“Iehova Ena Imana” Egu Mauri Lalonai
LAWRENCE THOMPSON ESE IA SIVARAILAIA
HANUABOI ta ai 1946 neganai, egu tamana bona lau be motuka lalonai ai helai bona not kahana ena diari be guba dekenai ia hanaia lao ai raraia. Iehova ia bada bona ai maragi ai herevalaia. Canada dekenai Iehova ena Witness taudia edia gaukara idia koua sivaraidia ai herevalaidia. Tamagu be lau dekenai Iehova ese unai laganidia lalodiai Iena bese ia durudia bona ia hakaudia dalana ia gwauraia bada.
ENA BE lauegu lagani be 13 sibona, Tamagu ia hereva momokani be lau diba. Danu, gabeai do ai karaia haroro gaukarana be anina bada bona do ia tubu be lau dekenai ia gwauraia bada. Tamagu ese Numera 11:23 ena hereva ia gwauraia bona Iehova ena imana be ta ese ia koua lasi be lau dekenai ia gwauraia bada. Ita abidadama lasi bona ita tabekau lasi neganai sibona, iena imana be ita dekenai ia koua. Unai be tamana bona natuna mero idia kiki hebou nega namo hereana, bona do lau laloaboio lasi.
Watch Tower buka bona magasin lau stadilaidia dainai, lagani 1939 ai idia karaia Salvation bukana danu, be anina bada egu lagani matamata negana ai. Ena hamatamaia laulau hereva dala idauna do lau laloaboio lasi: “Ia lao haraga momokani train dekenai be guia taudia momo, bona ena sipidi be kilomita 160 hora tamona lalonai. Sinavai ia hanaia dalana be nese amo . . . Train ena murina kahana dekenai be tatau rua idia helai . . . bona idia itaia nese ena dokona kahana be lahi ese ia araia noho bona sinavai dekenai ia moru. Idia diba dika bada do idia davaria. Namona be gau ta idia karaia haraga. Train idia koua haraga diba bona guia taudia idia hamauridia diba, a?”
Unai laulau ena anina ia herevalaia neganai, unai buka ena hereva dokona be inai: “Hari inai nega be unai bamona, namona be tanobada besedia iboudiai be gau ta idia karaia haraga. Dirava ese hahegani ia henia hegeregerena idia hadibadia noho Aramagedono be idia vairanai. . . . Sisiba idia abia dainai, namona be idia ta ta iboudiai be harihari do ia rakalaia dalana ia abia hidi.”
Ia lao haraga train, ia araia noho nese, bona haroro gaukara ita karaia haraga be gau badana be lau laloa hanaihanai.
Haroro Nega Gunadia
Lagani 1938 lalonai, lau be lagani ima neganai, haroro gaukara lau karaia hamatamaia. Henry bona Alice Tweed, pioneer taudia rua (ful-taim haroro taudia), be lau idia abia lao, bona dina tamona lalonai taunimanima ai hereva henidia hora 10 ia lao 12 lalodiai. Lau moale bada unai dinadia lalodiai Iehova ena hesiai gaukara lau karaia dainai. Unai dainai murinai lagani lalonai lau moale bada badina Tamagu bona Sinagu be lau idia koua lasi pablisa ai lau lao totona bona egu haroro ripoti lau karaia.
Unai nega gunadia ai, ai be taunimanima ai hadibadia totona hanua edia dala badadia dekenai ai raka lao, bona saini ai dogoatao, unai saini ese tomadiho koikoi edia kara idia gwauraia hedinarai bona Dirava ena Basileia idia harorolaia. Danu, rekodi masini ai abia loaloa bona rekodi amo Baibel ena sivarai be ruma taudia edia iduara vairadiai ai halasia. Watch Tower Society ena presiden, J. F. Rutherford, ena haroro herevadia be rekodi dekena amo ai halasia, idia haida be egu kwarana amo lau gwauraidia diba. Lau laloatao ia gwau: “Nega momo taunimanima idia gwau, Tomadiho karana be idoa bona kara koikoi gauna!”
Iseda Gaukara be Canada ai Idia Koua
Tanobada ibounai tuarina iharuana neganai, Iehova ena Witness taudia edia gaukara be Canada dekenai idia koua, Nazi Germany bona ma tano haida ai idia karaia hegeregerena. Unai dainai Baibel sibona ai gaukaralaia to Dirava ena amo ai abia gaukarana ai karaia noho Baibel ai badinaia totona. (Mataio 28:19, 20; Kara 5:29) Pulisi taudia be mai dagedage ida aiemai hebou bona aiemai ruma idia vareai neganai, unai hekwakwanai hanaia dalana ai karaia. Danu, kota henia taudia bona henanadai henia taudia vairadiai ai hereva dalana dekenai diba ai habadaia.
