Iehova Ena Hereva be Ia Mauri Noho
Ieremia Bukana Ena Hereva Badadia
IEREMIA ese Ierusalema dekenai do ia vara dika gaudia ia harorolaia neganai, kamonai taudia idia badu dikadika! Lagani 30 mai kahana lalonai Dirava idia tomadiho henia dubu helagana mai hairaina be lahi ese do ia gabua ore. Ierusalema hanuana bona Iuda tanona be do idia hadikaia ore bona hanua taudia be igui hesiai taudia ai do idia halaodia. Unai sivarai bona hahemaoro herevadia haida be Baibel ena buka badana iharuana, Ieremia lalonai idia torea. Danu, Ieremia be lagani 67 lalodiai mai abidadama ida hesiai gaukara ia karaia lalonai ia davaria gaudia edia sivarai ia torea danu. Ieremia bukana lalonai mai anina bada gaudia ta ta ia torea, to unai gaudia be idia vara edia nega edia nega hegeregerena ia torea lasi.
Dahaka dainai Ieremia bukana ita laloa bada? Ia gwauraia peroveta herevadia idia guguru karana ese ia hamomokania, Iehova be ena gwauhamata ia Hagugurua Tauna. (Isaia 55:10, 11) Ieremia ese ia karaia peroveta gaukarana bona iena hereva idia kamonai taudia edia kara be hari iseda nega lalonai idia vara danu. (1 Korinto 10:11) Danu, Iehova ese iena taunimanima ia kara henidia dalana ena sivarai ese iena kara ia hahedinaraia bona unai be mai anina bada ita dekenai.—Heberu 4:12.
“LAUEGU BESE TAUDIA ESE, KARA DIKA RUA IDIA KARAIA VADAENI”
Iuda ena King Iosaia ena lohia lagani 647 B.C.E. ai, Ieremia ese ena peroveta gaukarana ia hamatamaia. Unai neganai lagani 40 idia do noho bena lagani 607 B.C.E. ai Ierusalema do idia hadikaia. (Ieremia 1:1, 2) Iosaia ena lohia lagani oredia 18 lalonai, Ieremia ese Iuda ena kara dika ia gwauraia hedinarai bona Iehova ena hahemaoro herevadia ia harorolaia. Iehova ia gwau: “Lau ese Ierusalema do lau hadikaia momokani. . . . Iuda ena hanua be do lau hadikadia ore, tano kaukau idia do lau halaoa. Unai gabudia dekenai tau ta do ia noho lasi.” (Ieremia 9:11) Dahaka dainai? “Badina be lauegu bese taudia ese, kara dika rua idia karaia vadaeni.”—Ieremia 2:13.
Ieremia bukana ese idia helalo-kerehai taudia be edia hanua dekenai do idia giroa lou sivaraina ia gwauraia danu. (Ieremia 3:14-18; 12:14, 15; 16:14-21) To, unai sivarai ia abia lao tauna be mai moale ida idia abia dae lasi. “Dubu Helagana ena naria tauna badana” ese Ieremia ia botaia bona seini dekenai idia guia.—Ieremia 20:1-3.
Baibel Henanadaidia Edia Haere:
1:11, 12—Dahaka dainai Iehova ese ena hereva ia itaia noho (o “noga noho” NW ) karana be “alamono au ena rigi ta” ida ia hahegeregerea? January eiava February dokona ai alamono auna be ena rigi matamatadia ia atoa guna auna. Laulau dalanai, Iehova be ia toreisi haraga bona iena taunimanima dekenai hahemaoro herevadia ia gwauraia totona, ‘iena peroveta taudia ia siaia’ bona ia itaia noho eiava ia “noga noho” ela bona ena hereva idia guguru.—Ieremia 7:25.
2:10, 11—Dahaka dainai abidadama lasi Israela taudia edia kara be idau momokani? Dirava koikoidia idia tomadiho henia besedia, west kahana ai ia noho Kupro besena bona ist kahana ai Kedara besena be edia dirava idia rakatania lasi, to bese idaudia edia dirava idia abia dae bona edia dirava ida idia tomadiho henidia hebou. To, Israela taudia be, mauri Diravana, Iehova, idia rakatania bona idia mauri lasi kaivakuku diravadia idia tomadiho henidia. Unai idia karaia dainai, edia kara be idau momokani.
