Idia Ura Kwalimu Gwauraia Tanobadana Lalonai Lalo-Maino Abia

IESU KERISO ese ena aposetolo taudia dekenai sisiba ia henia, ia gwau: “Bema tau ta ena ura be ia gini, gunalaia tauna o biaguna, unai tau dohore ia lao gabeai, bona ia be dohore taunimanima ibounai edia hesiai tauna.” Aposetolo taudia amo daika ia bada idia hepapahuahulaia. Idia diba Iesu ese unai bamona kara ia ura henia lasi. Lauma dalanai do idia goada totona ta ese ma ta do ia hanaia karana ia hadibadia lasi.​—Mareko 9:​33-37.

Tanobada dekenai ia do diho mai lasi neganai, Iesu Keriso ese taunimanima ginigunadia ruaosi havaraia gaukarana ia durua, bona edia karaia dalana ia diba. (Kolose 1:​15, 16) Taunimanima ginigunadia idia vara neganai, idia lalodiai dala ia noho edia aonega idia habadaia diba totona, to mai dagedage danu ta ese ma ta ia hanaia karana amo idia karaia lasi. Daika be edia kwarana tauna idia heailaia lasi, bona do idia mauri noho totona animal danu idia tuari lasi.​—Genese 1:26; 2:​20-24; 1 Korinto 11:3.

Ta ese Ma Ta Ia Hanaia Karana Ia Matamaia Dalana

Vadaeni, taunimanima be mai dagedage danu ta ese ma ta ia hanaia karana be edena dala amo ia bada ia lao? Taunimanima edia histori lalonai ala-ala karana ginigunana ese ita ia hadibaia sisina. Kain be taunimanima ginigunadia rua edia vara guna merona, bona ma ta ia ura hanaia dainai dika ia vara. Dirava ese Abel ena boubou gauna ia moalelaia to Kain ena ia moalelaia lasi, unai dainai Kain ese ena tadina Abel ia alaia mase. Baibel ia gwau Kain be ‘Satana ena tau, bona ia ese ena tadina ia alaia mase.’​—1 Ioane 3:12; Genese 4:​4-8.

Oibe, dika karaia tauna, Satana Diabolo, be ta ese ma ta ia hanaia karana ia havaraia bona ia habadaia. Ena be ia be Dirava ena aneru natuna ta bona mai ena dagi bada, to ia ese ma gau haida ia ura henia. (Esekiel 28:​14, 15 itaia danu.) Eva ia koia neganai, ia sibona ena ura ia hahedinaraia. Ia gwau Eva ese taravatu auna do ia ania neganai, ia be “Dirava bamona do [ia] noho.” (Genese 3:​4, 5) Satana ia ura Dirava hegeregerena ai do ia lao, Iehova ia heai henia. Ia ura Dirava ia hanaia, unai dainai ia gwau-edeede henia.​—Iakobo 1:​14, 15.

Unai kara be taunimanima dekenai ia hanai. Dirava ese ruma bese ginigunana dekenai ia henia maino karana be Satana ena lalona ania karana dainai, ia boio. (Genese 3:​6, 16) Dirava ia gwau-edeede henia negana amo, Satana Diabolo ese taunimanima ia biagudia, ia be ta ese ma ta ia hanaia lalohadaina ia habadaia, tatau bona hahine ia koidia, idia laloa ta ese ma ta ia hanaia karana amo do idia kwalimu diba. To, Baibel ia gwau: “Mama bona sibona habadaia kara idia noho neganai maino be lasi, bona kara dikadia ibounai idia noho.” (Iakobo 3:​14-16) Satana ese taunimanima dekena amo moale bona lalo-maino ia kokia.

Ta ese Ma Ta Ia Hanaia Karana amo Idia Kwalimu Lasi

Satana ena hereva bamona lasi, Baibel ese ia hahedinaraia taunimanima idia kwalimu dalana be ta ese ma ta ia hanaia karana amo lasi. Ia kwalimu tauna ta be Iesu Keriso. Ena be Dirava ena toana hegeregerena ai ia noho, to ia laloa lasi iena siahu be Dirava ena siahu hegeregerena, to ia be hesiai tauna ena toana ia atoa bona tanobada dekenai ia diho mai. Unai sibona lasi, to mai manau danu ia abidadama noho ela bona hisihisi auna dekenai ia mase. Iena kamonai karana, bona ia heai lasi dainai, Dirava ena lalo-namo ia davaria. “Unai dainai Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hanaia.” (Filipi 2:​5-9) Ia kwalimu momokani, ani? Mauri gaudia iboudiai amo ia sibona ese ena Tamana ia hamoalea bada herea diba, bona heai eiava ta ese ma ta ia hanaia karana amo ia karaia lasi.​—Hereva Lada-isidia 27:11.

Guba dekenai, mai edia abidadama aneru hutuma danu be unai bamona kara idia hahedinaraia. Iesu be aneru edia biaguna, to tanobada dekenai ia diho mai neganai, ia be aneru henunai ia noho, to aneru be mai edia ura danu idia durua. Ia hedinarai goevagoeva, idia ta ia ura lasi unai Aneru Badana ena dagi ia abia toho.​—Mataio 4:11; 1 Tesalonika 4:16; Heberu 2:7.

