Henia Karana Oi Moalelaia!
“Henia kara ena moale be bada, abia kara ena moale be maragi.”—KARA 20:35.
1. Iehova be edena dala ai henia karana ena moale ia hahedinaraia?
HEREVA momokani ita diba ena moale bona unai amo idia vara hahenamodia be Dirava amo idia mai davana bada harihari gaudia. Iehova idia diba taudia be mai edia badina momo idia moale totona. Harihari gauna ita abia neganai ita moale, to ita henia neganai danu, moale ita davaria. Iehova be “gau namodia ibounai, bona harihari gaudia namodia momokani ibounai” ia Henia Tauna, bona ia be “moale Diravana.” (Iamesi 1:17; 1 Timoteo 1:11) Idia kamonai taudia ibounai dekenai ena hahediba hereva namodia ia henia, bona ia hadibaia taudia edia kamonai henia karana ia moalelaia, natudia ese tama sina edia lalokau hadibaia herevadia idia kamonai henia neganai, idia moale hegeregerena.—Aonega Herevadia 27:11.
2. (a) Iesu be dahaka ia gwau, henia karana dekenai? (b) Haida dekenai Baibel ena hereva momokani ita hadibaia neganai, edena bamona moale ita davaria?
2 Unai hegeregerena, Iesu be tanobada ai ia noho neganai, taunimanima ese iena hadibaia herevadia idia abia dae neganai ia moale. Aposetolo Paulo ese Iesu ena hereva ia torea hanai, ia gwau: “Henia kara ena moale be bada, abia kara ena moale be maragi.” (Kara 20:35) Ma haida dekenai Baibel ena hereva momokani ita hadibaia neganai ita moale, to unai moale be ta ese ita abia dae tomadiho herevadia ia abia dae dainai ia vara lasi. Iseda moale ese unai ia hanaia momokani, ita moale ena badina be ita diba ita henia gauna be mai ena namo korikorina bona do ia noho hanaihanai. Lauma dalanai harihari gauna ta ita henia neganai, taunimanima ita durua namo idia davaria hari inai negai bona ela bona hanaihanai.—1 Timoteo 4:8.
Henia Karana ese Moale Ia Mailaia
3. (a) Aposetolo Paulo bona Ioane be lauma dalanai ma haida durua dainai idia abia moale be edena bamona idia gwauraia hedinarai? (b) Dahaka dainai Baibel ena hereva momokani iseda natudia dekenai ita hadibaia be lalokau karana?
3 Oibe, Iehova bona Iesu be lauma dalanai harihari gaudia idia henia neganai idia moale, Keristani taudia danu be unai bamona. Aposetolo Paulo be ma haida ia durua Dirava ena Hereva ena hereva momokani idia dibaia neganai, moale ia davaria. Tesalonika kongregesen ia tore henia, ia gwau: “Iseda Lohiabada Iesu do ia giroa mai neganai, . . . Ai moalelaia gauna bona ai heagilaia gauna be dahaka? Umui sibona, ani? Oibe, umui dainai moale momokani bona kwalimu namona ai abia vadaeni.” (1 Tesalonika 2:19, 20) Unai hegeregerena, aposetolo Ioane ese ena natudia lauma dalanai ia herevalaia neganai, ia gwau: “Bema lau kamonai, egu natuna Keristani taudia ese Dirava ena hereva momokani ena dala dekenai idia raka noho, vadaeni lau moale bada herea. Moale ta ese unai moale ia hereaia diba lasi.” (3 Ioane 4) Mani oi laloa, bema iseda natudia ita durua bena lauma dalanai danu idia be iseda natudia ai idia lao, unai be moale bada gauna, ani! Tama sina be edia natudia dekenai ‘Lohiabada ena hadibaia herevadia idia hadibaia,’ unai ese edia lalokau karana ia hahedinaraia. (Efeso 6:4) Unai amo tama sina idia hahedinaraia edia matamata taudia edia namo hanaihanai idia laloa bada. Natudia ese unai dala idia abia dae neganai, tama sina idia moale bada.
