Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w96 10/1 rau 24-28
  • Emai Ruma Taudia ida Iehova Ena Hesiai Ai Lao Henia

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • Emai Ruma Taudia ida Iehova Ena Hesiai Ai Lao Henia
  • 1996 Gima Kohorona Iehova Ena Basileia Ia Harorolaia
  • Sinado maragidia
  • Inai Bamona Atikol
  • Baibel Ena Hereva Momokani Lau Dibaia
  • Ful-taim Gaukarana Lalonai Lau Moale
  • Egu Mauri Ia Idau Neganai, Unai Lau Moalelaia
  • Emai Natuna ese Idia Abia Hidi Gaudia
  • Kwalimu Dalana
  • Oi Totona Unai be Gaukara Hereadaena, A?
    Gima Kohorona Iehova Ena Basileia Ia Harorolaia—2001
  • Oi Vadivadi Henia!
    Gima Kohorona Iehova Ena Basileia Ia Harorolaia—2010
  • Egu Abidadama Iehova Dekenai ese Lau Ia Hagoadaia
    1997 Gima Kohorona Iehova Ena Basileia Ia Harorolaia
  • “Dirava Ena Ruma” Ita Raraia Mai Lalo-Moale Ida
    1994 Gima Kohorona Iehova Ena Basileia Ia Harorolaia
Ma Haida Itaia
1996 Gima Kohorona Iehova Ena Basileia Ia Harorolaia
w96 10/1 rau 24-28

Emai Ruma Taudia ida Iehova Ena Hesiai Ai Lao Henia

ANTONIO SANTOLERI ESE IA SIVARAILAIA

Egu tamana be lagani 1919 lalonai Italy ia rakatania neganai, ena mauri laganidia be 17. Ia lao Brazil, mauri namona davaria totona. Gabeai huina pakosia gaukara rumana ta ia abia, São Paulo provinsi ena hanua maragina ta dekenai.

DINA TA lagani 1938 lalonai, egu lagani be 7 neganai, Tamagu ese ena gaukara gabuna dekenai ia lao tauna ta ena amo Brasileira Baibel ta ia abia. Bena lagani rua murinai Sinagu ia gorere bada, bena ia gorere ela bona ena mase dinana. Tamagu danu ia gorere, unai dainai ai ibounai—Sinagu, Tamagu, egu taihuna Ana, bona lau​—⁠be ai lao São Paulo, bena unai siti lalonai emai varavara ida ai noho.

São Paulo dekenai lau sikuli lalonai, idaunegai sivaraidia bukadia bona ma haida lau duahia mai egu ura bada ida. Idia lalodiai nega ta ta Baibel idia gwauraia; unai lau laloa bada. Buka ta, São Paulo ena pablik laiberi amo lau abia gauna, lalonai, Iesu be ororo dekenai ia harorolaia herevana be nega haida idia gwauraia. Unai neganai egu lalona lau hadaia Baibel ta do lau abia, lau sibona ese unai hereva do lau duahia totona. Tamagu ena Baibel, lagani haida gunanai ia abia gauna, lau tahua, bena maua ta lalonai lau davaria, lagani 7 lalodiai ia noho gabuna ai.

Emai famili be Katolik taudia, unai dainai nega ta lau idia hagoadaia lasi Baibel do lau duahia. To unai neganai, lau sibona ese karoa bona siri tahua dalana lau manadalaia. Iesu be ororo dekenai ia harorolaia herevana sibona lasi, to Mataio bukana ibounai bona Baibel ena buka ma haida danu be lau duahia. Lau laloa bada gauna be inai: Iesu ena hahediba herevadia bona ena hoa karadia edia sivarai edia mamina be hereva momokani edia mamina hegeregerena.