Egu kakana Jim bona lau be inai kara ai manadalaia momokani: ia heau lao motuka amo buklet ai negedia ruma edia iduara bona vaira kahadia ai. Ma danu United States dekenai hebouhebou ai idia lao bona tano hetoana idia hanaia taudia totona sivarai ai abidia lao, bona nega haida, idia totona ai gima.
Aiemai ruma be Port Arthur (hari idia gwauraia Thunder Bay), Ontario, ena murina kahana dekenai ai noho, unai be hectare rua bamona bona au bona uda ese ia gegea. Ai be mai emai boromakau ta, boromakau natuna ta, boroma, bona kokoroku—unai noho toana ese emai gaukara momokanina ia hunia, ai be Keristen tadikaka matamatadia ai durudia badina Dirava ena Basileia idia harorolaia dainai dibura dekenai idia lao totona idia tahudia.
Hanuaboi neganai, motuka, taraka, bona trailer dekena amo Keristen matamatadia be aiemai gabu dekenai idia mai bona idia lao. Unai tatau matamatadia be emai ruma dekenai idia mahuta, ai hunidia, edia toana ai haidaua, ai ubudia bena ai siaidia lao. Egu tamana bona sinana, bona unai nega gunadia haroro taudia, be mai edia goada ibounai ida idia gaukara hesiai taudia; idia ese egu kudou idia veria lau matamata negana amo Iehova Dirava lau hesiai henia bona lau lalokau henia totona.
August 1941 neganai, egu mauri be Iehova dekenai lau gwauhamatalaia bona uda momokani ena gohu dekenai lau idia habapatisoa. Ai haida be unai totona hanuaboi momokani neganai lamepa diari amo ruma ta lalonai ai hebou. Idia laloa gau ta ia vara dainai, pulisi taudia idia loaloa bona ai idia tahua, mai edia diari ida gohu dekenai idia tahua, to ai idia davaria lasi.
Nega Ibounai Hesiai Gaukara Ena Gaukara Idauidau
Lagani 1951 neganai, lau be haisikuli lau karaia ore bona kilomita 1,600 dekenai lau lao Cobourg, Ontario dekenai, pioneer gaukara lau karaia totona. Unai kongregesen ia maragi, bona egu pioneer bamoa tauna be lasi. To lau laloatao Iehova ena imana ia kwadogi lasi, unai daiutu ta lau rentaia, sibogu lau nadunadu, bona lau moale Iehova lau hesiai henia dainai. Murina lagani ai, lau idia boiria Toronto dekenai Watch Tower Society ena brens opesi dekenai lau hesiai karaia totona. Unuseniai diba momo lau abia bona gabeai Basileia hesiai gaukarana totona lauegu kara haida lau hanamoa.
Toronto dekenai lagani tamona lalonai lau hesiai karaia murinai, Lucy Trudeau bona lau ai headava, bona 1954 ena keru negana ai, ai be pioneer gaukara ai abia Levis, Quebec dekenai. Unai be keru bada gabuna, dagedage oreadia bona pulisi be ai idia hagaria, bona France gado dekenai diba ai abia totona be hekwarahi. Unai ibounai dekenai Iehova ena imana ia kwadogi lasi, unai dainai ena be nega haida ai hekwarahi, to ai be hahenamo momo ai davaridia danu.
Hegeregere, ai idia hamaoroa Society ese idia gaukaralaidia bouti rua (Arosa Star bona Arosa Kulm) do ai sekedia, Europe ena 1955 intenesenel hebouheboudia ai idia lao taudia be unai bouti dekenai idia lao. Nega haida bouti kampani biagudia be ai dekenai heabidae karana idia hahedinaraia, badina idia ura Society ese edia bouti idia gaukaralaia bona unai ese edia bisinesi ia durua; Quebec dekenai emai haroro gaukara ai hekwarahilaia bona unai neganai aiemai hekwarahi ai laloaboio diba sisina.
Lagani 1955 ena siahu nega bona keru nega ihuadiai, lau idia boiria sekit naria gaukara karaia totona, bona unai keru negana lalonai Ontario ena keru bada not kahana dekenai idia noho daudau kongregesen dekenai ai vadivadi. Murina lagani neganai ai lao United States ena Watchtower Bible School of Gilead dekenai, bona unai murinai ai idia siaia Brazil, South America, dekenai misinari gaukara ai karaia totona.