4. Edena ekspiriens ese lauma dalanai henia karana ena moale ia hahedinaraia?
4 Dell be ful-taim painia gaukarana ia karaia sinana ta mai ena natudia ima. Ia gwau: “Aposetolo Ioane ena hereva lau lalo-pararalaia goevagoeva diba, badina egu natudia hani be ‘hereva momokani ena dala dekenai idia raka noho’ dainai lau moale. Lau diba bema ruma bese taudia be tomadiho momokani dekenai idia lalo-tamona, unai ese Iehova ena ladana ia hanamoa bona hahairaia, unai dainai lau moale bada badina lau itaia egu natudia dekenai hereva momokani lau hadibaia toho neganai ia ese unai ia hanamoa. Egu ruma bese taudia ida Paradaiso lalonai do ai noho ela bona hanaihanai ena helaro namona ese egu moale ia habadaia bona ena be metau bona hekwakwanai idauidau idia vara, to lau ia hagoadaia unai gaudia lau haheaukalaia totona.” To madi, Dell ena natuna kekeni ta be kongregesen amo idia atoa siri badina Keristani lasi dalana ia badinaia. To, Dell ia gaukara goada, lalohadai namona ia dogoatao noho totona. Ia gwau: “Egu ura gauna be dina ta egu natuna kekeni be mai manau bona lalo-momokani ida Iehova dekenai do ia giroa lou. To Dirava lau tanikiu henia badina egu natudia kahirakahira ibounai be mai abidadama ida Iehova idia hesiai henia noho. Lau mamia moalena ese lau ia hagoadaia bada.”—Nehemia 8:10.
Noho Hanaihanai Turadia Karaia
5. Hahediba taudia halaoa gaukarana dekenai sibona ita henia neganai, dahaka ita diba dainai ita moale?
5 Iesu ese ia murinai idia raka taudia ia hagania Keristani hahediba taudia do idia karaia bona idia dekenai Iehova bona ena taravatu do idia hadibaia. (Mataio 28:19, 20) Iehova bona Iesu be sibodia edia ura idia tahua lasi, to taunimanima idia durua hereva momokani ena dala idia dibaia totona. Unai dainai hahediba taudia halaoa gaukarana dekenai sibona ita henia neganai, ita moale badina ita diba Iehova bona Iesu edia haheitalai ita tohotohoa noho, Keristani ginigunadia ese idia karaia bamona. (1 Korinto 11:1) Unai dala ai Siahu Ibounai Diravana bona ena Natuna lalokauna ida ita gaukara hebou neganai, iseda mauri be mai anina korikorina. Ita be Dirava ena ‘gaukara hebou’ taudia huanai ita noho be hahenamo badana! (1 Korinto 3:9) Bona sivarai namona harorolaia gaukarana dekenai aneru danu idia gaukara be moale gauna, ani?—Apokalupo14:6, 7.
6. Lauma dalanai harihari gaudia henia gaukarana ita durua neganai, daidia be iseda turadia ai idia lao?
6 Momokani, lauma dalanai harihari gaudia henia gaukarana ita durua neganai, Dirava ida gaukara hebou taudia ai ita lao sibona lasi—to ia ida noho hanaihanai hetura karana lalonai ita vareai. Aberahamo ena abidadama dainai, ia be Dirava ena turana ai ia lao. (Iamesi 2:23) Dirava ena ura karaia totona ita hekwarahi lalonai, ita danu be iena turadia ai ita lao diba. Bema unai bamona ita karaia, Iesu ena turadia ai do ita lao danu. Iena hahediba taudia dekenai ia gwau: “Umui be lauegu turana do lau gwauraia, badina be lauegu Tamana dekena amo lau kamonai herevadia ibounai umui dekenai lau hamaoroa vadaeni.” (Ioane 15:15) Taunimanima momo idia moale siahu eiava dagi bada taudia edia turadia idia gwauraia neganai, to guba bona tanobada taudia ibounai idia hereaia taudia ruaosi ese ita be edia turadia idia gwauraia!
