Basileia Haroro Ripoti
“Aonega Ia Davaria Tauna be Ia Moale”
KOREA ai taunimanima 71,000 mai kahana ese unai hereva idia hamomokania; idia be Iehova ena Witness taudia. (Hereva Lada-isidia 3:13) Idia 100 100 amo 42 42 ese ful-taim haroro gaukarana idia karaia! Inai sivarai ese ia hahedinaraia aonega korikori idia tahua taudia be idia moale.
Pusan ai hahine ta be lagani 16 lalodiai Kerisendom ena dubu ta ia lao loulou. Baibel ena hereva utua karadia momo ia itadia dainai, ia laloa reana Dirava be lasi. To, Dirava ia mauri noho herevana be ia gorea diba lasi, unai dainai Dirava ia guriguri henia mai ena momokani ida, ia gwau, bema tomadiho momokani ia noho ia ura do ia davaria. Unai neganai Iehova ena Witness taudia ia lalodia, badina be ia laloatao ena tomadiho oreana ese Witness taudia ia dadaraidia, Toi Tamona Diravana herevana, hel lahina herevana, bona Kerisendom ena hahediba herevadia ma haida idia abidia dae lasi dainai. Reana idia be tomadiho oreana momokanina a? Ena dekena hahine ena heduru amo Kingdom Hall ia davaria. Kerukeru hebou ia lao henia.
Hebou ena heau dalana ia hoalaia. Idia boiboi badabada lasi bona ane idia abia lalo-dika lasi, iena dubu ai idia karaia bamona. Witness hahinena ta ia hedavari henia, ena lalona be hegeregere Baibel amo do ia stadi henia. Edia stadi ginigunana ai idia stadi ela bona hora haida idia ore, badina be ia be mai ena henanadai momo. Stadi iharuana ai, ia gwau iena tomadiho oreana do ia rakatania bona Witness hahinena ta ai do ia lao. Ia ese taihu ia noia, do ia mai lasi stadi henia totona badina be hebou do ia lao henidia. To, taihu ese Baibel stadi abia danu karana ena namo ia gwauraia hedinarai ia dekenai. Taihu ena hereva ia abia dae, stadi karana ia goadalaia, bena gabeai bapatiso ia abia.
Hari ia moale bada, badina be Dirava momokanina, Iehova, ena aonega ia davaria vadaeni, bona ena helaro be Dirava ena tanobada matamatana ai do ia noho hanaihanai.
Jeneral Gunana ta ese Hereva Momokani Ia Dibaia
Lagani 1962 ai ami jeneral ta ena adavana ia bapatiso. Matamanai ena tau ese ia koua toho, to gabeai unai kara ia hadokoa, bena lagani 28 lalodiai tadikaka idauidau ese nega idauidau ai idia stadi henia, ena lalona idia veria toho, hereva momokani do ia abia dae totona. Nega ta ta hebou idauidau ia lao henidia, to hereva momokani ia laloa bada lasi. Lagani 1990 ai ia mai ena adavana ida idia lao Japan; unuseniai distrik hebouhebouna ta idia lao henia. Unai neganai hereva ia hakala henidia namonamo—guna unai bamona ia karaia lasi. Tomadiho koikoi edia kerere idia hahedinaraia goevagoeva herevadia ia hoalaidia, to unai hereva dainai Kerisendom ena koikoi ia lalo-pararalaia. Dirava ena orea taudia Japan ai edia kara namo bona edia moale ia hoalaia, Korea ai ia itaia vadaeni karadia unai. Korea ia lou henia neganai, Baibel ia stadilaia matamaia mai ena momokani ida, bena gabeai idia bapatisoa.
Bapatiso ia abia murinai, dahaka ia karaia? Ia be hotel badana ena presiden dagina amo ia risain, bena ena adavana ida pioneer gaukarana idia karaia hebou. Ia laloa regular pioneer gaukarana ia karaia be namo, badina be lagani 28 lalodiai iena nega ia haorea kava vadaeni.
Hari ia diba inai hereva, “aonega ia davaria tauna be ia moale” be mai anina ia enai!