Iehova Ena Hahemaoro Herevana, Hahediba Taudia Koikoidia Totona
“Ierusalem ena peroveta taudia dekenai dika momokani gaudia lau itaia, idia heudahanai, bona koikoi daladia ai idia raka . . . Lau dekenai idia iboudiai be Sodoma bamona, bona idia noholaia taudia be Gomora bamona.”—IEREMIA 23:14.
1. Dahaka dainai Dirava ena hahediba ia karaia tauna ena maduna be metau?
DIRAVA ena hahediba ia karaia tauna ena maduna be metau. Iakobo 3:1 ena sisiba be inai: “Lauegu varavara e, umui momo ese hadibaia gaukara umui abia be namo lasi. Badina be ai hadibaia taudia be Dirava ese do ia kota henia auka.” Oibe, Dirava ena Hereva idia hahedibalaia taudia be Dirava vairanai edia kara edia anina do idia gwauraia hedinarai neganai do ia hahemaoro henidia auka, to Keristen taudia oredia be unai bamona do ia kara henidia lasi. Unai ena anina be dahaka, hahediba koikoi taudia dekenai? Ieremia ena negai ia vara gauna ita laloa be namo. Do ita itaia unai ese hari inai negai ia vara gauna ia laulaulaia.
2, 3. Ieremia amo Iehova be Ierusalem ena hadibaia koikoi taudia dekenai dahaka hahemaoro herevana ia siaia?
2 Lagani 647 B.C.E. lalonai, King Iosia ena lohia laganina namba 13 ai, Iehova ese Ieremia be ena peroveta tauna ai ia halaoa. Iehova be mai ena samani herevana Iuda dekenai, unai dainai Ieremia ia siaia do ia gwauraia hedinarai totona. Ierusalem ena peroveta taudia koikoidia, hadibaia taudia unai, be Dirava vairanai “dika momokani gaudia” idia karaia. Edia dika be bada herea, unai dainai Dirava ia gwau Ierusalem bona Iuda be Sodoma bona Gomora bamona. Ita dekenai Ieremia karoa 23 ese unai ia hadibaia. Ie 23 Siri 14 ia gwau:
3 “Ierusalem ena peroveta taudia dekenai dika momokani gaudia lau itaia, idia heudahanai, bona koikoi daladia ai idia raka; bona kara dika taudia edia imadia idia ha-aukadia, bena unai dainai ta ese ena kara dika ia rakatania lasi. Lau dekenai idia iboudiai be Sodoma bamona, bona idia noholaia taudia be Gomora bamona.”
4. Hari inai negai Kerisendom lalonai idia vara gaudia be edena dala ai Ierusalem lalonai hahediba taudia edia haheitalai dikana hegeregerena?
4 Oibe, unai peroveta taudia, hadibaia taudia unai, idia kara miro, bona unai amo taunimanima idia veridia edia kara do idia tohotohoa totona. Hari inai negai Kerisendom ai idia vara gaudia mani umui lalodia! Idia be Ieremia ena negai idia vara gaudia hegeregeredia, ani? Hari inai negai tomadiho gunalaia taudia ese heudahanai taudia bona idia kara bodaga heheni tataudia be edia orea amo idia atodia siri lasi, bona gwaumaoro idia henidia edia dubu lalodiai do idia haroro. Unai dainai tomadiho oreadia edia memba taudia momo idia kara bodaga be ita hoalaia lasi, ani?
5. Dahaka dainai Kerisendom lalonai idia karaia kara bodaga be Sodoma bona Gomora ai idia karaia kara bodaga idia hanaia?
5 Iehova ia gwau Ierusalem idia noholaia taudia be Sodoma bona Gomora taudia hegeregeredia. To Kerisendom ena kara bodaga ese Sodoma bona Gomora edia kara bodaga ia hanaia. Oibe, Iehova vairanai ena kerere be bada, idia edia kerere be maragi. Ena hadibaia taudia ese Keristen ena taravatu idia laloa lasi. Unai ese kara bodaga lalohadai momo ia havaraia; idia dainai hedibagani dikadia idauidau ese taunimanima idia veridia, kara dika do idia karaia totona. Hari inai negai taunimanima momo be kara bodaga momo idia karaia dainai, idia laloa unai be vaia taunimanima edia kara korikoridia.
