be dibura rumana ai idia lao bona hisihisi idia abia, badina idia ura lasi Hitler ena tuari gaukara idia durua.

Lagani 1938 neganai, moni gaukara lau rakatania badina egu ura bada be pioneer gaukara lau karaia; unai hua lalonai danu, guna buka haida lau abia edia abitorehai monina lau henia lou. Egu tadina Beryl be unai neganai London dekenai pioneer gaukara ia matamaia, to ma ruma ta dekenai ia noho ma pioneer haida ida. Egu pioneer turana ginigunana be Mildred Willett, gabeai ia ese John Barr ia adavaia; John Barr be hari Iehova ena Witness taudia edia Hakaua Oreana ena memba tauna ta. Emai grup maragina taudia ida, ai be baisikele amo teritori dekenai ai lao, bona ena be medu ia diho, to dina ibounai lalonai ai haroro.

Europe dekenai tuari ia vara gwauraia. Ami lasi taudia be gas-mask karaia dalana dekenai idia sikuli, bona idia hegaegae tuari ia vara garina, unai neganai natudia be England ena hanua maragidia ai do idia siaidia lao. Egu moni be hegeregere tamaka sibona lau hoia totona, bona egu tamana bona sinana ese moni lau idia henia dalana be lasi. To Iesu be inai bamona ia hereva, ani? Ia gwau: ‘Iena Basileia do umui tahua guna neganai, unai gau ibounai danu dohore ia henia.’ (Mataio 6:33) Egu abidadama be Iehova ese egu dabu gaudia ibounai lau do ia henia, bona unai negana amo lagani iboudiai lalodiai unai bamona lauegu dabu gaudia ibounai ia henia bada. Tuari negana lalonai, lauegu aniani be sisina, to nega haida aniani ma haida lau davaria, badina taraka be dala dekenai idia heau lao neganai, nega haida uma aniani idia moru bona lau davaria. Bona nega momo aniani lau abia, badina Baibel bukadia lau henia bona au huahua bona uma aniani lau abia edia davana bamona.

Egu tadina kekeni Sonia be lagani 1928 ai ia vara. Ia be lagani 7 sibona neganai, ena gwauhamata Iehova dekenai ia karaia. Sonia ia gwau, unai negana amo, ia ura pioneer gaukara ia karaia. Lagani 1941 ai, ena gwauhamata be ranu bapatiso amo ia hamomokania ena nega sisina murinai, ena ura ia abia, badina ia bona emai Sinana be Caerphilly, South Wales, dekenai pioneer gaukara idia karaia.

Emai Haroro Gaukarana Tuari Laganidia Lalodiai

September 1939 ai, Tanobada Ibounai Tuarina Iharuana ia matamaia, bona emai Keristen tadikaka bona taihu Britain dekenai be dibura rumana ai idia lao, edia tadikaka Nazi Germany dekenai bamona​—idia ura lasi tuari dekenai idia vareai dainai. England dekenai, July 1940 ai, bomu idia hadihoa matamaia. Hanuaboi ta ta ibounai, Germany taudia edia peleini ese bomu idia hadihodia dainai rege be bada herea, to Iehova ena heduru dainai ai mahuta sisina, bena dina ta ta iboudiai ai toreisi diba, bona haroro gaukara ai karaia mai goada danu.

Nega haida ai lao haroro teritori dekenai bona ai davaria bomu ese ruma momo idia hadikadia ore vadaeni. November 1940 neganai, bomu ta be ai momo ai noho rumana kahirakahira dekenai ia moru dainai, aiemai ruma ena uindo be kahana tausen momo dekenai idia makohia. Ruma ena vaira iduara metauna ia moru, bona lahi kwalahuna ia daekau gabuna ia moru. Unai hanuaboi neganai, kohua ta tano lalonai, bomu moru negana hunia gabuna, dekenai ai noho, bona unai murinai ai parara bona Witness taudia edia ruma idauidau dekenai ai noho.

