Huahua—Namodia Bona Dikadia
“Iehova ese lau dekenai ia haheitalaia, bona, itaia! suke bosea rua . . . Bosea ta lalonai suke idia namo herea, idia mage guna gaudia bamona; to bosea iharuana lalonai suke idia dika momokani, idia dika bada dainai ta ese ia ania diba lasi.”—IEREMIA 24:1, 2.
1. Iehova be edena bamona iena bese, Israel, ia hebogahisi henidia, bona unai dainai dahaka idia karaia?
LAGANI be 617 B.C.E. Lagani 10 idia do noho ela bona Iehova ese Ierusalem bona ena taunimanima edia davana do ia henidia. Ieremia be lagani 30 lalodiai ia haroro goadagoada vadaeni. Esera ese unai negai ia vara gauna ia gwauraia, Sisiga Iharuana 36:15 ai ia gwau: “Iehova, edia senedia edia Dirava, ese hereva be ena gwaukau taudia edia ududia amo ia siaidia loulou, badina be ia ese ena taunimanima bona ena noho gabuna ia bogadia hisi.” Unai hekwarahi ibounai dainai dahaka ia vara? Madi, 2 Si 36 siri 16 ai Esera ia gwau: “To nega iboudiai idia ese Dirava [momokani] ena gwaukau taudia idia hevasehalaidia bona ena hereva idia dadaraidia bona ena peroveta taudia idia kirikirilaidia, ela bona Iehova ena badu ia vara ena taunimanima latadiai, ela bona hanamodia lou dalana be lasi.”
2, 3. Iehova ese Ieremia dekenai ia hahedinaraia matahanai mani oi gwauraia.
2 Unai ena anina be Iehova ese Iuda besena do ia haorea vaitani, a? Haere do ita davaria totona, matahanai ta, Iehova ese Ieremia ia haheitalaia gauna, mani ita laloa, unai be Ieremia bukana 2 Si 36 karoa 24 ai ia torea. Matahanai lalonai Iehova ese suke huahuadia bosea rua ia haheitalaia, ena gwauhamata besena taudia bogaragidiai idia vara gaudia idia laulaulaidia. Idia laulaulaidia huahuadia be rua, namodia bona dikadia.
3 Ieremia karoa 24, siri 1 bona 2 lalonai, Dirava ena peroveta tauna ese ia itaia gauna ia gwauraia, ia gwau: “Iehova ese lau dekenai ia haheitalaia, bona, itaia! suke huahuadia bosea rua be Iehova ena dubu vairanai idia noho; unai be Nebukadnesara, Babulono pavapavana, ese Iekonia, Iuda pavapavana Iehoiakim ena natuna, bona Iuda lohiadia bona ima gaukara taudia bona magu haginia taudia, be Ierusalem amo Babulono ai ia abidia lao negana ai. Bosea ta lalonai suke idia namo herea, idia mage guna gaudia bamona; to bosea iharuana lalonai suke idia dika momokani, idia dika bada dainai ta ese ia ania diba lasi.”
Matahanai Lalonai Suke Namodia
4 Iehova ese Ieremia ia nanadaia dahaka ia itaia, bena Ie 24 siri 5 ela bona 7 ai ia gwau: “Inai suke huahuadia hegeregeredia, lau ese Iuda tanona amo idia abidia oho Iuda taudia do lau gwauraidia namo; inai gabu amo do lau siaidia lao Kaldea taudia edia tano ai. Lau ese do lau raraidia, hanamodia totona, bona do lau hakaudia mai lou inai tano lalonai. Lau ese do lau haginidia, do lau hamakohidia lasi; do lau hadodia, do lau kokidia lasi. Lau ese edia lalodia do lau hapararadia, do idia diba lau be Iehova; bena idia be egu bese ai do idia lao, bona lau be edia Dirava ai do lau lao; badina be idia ese lau do idia lou henia, mai edia lalodia iboudiai ida.”
5, 6. (a) Israel taudia be Kaldea dekenai ‘ia siaidia lao’ be edena dala amo ‘ia namo’? (b) Unuseniai idia noho abidadama Israel taudia be edena dala ai Iehova ese ‘ia raraidia, hanamodia totona’?
5 Iehova ena hereva ese ia hahedinaraia nega namodia do idia vara bona Iuda besena do ia haorea vaitani lasi. Hari bosea mai ena suke huahuadia namodia edia anina be dahaka?