3:11-22; 11:10-12, 17—Ena be Samaria be lagani 740 B.C.E. ai ia moru vadaeni, to dahaka dainai Ieremia ese not kahana ena iduhu 10 basileia dekenai inai hahemaoro herevadia ia gwauraia danu? Badina be lagani 607 B.C.E. ai Ierusalema idia hadikaia ore neganai, Iehova be Iuda sibona ia hahemaoro henia lasi, to Israela besena ibounai ia hahemaoro henia. (Esekiela 9:9, 10) Ena be iduhu 10 basileia ia moru vadaeni, to Ierusalema dekenai idia noho taudia be unai iduhu 10 idia do laloa noho dainai, Dirava ena peroveta taudia edia hereva be iduhu 10 dekenai idia gwauraia danu.
4:3, 4—Dahaka dainai Iehova ese inai hereva ia gwauraia? Abidadama lasi Iuda taudia ese edia kudouna ena tano do idia geia, idia hamanokaia bona hagoevaia be namo. Idia ese edia kudouna ena “kopina” do idia utua, anina be edia lalohadai, hemami bona ura dikadia do idia kokia. (Ieremia 9:25, 26; Kara 7:51) Unai anina be edia noho dalana do idia haidaua—kara dika do idia rakatania bona Iehova ia hamoalea karadia do idia karaia.
4:10; 15:18—Edena dala ai Iehova ese ena gwau-edeede taudia ia koidia? Ieremia ena nega ai, “peroveta taudia be idia peroveta koikoi noho,” bona Iehova ese unai peroveta taudia ia koua lasi.—Ieremia 5:31; 20:6; 23:16, 17, 25-28, 32.
16:16—Iehova ese “haoda taudia momo” do ia siaia bona “labana taudia momo” do ia boiria ena anina be dahaka? Reana, ena anina be Iehova ese abidadama lasi Iuda taudia ia hahemaoro henidia bona inai taudia ia siaia idia do idia tahua totona. To, Ieremia 16:15 ena hereva bamona, reana unai ese helalo-kerehai Israela taudia ia tahua karana ia herevalaia danu.
20:7—Edena dala ai Iehova ese ena goada amo Ieremia ia koia? Ieremia ese Iehova ena hahemaoro herevadia ia harorolaia neganai, taunimanima idia ura lasi idia kamonai. Idia dadaraia bona idia dagedage henia dainai, Ieremia ia laloa ia be goada lasi ena peroveta gaukara ia karaia noho totona. To, Iehova ese unai bamona lalohadai ia koua, bona Ieremia dekenai goada ia henia. Unai dala amo, Iehova ese Ieremia ia koia, badina ena be Ieremia ia laloa ia hegeregere lasi, to ia be unai peroveta gaukarana ia karaia guguru.
Ita Dibaia Gaudia:
1:8. Nega haida Iehova ese dagedage amo iena taunimanima ia hamauridia. Reana dala ia kehoa, laloa maoromaoro tauna ta ese diadi gaukara ia karaia. Eiava, iena taunimanima ia dagedage henia tauna be ena dagi amo ia kokia bona laloa maoromaoro tauna ta ese ena gabu ia abia. Eiava, Iehova ese ia idia tomadiho henia taudia dekenai goada ia henia unai dagedage idia haheaukalaia totona.—1 Korinto 10:13.
2:13, 18. Abidadama lasi Israela taudia be kara dika rua idia karaia. Idia ese Iehova, idia ia hanamoa, ia hakaua bona ia gimaia tauna idia rakatania. Idia ese Aigupito bona Asuria besedia edia ami taudia amo heduru idia tahua, bona laulau dalanai unai be sibodia edia ranu guri idia geia bamona. Hari inai negai, taunimanima edia aonega, lalohadai bona politikol karadia ita abia dae bona Dirava momokani ita rakatania karana be “mauri ranuna” ita rakatania bona “ranu guri dikadia” ita geia bamona.
6:16. Iehova ese ena gwau-edeede taudia ia hamaorodia, edia kara do idia tahua namonamo bona edia “tubuna taudia edia dala” dekenai do idia giroa lou. Namona be ita danu be nega ta ta ai sibona iseda kara do ita tahua bona ita itaia ita be Iehova ena ura hegeregerena ita raka noho eiava lasi.
7:1-15. Iuda taudia idia laloa dubu helaga be toni bamona idia do ia gimaia, to unai ese ia hamauridia lasi. Namona be abidadama dekenai ita raka, bona matana amo ita itaia gaudia dekenai ita raka lasi.—2 Korinto 5:7.