Egu lalona ia parara Katolik tomadiho dalana be idau bona Baibel lalonai lau duahia herevadia be idau vaitani; unai dainai Presbiterian Dubuna dekenai lau lao matamaia, bona Ana ese lau ia bamoa. To egu lalona be ia do hegeregere lasi. Lagani sisina momo lalodiai Dirava lau tahua goadagoada vadaeni. (Kara 17:27) Hanuaboi ta ai, hisiu momo idia hedinarai neganai, egu lalona ai lau henanadai, lau gwau, ‘Lau mauri ena badina be dahaka? Mauri ena anina be dahaka?’ Emai ruma ena ariara, ta ia noho lasi gabuna, lau lao, lau tui diho bona lau guriguri, lau gwau, ‘Lohiabada Dirava e! Oi be daika? Oi be edena bamona do lau diba?’ Bena nega daudau lasi haere ia mai.

Baibel Ena Hereva Momokani Lau Dibaia

Dina ta lagani 1949 ai, Tamagu be basi amo ia diho neganai, hahine matamatana ta be ia dekenai ia lao. Gima Kohorona bona Noga! magasin ia henia toho. Tamagu be Gima Kohorona ena sabskripsen ia abia, bona ia noia emai ruma dekenai do ia vadivadi. Ia hamaoroa ena natuna ruaosi be Presbiterian Dubuna idia lao henia. Unai hahine ia vadivadi neganai, ia ese buka ladana Children be Ana ia henia, bona Baibel stadi be ia dekenai ia hamatamaia. Gabeai lau be stadi lalonai lau vareai.

November 1950 lalonai Iehova ena Witness taudia edia hebouhebou ta ai lao henia, nega ginigunana unai. Unuseniai buka ta ladana “Let God Be True” idia halasia, bena unai buka be emai Baibel stadi lalonai ai gaukaralaia. Nega daudau lasi ai lalo-parara hereva momokani ai davaria vadaeni, bona April 1951 lalonai bapatiso ai abia, emai gwauhamata Iehova dekenai ena toana. Lagani haida murinai Tamagu ese Dirava ia gwauhamata henia, bena ia badinaia ela bona lagani 1982 lalonai ia mase.

Ful-taim Gaukarana Lalonai Lau Moale

January 1954 lalonai, egu mauri laganidia be 22 sibona neganai, lau idia abia dae, Iehova ena Witness taudia edia brens opesi ladana Betele dekenai do lau gaukara. Lau ginidae neganai, lau hoa, badina be lau davaria iena vara dinana be lagani rua sibona amo lauegu ia gunalaia tauna, Richard Mucha, be brens naria tauna. Lagani 1955 lalonai, sekit naria taudia idia tahua neganai, tatau ima idia boiria unai gaukara do idia karaia; idia ta be lau.

Lau idia siaia, Rio Grande do Sul provinsi dekenai do lau gaukara. Lau hamatamaia neganai, Iehova ena Witness taudia edia kongregesen 8 sibona idia noho, to hua 18 lalodiai kongregesen matamatadia rua bona grup maragidia 20 idia haginia. Hari inai negai, unuseniai Iehova ena Witness taudia edia sekit be 15, bona idia ta ta lalodiai be kongregesen 20! Lagani 1956 ena dokonai, lau idia hamaoroa egu sekit idia hapararaia, sekit maragidia hani ai idia halaoa bena sekit naria taudia hani ese do idia naridia. Unai neganai lau idia hagania Betele dekenai do lau giroa lou, gaukara matamatana abia totona.

Lau hoa bona lau moale, badina be lau be distrik naria tauna ta ai idia halaoa, Brazil ena not kahana dekenai sekit haida edia hesiai do lau henia. Unai neganai Brazil dekenai be Iehova ena Witness taudia 12,000 bona unai tano be mai ena distrik rua. Richard Wuttke be saut kahana dekenai ia gaukara, bona lau be not kahana ena distrik lau naria. Betele dekenai idia ese muvini piksa hahedinaraia masini gaukaralaia dalana be ai dekenai idia hadibaia, Iehova ena Witness taudia ese idia karaia piksa ladadia The New World Society in Action bona The Happiness of the New World Society be ia amo do ai hahedinaraia totona.