6 Vadaeni, Iekonia, Iehoiakini unai, be hua toi bona dina ten lalodiai Iuda ia lohiaia, bena sibona ena ura hegeregerena Ierusalem be King Nebukadnesara ena imana ai ia atoa. Bena Babulono pavapavana ese Iekonia, bona Daniel mai ena Heberu bamodia toiosi, Hanania, Misael bona Asaria, bona Esekiel, bona lohia iboudiai ia abidia mauri, Babulono ai ia laohaidia. Babulono pavapavana ese ia hamauridia, unai dainai momokani ita gwau diba Iehova ese Kaldea taudia edia tano dekenai unai abidia mauri taudia iboudiai ia siaidia lao be namo. Ma oi laloa, Iehova ia gwauhamata, ia gwau ‘do ia raraidia, hanamodia totona.’ Ena gwauhamata be edena bamona ia hamomokania? Lagani 80 murinai, lagani 537 B.C.E. ai, Iehova ese King Kurese ia gaukaralaia neganai Kurese ese hahegani ta ia gwauraia, dala ia karaia edia tubudia haida be Iuda do idia lou henia. Unai Iuda taudia mai edia kamonai ese Ierusalem hanuana idia haginia lou; dubu matamatana idia haginia, ia lalonai edia Dirava do idia tomadiho henia totona; bona mai edia lalodia iboudiai ida Iehova idia lou henia. Unai ibounai lalonai, idia abia mauri taudia bona edia tubudia be suke huahuadia namo hereadia, idia mage guna gaudia bamona.
7. Edena negai bona edena dala ai Iehova ese hari inai nega ena Ieremia bamona oreana “ia raraidia, hanamodia totona”?
7 Reana oi laloatao, hari hereva ia gunalaia herevana lalonai, ita davaria Ieremia ena peroveta herevadia be mai anina hari inai negai. Ie Karoa 24 danu be unai hegeregerena. Tanobada Ibounai Tuarina Ginigunana ena dibura negana lalonai, Iehova idia gwauhamata henia vadaeni taudia momo be dala idauidau ai Babulono Badana ena siahu henunai idia mai. To Iehova ese ‘ia raraidia, hanamodia totona.’ Unai dainai, Kurese Badana, Keriso Iesu, ena amo Iehova ese Babulono Badana ena siahu amo ia ruhadia bena lauma paradaisona lalonai ia hakaudia vareai. Unai dainai lauma Israel taudia be mai edia kudouna ibounai ida Iehova dekenai idia giroa. Bena lagani 1931 ai, inai ladana, Iehova ena Witness taudia, idia abia dae mai edia moale ida. Momokani, unai neganai idia be bosea mai ena suke huahuadia namo hereadia bamona ai idia lao, Iehova vairanai.
8. Iehova ena Witness taudia be edena dala ai Basileia ena sivarai namona, suke huahuana gaihona bamona, idia harorolaia?
8 Dirava ena hariharibada dainai Iehova ena Witness taudia be Babulono Badana amo ia ruhadia, bona iena kara ena badina idia reaia lasi. Basileia ena sivarai namona, suke huahuana gaihona bamona, idia dogoatao lasi sibodia edia, to idia harorolaia badabada, Iesu ena hereva Mataio 24:14 dekenai hegeregerena; ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” Unai dainai dahaka ia vara? Mamoe bamona taudia, lauma Israel lasi taudia, 4,700,000 mai kahana be Babulono Badana ena igui amo idia roho mauri vadaeni!
Matahanai Lalonai Suke Dikadia
9 Bosea mai ena suke huahuadia dikadia, matahanai lalonai Ieremia ese ia itaia gaudia, be edena bamona? Ieremia karoa 24, siri 8 ela bona 10 dekenai Ieremia ia gwau: “Iehova be inai bamona ia hereva: Hari suke dikadia, idia dika momokani dainai idia ania diba lasi gaudia, hegeregeredia, ‘Sedekia, Iuda pavapavana, bona ena lohia taudia, bona Ierusalem dekenai inai tano taudia oredia, bona Aigupito dekenai idia noho taudia, do lau kara henidia. Lau ese gari gauna ai do lao halaodia, tanobada ena basileia iboudiai dekenai, bona do lau luludia lao gabudia iboudiai dekenai do idia gwauraidia dika, do idia gonagonalaidia, bona do idia hadikadia. Lau ese dare bona doe bona dai-hanai gorerena be idia latadiai do lau siaidia, ela bona idia bona edia sene taudia dekenai lau henia tanona amo do idia ore.’ ”
