Oi Laloa Iehova ese Ena Palani Do Ia Hagugurua
“Kara maoromaoro taudia ese tanobada do idia abia, do idia noholaia hanaihanai.”—SALAMO 37:29.
1. Iehova ena palani taunimanima bona tanobada totona be dahaka?
IEHOVA ese iseda tubudia roboadia, Adam bona Eva, ia karadia neganai, idia goevadae. Bema ena taravatu idia badinadia, tanobada ai do idia mauri diba ela bona hanaihanai. (Genese 1:26, 27; 2:17) Paradaiso lalonai ia hanohodia. (Genese 2:8, 9) Ia hereva henidia, ia gwau: “Emui bese umui havaraia, do umui hutuma. Tanobada ena gabu ibounai dekenai umui noho, bona umui biagua.” (Genese 1:28) Anina be, gabeamo edia bese, moale taudia goevadaedia, ese tanobada ibounai do idia noholaia bona paradaiso ai do idia halaoa. Taunimanima edia noho ena matamana be namo herea! “Dirava ese ia karaia vadaeni gaudia ibounai ia itaia bona momokani idia be namo herea.”—Genese 1:31.
2. Taunimanima edia noho dalana dainai dahaka henanadai idia vara?
2 To, lagani tausen tausen lalodiai taunimanima edia noho dalana be Dirava ena palani hegeregerena lasi. Idia goevadae lasi bona idia moale lasi. Tanobada ai idia vara gaudia ese lalohisihisi bada idia havaraia, bona idia peroveta hegeregerena, hari inai negai idia dika momokani. (2 Timoteo 3:1-5, 13) Vadaeni, edena bamona ita diba Dirava ena palani taunimanima totona ena anina be kahirakahira do ia vara? Lalohisihisi havaraia gaudia be nega daudau do idia noho, eiava?
Dahaka ese Ia Hadikaia?
3 Dirava ena Buka Helaga idia diba maoromaoro taudia idia diba dahaka dainai Dirava ese unai dika tanobada ai ia koua lasi, bona idia diba dahaka do ia karaia hadokoa totona. Baibel ese ia hadibadia, Dirava ese eda tubudia roboadia ia henidia ura-kwalimuna be idia gaukaralaia kerere. (1 Petero 2:16 itaia.) Iena lohia siahuna idia dadaraia. (Genese, karoa 2 bona 3) Edia gwau-edeede ese henanadai badadia ia havaradia; gaudia be inai: Dirava ese taunimanima ia lohiadia be maoro a? Ena lohia dalana ese ia hanamodia bada a? Bema ia naridia lasi neganai, sibodia edia gavamani do idia kwalimulaia a? Inai henanadai edia haere davaridia dalana be, do ia kahudia nege, nega daudau lalonai sibodia do idia naria totona. Do idia vara gaudia ese do idia hahedinaraia goevagoeva, Karadia Diravana bema idia dadaraia, do idia kwalimu eiava lasi.
4, 5. (a) Taunimanima ese Dirava ena lohia siahuna idia dadaraia dainai, dahaka ia vara? (b) Nega daudau lalonai idia vara gaudia ese dahaka idia hahedinaraia goevagoeva?
4 Adam bona Eva ese Dirava idia rakatania murinai, ia naridia lasi, guna ia naridia bamona. Unai dainai edia goevadae ia ore; idia buruka idia lao bena idia mase. Unai dika be edia bese taudia iboudiai, ita danu, be idia henidia hanai. (Roma 5:12) Bona taunimanima be lagani 6,000 bamona lalodiai idia lohia dainai, dahaka ia vara? Dika bada herea ia vara, Kohelete 8:9 ena hereva hegeregerena: “Taunimanima haida ese edia bamodia idia biagudia bona idia hahisidia.”
5 Nega daudau lalonai idia vara gaudia ese idia hahedinaraia goevagoeva, taunimanima ia karadia Diravana bema ia durudia lasi, idia kwalimu diba lasi. Ieremia ia gwau: “Iehova e, lau diba taunimanima ena dala be ia sibona lalonai lasi. Taunimanima ena raka be ia sibona ese do ia gwauraia hidi diba lasi.”—Ieremia 10:23; Deuteronomi 32:4, 5; Kohelete 7:29.