Unai neganai laolao daladia be idau vaitani. Witness taudia ta lasi be mai ena motuka, unai dainai lau be vanagi, dingi, boromakau ese ia veria gauna, hosi, treila, taraka, bona nega ta peleini amo lau laolao. Amazon ena uda ataiai ai roho hanai bena Santarém dekenai ai diho neganai, unai lau moalelaia bada; unai siti be Belém, Amazon Sinavaina ena uduna dekenai bona Manaus, Amazonas Provinsi ena siti badana edia ihuanai. Unai nega lalonai ai distrik naria taudia be sekit hebouheboudia momo lasi dekenai ai gaukara, unai dainai egu nega ena kahana badana be Society ena muvini piksa hahedinaraia gaukarana dekenai lau haorea. Siti badadia dekenai taunimanima handred momo idia hebou, unai piksa itaia totona.

Brazil ena not kahana dekenai lau laloa bada gauna be Amazon gabuna. April 1957 lalonai, unuseniai lau gaukara noho neganai, Amazon Sinavaina bona ia lalonai idia aru vareai sinavaidia maragidia edia abata ia daekau, ia utu-utu dae. Nega ta uda lalonai lau ese dabua ta be au rua padadiai lau taua dae, bena muvini piksa be ia dekenai lau hahedinaraia. Laulau hahedinaraia gauna ena paua be motabouti ta, unai gabu badinai sinavaina ai ia noho gauna, amo ai abia. Hebou taudia momo ese muvini piksa idia itaia negana ginigunana be unai.

Nega daudau lasi Betele gaukarana dekenai lau giroa lou, bena lagani gabena ai, lagani 1958 ai, hahenamo ta lau davaria: “Dirava Ena Ura” Intenesenel Hebouhebouna, Iehova ena Witness taudia edia, be lau lao henia, New York City ai. Unai dina 8 hebouhebouna ena dina ginigabena ai, hebou taudia 253,922 ese Yankee Stadium bona ia kahirakahira gabuna, Polo Grounds, idia hahonua; idia bogaraginai be tano idauidau 123 amo idia lao taudia.

Egu Mauri Ia Idau Neganai, Unai Lau Moalelaia

Betele lau lou henia murinai, nega daudau lasi Clara Berndt ida ai hedavari, bena March 1959 lalonai ai headava. Ai idia siaia, sekit gaukarana be Bahia provinsi dekenai do ai karaia, bena lagani ta bamona unuseniai ai gaukara. Tadikaka unuseniai idia noho edia lalo-manau, edia heabidae karana, edia lalo-goada, bona edia lalokau be lau bona Clara ese ai laloatao mai emai moale ida; kohu dekenai idia dabu, to Basileia ena huahua dekenai idia taga. Bena Society ese ai idia siaia lao São Paulo Provinsi dekenai. Unuseniai, lagani 1960 lalonai, egu adavana ia rogorogo dainai, ful-taim gaukarana ai rakatania.

Emai lalona ai hadaia Santa Catarina provinsi ena gabu ta do ai lao, egu adavana ia vara gabuna unai. Emai natuna merona, Gerson, be emai natuna imaosi ginigunana. Ia murinai Gilson be lagani 1962 ai ia vara, Talita lagani 1965 ai, Tárcio lagani 1969 ai, bona Janice lagani 1974 ai. Iehova ai tanikiu henia, badina be iena sisiba namona dainai ai ese ‘Lohiabada ena hadibaia hereva idia dekenai hadibaia’ gaukarana aukana lalonai ai kwalimu.​—⁠Efeso 6:4.

Emai natuna ta ta iboudiai ai laloa bada. Salamo torea tauna ese emai lalona edia mamina ia gwauraia goevagoeva: “Kamonai! Iseda natudia be Dirava ena harihari gauna ita dekenai.” (Salamo 127:3) Ena be hekwakwanai idia vara, to emai natudia ai naria, “Dirava ena harihari gauna” ta bamona, bona iena Hereva lalonai ai davaria haheganidia ai laloatao. Davana namodia momo ai davaria. Ai moalelaia dikadika gauna be inai: Emai natuna imaosi be ta ta ena nega ena nega ai, bona ena ura ena ura hegeregerena idia gwau idia ura bapatiso do idia abia, Dirava idia gwauhamata henia karana ena toana unai.​—⁠Hadibaia Tauna 12:1.