7. (a) Edena dala ai hahine ta be turana korikorina ia abia? (b) Oi dekenai unai bamona ia vara danu, a?
7 Danu, bema taunimanima ita durua Dirava idia dibaia totona, idia danu be iseda turadia ai idia lao, bona unai ese ita dekenai moale ia mailaia. Joan be United States dekenai ia noho bona ia be hahine ladana Thelma ida Baibel ia stadilaia matamaia. Ena be Thelma ena ruma bese ese ena stadi karana idia koua toho, to ia haheauka bona lagani ta murinai bapatiso ia abia. Joan ia gwau: “Emai hebamo karana be unuseniai ia doko lasi; to, ia be hetura karana ai ia lao bona unai tura karana be hari lagani 35 bamona ai moalelaia. Nega momo haroro gaukara bona hebouhebou badadia dekenai ai lao hebou. Gabeai, noho gabuna matamatana dekenai lau lao, ena daudau be kilomita 800. To, Thelma ese lau dekenai lalokau bada idia hahedinaraia bona lalona idia hamoalea revarevadia ia do siaia noho, lau ia hamaoroa mai lalokau ida lau ia laloa noho, bona lau be iena turana bona ena haheitalai bona ia dekenai Baibel ena hereva momokani lau hadibaia dainai, lau ia tanikiu henia. Iehova ia dibaia totona lau hekwarahi dainai turana namona lau abia be hahenamo badana.”
8. Haroro gaukara lalonai edena lalohadai namona ese ita do ia durua?
8 Ita diba hereva momokani ia ura dibaia tauna ta do ita davaria diba ese ita ia durua ita haheauka totona, ena be ita davaria taudia momo be Iehova ena Hereva idia kamonai sisina sibona, eiava idia kamonai lasi. Unai bamona laloa lasi karana ese iseda abidadama bona haheauka ia tohoa diba. To, lalohadai namona ese ita do ia durua. Guatemala amo ia mai tauna, Fausto, ia gwau: “Taunimanima ma haida lau haroro henidia neganai, lau laloa do ia namo herea bema lau hereva henia noho tauna be lauma tadikaka o taihu ta ai do ia lao, unai be namo herea momokani. Lau laloa, lau davaria taudia ibounai amo ta be gabeai Dirava ena Hereva ena hereva momokani do ia abia dae. Unai lalohadai dainai lau haroro noho bona unai ese moale korikorina ia mailaia.”
Kohu Haboua Guba Dekenai
9. Guba ai kohu haboua karana dekenai Iesu be dahaka ia gwau, bona unai amo dahaka ita dibaia diba?
9 Iseda natudia eiava taunimanima ma haida be hahediba taudia ai ita halaoa gaukarana be nega momo mai ena hekwarahi. Unai oi karaia totona nega oi atoa, oi haheauka, bona oi hesiku lasi be namo. To, namona be oi laloaboio lasi, taunimanima momo be idia ura idia gaukara goada kohu momo idia haboua totona, bona nega momo unai gaudia ese moale idia mailaia lasi bona idia noho daudau lasi. Iesu be ena kamonai taudia ia hamaoroa lauma gaudia totona idia gaukara be namo. Ia gwau: “Inai tanobada dekenai kohu do umui haboua lasi, iniseni be manumanu ese dabua idia ania ore, bona raraka ese auri ia hadikaia, iniseni danu henaoa taudia ese ruma idia makohia bona gau idia henaoa. To umui emui kohu be guba dekenai do umui haboua, unuseni be manumanu bona raraka ese gau idia hadikaia lasi, unuseni danu henaoa taudia ese ruma idia makohia diba lasi, bona gau idia henaoa diba lasi.” (Mataio 6:19, 20) Lauma gaudia—idia ta be mai anina bada hahediba taudia halaoa gaukarana—ita tahua neganai, ita moale badina ita diba Dirava ena ura ita karaia noho bona ita dekenai davana namona do ia henia. Aposetolo Paulo ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi.”—Heberu 6:10.