Dirava Ena Palani Ia Idau Lasi
6 Nega daudau herea lalonai taunimanima idia kara dika bona hisihisi idia ania dainai, Dirava ese ena palani ia haidaua a? Baibel ia gwau: “Iehova, guba karaia Diravana, Dirava momokanina, ia ese tanobada ia karaia bona ena oromana ia henia, bona ia haginia auka, ia karaia kava lasi, to taunimanima ese do idia noholaia totona ia karaia.” (Isaia 45:18) Unai be iena palani, ema bona hari.
6, 7. (a) Nega daudau herea lalonai idia vara gaudia dainai, Iehova ese ena palani ia haidaua a? (b) Iehova ena palani ena kahana ta be dahaka?
7 Unai sibona lasi; Iehova ena palani be tanobada be paradaiso ai do ia lao bona taunimanima goevadaedia ese do idia moalelaia. Unai dainai Baibel ia gwau ‘tanobada matamatana,’ tanobada besena matamatana unai, be do ia vara, ia lalonai “kara maoromaoro sibona do ia noho.” (2 Petero 3:13) Bona Apokalupo 21:4 ai Dirava ese ita ia hamaoroa, iena tanobada matamatana lalonai, “ia ese matana ranu ibounai [taunimanima] edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” Unai dainai Iesu ese unai tanobada matamatana be ‘Paradaiso’ ia gwauraia.—Luka 23:43.
8. Dahaka dainai ita diba momokani Iehova ese ena palani do ia hagugurua?
8 Iehova be siahu ibounai bona aonega ibounai Diravana, guba bona tanobada karadia Diravana, unai dainai ta ese ena palani ia koua diba lasi. “Iehova ia gwauhamata vadaeni, ia gwau: ‘Lau laloa hegeregerena, unai bamona do ia vara; bona lau lalohadailaia hegeregerena, unai bamona do ia momokani.’ ” (Isaia 14:24) Unai dainai Iehova ena gwauhamata, tanobada be paradaiso ai do ia halaoa bona taunimanima goevadaedia be ia latanai do ia hanohodia gwauhamatana, be do ia momokani. Iesu ia gwau: “Dagedage lasi taudia be idia namo, badina tanobada do idia abia.” (Mataio 5:5; ma Salamo 37:29 itaia.) Unai gwauhamata ita abia dae vaitani diba.
Iehova Idia Abidadama Henia
9 Gunaguna Dirava gari henia taudia momo ese edia mauri daladia amo idia hahedinaraia idia laloa Dirava ese ena palani tanobada totona be do ia hagugurua. Ena be reana edia diba be bada lasi, to Dirava idia abidadama henia bona edia mauri lalodiai ena ura idia karaia. Ta be Abraham, lagani 2,000 idia do noho ela bona Iesu be tanobada ai ia noho neganai, bona nega daudau ia do noho ela bona Baibel idia torea matama neganai, ia noho. Iehova ia abidadama henia dainai, ia laloa Iena gwauhamata do ia hamomokanidia. Toana be Abraham ena tubuna, kamonai tauna Sem, Noa ese ia hadibaia tauna, ese Abraham na Dirava ia hadibalaia. Unai dainai, Dirava ese Abraham ia hamaoroa Kaldea taudia edia taga momo hanuana Uru do ia rakatania bona ia diba lasi tanona, Kanana, do ia lao henia neganai, Abraham ese Iehova ia abidadama henia, unai dainai ia lao. (Heberu 11:8) Gabeai, Iehova ese ia hamaoroa, ia gwau: “Lau be oi dekenai tubuna momo do lau henia, dohore idia be bese bada herea.”—Genese 12:2.
10, 11. Dahaka dainai Abraham ena lalona be hegeregere ena natuna tamona Isako do ia bouboulaia?
10 Abraham ese Isako ia havaraia murinai, Iehova ese Abraham ia hadibaia Isako ena amo ena tubudia do idia vara bona bese bada hereana ai do idia lao. (Genese 21:12) Unai dainai, Iehova ese Abraham ena abidadama dibaia totona ia hamaoroa ena natuna do ia bouboulaia neganai, toana be sibona ena hereva ia gorea unai. (Genese 22:2) To Abraham ese Iehova ia abidadama henia vaitani dainai, ena kaia ia abia, Isako ia alaia gwauraia. Unai neganai Iehova ese aneru ta ia siaia, Abraham ia koua.—Genese 22:9-14.
