Dubu Idauidau Idia Gaukara Hebou Karana​—Dirava Ena Dala, A?

DUBU idauidau idia gaukara hebou (interfaith) karana idia sapotia taudia edia lalohadai be unai bamona lasi. Orea ta ladana, Interfaith Youth Core ia haginia tauna, Eboo Patel ia gwau: “Dubu ibounai be ita idia hebogahisi henia . . . , iseda gabu idia naria . . . , bona heabidae karana idia hahedinaraia.”

Buddhist, Katolik, Protestan, Hindu, Muslim, bona dubu ma haida be nega haida idia gaukara hebou ogogami idia haorea, taunimanima edia maoro idia herevalaia, idia ura bomu idia taravatua, o tanobada hanamoa daladia ma haida idia herevalaia. Idia ese taunimanima durua bona hagoadaia daladia idia herevalaia. Edia aria lalonai, kandolo idia gabua, moale karadia idia karaia, miusiki idia gadaralaia, idia guriguri bona gau ma haida idia karaia.

Dubu idauidau idia gaukara hebou dalana ese idia huanai ia vara heiriheiri ia hanamoa, a? Dirava ia ura dubu idauidau idia gaukara hebou, unai amo tanobada do idia hanamoa, a?

IDIA LALOTAMONA, A?

Tomadiho orea badana ta ia hekokoroku, ia gwau ena memba be dubu idauidau 200 mai kahana amo, bona tano 76 ai idia noho. Unai orea ia ura “dina ta ta ai dubu iboudiai idia lalotamona” be namo. To unai hereva idia badinaia be auka. Hegeregere, unai orea gunalaia taudia idia gwau, namona be edia kontraka pepana ai idia torea herevadia idia abia hidi namonamo, unai amo dubu momo do idia badu lasi, to mai lalotamona ida kontraka pepana idia sainia. Dahaka dainai? Badina ta be, haida idia gwau unai pepa ai Dirava ladana ia noho lasi be namo. Unai amo edia dubu taudia ese inai hereva, Dirava, idia gwauraia lasi o torea lasi.

Bema Dirava ladana be lasi vadaeni dubu be dahaka do ia hadibaia? Dahaka dainai dubu idauidau idia gaukara hebou karana be idau, bona ogogami taudia durua oreadia (charitable eiava philanthropic organization) be idau? Badina ataiai ita herevalaia tomadiho orea badana ia gwau, ia be dubu idauidau ia durua edia gaukara hebou karana idia habadaia totona.

KARA NAMODIA SIBONA IDIA HEREVALAIA BE HEGEREGERE, A?

Tomadiho gunalaia tauna ta, Dalai Lama ia gwau: “Dubu badadia ibounai ese idia harorolaia hereva badana be inai: Lalokau, hebogahisi bona dika gwauatao karana.” Ma ia gwau: “Gau badana be dina ta ta lalonai unai kara namodia ita hahedinaraia.”

Momokani lalokau, hebogahisi, bona dika gwauatao karana ita herevalaia sibona be hegeregere lasi. Iesu ia gwau: “Unai dainai, gau ibounai umui ura taunimanima ese umui dekenai idia karaia hegeregerena, idia dekenai danu unai bamona do umui karaia.” (Mataio 7:12) To tomadiho momokanina ese kara namodia sibona idia herevalaia be hegeregere, a?

Aposetolo edia negai momo idia gwau Dirava idia hesiai henia, to Paulo ia gwau: “Idia dekenai lau gwauraia hedinarai, idia be idia ura dikadika Dirava idia hesiai henia, to diba maoromaoro hegeregerena idia karaia lasi.” Edia hekwakwanai be dahaka? Paulo ia gwau: “Badina idia be Dirava ena kara maoromaoro idia badinaia lasi, to sibodia edia kara maoromaoro idia haginia toho.” (Roma 10:2, 3) Dirava ena ura idia diba namonamo lasi dainai, edia ura​—bona abidadama o tomadiho​—be anina lasi.​—Mataio 7:21-23.

DUBU IDAUIDAU IDIA GAUKARA HEBOU KARANA​—BAIBEL BE DAHAKA IA GWAU?

Iesu ia gwau: “Maino idia karaia taudia be idia moale.” (Mataio 5:9) Iesu be ia harorolaia herevadia ia badinaia​—ia dagedage lasi, bona dubu idauidau taudia dekenai maino sivaraina ia harorolaia. (Mataio 26:52) Iesu idia kamonai henia taudia be lalokau​—taunimanima ia hatamonaia gauna hereadaena​—idia hahedinaraia. (Kolose 3:14) To Iesu ia ura taunimanima idauidau ia durua edia gaukara hebou karana idia habadaia, unai amo maino ai idia noho diba, a? Iesu be dubu ma haida ida ia gaukara hebou, a?

Farisea bona Sadukea dubu gunalaia taudia be Iesu idia dagedage henia, bona idia ura idia hamasea. Iesu be dahaka ia karaia? Ia ese ena hahediba taudia ia hamaoroa: “Rakatanidia, idia be matakepulu hakaua taudia.” (Mataio 15:14) Iesu ia ura lasi iena tadikaka be unai bamona dubu ida idia gaukara hebou.

Gabeai, Greece ai, Korinto Keristani kongrigeisen ia gini. Ena be unai siti ai dubu idauidau taudia momo idia noho, to Keristani taudia ese dahaka idia karaia be namo? Aposetolo Paulo ia gwau: “Abidadama lasi taudia ida do umui hakapua tamona lasi.” Dahaka dainai? Paulo ia gwau: “Keriso bona Beliala be edena bamona idia lalotamona diba? Eiava abidadama tauna bona abidadama lasi tauna be edena bamona idia gaukara hebou diba?” Bena inai sisiba ia henia: “Umui ese idia do umui rakatania, bona idia amo do umui parara.”​—2 Korinto 6:14, 15, 17.

Dubu idauidau idia gaukara hebou karana be Baibel ese ia taravatua. To reana oi henanadai, ‘Edena dala ai lalotamona momokanina ita havaraia diba?’

LALOTAMONA MOMOKANINA HAVARAIA DALANA

Konstraksen kampani edia gaukara taudia be momo. To, bema ruma ta ena palani pepana dekenai idia lalotamona lasi, edia gaukara idia hagugurua diba, a?

Hari inai negai dubu idauidau be unai bamona, idia gaukara hebou namonamo lasi. Ena be taunimanima idia itaia unai dubu idia gaukara hebou bona hemataurai heheni, to lalotamona be lasi. Badina nega momo edia taravatu o tomadiho ena hahediba herevadia dekenai idia hepapahuahu.

Baibel ai Dirava ena taravatu idia noho. Iseda mauri lalonai Baibel ena hereva ita badinaia diba. Unai bamona idia karaia taudia be bese o tomadiho ma haida idia inai henia lasi, to maino bona gaukara hebou dalana idia dibaia. Dirava ia peroveta: “Lau ese bese idauidau edia gado do lau haidaua, gado goevadaena do lau henidia; bena idia ibounai ese Iehova ena ladana do idia hanamoa, bona iena hesiai gaukara be mai edia lalotamona ida do idia karaia.” Unai “gado goevadaena” o Dirava tomadiho henia karana ese lalotamona do ia havaraia.​—Sepanaia 3:9, BHḡ; Isaia 2:2-4.

Iehova ena Witnes taudia be oi idia boiria emu gabu kahirakahira ia noho Kingdom Hall dekenai oi lao, unai amo idia huanai ia noho maino bona lalotamona be oi sibona ese do oi itaia.​—Salamo 133:1.