10. Dahaka dainai Iehova ia laloa Sedekia be ‘suke dikana’ ta?
10 Sedekia be momokani ‘suke dikana’ ai ia lao Iehova vairanai. Iehova ena ladanai King Nebukadnesara ia gwauhamatalai henia karana ia karaia lasi, to ia gwau-edeede henia, bona Iehova ena hebogahisi, Ieremia ena amo ia henia gwauraia hebogahisina, be ia ese ia dadaraia. Unai sibona lasi, to ia ese danu Ieremia be dibura rumana ai ia koua! Unai dainai Esera be 2 Sisiga 36:12 dekenai pavapava ena kara ia gwauraia, ia gwau: “Ia be Iehova, ena Dirava, vairanai ia kara dika noho. Sibona ia hamanaua lasi.” Iehova ena matana ai, Sedekia bona taunimanima oredia Ierusalem ai idia do noho be bosea mai ena suke huahua dikadia bamona!
Matahanai Suke Huahua Dikadia Iseda Nega Lalonai
11 Tanobada oi laloa. Mani oi laloa bosea ta mai ena suke huahuadia dikadia ese idia laulaulaia gauna be hari inai negai ita davaria diba, a? Unai do ita diba totona, iseda nega be Ieremia ena nega ida do ita hahegeregerea be namo. Idia hanaia laganidia 70 bamona lalodiai Iehova ese Ieremia bamona oreana, horoa orena taudia unai, ia gaukaralaidia, iena badu, hisihisi badana ai do ia halasia baduna, be tanobada besedia do idia hamaorolaidia loulou totona. Ia noidia goadagoada, iena ladana do idia hanamoa, lauma ai bona momokani ai do idia tomadiho henia, bona ena Natuna, Keriso Iesu, ia lohia noho tauna, do idia abia dae tanobada ena Lohia maorona. Edena bamona idia karaia? Ieremia ena negai hegeregerena. Tanobada besedia be Iehova vairanai idia kara dika noho.
11, 12. Hari inai negai, daidia be suke dikadia, bona idia dekenai dahaka do ia vara?
12 Daidia ese inai gwau-edeede idia havaraia? Daidia ese Iehova ena gwaukau taudia, Ieremia bamona taudia, idia hevasehalaidia, idia gwau idia be Dirava ena hesiai taudia korikoridia lasi? Daidia be Dirava ena Hereva idia gwauraia dika noho? Hari inai negai nega momo daidia ese taunimanima edia lalodia idia anidia, Iehova ena Witness taudia do idia dagedage henidia totona? Taunimanima iboudiai idia diba vadaeni—Kerisendom ese; bona ena haroro taudia ese unai kara idia karaia badabada! Kerisendom ena huahua dikadia, ita herevalaidia vadaeni karadia, be mani umui lalodia. Oibe, bosea ta mai ena suke huahuadia dikadia ese ia laulaulaia gauna be hari ia noho. Iehova ia gwau idia “dika bada dainai ta ese ia ania” diba lasi. Iehova be Ieremia ena amo ia gwauraia herevana, be hari inai negai ita kamonaia noho, ia gwau: ‘Edia dokona dekenai do idia mai’! Iehova ese Kerisendom ia badu henia, bona do ia namo lou lasi.
Unai be Sisiba Ita Dekenai
13 Ieremia ena sisiba herevadia, Dirava ena lauma ese ia havaraia herevadia, ita tahudia neganai, aposetolo Paulo ena hereva Korinto Ginigunana 10:11 ai ita laloa; ia gwau: “Iseda tubuna dekenai unai bamona kara idia vara, be ita dekenai toana bamona, do ita itaia mai gari danu. Edia sivarai danu Buka Helaga lalonai idia torea vadaeni, idia ese ita do idia sisiba henia totona. Badina be tanobada ena dokona be kahirakahira negana ita noho inai.” Hari sisiba, bosea rua mai edia suke huahuadia matahanaina amo ia henia sisibana, be ita ta ta ese ita abia dae, a? Hari ita herevalaidia gaudia, Israel dekenai idia vara gaudia, be toa ta ita dekenai, ita idia sisiba henia.