10. (a) Dahaka dainai Iesu be mai ena lauma kohudia? (b) Edena dala ai Iesu ese sibona ia henia bona unai ese ma haida dekenai dahaka namo ia mailaia?
10 Bema ita gaukara goadagoada hahediba taudia karaia totona, iseda ‘kohu be guba’ dekenai do ita haboua, Iesu ena hereva hegeregerena. Abia karana amo ia mai moalena do ita mamia. Bema sibona laloa lasi dalanai henia karana ita karaia, gau momo do ita abia danu. Iesu be lagani bilioni momo lalonai Iehova ia hesiai henia mai ena kamonai ida. Guba dekenai ia haboua kohu mani oi laloa! To, Iesu ese sibona ena ura ia tahua lasi. Aposetolo Paulo ia gwau: “[Keriso ese] sibona ena mauri ia atoa diho iseda kara dika davana karaia totona. Keriso be inai bamona ia karaia, inai hari tanobada ena dika dekena amo ita do ia hamauria totona.” (Galatia 1:4) Iesu ese sibona ena ura tahua lasi dalanai haroro gaukara ia karaia totona ia hekwarahi sibona lasi, to ena mauri ia henia taunimanima edia mauri davana karaia totona, unai amo ma haida be mai edia dala guba dekenai kohu idia haboua totona.
11. Dahaka dainai lauma dalanai oi henia harihari gaudia ese tauanina dalanai oi henia harihari gaudia edia namo idia hanaia?
11 Taunimanima dekenai Dirava ita herevalaia neganai, ita durudia bena idia itaia edena bamona idia danu be ia ore diba lasi lauma kohuna idia haboua diba. Oi henia harihari gauna ta ese unai ia hereaia diba lasi, ani? Bema emu turana dekenai, dava bada dina gauna, motuka, eiava ruma oi henia, unai turana ese emu harihari gauna do ia laloa bada bona do ia moale, bona henia karana do oi moalelaia. To lagani 20, 200, eiava 2,000 murinai, unai harihari gauna ena toana be edena bamona? To, bema sibona oi henia bona ta oi durua Iehova ia hesiai henia totona, unai tau eiava hahine be unai harihari gauna amo namo do ia abia diba ela bona hanaihanai.
Hereva Momokani Idia Ura Taudia Tahua
12. Edena dala ai momo ese sibodia idia henia lauma dalanai haida idia durua totona?
12 Lauma dalanai harihari gaudia henia karana idia moalelaia totona, Iehova ena taunimanima be tanobada ena kahana ibounai dekenai idia lao vadaeni. Taunimanima tausen momo be edia tano bona ruma bese idia rakatania vadaeni, misinari gaukara karaia totona bona idia lao tanodia dekenai gado bona mauri dalana matamata idia manadalaia. Ma haida be edia tano dekenai, Basileia harorolaia taudia be lasi gabudia dekenai idia lao. Ma haida be gado matamata idia dibaia, unai ese dala ia kehoa, edia gabu dekenai idia noho tano idau taudia idia haroro henia totona. Hegeregere, New Jersey ai, U.S.A. dekenai, tau ta mai ena adavana ese hari Iehova ena Witnes taudia edia hedikwota dekenai idia gaukara memero rua idia naria, bona murinai painia gaukara idia matamaia bona Chinese gado idia dibaia. Lagani toi lalonai, Chinese gado idia hereva diba taudia 74 ida Baibel stadi idia karaia, unai taudia be edia ruma kahirakahira ai ia noho koledi dekenai idia lao taudia. Oi ese dala ta ai emu haroro gaukara oi habadaia diba, bona unai amo hahediba taudia halaoa gaukarana ena moale oi habadaia diba, a?