Aiemai haroro gaukara gabuna matamatana dekenai ai gaukara goadagoada, bona nega sisina murinai ai be Portugal gado dekenai ai haroro bona ai hadibaia diba. Lagani 1957 ena hamatamaia negana ai, lau dekenai sekit naria gaukara idia henia lou. Unuseniai Not kahana ena keru bada be lasi, to ai be siahu bada herea ena hekwarahi ai abia. Nega momo gaukara ai rakatania bona emai tamaka amo emai aedia idia hasiahua miri ai kokia eiava tohu ai utua bona ai ania goada ai abia lou totona. To hahenamo ai abidia.
Regente Feijo hanuana dekenai, lau be pulisi ena biaguna dekenai lau haroro, bona ia gwau namona be sitoa ibounai idia koua bona hanua taudia iboudiai be hanua ena hebou gabuna ai idia lao. Mai herahera rau badadia au ta henunai, hanua taudia dekenai Baibel hereva lau henidia. Hari inai negai unuseniai be Witness taudia edia kongregesen ta.
Brazil Dekenai Emai Natudia Ai Ubudia
Lucy be 1958 ai ia rogorogo neganai, ai be Juiz de Fora dekenai ai noho bona unuseniai special pioneer gaukara ai karaia. Gabeai lagani rua lalodiai, aiemai natudia kekeni, Susan bona Kim, idia vara. Haroro gaukara lalonai idia be hahenamo badana ta, badina taoni dekenai taunimanima edia matadia idia veria. Edia pram be nadi daladia dekenai ai doridia lao neganai, taunimanima idia mai itaia totona. Equator amo ia diho gabuna, Recife dekenai, Basileia harorolaia taudia idia lao be namo dainai, unai siahu bada gabuna dekenai ai lao.
Lagani 1961 neganai, lau ese São Paulo hebouhebou dekenai idia lao Witness taudia edia peleini dalana lau karaia; nega daudau lalonai unai hebouhebou idia laloatao, bona lau danu lau lao. To peleini be miniti 20 ia roho lao murinai, peleini be guba amo ia moru diho, bona guia taudia be peleini lalonai idia moru. Peleini ena gau ibounai idia moru; helai gaudia be edia gini gabudia amo idia kokia, bona guia taudia be bero idia davaria bona rara ia diho. Namo herea badina peleini taria tauna ese peleini ena moru diho dalana ia koua, bona ai be tano dekenai ai diho namonamo. Ena be ai haida ai hisihisi, to ai ibounai ai hegeregere ma peleini ta ai guia São Paulo dekenai ai lao totona. Hebouhebou namo herea ta ai moalelaia, to lau gwau ma nega ta ai peleini dekenai do lau guia lasi!
To, hebouhebou amo lau giroa neganai, ma gaukara ta be lau idia henia gwauraia. Idia ura lau be Teresina, Piaui̇́ State gabuna ai, ena uda lalonai hebouhebou ta do lau naria. Unuseniai lau lao totona peleini do lau guia. Ena be lau gari bada to unai gaukara lau abia, Iehova ena imana dekenai lau tabekau.
Lagani 1962 neganai, aiemai natuna mero, Greg, be Recife dekenai ia vara. Ena be lau pioneer noho diba lasi, badina hari lau be mai egu ruma bese, to unai kongregesen maragina lau hagoadaia diba. Aiemai natudia idia ura bada ai danu haroro gaukara idia karaia, badina ai karaia dalana be idia ura henia. Idia ta ta iboudiai edia lagani toi negana amo be iduara dekenai idia haroro diba. Aiemai kara be hebou ai reaia lasi eiava haroro gaukara ai reaia lasi. Ena be ruma bese lalonai ta ia gorere dainai ma ta ia noho ruma dekenai ia naria totona, to ruma bese taudia oredia be hebou dekenai eiava haroro gaukara dekenai idia lao.
Lagani idia lao noho lalonai, aiemai ruma bese taudia be nega momo ai hebou natudia edia sikuli gaukara bona mauri lalonai idia tahua gaudia ai herevalaia totona, ai hegaegaelaidia Iehova ena orea dekenai gaukara idia karaia totona. Ai naria namonamo gau haida amo idia manoka garina, hegeregere televisen ena siahu. Aiemai ruma lalonai televisen be lasi ela bona natudia be lagani 13 idia abia murinai. Bona ena be aiemai moni ia hegeregere, to tanobada kohudia momo amo ai hakereredia lasi. Hegeregere, baisikele tamona sibona ai hoia, bona idia toi ese idia gaukaralaia diba.