Unai nega sisina murinai, lau idia siaia Croydon, Greater London, dekenai lau haroro totona. Egu pioneer turana be Ann Parkin, ena taihuna Ron Parkin be gabeai Puerto Rico ena Branch Komiti taudia edia coordinator ai ia lao. Gabeai, Bridgend, South Wales, dekenai lau lao bona unuseniai lau pioneer noho; hua 6 lalodiai hosi ese ia veria daiutu bamona gauna ta lalonai lau noho. Unuseni amo, baisikele amo ai lao kilomita 6, kongregesen badana, Port Talbot dekenai.

Unai neganai, hanua taudia be ai idia badu henia, bona ai idia gwauraia tuari lalonai vareai lasi taudia. Unai dainai ai hekwarahi mahuta gabuna ai davaria totona, to Iehova ia gwauhamata hegeregerena, ai ia naria.

Gabeai, ai 8 be special pioneer gaukara ai abia Swansea, South Wales, unai be davara badinai kone hanua maragina dekenai. Tuari ena siahu ia bada ia lao neganai, taunimanima edia badu ai dekenai ia bada ia lao danu. Emai pioneer rumana ena haba dekenai, inai hereva “bita bamona taudia” bona “gari taudia” idia torea. Idia badu badina niuspepa dekenai ai idia samania ai be tuari dekenai ai vareai lasi dainai. Gabeai, ai tamona tamona idia siaia dibura rumana dekenai, ela bona ai ibounai 7 be unuseniai ai noho. Lagani 1942 lalonai, lau be hua tamona Cardiff dibura rumana dekenai lau idia atoa, bona gabeai egu tadina kekeni Beryl be unuseniai danu idia atoa. Ena be emai kohu be sisina sibona, bona ai idia hevasehalaia bona ai idia gwauraia dika, to lauma dalana dekenai ai taga bada.

Unai negana lalonai, Sinagu bona Sonia be Caerphilly dekenai idia pioneer karaia bona ai dekenai idia vara gaudia be idia danu idia mamia. Sonia ese ia henia Baibel stadi ginigunana be Friday hanuaboi ia henia hahine ta dekenai. Sonia ia laloa Sinagu ese do ia bamoa, to Sinagu ia gwau: “Lau danu be ta do lau vadivadi henia. Oi gwau unai hahine do oi lao henia, unai dainai oi sibona oi lao be namo.” Ena be Sonia ena lagani be 13 sibona, to sibona ia lao, bona unai hahine be lauma dalana ai ia tubu, bona gabeai bapatiso Witness ta ai ia lao.

Tuari Murinai Gaukarana—Bena Gilead

Tanobada Ibounai Tuarina Iharuana be lagani 1945 ai ia doko neganai, lau be daudau teritori Whaley Bridge, Derbyshire, dekenai lau haroro. Daba kahanai tuari ia doko herevana idia gwauraia neganai, ai lao tuari idia hesikulaia taudia ai durudia totona​—tama sina lasi natudia, vabu taudia, bona bero ese edia tauanina ia hadikaia taudia.

Hua haida murinai, Society idia noinoi volantia taudia haida be Ireland, idia gwauraia Emerald Motumotuna, dekenai idia lao totona. Unai neganai, Iehova ena Witness taudia 140 bamona be unai motumotu dekenai, bona idia gwauraia misinari teritori. Hua haida murinai, special pioneer 40 bamona, bona lau danu, be unuseniai idia siaia.

Not kahana ai Coleraine bona Cookstown dekenai lau haroro nega sisina murinai, lau bona ma toi be ist konena ai, Drogheda, dekenai ai idia siaia. Ena be Ireland taudia be moale bona heabidae taudia, to edia tomadiho idia goadalaia dainai tomadiho idaudia idia inai henidia. Unai dainai, lagani tamona ibounai lalonai, ai be Baibel stadi buka haida sibona ai henia diba (unai be buka tamona bona buklet haida).

