Dirava Ena Ura Oi Karaia, A?

EDIA ruma-ta-ruma-ta gaukara lalonai, Iehova ena Witness taudia rua ese Episcopal Dubuna ena pris tauna ta idia davaria. Ia be moale tauna, mai ena adena huina, bona ia atoa T-shirt dekenai ena dubu ena ladana ia noho. Karaharaga ia gwau: “Bema aiemai dubu taudia be umui hegeregerena Hereva idia harorolaia be namo, to lau ura lasi umui giroa mai egu ruma dekenai.”

Oibe, taunimanima momo be Iehova ena Witness taudia edia gaukara dainai idia moale, bona edia gaukara goadagoada karana dainai idia hanamodia. To, Witness taudia edia gaukara ena badina idia laloa lasi, bona idia ura lasi unai gaukara idia karaia. Unai lalohadai rua be gau matamatana lasi. Iesu ese ena nega lalonai ia gwauraia danu, bona lalona veria haheitalai herevana amo ia hahedinaraia.

Ia gwau: “Dahaka umui laloa? Tau ta mai ena natuna rua. Vadaeni ia ese ena vara guna natuna dekenai ia lao, ia gwau, ‘Egu natuna e, hari dina mani oi lao, lauegu vain uma gabu dekenai oi gaukara.’ Ena natuna ia haere, ia gwau, ‘Do lau lao lasi.’ To gabeai ena lalona ia giroa, vadaeni ia lao. Gabeai ia vara tauna danu dekenai ia lao, unai bamona ma ia hamaoroa. Vadaeni mero ia haere, ia gwau, ‘Lohia e, do lau lao.’ To ia lao lasi. Idia ruaosi, daika be edia tamana ena ura ia karaia?”​—Mataio 21:​28-31.

Haere maorona be ia hedinarai goevagoeva. Iesu ena hereva idia kamonai taudia hegeregeredia do ita gwau, “Guna ia vara natuna” ese ena tamana ena ura ia karaia. Unai haheitalai hereva dekena amo, Iesu ese ia hahedinaraia tamana ena ura ita karaia be gau badana. Ena be natuna ginigunana ia gwau ia ura lasi ia lao, to gabeai ia lao bona unai ia karaia dainai idia hanamoa. Gaukara maorona ita karaia be gau badana. Natuna ginigunana ese kara ta ia karaia, ia be ena tamana ena vain umana dekenai ia gaukara; ia be sibona ena vain umana dekenai ia gaukara lasi.

Ita dekenai unai hereva ena anina be dahaka? Hari inai negai, tomadiho taudia dekenai Dirava ena ura be dahaka? Iesu ena mauri dalana amo dahaka ita diba bona edena bamona ita ia durua iena Tamana ena ura ita karaia totona? Unai be mai anina bada henanadaidia, bona haere maorodia ita davaria neganai namo ela bona hanaihanai do ita davaria, badina “Dirava ena ura ia karaia noho tauna be do ia noho ela bona hanaihanai.”​—1 Ioane 2:17; Efeso 5:17.

“Dirava Ena Ura” be Dahaka?

Unai noun ena hereva “ura” be Comprehensive Concordance of the New World Translation of the Holy Scriptures bukana dekenai nega 80 bona ma haida idia torea. Unai nega 80 amo nega 60 (eiava 75 pesen) Dirava ena ura ia gwauraia. Inai hereva “Dirava ena ura,” “egu Tamana ena ura,” bona “Dirava ena ura kara” be nega 20 bona ma haida idia torea. Unai amo ita diba Dirava ena ura ita laloa bada be gau badana. Namona be ita diba iseda mauri lalonai Dirava ena ura ita karaia be gau badana.