Nega momo gau ai karaia hebou, basketbol gadara, ai nahu, bona ruma bese loaloa negadia be ai karaia hebou. Ai loaloa negadia be Keristen hebouhebou totona ai lao eiava tano idauidau dekenai Betele rumadia dekenai ai vadivadi negadia ai. Unai loaloa negadia ai ai herevahereva hebou namonamo diba, bona unai amo Lucy bona lau ai diba dahaka be emai natudia edia kudou dekenai. Iehova dekenai ai moale bada unai lagani namo hereadia dainai!
Gabeai, equator kahirakahira ai, medu bada siahu momo gabuna ai lagani ten ai noho dainai, Lucy ena tauanina goada ia dika sisina. Unai dainai diho kahanai, Curitiba, Paraná State gabuna ai, ia siahu momo lasi gabuna ai haroro gaukara ai abia neganai, ai moale.
Canada Dekenai Ai Giroa
Lagani 1977 neganai, Brazil dekenai lagani 20 ai noho murinai, Lucy bona lau be aiemai natudia ida Canada dekenai ai giroa egu gorere tamana ai naria totona. Egu ruma bese dekenai unai be noho dalana mai ena kastom idauidau momokani! To lauma dalana dekenai ia idau lasi, badina emai lalokau Keristen tadikaka ida hanaihanai ai karaia dalana ai karaia noho.
Canada dekenai emai ruma bese taudia ibounai be ful-taim haroro gaukara idia laloa badina idia ibounai be ful-taim pioneer hesiai gaukarana idia vareai. Ai ibounai be ruma bese gaukarana ai durua. Emai ruma ai naria bona aiemai gabu badana teritori dekenai motuka toi ai gaukaralaia, bona pat-taim moni gaukara amo ai abia monina be unai totona ai atoa. Wiki iboudiai, emai ruma bese Baibel stadi murinai, emai ruma bese edia palani ai herevaherevalaia. Unai herevahereva hebou kara dainai ai ibounai ai diba dahaka do ai tahua bona emai mauri lalonai dahaka ai karaia.
Emai natuna merona, Greg, be iena taihudia bamona nega ibounai hesiai gaukarana ia tahua. Iena lagani be ima negana amo, ia gwau Society ena brens opesi, idia gwauraia Betele, dekenai ia ura gaukara. Ia tahua gauna ia laloaboio lasi, bona haisikuli ia karaia haorea murinai, iena sinana bona lau ia nanadaia, ia gwau: “Oi laloa Betele totona aplikeisen lau karaia be namo, a?”
Ena be aiemai lalona ia tai bamona, to haraga ai gwau: “Betele dekenai Iehova ena imana ia gaukara ena anina do oi abia—unai be Iehova ena orea ena bogaragina momokani.” Hua rua idia ore lasi bona ia lao Canada Betele. Unai be 1980 neganai, bona unuseniai ia hesiai noho.
Lagani 1980 murinai Lucy bona lau be mauri daladia idau ai davaria. Ai hamatamaia bamona ai giroa—ai ruaosi sibona. Unai neganai Susan ia headava vadaeni bona ena adavana ida idia pioneer hebou, bona Kim bona Greg be Betele dekenai idia hesiai karaia. Dahaka do ai karaia? Unai henanadai ena haere ai abia haraga badina 1981 neganai ai idia boiria Portugal gado sekit ai karaia totona, unai be Canada ena kilomita 2,000 dekenai ai loaloa. Sekit gaukara ai moalelaia noho.
Kim ia headava bona Gilead dekenai ia lao, bona hari iena adavana ida Brazil dekenai sekit gaukara idia karaia. Susan bona ena adavana be Canada dekenai idia do noho, edia natudia rua idia ubudia, bona Susan ena adavana be pioneer gaukara ia karaia. Ena be vanegai laganidia lalonai tauanina dalanai emai ruma bese idia parara emai nega ibounai hesiai gaukara idauidau dainai, to lauma dalana ai bona lalona ena hemami dalanai ai noho hebou.
Lucy bona lau be gabeai negana ai naria, unai neganai aiemai ruma bese ida be ia goeva tanobadana dekenai do ai noho. (2 Petero 3:13) Idaunegai tauna Mose bamona, ai diba Numera 11:23 dekenai henanadai ena haere ia momokani, ia gwau: “Iehova ena imana ia kwadogi, a? Do umui itaia lauegu hereva be do ia vara eiava lasi.” Momokani, iena hesiai taudia be mai edia kudou ibounai ida edia hesiai gaukara idia karaia bona ia hanamodia neganai gau ta be Iehova ia koua lasi.
[Picture on page 25]
Egu adavana Lucy ida