“Koikoi Daladia ai Idia Raka”
6 Vadaeni, mani Ie 23 siri 14 ita itaia; ia gwau Ierusalem ena peroveta taudia be “koikoi daladia ai idia raka.” Bona Ie 23 siri 15 ena dokona ia gwau: “Ierusalem ena peroveta taudia edia amo, Dirava dadaraia kara be tano ibounai dekenai ia lao.” Bena, Ie 23 siri 16 ia gwau: “Tuari oreadia edia Iehova be inai bamona ia hereva: ‘Umui idia peroveta henia taudia edia hereva umui kamonai lasi. Edia hereva dainai umui hekwarahi kava. Sibodia edia lalodia edia matahanai idia gwauraia—Iehova ena uduna amo ia mai herevadia idia gwauraia lasi.’ ”
7, 8. Badina be dahaka Kerisendom ena dubu taudia be Ierusalem ena peroveta koikoi taudia hegeregeredia, bona unai ese dahaka ia havaraia dubu taudia dekenai?
7 Ierusalem ena peroveta taudia hegeregeredia, Kerisendom ena haroro taudia danu be koikoi daladia ai idia raka, hahediba hereva kereredia, Dirava ena Hereva ai idia noho lasi herevadia, idia hahedibalaidia. Unai hahediba hereva koikoidia haida be dahaka? Gaudia be inai: Taunimanima be mai edia mase diba lasi laumana herevana, Toi Tamona Diravana herevana, pegatori herevana, bona mase murinai hel lahina ai hisihisi ania ela bona hanaihanai herevana. Danu, idia ese idia haroro henidia taudia edia taiadia idia hahemaihemaidia, taunimanima ese idia ura henia herevadia idia harorolaia. Idia gwau loulou dika ta be Kerisendom latanai do ia mai lasi, badina be Dirava ena maino ia abia vadaeni. To haroro taudia be “sibodia edia lalodia edia matahanai” idia gwauraia. Unai be hereva koikoidia. Unai hereva koikoidia be mase muramurana bamona, idia abidia dae taudia be lauma dalanai idia hadikadia. Mase dekenai idia hakaudia lao!
8 Ie 23 Siri 21 ai Iehova ese hari hahediba koikoi taudia inai bamona ia gwauraidia, ia gwau: “Peroveta taudia lau siaidia lasi, to idia heau. Lau hereva henidia lasi, to idia sibodia idia peroveta.” Unai hegeregerena, hari inai negai Dirava ese Kerisendom ena haroro taudia ia siaidia lasi, bona iena hereva momokanidia idia hahedibalaidia lasi. Unai dainai dahaka ia vara? Edia orea taudia momo be Baibel ena hereva idia diba lasi, badina edia haroro taudia be tanobada ena aonega herevadia dekena amo idia ubudia.
9, 10. (a) Ierusalem ena hahediba koikoi taudia be edena bamona nihi idia abia? (b) Unai hegeregerena, Kerisendom ena haroro taudia ese “nihi koikoidia” be edena bamona idia hahedibalaia?
9 Unai sibona lasi, to hari inai negai haroro taudia ese helaro koikoidia idia havaradia. Mani Ie 23 siri 25 umui laloa: “Lauegu ladana ai idia peroveta koikoi taudia edia hereva lau kamonai, idia gwau, ‘Nihi ta lau abia! Nihi ta lau abia!’ ” Unai nihi be edena bamona? Ie 23 Siri 32 ese ita ia hadibaia, ia gwau: “Iehova ia gwau: ‘Nihi koikoidia idia perovetalaia taudia lau inai henidia; idia ese idia gwauraidia, bona edia koikoi bona edia heagi amo egu bese taudia idia hakaudia kerere. To lau siaidia lasi bona lau hamaorodia lasi. Unai dainai idia ese inai bese taudia dekenai namo do idia havaraia lasi.’ Iehova be inai ia hereva.”