English gado ai unai noun ena hereva “ura” ena anina be ‘ura karaia gauna, lalona ia ura abia gauna, lalona ia hadaia, eiava mai ena siahu dagi tauna ese ena lalona dekenai kara ta ia hegaegaelaia.’ Vadaeni, Iehova, be mai ena Dagi Hereadaena, mai ena ura, bona lalona ia hadaia gau ta ia karaia totona. Unai be dahaka? Baibel ese ita ia hadibaia unai ura ena kahana ta be “Dirava ia ura taunimanima ibounai ese mauri do idia davaria, bona hereva momokani do idia diba.” (1 Timoteo 2:4) Iesu Keriso bona idaunegai Keristen taudia be mai edia lalona ibounai danu idia gaukara taunimanima dekenai hereva momokani idia hadibadia totona.​—Mataio 9:35; Kara 5:42; Filipi 2:​19, 22.

Hari inai negai, daidia ese Dirava ena ura idia karaia? Sibodia idia gwauraia idia be Iesu Keriso murinai idia raka taudia edia namba be bilion rua ia hanaia, to Iesu ena haheitalai herevana lalonai, idia hida be natuna ginigunana hegeregerena, idia lao tamana ena ura idia karaia totona? Haere davaria be ia auka lasi. Iesu Keriso ena aena gabuna dekenai idia raka taudia korikoridia be ia gwauraia gaukarana idia karaia. Ia gwau: “Sivarai Namo bese ibounai dekenai be do idia haroro henia guna.” (Mareko 13:10) Tanobada hegegemadai, Iehova ena Witness taudia edia namba be kahirakahira milion hani mai kahana, bona idia ese Dirava ena Basileia ena sivarai namona idia harorolaia, bona idia hahedinaraia Basileia sibona ese taunimanima dekenai maino bona noho namona ia havaraia diba. Oi gaukara goadagoada Dirava ena ura oi karaia totona, a? Iesu hegeregerena Basileia ena sivarai namona oi harorolaia, a?​—Kara 10:42; Heberu 10:7.

Dirava Ena Ura Oi Karaia Bona Moale Oi Davaria

Tamana ena ura ita diba neganai ita moale, to Dirava ena ura taunimanima dekenai ita hadibadia neganai ita moale bada herea. Iesu ese taunimanima dekenai iena Tamana ena kara ia hadibadia neganai ia moale bada. Ia dekenai unai be aniani bamona. (Ioane 4:34) Bema Iesu ena kara ita tohotohoa, ita danu moale momokani do ita davaria, unai ena anina be iena Tamana dekena amo ia abia bona ia hadibaia herevadia ita harorolaia bona ita hadibaia. (Mataio 28:​19, 20) Iesu ia gwauhamata hegeregerena, “bema umui diba bona bema umui karaia, be do umui namo.”​—Ioane 13:17.

Haheitalai ta be inai: Sinana ta be vanegai ful-taim pioneer gaukara ma ia karaia lou, bona ia gwau: “Baibel ena hereva momokani ta ta ese Baibel stadi tauna ena kudouna ia hamarerea neganai, ena vairana dekenai moale toana oi itaia be namo momokani! Lauegu Baibel stadi ta ese stadi vairanai Baibel siri iboudiai ia toredia, bona stadi lalonai hereva ma haida ia toredia hegaegae riviu neganai haere momokani do ia henia diba totona.” Iena Baibel stadi ma ta be lagani 16 ia do abia lasi neganai, hereva momokani ena sivarai ia kamonai. Hari ia headava vadaeni bona ia dekenai hekwakwanai haida idia noho dainai, ia ura dikadika Witness taudia ia davaridia. Pioneer taihuna ia davaria neganai ia moale bada herea. Ia ura Baibel stadi ia danu ia hamatamaia lou.

Mai Moale Danu Dirava Ena Ura Karaia Noho

Idaunegai Israel ena Pavapava David ena mauri ibounai lalonai ia ura Dirava ena ura ia karaia. Ena be hekwakwanai bona tanobada ena metau gaudia ese idia botaia, to lauma helaga ena siahu henunai ia gwau: “Egu Dirava e, oiemu ura karaia karana lau moalelaia, bona oiemu taravatu be lauegu lalona ai ia noho.” (Salamo 40:8) Mai ena lalona bona mai ena goada ibounai ida David ese Dirava ena ura ia karaia. Unai dainai ena moale Iehova ena hesiai gaukara dekenai be ia boio lasi. David dekenai Dirava ena ura karaia be auka lasi, ia moalelaia iena kudouna amo ia karaia dainai. Ena be nega haida ia kara dika bona ia kerere, to ena mauri ibounai lalonai, ia hekwarahi noho iena Dirava, Iehova, ena hesiai gaukara ia karaia namonamo totona.