Ia hedinarai goevagoeva aneru be ta ese ma ta ia hanaia karana idia ura henia lasi momokani, badina ena be Dirava ese goevadae lasi tanobada taudia haida ia abidia hidi bona mase diba lasi guba maurina ia henidia, bena idia ese ‘aneru do idia kota henidia,’ to aneru ese Dirava ena ura idia abia dae. (1 Korinto 6:3) Iehova hesiai henia karana dekenai aneru be idia manada vadaeni, bona namo bada idia havaraia diba, goevadae lasi tanobada taudia be namo sisina sibona idia havaraia diba. To, mai moale danu aneru be tanobada dekenai idia noho horoa taudia idia durudia, unai horoa taudia ese do idia davaria hahenamo dainai aneru idia mama lasi. (Heberu 1:14) Ta ese ma ta ia hanaia toho lasi dainai, aneru be mai edia dala Siahu Ibounai Lohiabadana Iehova ena terona vairanai idia hesiai henia noho totona.

Danu, namona be idaunegai abidadama taudia be tanobada dekenai do idia toreisi lou sivaraina oi laloa. Abraham be abidadama bada tauna bona idia gwauraia “abidadama taudia iboudiai edia tamana.” (Roma 4:​9, 11, NW) Iobu be haheauka karana dekenai haheitalai namo herea ia hahedinaraia. (Iakobo 5:11) Mose, “tanobada taudia iboudiai bogaragidiai ia mo sibona be manau herea,” ese Israel be igui hesiai amo ia hakaudia. (Numera 12:3) Goevadae lasi taudia iboudiai amo unai taudia edia abidadama, haheauka, bona manau karadia be bada momokani, ani? To, Dirava ena Basileia lalonai idia be tanobada dekenai do idia mauri noho. (Mataio 25:34; Heberu 11:​13-16) Idia be Ioane Bapatiso hegeregerena, “Guba Basileia lalonai, tau maragina” henunai do idia noho. (Mataio 11:11) Do idia maumau, do idia gwau edia abidadama, haheauka, eiava manau karadia be guba maurina idia abia taudia edia hegeregerena, eiava ia hanaia, a? Lasi momokani! Tanobada dekenai idia be mai moale danu Dirava ena Basileia henunai do idia noho.

Danu, hari inai negai, ta ese ma ta ia hanaia toho toana ia hahedinaraia lasi neganai, haida idia ura unai taudia idia bamodia. Yasuo, sivarai ginigunana lalonai ita kikilaia tauna, be golo hoihoilaia bisinesi ia karaia, to ena bisinesi ia dika bona ena kohu ibounai ia haboioa. Iena “turadia” ese ia idia rakatania. Iena hahine be Iehova ena Witness taudia ida Baibel ia stadilaia hamatamaia, bona hari tau be ena ruma bese dekenai hisihisi ia havaraia dainai, ia hemarai bona idia danu hebou dekenai ia lao. Gabeai, ta ese ma ta ia hanaia karana ia negea bona Iehova ena Witness tauna ta ai ia lao. Hari ia moale badina ena Keristen turadia ia bamodia, unai taudia be hisihisi negana lalonai idia ura durua.

Lalo-Maino Dogoatao Noho Dalana

Hebogahisi lasi bona idia kwalimu gwauraia tanobadana lalonai lalo-maino ita hahedinaraia noho be ia auka. Namona be inai ita laloatao, Baibel ese “heai, heatu, mama, badu, sibona ena ura tahua kara, hepapahuahu, orea hapararaia kara, laloa dikadia” ia gwauraidia “tauanina ena kara,” bona unai kara idia karaia taudia ese Dirava ena Basileia lalonai do idia vareai diba lasi. Ta ese ma ta ia hanaia toho neganai, unai bamona karadia ia karaia. Unai dainai, ita hoa lasi aposetolo Paulo ese Galatia taudia dekenai inai hagoadaia hereva ia henidia, ia gwau: “Ita hekokoroku lasi, ita ta ta ita habadua lasi, bona ita ta ta dekenai kohu totona ita mama henia lasi.”​—Galatia 5:​19-21, 26.

Paulo ena revareva lalonai ta ese mai hekokoroku danu ma ta ia hanaia karana koua dalana ia hahedinaraia. Ia gwau: “Lauma Helaga ese inai bamona karadia ia havaraia: Lalokau, moale, maino, haheauka, [hebogahisi], kara maoromaoro, abidadama momokani kara, manau, tauanina ena ura koua karana. Inai bamona karadia idia karaia taudia be taravatu ta ese ia koudia diba lasi.” (Galatia 5:​22, 23) Lauma ena huahua ese ita idia durua iseda lalona dekena amo heai ita negea totona. Namona be lalokau karana ita laloa. Paulo ia gwau: “Lalokau be mai ena [hebogahisi], . . . Lalokau be kohu momo tauna ia mama henia lasi. Lalokau be ia heagi lasi, bona ia hekokoroku lasi. Lalokau be haida hadikaia ia ura lasi. Lalokau be sibona ena gau ia tahua lasi, ia badu haraga lasi.” (1 Korinto 13:​4-7) Lalokau ita habadaia neganai, ita ese mama karana ita negea diba, mama be mai ena siahu bada ta ese ma ta ia hanaia karana dekenai. Iseda kudouna bona lalohadai dekena amo taunimanima ma ta hanaia urana ita negea totona, lauma huahua oredia ese ita idia durua danu. Bema oi be ma ta oi hanaia do oi kwalimu totona, haheauka karana amo unai ura do oi negea diba!​—Hereva Lada-isidia 17:27.

To, unai kara namodia do ita habadaia diba totona, namona be Dirava ena lauma helaga be ita dekenai ia noho. Unai ia vara totona, namona be ita guriguri hanaihanai bona Dirava ena lauma helaga ena heduru ita noia. (Luka 11:13) Iseda guriguri ia haerelaia neganai, Dirava ese ita dekenai dahaka do ia henia? Baibel ia gwau: “Gau ta totona do umui laloa hekwarahi lasi. To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia bona emui kudouna idia mamia gaudia ibounai do ia naria namonamo.”​—Filipi 4:​6, 7.

Iesu ena aposetolo taudia dekenai unai be ia momokani. Iesu be ena aposetolo taudia ida ia ese hanuaboi dekenai Lohiabada ena Adorahi Anianina ia karaia badina kerukeru do ia mase, to idia be daika do ia herea idia do hepapahuahulaia noho. (Luka 22:​24-27) Nega idauidau dekenai, edia lalohadai kererena ia hamaoromaoroa totona Iesu ese ia durudia, to ta ese ma ta ia hanaia karana be idia manadalaia. (Mareko 9:​34-37; 10:​35-45; Ioane 13:​12-17) To, idia hepapahuahu ena dina 50 murinai, lauma helaga idia davaria neganai, edia lalohadai unai kara dekenai idia haidaua. Pentekoste dinanai, taunimanima hutuma idia mai bona daika ese do ia hereva henidia idia hepapahuahulaia lasi.​—Kara 2:​14-21.

Taunimanima ta ese Keristen kongregesen do ia biagua be dala lasi. Kopina utua karana dekenai hekwakwanai ia vara neganai, Iakobo ese unai mai anina bada hebouna ia gunalaia, Iesu ia mase neganai ia be hahediba tauna ta ai ia do lao lasi. Daika ese Keristen kongregesen ena hakaua oreana ena hebou do ia gunalaia idia hepapahuahulaia lasi. Guna, aposetolo taudia be ta ese ma ta ia hanaia toho, to murinai idia be idau! Lauma helaga ena siahu ese ia durudia dainai, idia be Iesu ena hadibaia hereva idia laloatao, bona edia anina idia lalo-pararalaia.​—Ioane 14:26.

Ita dekenai unai be ia momokani diba danu. Kwalimu totona bema haida ita ura hanaia bona idia dekenai hisihisi ita havaraia ita laloa lasi, lauma helaga ena heduru amo unai ura dikana ita negea diba. Bena lalo-maino, diba ibounai ia hanaia gauna ita abia diba. Baibel ese ita ia hadibaia, ia gwau daudau lasi ta ese ma ta ia hanaia ena dagedage karana ia havaraia tauna, Satana Diabolo, be guri dobu masemase gabunai do ia lao bona kara ta ia karaia diba lasi. (Apokalupo 20:​1-3) Taunimanima huanai heai do ia ore. Ita gwau diba unai ese aonega dalana do ia koua, a? Lasi momokani! Taunimanima be do idia goevadae idia lao, to ta ese ma ta ia hanaia karana amo unai do ia vara lasi, to Iesu ese ia henia boubou karana idia badinaia karana dainai do ia vara.​—1 Ioane 2:​1, 2.

Guna ita gwauraia tauna, Keinosuke, be tanobada dekenai ia kwalimu badina motuka momo herea ia hoihoilaidia dainai, to ia gaukara momo dainai ena lalona bona ena tauanina dekenai hisihisi ia davaria, to gabeai unai gaukara ia rakatania. Bona ia gwau: “Harihari, egu mauri be moale amo ia honu.” Iesu ena mauri lalonai ia kwalimu momokani ena badina ia lalo-pararalaia. Harihari, tanobada hegegemadai Dirava ena kongregesen lalonai, herevana dahaka gaukara ia karaia, to unai tau ese lalo-maino ia davaria. Vadaeni, unai ese ia hegaegaelaia tanobada matamatana lalonai do ia vareai totona, bona unuseniai ta ese ma ta ia hanaia karana do ia noho lasi. Bema oiemu gabu dekenai Kingdom Hall dekenai oi lao bona Iehova ena Witness taudia oi bamodia, oi danu ese unai tanobada matamata oreana ena kara oi itaia diba.

[Picture on page 7]

Dirava ena tanobada matamatana lalonai, taunimanima be maino bona lalo-tamona dekenai do idia gaukara