10 Haroro taudia ese dahaka nihi koikoidia, o helaro koikoidia, idia hadibalaidia? Idia gwau, namona be taunimanima ese United Nations oreana do idia helaro henia, badina be ia sibona ese maino bona noho namona ia havaraia diba. Lagani haida gunanai idia gwau United Nations be “lalo-tamona bona maino helarona ginigabena,” “maino bona hahemaoro goevagoeva naria gaukarana do ia gunalaia ela bona hanaihanai,” bona “tanobada ai maino do ia havaraia gauna badana.” Koikoi bada unai! Taunimanima hamauridia gauna tamona be Dirava ena Basileia. To unai guba gavamanina herevana momokanina be Kerisendom ena haroro taudia ese idia harorolaia lasi bona idia hahedibalaia lasi; unai be Iesu ena haroro hereva badana.
11. (a) Ierusalem ena hahediba koikoi taudia be Dirava ena ladana edena bamona idia hadikaia? (b) Ieremia oreana hegeregerena lasi, hari inai negai tomadiho koikoi hahediba taudia be dahaka idia karaia Dirava ena ladana dekenai?
11 Ie 23 Siri 27 be ita dekenai ma hereva haida ia hadibaia. “Idia laloa edia nihi, ta ta dekenai idia sivarailaia gaudia, dainai egu bese taudia ese egu ladana do idia laloaboio, edia tamadia be Baal dainai egu ladana idia laloaboio hegeregerena.” Ierusalem ena peroveta koikoi taudia ese unai bese taudia idia veridia Dirava ena ladana idia laloaboio totona. Hari inai negai tomadiho koikoi ena hahedibalaia taudia danu be unai bamona idia karaia, ani? Gau dika hereana be Dirava ena ladana, Iehova, idia hunia. Idia hadibaia, idia gwau unai ladana gaukaralaia be anina lasi, bona edia Baibel idauidau amo idia kokia. Haida be taunimanima idia hadibadia Dirava ena ladana be Iehova, bona tomadiho koikoi hadibalaia taudia ese idia inai henidia. To Ieremia oreana taudia, Dirava ese ena lauma amo ia horodia taudia oredia, bona edia bamodia be Iesu ese ia karaia bamona idia karaia. Taunimanima milion momo dekenai Dirava ena ladana idia hadibaia.—Ioane 17:6.
Edia Kerere Idia Hahedinaraia
12. (a) Badina be dahaka tomadiho ena koikoi hahediba taudia be mai edia kerere bada rara bubua karana dekenai? (b) Tanobada ibounai tuaridia rua lalonai dubu haroro taudia be dahaka idia karaia?
12 Ieremia bamona oreana ese idia hahedinaraia loulou, dubu gunalaia taudia be hahediba koikoi taudia, edia mamoe be mase dalana badana ai idia hakaudia lao. Oibe, horoa taudia oredia ese idia hahedinaraia goevagoeva dahaka dainai Iehova ia gwau unai nihi taudia do idia mase be namo. Hegeregere, Iehova ena hesiai taudia be nega momo Apokalupo 18:24 ena hereva idia gwauraia, ia gwau “tanobada dekenai idia alaia mase taudia ibounai edia rarana” be Babulono Badana lalonai idia davaria. Tomadiho hepapahuahu dainai idia karaia tuaridia iboudiai mani umui lalodia. Tomadiho koikoi hahedibalaia taudia be rara dainai idia kerere bada! Edia hahediba herevadia ese taunimanima idia hapararaia bona tomadiho idaudia bona bese idaudia taudia inai henidia karana idia habadaia. Buka ta ladana Preachers Present Arms ese Tanobada Ibounai Tuarina Ginigunana ia herevalaia, ia gwau: “Haroro taudia [dubu gunalaia taudia] ese tuari taudia edia lalodia idia hasiahudia. . . . Unai dala amo dubu oreadia ese tuari idia durua.” Unai hegeregerena, Tanobada Ibounai Tuarina Iharuana negana lalonai danu, dubu gunalaia taudia ese idia tuari besedia idia durudia vaitani bona edia tuari taudia idia hanamodia. Tanobada ibounai tuaridia ruaosi be Kerisendom ai idia vara, idia lalodiai tomadiho oreana tamona taudia idia ala-ala heheni. Tomadiho oreadia bona gavamani oreadia Kerisendom lalonai ese taunimanima edia rara idia bubua noho ema bona hari. Edia hahediba hereva koikoidia dainai idia vara gaudia be dika rohoroho!