Drogheda dekenai ai noho neganai, baisikele amo lau lao uma ta amo ia lao uma ta dekenai, bena uma gaukara tauhauna be dala dekenai idia noho tubutubu gaudia lalona amo ia heai mai. Dala ia itaia, bena gado maragina ai ia henanadai, ia gwau: “Oi be Iehova ena Witness ta, a?” Lau haere lau gwau, oibe, bena ia gwau: “Varani hanuaboi, lau bona egu maoheni kekeni be emui kara ai hepapahuahulaia, bona emai maoheni ai hadokoa. Ia gwau umui be Komiunis kekeni, Katolik pris taudia bona niuspepa idia hereva bamona, to lau gwau unai be koikoi, badina umui gaukara hehuni lasi to umui lao ruma ta ruma ta dekenai.”

Buklet ta lau henia ia duahia totona, bena ena poketi dekenai ia hunia, bona dala ai hegaegaelaia dibura negana ai do ai hedavari bona ai herevahereva totona, badina ia gwau: “Bema lau idia itaia oi danu lau herevahereva, egu moni gaukara amo lau do idia hadokoa.” Unai hanuaboi, ai rua be ia ida ai hedavari bona iena henanadai momo ai haerelaidia. Toana be ia abia dae unai be hereva momokani, bona ia gwauhamata ma hanuaboi ta ai do ia mai emai ruma dekenai, hereva ma haida do ia kamonai totona. Ia mai lasi, unai dainai ai laloa, reana hanuaboi ginigunana lau hereva henia neganai, baisikele ai idia loaloa taudia be idia itaia dainai iena moni gaukara amo idia hadokoa. Nega momo ai laloa, Witness ta ai ia lao, eiava?

Lagani 1949 ai, England ena saut kahana konena ai, Brighton, ena distrik hebouhebou dekenai ai lao murinai, ai momo be Watchtower Bible School of Gilead, New York State, dekenai ai idia boiria. Britain amo, 26 be klas namba 15 idia lao henia, bona Yankee Stadium ena intenesenel hebouhebou dekenai, July 30, 1950 ai, klas hadokoa herevana idia karaia.

Emai Hesiai Gaukara Brazil Dekenai

Lagani gabenai, lau idia siaia São Paulo, Brazil, dekenai; unai be tanobada ena bada ia lao haraga siti ta. Unai neganai, unuseni Iehova ena Witness taudia edia kongregesen be 5 sibona, to hari, kahirakahira 600 idia noho! Unai be idau momokani Ireland dekenai ai gaukara neganai! São Paulo ena teritori dekenai, ruma momo idia bada momokani, bona edia magu be mai hairai auri latadia amo idia karaia. Ruma tauna eiava hesiai kekeni ai boiria dalana be emai imana ai hapatapataia.

Lagani idia lao noho lalonai, lau haroro henia gabudia be momo. Lau moale bada badina São Paulo ena gunika hanuadia dekenai, kongregesen matamatadia haginia gaukara lau durua dainai; lagani 1955 lalonai Jundiaí dekenai ta idia haginia, bona lagani 1958 lalonai Piracicaba dekenai ta idia haginia. Gabeai, lagani 1960 dekenai, egu tadina Sonia be egu misinari turana ai ia lao, bona ai idia siaia Pôrto Alegre dekenai, unai be Rio Grande do Sul ena hanua badana. Reana oi ura oi diba, edena dala amo ia lao Brazil dekenai?

Sonia bona Sinagu be Tanobada Ibounai Tuarina Iharuana murinai, England dekenai idia do pioneer hebou. To lagani 1950 murinai, Sinagu be kansa operesen ia abia, bona ena be Baibel stadi bona revareva ia karaia diba, to ia manoka bada dainai ruma ta ruma ta dekenai ia lao diba lasi. Sonia be pioneer gaukara ia karaia noho, bona emai Sinana ia naria noho danu. Lagani 1959 lalonai, Sonia be Gilead ena klas namba 33 dekenai ia lao, bona Brazil dekenai idia siaia. Unai neganai, Beryl ese Sinagu ia naria ela bona 1962 dekenai bena emai Sinana ia mase. Beryl ia headava vadaeni, bona ena ruma bese taudia ida mai abidadama danu Iehova idia hesiai henia noho.

