Basileia Haroro Ripoti

“Dirava ese Taunimanima Edia Toana Ia Laloa Lasi”

LAGANI 1,900 gunanai, lauma helaga ena siahu henunai, aposetolo Petero ia gwau: “Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.” (Kara 10:​34, 35) Iehova ena Witness oreana lalonai bese idauidau taudia idia noho bona guna edia tomadiho be idauidau. Idia ese kara maoromaoro idia ura henia, bona Dirava garina idia gari. Iehova ese idia ibounai be tanobada matamata oreana lalonai ia abidia dae, hegeregere, hahine ta Chad dekenai ia abia dae bamona.

Unai hahine be ena tomadiho orea ia moalelaia lasi. Lagani haida gunanai, Iehova ena Witness taudia ese idia halasia bukana, Memero Kekeni​—Moale Umui Davaria Dalana ia abia, bona unai buka ena sisiba namona dainai ia moale. Ia dekenai Baibel stadi idia hamatamaia, bona hanaihanai ia noho stadi totona. Idia hagoadaia Kingdom Hall dekenai do ia mai totona, to ia mai lasi. Dahaka dainai? Ena be stadi totona iena tau ese ia koua lasi, to gwaumaoro ia henia lasi Kingdom Hall dekenai do ia lao hebou totona.

Unai hahine ia ura sekit hebouhebou dekenai do ia lao, unai dainai Witness hahine be unai hahine ena tau dekenai program pepana ia henia, bona do idia kamonai henia sisiba namodia ia dekenai ia hahedinaraia. Tau ese gwaumaoro ia henia ena hahine be “nega tamona sibona” do ia lao totona. Vadaeni, hahine ia lao bona hebouhebou ena hereva ia moalelaia bada. Ia kamonai gaudia be ena tau dekenai ia hamaoroa, bona murinai ena tau ese ia koua lasi dainai, hebou ma haida dekenai ia lao diba. Kongregesen lalonai bese idauidau taudia idia noho bona idia lalokau heheni karana ia itaia neganai, ia laloa unai be namo herea. Gabeai, distrik hebouhebou dekenai ia lao bona idau bese Witness taudia ese ena natudia idia rosidia. Witness taudia ida idia aniani hebou bona idia lalokau heheni ruma bese tamona bamona ia itaia neganai, ia moale momokani. Unai neganai ena lalona ia hadaia momokani.

To dagedage ia vara. Ena be ia be manau momokani hahinena, to hebou dekenai haere ia henia bona gari lasi dekenai ena varavara bona dekena taudia edia koua herevadia ia hanaidia. Ena be lagani momo lalodiai ena tau danu ia noho, to dala maorona dekenai idia headava lasi. Hari ia ura dala maorona dekenai idia headava, to edena bamona ena tau do ia hamaoroa diba? Ena lalona ibounai danu Iehova dekenai ia guriguri murinai, ena tau ia hereva henia, bona ena tau ia gwau unai hereva do ia laloa. Gabeai, tau ese gwaumaoro ia henia, bona dala maorona dekenai idia headava.

Ena nakimi be idia danu ia noho bona ia ese hekwakwanai momo ia havaraia, to tau ese ena hahine ena ura ia abia dae. Gabeai, tau ena tamana ia mai vadivadi. Hahine ese ena tomadiho orea ia haidaua dainai, tamana ese ena natuna ia oda henia ena hahine do ia rakatania totona. Tamana ese ena natuna ia hamaoroa “adavana namona ta” do ia abia totona, headava davana do ia karaia. Natuna ia haere, ia gwau: “Lasi, unai bamona do lau karaia lasi. Egu hahine be namo. Bema ia ura lau ia rakatania, vadaeni ia sibona ena ura, to ia do lau lulua lasi.” Hahine ese ena ravana dekenai hemataurai karana ia hahedinaraia, bona ena kara dainai ena ravana ia hemarai. To, ena ravana be hanua dekenai ia giroa lao neganai, ena natuna dekenai revareva ta ia torea, hereva aukana ia gwauraia. Ia gwau bema ena natuna ia ura lasi ena hahine ia lulua, ia be iena natuna bamona lasi. To unai tau ese ena hahine ena ura ia abia dae. Tau ese unai bamona ia karaia dainai hahine be ia moale bada.

Harihari, edia mero maragi rua be mai moale danu edia sinana idia bamoa Kingdom Hall dekenai idia lao totona. Danu, unai memero idia itaia hereva idia henia taudia iboudiai be necktie idia karaia, unai dainai, edia tamana idia noia edia necktie do ia abia totona. Harihari, unai hahine be bapatiso vadaeni taihuna ta.

Chad dekenai ia be mai edia moale Witness taudia 345 ida Iehova ena Basileia ena sivarai namona ia harorolaia, bona ia diba momokani “Dirava ese taunimanima edia toana ia laloa lasi.”