13. Ieremia 23:22 be edena bamona ia hamomokania Kerisendom ena haroro taudia be Iehova ida idia turana karaia lasi?
13 Mani Ieremia karoa 23, siri 22 oi itaia: “Bema egu hebou lalonai idia gini, egu bese taudia dekenai egu hereva idia gwauraia, bona edia dala dikana bona edia kara dika idia rakatania totona idia hakaudia.” Bema Kerisendom tomadiho ena peroveta taudia be Iehova ena hebou lalonai idia noho, mai ena kamonai bona mai ena kara maoromaoro hesiai tauna hegeregerena, idia danu be Dirava ena taravatu idia badinaia. Idia danu be Kerisendom taudia idia hakaudia Dirava ena hereva idia kamonai totona. To idau, hari inai nega ena hahediba koikoi taudia be idia murinai idia raka taudia idia hakaudia, Dirava ena Inai Tauna, Satana Diabolo, ena mata-kepulu hesiai taudia ai idia lao totona.
14. Lagani 1958 lalonai, edena bamona Kerisendom ena haroro taudia edia kerere idia hahedinaraia bada?
14 Ieremia oreana taudia ese haroro taudia edia kerere idia gwauraia hedinarai mai edia siahu ida. Hegeregere, lagani 1958 ai, New York siti dekenai, Iehova ena Witness taudia edia Dirava ena Ura Intenesenel Hebouhebouna ai, Watch Tower Society ena vais presiden ia gwau: “Ai hereva maoromaoro bona ai daradara lasi inai, taravatu utua karadia, gwau-edeede, badu, heai, lalo-dika, . . . bona heiriheiri bada edia badina korikorina be tomadiho kererena, tomadiho koikoina unai; unai tomadiho be taunimanima edia inai tauna, Satana Diabolo, ese ia havaraia. Tanobada ena dika havaraia karana ai, tomadiho hahedibalaia bona gunalaia taudia edia kerere be bada; bona idia kerere bada herea taudia be Kerisendom ena haroro taudia. . . . Tanobada Ibounai Tuarina Ginigunana ena nega amo ema bona hari, Dirava ese Kerisendom ia laloa, Israel taudia Ieremia ena negai ia lalodia bamona. Oibe, Kerisendom do ia hadikaia ore. Kerisendom dekenai do ia vara gauna ese Ieremia ena negai Ierusalem dekenai ia vara gauna do ia hanaia momokani.”
Hahediba Koikoi Taudia Edia Davana Do Ia Henidia
15 Ena be unai sisiba herevana idia gwauraia, to unai murinai haroro taudia be edena bamona idia kara? Edia kara be Ie 23 siri 17 ese ia gwauraia bamona: “Lau idia matauraia lasi taudia dekenai idia hereva loulou, idia gwau, ‘Iehova be inai bamona ia hereva: “Umui be maino do umui davaria.” ’ Bona edia lalo-auka dekenai idia raka noho taudia dekenai idia gwau, ‘Dika ta ese umui do ia davaria lasi.’ ” Unai be momokani, a? Lasi vaitani! Iehova ese do ia hahedinaraia haroro taudia edia peroveta herevadia be koikoi. Iena ladanai idia gwauraia herevadia do ia hamomokanidia lasi. To, Kerisendom ena haroro taudia ese taunimanima idia koidia vaitani dainai, idia laloa Dirava ese ia lalo-namo henidia!
16. (a) Inai tanobada ena kara be edena bamona, bona unai be daidia edia kerere danu? (b) Inai tanobada ena lalohadai dikadia dainai Ieremia oreana be dahaka idia karaia?