Brazil dekenai, Sonia bona lau be taunimanima momo ai durudia idia gwauhamata bona bapatiso idia abia totona. To, Brazil taudia momo edia hekwakwanai be inai: Bema Brazil gavamani ena taravatu hegeregerena ai idia headava, gabeai edia headava idia hadokoa be auka, unai dainai tau bona hahine momo be dala maorona ai idia headava lasi, to idia mahuta hebou sibona. Dala maorona ai ia headava tauna eiava hahinena ena adavana ese ia rakatania neganai unai ia vara.

Hahine ta, ladana Eva, lau davaria neganai unai bamona ia noho. Ena adavana korikorina ia lao boio, unai dainai, ai davaria totona, reidio dekenai hereva ta ai halasia. Ena adavana idia davaria neganai, Eva lau bamoa unai siti ta dekenai ia lao unai tau ese pepa ta ia sainia totona, bena edia headava idia hadokoa; unai pepa ia gwau Eva ese ma tau ta danu idia mahuta hebou, to ia ura dala maorona ai idia headava. Kota dekenai, kota naria tauna be Eva bona lau ia nanadaia, ia ura ia diba badina be dahaka Eva ia ura ena headava dalana ia hamaoromaoroa. Unai ai gwauraia hedinarai neganai, kota naria tauna ia hoa bona ia moale.

Ma nega ta ai, egu Baibel stiuden ta ida ai lao, loia tauna ta ese kota dekenai ia durua totona. Unai neganai danu, headava bona Dirava ena taravatu mauri ena kara namo dekenai ai harorolaia namonamo. Unai neganai, headava hadokoa ena davana be bada herea dainai, edia headava idia hamaoromaoroa tau bona hahine be moni gaukara idia karaia, davana idia karaia totona. To unai Baibel stiuden matamatadia dekenai, unai hekwarahi be mai anina namona. Sonia bona lau, ai moale badina edia headava dinanai ai noho, bona unai murinai, edia natudia badadia toi ida, edia ruma dekenai Baibel ena headava hereva kwadogina ta ai kamonai.

Mai Ena Taga Bona Mai Anina Bada Mauri Dalana

Sonia bona lau be Iehova dekenai ai gwauhamata bona pioneer taudia ai lao neganai, bema mai dalana, ai ura emai mauri ibounai lalonai ful-taim hesiai gaukarana do ai karaia. Do ai buruka neganai eiava ai gorere eiava do ai hekwarahi moni dekenai, ai laloa lasi. To, Iehova ia gwauhamata hegeregerena, ai ia rakatania lasi.​—Heberu 13:6.

Io, nega haida moni be lasi dainai ai hekwarahi. Nega ta, egu turana bona lau be lagani tamona lalonai, dina tubua ai aiemai aniani be paraoa mai parsley sibona, to ai hitolo lasi, bona ai dekenai mauri durua gaudia be nega ibounai idia noho.

Lagani idia lao noho neganai, emai goada ia ore sisina. Lagani 1985-87 dekenai, ai ruaosi be operesen badana ai abia, bona unai be hetoho ai dekenai badina ai haroro momo diba lasi. January 1987 neganai, ai idia boiria Iehova ena Witness taudia edia hedikwota Brazil dekenai ai noho totona.

Emai bese badana ena hesiai taudia be tausen ta bona ma haida, bona ai noholaia ruma hairaina be kilomita 140 São Paulo amo, unuseniai Brazil totona bona South America tanodia ma haida totona Baibel buka bona magasin ai printaia. Iniseniai, Dirava ena abidadama hesiai taudia be lalokau dekenai ai idia naria. Lagani 1951 ai, Brazil dekenai lau mai neganai, Basileia harorolaia taudia be 4,000 bamona sibona, ta hari edia namba be 366,000! Emai hebogahisi guba Tamana ena Basileia ai tahua guna dainai ‘gau ibounai’ ia henia.​—Mataio 6:33.

[Picture on page 22]

Olive bona Mildred Willett be sivarai henia mauana badinai idia gini, 1939

[Picture on page 25]

Olive bona Sonia Springate