13. Dahaka oi karaia diba bema oi ura emu haroro gaukara ese anina bada ia havaraia?
13 Reana oi ura bada Baibel stadi ta oi hamatamaia to oi do karaia diba lasi. Tano haida dekenai kamonai taudia davaria be auka. Reana oi davaria taudia be idia ura lasi Baibel ena hereva idia kamonai. Bema unai bamona ia vara, reana emu ura be nega momo guriguri lalonai oi gwauraia diba, badina oi diba Iehova bona Iesu be unai gaukara idia laloa bada bona mamoe bamona tauna dekenai oi idia hakaua lao diba. Emu kongregesen lalonai haroro gaukara idia manadalaia taudia eiava haroro gaukara dekenai anina idia havaraia taudia edia heduru do oi noia. Keristani heboudia dekenai idia henia hadibaia herevadia bona heduru herevadia oi gaukaralaia namonamo. Loaloa naria taudia bona edia adavadia idia henia sisiba amo namo do oi abia. To gau badana be, oi hesiku lasi. Aonega tauna ia gwau: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.” (Hadibaia Tauna 11:6) Unai oi karaia lalonai, Noa bona Ieremia bamona abidadama taudia oi laloa. Ena be haida sibona ese edia haroro herevana idia abia dae, to edia haroro gaukara ese anina ia havaraia. To unai ia hereaia gauna be inai, ia ese Iehova ia hamoalea.
Oi Karaia Diba Gauna Oi Karaia
14. Iehova ese ena hesiai gaukara lalonai idia noho bona idia buruka taudia be edena bamona ia laloa?
14 Emu noho dalana dainai, reana emu ura hegeregerena haroro gaukara oi karaia badabada diba lasi. Hegeregere, reana buruka dainai emu hesiai gaukara Iehova dekenai be mai ena hetoana. To, aonega tauna ia torea herevana oi laloatao, ia gwau: “Kara maoromaoro taudia edia mauri dinadia, be do idia momo, bona buruka taudia edia huina kurokuro, be matauraia gauna.” (Aonega Herevadia 16:31) Iehova ena hesiai gaukara lalonai idia noho bona idia buruka taudia edia mauri be mai ena hairai ia dekenai. Danu, Baibel ia gwau: “Lau be emui Dirava, bona lau ese umui do lau naria noho, ela bona umui be buruka, bona emui huina idia kurokuro. Lau ese umui lau karaia, bona umui do lau naria. Lau ese umui do lau durua, bona umui do lau hamauria.” (Isaia 46:4) Iseda lalokau guba Tamana ia gwauhamata, ia idia badinaia taudia do ia hagoadaia bona durua.
15. Oi abia dae Iehova ese oiemu noho dalana ia diba, a? Dahaka dainai?
15 Reana oi ese gorere ta, o abidadama lasi adavana ena dagedage karana, o ruma bese maduna metaudia, eiava hekwakwanai aukadia ma haida oi haheaukalaia noho. Iehova be ita karaia diba lasi gaudia bona eda noho dalana ia diba, bona mai momokani ida ia ita hesiai henia totona ita hekwarahi dainai, ita ia lalokau henia. Unai be momokani, ena be ma haida edia gaukara ena bada ese eda gaukara ena bada ia hanaia. (Galatia 6:4) Iehova ia diba ita be goevadae lasi taudia, bona ita henia diba gaudia ia diba. (Salamo 147:11) Bema ita karaia diba gaudia ita karaia, ita diba Iehova ena matana ai ita be mai anina bada bona iseda abidadama karadia do ia laloaboio lasi.—Luka 21:1-4.