14. Israel taudia be edena bamona idia laloa Iehova ena lalokau hebogahisina dekenai?
14 Vadaeni, Iehova ena hereva Samuel Iharuana 7:10 ai ita lalodia be namo; ia ese King David ia hereva henia, Israel taudia ia herevalaidia, ia gwau: “Egu bese Israel edia gabu do lau gwauraia hidi, bona do lau atodia.” Iehova ese ena bese, Israel, be dala iboudiai ia naridia mai ena hebogahisi ida. Israel taudia ese huahua namodia be edia mauri ai do idia havaradia be mai badina momo. Iehova ena hahediba do idia kamonaia bona ena taravatu do idia badinadia be namo. To idia haida mo be unai bamona idia karaia. Idia momo idia gwau-edeede bona idia raka kerere dainai, huahua dikadia idia havaradia.
15. Hari inai negai, lauma Israel taudia bona edia turadia, mamoe bamona taudia, be Iehova ena hariharibada edena bamona idia laloa?
15 Vadaeni, iseda nega be edena bamona? Iehova ese iena lauma Israel taudia oredia bona edia bamodia ia hebogahisi henidia bada. Lagani 1919 ai lauma dalanai ia ruhadia, bona unai nega amo ia itadia noho. Isaia ena amo ia peroveta hegeregerena, dina iboudiai Hahediba Diravana hereadaena, Iehova, ese ia hadibadia. (Isaia 54:13) Unai hahediba, iena Natuna lalokauna, Iesu Keriso, ena amo ia henidia hahedibana, dainai edia maino ia bada bona idia be Iehova ida idia hetura heheni momokani. Lauma dalanai unai ese ita ia durua bada, Iehova do ita diba, do ita kamonai henia, bona iseda mauri ai huahua namodia do ita havaradia—Iehova hanamoa huahuadia unai! Unai kara dainai mauri do ita abia diba!
16. Ita ta ta ibounai be suke bosea rua matahanaina ena anina edena bamona ita gaukaralaia diba?
16 To, ena be Dirava ese hariharibada ia hahedinaraia, haida idia gwau-edeede bona edia kudou idia ha-aukaia noho, idaunegai Iuda dekenai momo ese idia karaia bamona, bona edia mauri daladia ai huahua dikadia idia havaraia. Madi! Hari bosea ruaosi—ta mai ena suke huahua namodia bona ta mai ena suke huahua dikadia—edia anina do ita laloaboio lasi be namo. Idia be toa ta, ita idia sisiba henia. Iehova ese Kerisendom, dala maorona ia rakatania oreana, ena davana do ia henia negana be ia mai kahirakahira noho lalonai, aposetolo Paulo ena sisiba do ita laloa bada be namo; ia gwau: “[Iehova] ena ura hegeregerena do umui noho bona nega ibounai ia do umui hamoalea. Emui mauri ese kara namodia edia anina do idia havaraia.”—Kolose 1:10.
Riviu
◻ “Huahua—Namodia Bona Dikadia” bona “Iehova Ena Samani Herevana, Bese Idauidau Latadiai” ena paragraf 1-4
◻ Suke namodia bosea ese dahaka ia laulaulaia?
◻ Matahanai lalonai suke dikadia bosea be edena bamona idia hedinarai?
◻ Ieremia ena hereva amo dahaka sisiba ita abia?
◻ Dahaka ia vara dainai ita gwau lagani 607 B.C.E. bona 1914 C.E. be lagani badadia?
4. Unai suke huahuadia matahanaina amo abidadama Israel taudia be dahaka hagoadaia herevana idia abia?
9. Suke huahua dikadia, Ieremia ena matahanai lalonai idia hedinarai, ese daidia idia laulaulaidia, bona idia dekenai dahaka do ia vara?
13. Paulo ena hereva Korinto Ginigunana 10:11 dekenai dainai, namona be suke bosea rua matahanaina be edena bamona ita laloa?
[Pictures on page 15]
Suke namodia hegeregeredia, Dirava ena taunimanima be Basileia ena huahua namona idia havaraia
Kerisendom ese ia hamomokania ia be suke dikadia bosea ai ia lao vadaeni