15:16, 17. Ieremia hegeregerena, lalomanoka karana ita koua diba. Sibona iseda Baibel stadi karana do ita moalelaia, haroro gaukara lalonai Iehova ena ladana do ita hanamoa bona hebamo dikadia do ita dadaraia neganai, lalomanoka ita koua diba.
17:1, 2. Iuda taudia ese kara dika idia karaia dainai, Iehova be edia boubou gaudia ia moalelaia lasi. Bema matabodaga karadia ita karaia, iseda hesiai gaukara do ia abia dae lasi.
17:5-8. Taunimanima bona edia orea idauidau ita abidadama henidia diba, bema edia kara be Dirava ena ura hegeregerena bona ena hakaua herevadia idia badinaia. To, hahemauri, maino bona noho namona ita laloa neganai, Iehova sibona do ita abidadama henia be aonega karana.—Salamo 146:3.
20:8-11. Ena be taunimanima idia ura lasi kamonai, idia badu eiava idia dagedage, to unai ese iseda Basileia ena sivarai namona harorolaia urana ia hadikaia lasi be namo.—Iamesi 5:10, 11.
“BABULONIA ENA KING ENA SIAHU HENUNAI DO OI LAO”
Ieremia ese Iuda ena king hani, peroveta taudia koikoidia, gunalaia taudia dikadia bona kara gageva hahelaga taudia dekenai hahemaoro herevadia ia gwauraia. Kara maoromaoro taudia oredia be fig huahua namodia bamona ia herevalaidia, ia gwau: “Lau ese idia do lau naria bona hanamoa.” (Ieremia 24:5, 6) Karoa 25 lalonai ia herevalaia peroveta herevadia toi be gabeai karoa haida lalonai edia anina ia gwauraia hedinarai.
Hahelaga taudia bona peroveta taudia be idia gwaubou Ieremia idia hamasea totona. Ia hamaorodia Babulonia ena king do idia hesiai henia. King Sedekaia dekenai Ieremia ia gwau: “Babulonia ena king ena siahu henunai do oi lao.” (Ieremia 27:12) To, Iehova ma ia gwau: “Lauegu bese taudia lau luludia, gabu idauidau momo idia lao, to lau ese idia do lau haboua lou.” (Ieremia 31:10) Rekaba iduhu taudia edia badinaia karana dainai, Iehova ese idia dekenai gwauhamata ta ia karaia. Ieremia be “king ena ariara magu lalonai rumana dekenai” idia koua. (Ieremia 37:21) Babulonia ese Ierusalema ia hadikaia, bona hanua taudia momo be igui hesiai taudia ai idia halaodia. Ieremia bona Baruku be taunimanima ma haida ida Ierusalema dekenai idia noho. Ena be Ieremia ese ia koudia, to idia gari taudia haida be Aigupito dekenai idia lao. Karoa 46 ia lao 51 be bese ma haida dekenai Ieremia ese ia gwauraia herevana ia hahedinaraia.
Baibel Henanadaidia Edia Haere:
22:30—Unai oda herevana ese Iesu Keriso be Davida ena terona dekenai do ia helai lasi karana ia herevalaia, a? (Mataio 1:1, 11) Lasi, unai ia herevalaia lasi. Unai oda herevana be Iehoiakini ena bese taudia ia koua, idia ta be “Davida ena terona . . . Iuda dekenai do ia lohia karaia lou lasi.” Iesu be Iuda dekenai ia noho terona latanai do ia helai lasi, to ia be guba amo do ia lohia.
23:33—Lohiabada ena “gau metauna” be dahaka? Ieremia ena negai, ia ese ia harorolaia Ierusalema ena dika herevana be hereva metauna kamonai taudia dekenai. Ma danu, unai hereva idia kamonai lasi taudia be Iehova dekenai gau metauna bamona dainai, Dirava ese idia do ia negea. Unai hegeregerena, hari inai negai Baibel ena hereva Kerisendom be dika do ia davaria be hereva metauna. Bona Kerisendom be dika do ia davaria herevana idia abia dae lasi taudia be Dirava dekenai gau metauna bamona.
31:33—Edena dala ai Dirava ena taravatu be iseda kudouna dekenai ita torea? Tau ta be Dirava ena taravatu ia lalokau henia bona ia ura dikadika Iehova ena ura ia karaia neganai, ita gwau diba Dirava ena taravatu be iena kudouna dekenai ia torea.