Emai Natuna ese Idia Abia Hidi Gaudia

Gerson ese kompiuta kosi ia haorea bena nega daudau lasi ia gwau ia ura Betele dekenai do ia gaukara; unai neganai ai moale bada. Unai amo ful-taim hesiai gaukarana ia abia dae bona ful-taim moni gaukarana ia dadaraia. To matamanai Gerson ese Betele ena mauri dalana ia hekwarahilaia. Hua hani sibona Betele dekenai ia gaukara murinai, ai vadivadi henia neganai, iena lalohisihisi, ai rakatania neganai ena vairana dekenai ia hedinaraia, be lau laloa momo. Emai motuka ena hevarihevari dekenai lau itaia, ai ia raraia ela bona dala ia giroa gabuna ginigunana ai hanaia. Egu matana be ranu amo idia honu dainai, motuka be dala ena isena dekenai lau hastopua, bena unai murinai ai heau lao kilomita 700, ela bona emai ruma dekenai ai ginidae.

Gabeai Gerson ese Betele ia moalelaia momokani. Lagani 6 bamona murinai, Heidi Besser ia adavaia, bena idia ruaosi be ma lagani rua Betele dekenai idia gaukara. Bena Heidi ia rogorogo dainai idia rakatania. Edia natuna kekenina, Cintia, hari iena mauri laganidia be 6, ese ia bamodia, edia Basileia gaukara lalodiai.

Gerson be Betele dekenai ai vadivadi henia nega ginigunana, bena nega daudau lasi Gilson ia gwau ia ura ia danu be unuseniai do ia gaukara. Unai neganai ia be bisinesi naria gaukarana kosi ena lagani ginigunana ia haorea vadaeni, bona ena palani be lagani tamona Betele dekenai do ia gaukara murinai unai kosi orena do ia karaia. To ena palani ia haidaua, bona Betele gaukarana ia karaia noho. Lagani 1988 lalonai painia kekenina ta ladana Vivian Gonçalves ia adavaia. Bena unai nega amo, Betele dekenai idia gaukara hebou ema bona hari.

Emai moale be ia bada noho, badina be emai natuna ihatoina, Talita, be ruma edia palani torea gaukarana kosina ia karaia murinai, lagani 1986 lalonai painia gaukarana lalonai ia vareai. Lagani toi murinai idia boiria Betele do ia lao. Lagani 1991 lalonai ia ese José Cozzi, lagani 10 Betele dekenai ia gaukara vadaeni tauna, ia adavaia. Unuseniai idia gaukara noho ema bona hari.

Lau bona egu adavana ai moale bada lou, Talita murinai ia vara merona ladana Tárcio ese ai be nega toi ai kamonai vadaeni herevana ia gwauraia lou neganai; ia gwau: “Tamagu, lau ura Betele do lau lao.” Iena aplikeisini idia abia dae, bena lagani 1991 lalonai ia danu be Betele dekenai ia gaukara matamaia bona unuseniai ia noho ela bona lagani 1995 ai. Ai moale, badina be ena tauhau negana ena goada be lagani toi lalodiai unai bamona ia gaukaralaia, Iehova ena Basileia gaukarana durua totona.

Emai natuna ginigabena, kekeni ladana Janice, ese ena lalona ia hadaia Iehova ena hesiai do ia lao henia, bena ena mauri laganidia be 13 neganai, bapatiso ia abia. Ia sikuli noho lalonai, lagani ta lalonai heduru painia gaukarana ia karaia. Bena, September 1, 1993 ai, regula painia ai ia lao, emai kongregesen, Gaspar siti dekenai.

