Tanobada Ena Tomadiho Edia Hebou—Do Ia Kwalimu, A?
TANOBADA ena tomadiho gunalaia taudia handred momo be 1993 ena siahu negana ai idia hebou, Chicago, Illinois, U.S.A. dekenai, Tanobada Ena Tomadiho Edia Hebou iharuana idia karaia totona. Buddha, Kerisendom, Hindu, Iuda, bona Islam tomadiho amo idia mai taudia idia hebou. Meamea hahine bona dirava hahine tomadiho henidia taudia idia mai danu. Idia herevaherevalaia gauna be dahaka idia karaia tuari idia haorea totona. Unai hebou ena seamani ia gwau “hari inai tanobada negana ai, idia karaia tuaridia toi toi amo rua rua be tomadiho idia hepapahuahulaia.”
Lagani Handred Tamona Gunanai
Unai hebou be ena gaukara ia hagugurua, a? Lagani handred tamona gunanai, Tanobada Ena Tomadiho Edia Hebou ginigunana dekenai ia vara gauna ita itaia. Unai hebou be Chicago dekenai idia karaia danu, lagani 1893 ena siahu negana ai, bona tomadiho 40 bona ma haida amo hebou taudia idia mai. Tanobada Ena Tomadiho Edia Hebou Ena Kaunsolo taudia idia gwau, lagani 1893 ena hebou ai idia lao taudia “idia laloa unai be tomadiho idauidau intenesenel hebou ginigunana lalo-parara, maino, bona namo habadaia karana durua totona. Unai ia vara lasi. Idia hanai lagani handred tamona lalodiai idia vara tuaridia dekenai tomadiho idauna dadaraia bona dagedage idia vara, bona unai bamona ia vara noho.” Badina be dahaka idia ura gauna idia karaia lasi? Badina Dirava ese tomadiho idauidau hebou karana ia moalelaia lasi. Baibel ia gwau: “Dirava idia abidadama henia lasi taudia danu do umui hakapua tamona lasi.”—2 Korinto 6:14-17.
September 1893 ena Zion’s Watch Tower lalonai, ia maoro idia hahedinaraia Baibel ia gwau lasi Tanobada Ena Tomadiho Edia Hebou idia karaia totona. Inai bamona idia toretore mai hevaseha sisina danu: “Idia ese Babulono bona idaunega hanua ma haida gabudia ai raro nadidia momo idia geidia, to haida idia do davaridia lasi. . . . Idia davaria lasi ta ia gwau Mose bona Iosua be Moab taudia, Amono taudia, bona Edom taudia ida ‘Tanobada Ena Tomadiho Edia Hebou’ idia karaia totona . . . Idia davaria lasi ta ia gwau buruka tauna Samuel be Gath bona Ekron dekenai ia lao, Dagon ena pris taudia ia boiridia Silo dekenai idia mai bona Iehova ena hahelaga taudia ida idia hebou . . . Idia davaria lasi ta ia gwau boromakau kopina amo beleta ia atoa buruka tauna Elia be Baal bona Molek edia pris taudia ida wiki tamona ‘hebouna’ ta idia karaia, idia ta ta edia tomadiho ena hahediba herevadia idia herevaherevalaia hebou, edia tomadiho hemataurai heheni karana idia habadaia totona.”
Dirava Ena Basileia—Helaro Tamona Sibona be Unai
Tanobada Ena Tomadiho Edia Hebou be do ia kwalimu lasi. Niuspepa bona unai hebou dekenai idia lao taudia be unai hebou idia herevalaia inai herevadia amo: “heiriheiri,” “hepapahuahu,” bona “daradara bada.” Sivarai ta ia gwau, pulisi taudia danu be politikol kara amo ia vara hepapahuahu rua idia koua. Lagani 1952 pepana ta lalonai, unai hebou dekenai idia gwau idia tahua gauna ta be inai: “Ai ura UNITED NATIONS ida ai gaukara hebou totona hanaihanai do ia noho Tanobada Ena Tomadiho Edia Hebou oreana ta do ai karaia, tanobada mainona bona bese iboudiai bogaragidiai noho hebou namona do ai havaraia totona.” To Iesu ena hereva be idau, ia gwau iena Basileia be inai tanobada gauna ta lasi. Baibel ese ia hahedinaraia Dirava ena Basileia sibona ese taunimanima edia hekwakwanai ia hanamodia diba.—Daniel 2:44; Ioane 18:36.