16 Reana emu lalona ai oi gwau, ‘Haroro taudia ese edia hahediba herevadia koikoidia ese lau idia koia diba lasi. Lasi vaitani!’ Bema unai bamona oi laloa, oi naria namonamo! Mani inai oi laloa: Dubu gunalaia taudia edia hahediba hereva koikoidia dainai, lebulebu karadia dikadia idia bada noho. Taunimanima be unai hahediba kereredia dainai idia laloa kara bodaga idia karaia be kerere lasi. Unai lalohadai dikadia be muvini piksa, TV, magasin, bona miusik ai idia hedinarai. Unai dainai, namona be do ita naria namonamo, unai lalohadai dikadia ese iseda lalona do idia ania bona idia hakererea garina. Video bona miusik dikadia ese memero kekeni idia veridia bona idia hadikadia diba. Mani umui laloatao, inai lebulebu lalohadaina ia vara, dubu gunalaia taudia edia hahediba hereva koikoidia dainai, bona Dirava ena taravatu maoromaorodia idia badinaia lasi dainai. Ieremia oreana ese unai lalohadai dikadia idia tuari henidia, bona Iehova ena hesiai taudia idia durudia, Kerisendom lalonai ia bada momokani dikana idia dadaraia totona.
17. (a) Ieremia ena hereva hegeregerena, dahaka hahemaoro herevana be kara dika hanuana Ierusalem dekenai do ia mai? (b) Kahirakahira dahaka do ia vara Kerisendom dekenai?
17 Hahemaoro Diravana badana, Iehova, ese Kerisendom ena hahediba koikoi taudia do ia henidia davana be dahaka? Ie 23 Siri 19, 20, 39, bona 40 idia haere, idia gwau: “Itaia! Iehova ena lai gubana! Iena badu be do ia lao koe-hirihiri bada hereana ta bamona. Kara dika taudia edia kwarana dekenai do ia lao. Iehova ena badu be do ia lou lasi ela bona ena lalona ena ura ibounai do ia karaia guguru. . . . Egu vairana amo umui do lau negea momokani, bona emui sene taudia bona umui dekenai lau henia hanuana do lau rakatania. Bona umui dekenai gwaudika herevana bona hemarai do lau atoa ela bona hanaihanai, bona do idia laloaboio lasi.” Unai ibounai be Ierusalem dikana bona ena dubu dekediai idia vara, bona kahirakahira, unai bamona hisihisina be kara dika oreana Kerisendom dekenai do ia vara!
“Iehova Ena Maduna” Idia Harorolaia
18 Vadaeni, Dirava ese Ieremia oreana taudia bona edia bamodia ia henidia gaukarana be dahaka? Ie 23 Siri 33 ese ita ia hamaoroa, ia gwau: “Inai bese taudia ta, eiava peroveta tauna ta, eiava hahelaga tauna ta, ese umui ia nanadaia, ia gwau ‘Iehova ena maduna be dahaka?’, neganai do umui haere henia, umui gwau ‘Iehova ia gwau, “Maduna be umui! Bona umui do lau negea momokani.” ’ ”
18, 19. Dahaka maduna “Iehova ena” be Ieremia ese Iuda taudia dekenai ia harorolaia, bona ena anina be dahaka?
19 Heberu gado ai, inai hereva “maduna” ena anina be rua. Ena anina be Dirava ena hereva metauna eiava taunimanima ia hametaua bona ia hahekwarahia gauna. Inai hereva, “Iehova ena maduna,” ena anina be peroveta herevana metauna ta—Ierusalem do ia hadikaia ore herevana unai. Ieremia ese Iehova ena peroveta herevadia metaudia be taunimanima ia hamaorodia loulou negadiai, idia moalelaidia, a? Lasi, idia ese Ieremia idia kirikirilaia, idia gwau: ‘Dahaka peroveta herevana (hereva metauna) do oi gwauraia hari? Ai diba momokani ia be maduna metauna ma ta, ai do ia hametaua bona ia hahekwarahia gauna!’ To Iehova ese dahaka ia hamaorodia? Gauna be inai: “Maduna be umui! Bona umui do lau negea momokani.” Oibe, unai taunimanima be maduna ta Iehova dekenai, bona ia negedia gwauraia, maduna ta ia negea bamona, bena do idia hahekwarahia lou lasi.