16. Edena dala ai kongregesen taudia ibounai ese ta idia durua, hahediba tauna ai ia lao totona?
16 Namona be oi laloatao, hahediba taudia halaoa gaukarana dekenai, ma haida ida ita gaukara hebou. Tau ta sibona ese ma ta be hahediba tauna ai ia halaoa diba lasi, medu ena hetuturu tamona sibona ese tubutubu gauna ia hanamoa diba lasi hegeregerena. Momokani, Witnes ta ese kamonai tauna ta ia davaria bona ia ida Baibel stadi ia karaia diba. To unai tauna be Kingdom Hall dekenai ia mai neganai, kongregesen taudia ibounai ese unai tau eiava hahine idia durua hereva momokani ia diba totona. Tadikaka oreana edia lalokau ese Dirava ena lauma helaga ena siahu ia hahedinaraia. (1 Korinto 14:24, 25) Natudia maragidia bona badadia be lalona hagoadaia haeredia idia henia, unai tauna dekenai idia hahedinaraia iseda matamata taudia be tanobada memero kekeni amo idia idau. Kongregesen lalonai idia noho gorere taudia, tauanina dalanai idia manoka taudia, bona buruka taudia amo unai matamata taudia ese haheauka karana ena anina idia dibaia diba. Herevana iseda mauri lagani eiava ita karaia diba gaudia be dahaka, to matamata taudia edia ura Baibel ena hereva momokani dekenai idia habadaia, bona lauma dalanai idia goada idia lao ela bona bapatiso idia abia neganai, idia ita durua gaukarana lalonai ita ibounai be mai anina bada. Haroro gaukara dekenai ita negea hora ibounai, ita karaia lou henia ta ta, kamonai taudia ida Kingdom Hall dekenai ita kikilaia hereva ibounai, edia toana be idia be anina bada lasi, to idia be Iehova ese ia hagugurua noho gaukara badana ena kahana ta ta.
17, 18. (a) Hahediba taudia halaoa gaukarana amo sibona lasi, to edena dala ma haida amo henia karana ita moalelaia diba? (b) Henia karana ita moalelaia neganai, daidia ita tohotohoa?
17 Momokani, ita Keristani taudia ese anina bada hahediba taudia halaoa gaukarana sibona ita karaia lasi, to dala ma haida ai henia karana ita moalelaia danu. Moni ita henia diba tomadiho goeva durua totona bona idia dabu taudia durua totona. (Luka 16:9; 1 Korinto 16:1, 2) Dala ita tahua diba, ma haida dekenai heabidae karana ita hahedinaraia totona. (Roma 12:13) Ita hekwarahi “taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Galatia 6:10) Bona auka lasi to mai anina bada daladia ai, hegeregere revareva, telefon amo ita hereva henidia, harihari gauna, heduru, eiava hagoadaia herevana, amo henia karana ita hahedinaraia diba.
18 Henia karana amo ita hahedinaraia iseda guba Tamana ita tohotohoa. Danu, iseda tadikaka lalokau henia karana ita hahedinaraia, unai be Keristani taudia momokanidia edia toana korikorina. (Ioane 13:35) Unai gaudia laloatao karana ese ita ia durua diba, henia karana ita moalelaia totona.
Anina Oi Gwauraia Diba, A?
• Iehova bona Iesu be lauma dalanai harihari gaudia henia karana dekenai, edena bamona haheitalai namona idia hahedinaraia?
• Edena dala ai noho hanaihanai turadia ita abia diba?
• Dahaka dala idauidau ita badinaia diba, iseda haroro gaukara dekenai anina bada ita havaraia totona?
• Edena bamona kongregesen taudia ibounai be henia karana idia moalelaia diba?
[Pictures on page 13]
Natudia ese hadibaia karana idia abia dae neganai, tama sina idia moale bada
[Picture on page 15]
Hahediba taudia halaoa gaukarana dekenai, turadia korikoridia ita abia diba
[Picture on page 16]
Ita buruka neganai Iehova ese ita ia durua
[Pictures on page 17]
Auka lasi to mai anina bada daladia amo henia karana dekenai moale ita davaria