Nega haida, reana iseda moale do ia maragi. Reana iseda tauanina ia manoka eiava ita lalohisihisi. Reana guna ita karaia kara dikana ita do laloa noho dainai iseda lalona ena mamina be ia dika. Bema Dirava ena Hereva ita stadilaia momo, reana unai mamina dikana do ita kokia diba. David bamona, namona be ita goada karaia iseda ‘lalona dekenai’ Dirava ena taravatu ita torea totona. Bema iseda kudouna bona goada ibounai danu Dirava ena ura ita karaia toho, ia ese ita dekenai davana namona do ia henia badina ia be kara maoromaoro Diravana.​—Efeso 6:6; Heberu 6:​10-12; 1 Petero 4:19.

Gau namona be inai, Heberu 10:​5-7 ai, aposetolo Paulo ese David ena hereva Salamo 40:​6-8 dekenai ia herevalaia bona ia gwau ena anina be Iesu Keriso dekenai. Unai ia karaia neganai, Paulo ese ia hahedinaraia Iesu be ena Tamana kahirakahira dekenai ia noho. Heberu gado ai unai hereva “ura” ena anina be ‘moale, ura karaia gauna, ura abia hidi gauna, eiava moale mamina.’ Vadaeni, Salamo 40:8 ese Keriso ia gwauraia, bona reana inai bamona idia torea diba, ia gwau: “Egu Dirava e, oiemu ura karaia karana lau moalelaia.”a Iesu ia ura iena Tamana ia moalelaia gaudia ia karaia. Iesu ese Dirava ia henia gaukarana ia karaia, to unai sibona lasi. Iena Tamana ena lalona ia ura dikadika gaudia ia karaia, bona mai moale danu ia karaia.

Ena mauri ibounai lalonai, Iesu ese taunimanima dekenai Dirava ena ura be dahaka bona edena bamona Dirava ena hahenamo do idia davaria ia hadibadia. Ia be ful-taim haroro bona hadibaia gaukara karaia tauna, bona unai gaukara amo moale bada ia davaria. Vadaeni, ia hegeregerena, Iehova ena gaukara ita habadaia neganai, iseda moale do ita habadaia danu. Emu moale do ia bada totona, ful-taim haroro gaukara oi karaia diba, a?

Mai moale danu Dirava ena ura ita karaia noho totona, namona be dina vaira dekenai do idia vara gaudia ita lalodia noho. Iesu ese unai ia karaia. “Guba ena moale be ia vairanai ia noho dainai ia ese satauro ena hemarai bona ena mase ia laloa lasi.” Ia moale badina mai ena abidadama danu Dirava ena ura ia karaia ela bona ia mase, bona murinai ena Tamana ena idiba kahana dekenai pavapava dagina ena davana namona ia abia.​—Heberu 12:2.

Inai oi laloa, bema Dirava ena ura ita karaia noho, gabeai moale bada herea do ita davaria. Dirava ena ura karaia taudia idia hisihisi henidia taudia be sibodia edia ura idia tahua, bona edia mase do ita itaia. (2 Tesalonika 1:​7, 8) Iseda lalokau taudia be mase amo do idia toreisi lou, bona dala ia kehoa idia be Dirava ena ura idia diba bona idia karaia totona ita itaia be moale bada gauna. Mani oi laloa, Dirava ese tanobada be Paradaiso ai do ia halaoa. Bona dokona gauna be inai, Iehova ena ura ia dadaraia tauna, Satana, do ia ore neganai, ruhaia mauri namona do ita abia.

Oibe, hari inai negai, Dirava ena ura ita karaia neganai moale bada ita davaria, bona gabeai moale ela bona hanaihanai do ita davaria. Ena be haroro gaukara dekenai taunimanima idia kamonai eiava lasi, to namona be Iesu ena kara ita tohotohoa ia ese mai moale danu ena Tamana ena ura ia karaia.

[Footnotes]