Kwalimu Dalana

Famili ta be Iehova tomadiho karana lalonai idia lalo-tamona noho totona, naridia dalana be dahaka? Lau laloa lasi unai be hoa dalana ta. Iena Hereva lalonai Iehova ese Keristani tama sina dekenai be do idia badinaia be namo sisibana ia henia; unai dainai ia ai hanamoa emai gaukara ena anina namona dainai. Iena sisiba herevadia ai badinaia sibona. (Aonega Herevadia 22:6) Emai natuna iboudiai be Italy taudia edia lalona edia toana be lauegu amo idia abia, bona Germany taudia edia be edia sinana ena amo idia abia. To aiemai amo idia abia gauna mai anina bada be lauma ena harihari gauna.

Emai ruma lalonai Basileia gaudia ai tahua guna, to unai be mai ena hekwarahi. Hegeregere, emai famili Baibel stadi be nega korikorina dekenai ai karaia loulou be auka, to ai hesikulaia lasi. Emai natudia edia mauri dinadia ginigunadia amo, Keristani heboudia dekenai ai abidia lao, bona hebouhebou badadia dekenai danu. Gorere eiava unai bamona gauna ta idia vara neganai sibona ai lao lasi. Inai danu, emai natudia idia maragi negana amo Keristani hesiai gaukarana lalonai ai idia bamoa.

Emai natudia ta ta edia mauri laganidia be 10 neganai, Haroro Sikuli lalonai hereva idia henia matamaia. Ai durudia, edia hereva ginigunadia do idia hegaegaelaia totona, bona ai hagoadadia, hereva iboudiai do idia torea lasi, to autlain do idia gaukaralaia. Gabeai idia ta ta be sibodia edia hereva idia hegaegaelaia. Inai danu, idia ta ta edia mauri laganidia be 10 bona 12 padadiai neganai, haroro gaukarana idia karaia matamaia. Unai mauri dalana sibona be idia diba.

Egu adavana, Clara, ese emai natudia naria gaukarana ia goadalaia. Natudia be idia maragi momokani neganai, idia dibaia gaudia idia abia dae haraga​—⁠sponge ta ese ranu ia abia dae bamona. Unai lagani lalodiai Clara ese Baibel ena sivarai ta ia duahia idia dekenai bona idia ta ta ida ia guriguri. Buka ladadia From Paradise Lost to Paradise Regained, Hadibaia Tauna Badana Ita Kamonai Henia, bona Lau Egu Bible Sivarai Bukaa ia gaukaralaia namonamo. Kaset bona vidio, Iehova ena Witness taudia ese idia karaia gaudia, be idia halasia murinai, idia danu ai gaukaralaia.

Ai Keristani taudia ruaosi ese emai natuna ai naridia noho lalonai idia vara gaudia ese idia hamomokania iseda natudia be dina iboudiai ita durua be namo. Namona be ita lalokau henidia, idia ta ta edia namo ita tahua, bona hora momo be idia dekenai ita haorea be namo. Ai laloa ai tama sina emai maduna be unai, bona unai kara amo moale bada ai davaria.

Momokani, Salamo 127:​3-5 ena hereva ena anina be tama sina dekenai ia vara neganai, unai idia moalelaia; ia gwau: “Kamonai! Iseda natudia be Dirava ena harihari gauna ita dekenai. Dirava ese ita dekenai ia henidia, bona idia ese ita idia hanamoa noho. Eregabe tauna ena natuna taudia be, tuari tauna ena imana dekenai peva ena diba bamona. Bema tau ta be mai ena natuna momo, ia be do ia moale.” Momokani, emai ruma taudia ida Iehova ena hesiai ai lao henia mai emai lalo-tamona ida dainai, ai moale!

[Footnotes]

a Iboudiai be Watchtower Bible and Tract Society of New York, Inc. ese ia halasia.

[Picture on page 26]

Antonio Santoleri mai ena ruma bese ida

    Hiri Motu Pablikeisen (1987-2025)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia