Ta ese Ma Ta Ia Hanaia be Kwalimu Toana Namona, Eiava?

“KWALIMU sibona be gau badana.” Taunimanima idia gwau futbol ia hadibaia America tauna, Vince Lombardi, be unai hereva ia gwauraia, bona hari inai negai, taunimanima momo be iena hereva idia abia dae. Guna Komiunis oreana idia abia dae tanodia be hari idia gwau ta ese ma ta hanaia karana be ia namo. Idia gwau bisinesi lalonai ta ese ma ta hanaia karana be taga havaraia dalana. Asia dekenai tama sina momo ese edia natudia idia doridia natudia ma haida do idia hanaidia totona, bona do idia kwalimu totona sikuli ma haida dekenai idia siaidia nega sisina lalonai diba bada do idia abia haraga totona, bena sikuli badana do idia vareai ena eksam do idia karaia namonamo diba. Sikuli idia laloa bada tamana bona sinana idia laloa edia natudia be sikuli namona lalonai idia vareai be gau badana badina gabeai mai taga danu do idia noho namo diba.

Taunimanima momo idia laloa ta ese ma ta ia hanaia be kwalimu toana namona. Idia gwau, taunimanima idia namo idia lao badina ta ese ma ta ia hanaia toho dainai. Japan ena Federation of Economic Organization oreadia ese bisinesi orea badadia edia kara idia tahua, bona unai orea edia tau badadia 65.9 pesen idia gwau: “Japan bisinesi badadia dekenai dagi idia abia totona ta ese ma ta ia hanaia toho karana ese bisinesi ia hagoadaia.” Bona toana be Japan ena bisinesi kampani be nega sisina daudau lalonai idia kwalimu. To, momokani ta ese ma ta ia hanaia be kwalimu toana namona, eiava?

Toana Namona, Eiava?

Taunimanima be ma haida idia hanaidia toho neganai, unai be mata-ganigani bona sibodia edia namo tahua karana. Gaukara dekenai haida idia hekwakwanai neganai idia moale, badina idia laloa unai ese edia gaukara toana do ia hanamoa. Sibodia idia taga totona, ma haida idia laloa lasi bona nega haida reana do idia hahisidia danu. Ta ese ma ta ia hanaia karana amo dahaka do ia vara? Yasuo be iena kampani dekenai tau badana ta ai do ia lao totona, ia gaukara goadagoada, bona ena kara gunana ia laloa neganai, ia gwau: “Lau goada karaia ma ta lau hanaia totona bona hanaihanai dagi do lau abia lalohadaina lau abia, lauegu kara bona taunimanima ma haida edia kara lau hahegeregerea neganai, lau laloa idia lau hanaidia. Bema unai taudia be lau ataiai dagi idia henia neganai, lau lalohisihisi bona dina ta ta iboudiai kampani ena gaukara taudia naria dipatmen lau maumauraia. Lauegu turana momokani ta be lasi.”

Ta ese ma ta ia hanaia toho karana be mase ia havaraia haraga diba danu. Edena bamona? Japan ena niuspepa Mainichi Daily News lalonai karoshi, eiava gaukara momo dainai idia mase karana, ia gwauraia toana-A. Toana A ena anina be tau ta ese nega do ia gaukaralaia namonamo ia laloa bada, bena ia lalo-hekwarahi momo lasi, nega ibounai ia ura ma ta ia hanaia, bona ia dagedage. Kudouna idia stadilaia America taudia Friedman bona Rosenman idia gwau toana-A taudia be kudouna gorere idia abia diba. Oibe, ta ese ma ta ia hanaia karana be mase ia havaraia diba.

Gaukara gabunai ta ese ma ta ia hanaia toho neganai, taunimanima edia tauanina bona lalona dekenai gorere ma haida ia havaraia diba danu. Haheitalai ta be Keinosuke, ia be Japan ena motuka kampani badana ta ena hoihoi tauna badana. Ia ese taunimanima iboudiai ia hanaidia badina motuka 1,250 ia hoihoilaidia. Hedikwota dekenai, kampani ena dairekta taudia idia hebou daiutuna lalonai, iena laulau be haba dekenai idia atoa. Ena be dagi do ia abia totona, ia ura lasi ena gaukara taudia ia hanaidia bona ia doridia diho, to kampani ese ia doria unai ia karaia totona. Unai dainai, lagani tamona lalonai ena bogana lalonai toto ia davaria dainai hisihisi ia ania. Unai lagani tamona lalonai, iena kampani ena tau badadia 15 be gorere dainai hospital dekenai idia vareai, bona idia ta ese sibona ena mauri ia hadokoa.

Noho gabuna dekenai danu ta ese ma ta ia hanaia toho, edia dekena taudia edia kohu hegeregerena idia ura abia bona unai ese ia doridia sibodia edia taga idia heagilaia totona. (1 Ioane 2:16) Unai ese bisinesi sibona ia hanamoa, tanobada ena hoihoi taudia edia imana dekenai moni ia henia.​—⁠Apokalupo 18:⁠11 itaia danu.

Ena be gaukara gabuna dekenai ta ese ma ta ia hanaia be reana gaukara do ia hanamoa, to Pavapava Solomon ia gwau: “Bena lau itaia, hekwarahi ibounai bona gaukara karaia namonamo karadia iboudiai be tau ta ese ena dekena tauna ia mama henia amo ia vara; inai danu be anina lasi, lai dogoatao toho karana bamona.” (Kohelete 4:⁠4) Taunimanima idia ura kwalimu gwauraia tanobadana lalonai ita noho dainai, edena bamona lalo-maino do ita abia diba? Unai do ita diba totona namona be ta ese ma ta ia hanaia lalohadaina ia matamaia sivaraina do ita tahua.