32:10-15—Ena be Ieremia ese tano tamona ia hoia, to dahaka dainai tano biagua pepadia rua ia torea? Idia koua lasi gauna be do idia itaia lou lou pepana. Idia koua gauna be gabeai bema idia ura gau ta idia hamomokania, idia kehoa bona idia sekea diba pepana. Ieremia be haheitalai namona ia hahedinaraia ita dekenai, bema iseda varavara eiava tadikaka ida bisinesi ita ura karaia neganai, taravatu hegeregerena ita karaia be maoro.
33:23, 24—Inai siri ese edena bese rua ia gwauraia? Heberu gado Baibel toretorena ginigunana ai “Israela bona Iuda” besedia idia torea lasi. Vadaeni, unai bese rua be daidia? Ta be King Davida amo ia mai lohia besena bona ma ta be Arona amo idia mai hahelaga taudia edia bese. Ierusalema hanua bona Iehova ena dubu helagana idia hadikaia ore neganai, ia hedinarai Iehova be unai bese rua ia dadaraia vadaeni, badina iena basileia be tanobada ai ia lohia lasi bona iena tomadiho momokanina be idia haginia lou lasi.
46:22—Dahaka dainai Aigupito be gaigai ia rau lao ena regena bamona ia herevalaia? Unai ese ia hahedinaraia Aigupito be tuari dekenai dika bada ia davaria dainai, ia giroa lou eiava ia hemarai bada. Danu, unai parabole ese ia hahedinaraia Farao ese ia karaia kwarana gauna mai ena gaigai laulauna be anina lasi. Idia gwau unai kwara gauna be gaigai dirava hahinena Uatchit ia laulaulaia bona ia ese idia do ia gimaia, to unai ia karaia lasi.
Ita Dibaia Gaudia:
21:8, 9; 38:19. Ierusalema be kahirakahira momokani do idia hadikaia ore lalonai, Iehova be Ierusalema dekenai idia do noho kamonai lasi taudia dekenai dala ia kehoa. Oibe, “Lohiabada ena bogahisihisi be bada herea.”—2 Samuela 24:14; Salamo 119:156.
31:34. Ita moale badina Iehova ese iseda kara dika ia gwauatao neganai, vaira negana ai do ia laloa lou lasi bona gabeai ita do ia panisia lasi!
38:7-13; 39:15-18. Iehova be iseda hesiai gaukara, bona ‘Dirava ena taudia ita durua’ karadia danu ia laloaboio lasi.—Heberu 6:10.
45:4, 5. Hari inai “nega dokona” ai ita noho be Iuda ena nega dokona bamona, hari be “gau namo herea” hegeregere, dagi bada, moni eiava kohu momo tahua negana lasi.—2 Timoteo 3:1; 1 Ioane 2:17.
IERUSALEMA HANUA IDIA GABUA
Lagani be 607 B.C.E., Sedekaia be lagani 11 ia lohia vadaeni. Babulonia ena King Nebukanesa be hua 18 lalonai Ierusalema ia hagegea bona ena lohia laganina 18, ena hua 5 ena dina namba 7 ai, Nebusaradana, tuari biaguna badana “be Ierusalema dekenai ia ginidae.” (2 King Taudia 25:8) Reana, hanua ena magu murimurina dekenai ena kamepa ia karaia bona idia vara gaudia edia oromana ia itaia bona tuari dalana ia palanilaia. Dina toi murinai, unai hua ena dina namba 10 ai, “Nebusaradana ese Ierusalema dekenai ia raka vareai” bona hanua ia gabua.—Ieremia 52:12, 13.
Ieremia ese Ierusalema dekenai idia vara gaudia bona ena moru ena sivarai ibounai ia torea. Ia herevalaia gaudia ese lalohisihisi bona taitai ia havaraia. Ieremia ena taitai herevadia be Lalohisihisi ena Ane bukana lalonai ia torea.
[Picture on page 28]
Ieremia be Iehova ena hahemaoro herevadia Ierusalema dekenai ia gwauraia danu
[Picture on page 29]
Edena dala ai Iehova ese ena goada ia gaukaralaia Ieremia ia koia totona?
[Picture on page 30]
“Inai fig au huahuadia namodia hegeregerena, lau ese Iuda tano dekena amo Babulonia dekenai idia abia lao taudia lau gwauraidia, idia be namo herea.”—Ieremia 24:5