20. Hari inai nega ai, “Iehova ena maduna” be dahaka?
20 Hari inai negai “Iehova ena maduna” be dahaka? Gauna be peroveta herevana metauna Dirava ena Hereva amo. Unai peroveta herevana ena anina be, Dirava ese Kerisendom be kahirakahira do ia hadikaia ore. Iseda maduna metauna be “Iehova ena maduna” metauna do ita gwauraia hedinarai. Dokona be ia kahirakahira dainai, namona be taunimanima iboudiai do ita hamaorodia Kerisendom ena raka kerere taudia be “maduna” ta, oibe, Iehova Dirava idia hametaua, bona kahirakahira unai “maduna” do ia negea, bena Kerisendom ese dika do ia davaria.
21. (a) Badina be dahaka lagani 607 B.C.E. ai Ierusalem idia hadikaia ore? (b) Ierusalem idia hadikaia ore murinai, dahaka ia vara peroveta koikoi taudia dekenai bona Iehova ena peroveta momokani tauna dekenai, bona unai dainai hari inai nega ai dahaka ita diba momokani?
21 Ieremia ena negai, Iehova ese Ierusalem ena davana ia henia, lagani 607 B.C.E. ai Babulono taudia ese idia hadikaia ore neganai. Peroveta hereva hegeregerena, lalo-auka Israel taudia, Dirava idia badinaia lasi taudia, dekenai unai be hemarai gauna. (Ieremia 23:39, 40) Unai ese ia hadibadia, Iehova, idia gwau-edeede henia loulou Diravana, ese ia rakatanidia, edia dika ena davana do idia abia totona. Edia peroveta taudia koikoidia be edia hemataurai lasi ududia ia koudia unai. To Ieremia ena uduna be ia peroveta noho. Iehova ese ia rakatania lasi. Unai hegeregerena, Iehova ena hahemaoro metauna ese Kerisendom ena haroro taudia bona edia hereva koikoidia idia abia dae taudia do ia moidia mase neganai, Iehova ese Ieremia oreana taudia do ia rakatanidia lasi.
22. Iehova ese ia henia davana dainai dahaka do ia vara Kerisendom dekenai?
22 Oibe, lagani 607 B.C.E. murinai Ierusalem ia dika momokani, bona ta ese ia noholaia lasi. Kerisendom ena taga do idia kokia bona ena kerere do idia hahedinaraia goevagoeva neganai, iena toana be Ierusalem ena toana ida do ia hegeregere. Iehova ia gwau vadaeni unai davana be hahediba koikoi taudia do ia henidia. Ena hahemaoro herevana do ia moru lasi. Ieremia ena sisiba herevadia, Dirava ena lauma ese ia havaraia herevadia, edia anina be idau negai idia vara hegeregerena, hari inai negai danu do idia vara. Unai dainai, namona be Ieremia do ita tohotohoa. Iehova ena maduna metauna, ena peroveta herevana metauna, be taunimanima do ita hamaorodia, gari lasi, bena do idia diba dahaka dainai Iehova ena hahemaoro maoromaoro ibounai be tomadiho koikoi ena hahediba taudia latadiai do ia mai!
Riviu Henanadai
◻ Iehova vairanai idaunega Ierusalem ena dika be edena bamona?
◻ Edena bamona Kerisendom be ‘koikoi daladia ai ia raka’?
◻ Hari inai negai dubu haroro taudia edia kerere be edena bamona idia hahedinaraia?
◻ “Iehova ena maduna” hari inai negai idia harorolaia be dahaka?
6. Ieremia be Ierusalem ena peroveta taudia edia dika be edena bamona ia gwauraia?
15. Dubu haroro taudia be edena bamona maino idia perovetalaia? Unai hereva edia anina do ia vara, a?
[Picture on page 8]
Ierusalem ena peroveta taudia be “dika momokani gaudia” idia karaia
[Picture on page 9]
“Sibodia edia lalodia edia matahanai idia gwauraia”
[Picture on page 10]
Ierusalem idia hadikaia ore murinai ena toana ese ia haheitalaia Kerisendom ena dokona toana be edena bamona