11 Dahaka dainai Abraham ena kamonai be bada? Heberu 11:17-19 ia gwau: “Abidadama dainai Aberahamo ese iena natuna Isako ia abia, boubou gauna bamona Dirava dekenai ia henia. Unai be, Dirava ese Aberahamo ena abidadama ia dibaia neganai. Oibe, Aberahamo ia diba Dirava ese iena gwauhamata ia henia, to iena natuna tamona boubou gauna bamona do ia alaia gwauraia. Dirava ese guna ia hereva henia, ia gwau, ‘Isako dekena amo oiemu bese do ia vara.’ To Aberahamo ia daradara lasi, ia laloa, ‘Bema Isako ia mase, Dirava be mai ena siahu do ia hatorea isi lou.’ ” Roma 4:20, 21 ia gwau: “Dirava ese unai gwauhamata ia henia dainai Aberahamo ia laloa daradara lasi. . . . Ia diba momokani Dirava ese iena gwauhamata do ia hamomokania.”
12. Ena abidadama dainai Abraham ese dahaka davana ia abia?
12 Dirava ese Abraham ena abidadama ena davana ia henia; Isako ia hamauria bena iena amo “bese bada herea” ia vara. Unai sibona lasi, to ia ese danu Abraham ia hamaoroa, ia gwau: “Oiemu garana dainai tanobada besedia iboudiai be sibodia do idia hanamoa, badina be oi ese lauegu hereva oi kamonai.” (Genese 22:18, NW) Dalana be inai: Dirava ena guba Basileiana ena Pavapava be Abraham ena bese lalonai do ia vara. Unai basileia ese inai tanobada dikana Satana henunai be do ia haorea. (Daniel 2:44; Roma 16:20; Apokalupo 19:11-21) Bena, Basileia henunai, tanobada hegegemadai goevana lalonai Paradaiso do idia karaia, bona taunimanima ‘besedia iboudiai’ edia amo, Dirava ena ura idia karaia taudia unai, ese mauri goevadaena do idia moalelaia ela bona hanaihanai. (1 Ioane 2:15-17) Bona ena be Abraham be Basileia ia diba sisina mo, to Dirava ia abidadama henia bona Basileia haginia negana ia naria.—Heberu 11:10.
13, 14. Dahaka dainai Iobu ese Dirava ia abidadama henia?
13 Bena lagani handred toi mai kahana idia ore murinai, Iobu be Usu tanona ai ia noho, hari unai tano ena ladana be Arabia. Unai danu be Baibel idia do torea matama lasi neganai. Iobu be “mai ena kerere ta lasi, bona kara maoromaoro tauna; Dirava garina ia gari, bona kara dika amo ia raka oho.” (Iobu 1:1) Satana ese gorere dikana amo ia hahisia neganai, unai kamonai tauna be “ena uduna bibinadia amo ia hereva kerere lasi.” (Iobu 2:10) Ena be Iobu ese ena hisihisi ena badina ia diba lasi, to Dirava ia abidadama henia bona ena gwauhamata ia abidia dae mai ena lalona ibounai ida.
14 Iobu ia diba ena be do ia mase, to Dirava ese do ia hatorea isi lou diba. Ena helaro ia gwauraia, Iehova Dirava ia hereva henia neganai, ia gwau: “Sheol [mase gabuna] ai mani lau oi hunia . . . lau dekenai nega oi gwauraia hidi bena lau oi laloatao! Tau ta bema ia mase, do ia mauri lou a? . . . Do oi boiboi, bena oi do lau haere henia.” (Iobu 14:13-15) Ena be Iobu ese hisihisi bada ia ania noho, to ia hahedinaraia Iehova ena lohia siahuna ia abidadama henia, ia gwau: “Harihari ela bona do lau mase, egu lalo-maoromaoro do lau negea lasi!”—Iobu 27:5.
15. David ese ena abidadama Iehova ena palani dekenai edena bamona ia herevalaia?
15 Iobu ia mase bena lagani 600 bamona murinai, lagani 1,000 idia do noho ela bona Iesu be tanobada ia mai neganai, David ia hahedinaraia ia laloa tanobada matamatana do ia vara. Salamo ai ia gwau: “Iehova idia naria taudia be tanobada do idia abia. Nega sisina murinai, kara dika tauna do ia noho lasi. . . . To manau taudia ese tano do idia abia, bona maino bada do idia moalelaia dikadika. Kara maoromaoro taudia ese tanobada do idia abia, do idia noholaia hanaihanai.” Ena helaro aukana dainai, David ia gwau: “Iehova oi abidadama henia, . . . Iehova oi moalelaia, bena emu lalona ena ura oi do ia henia.”—Salamo 37:3, 4, 9-11, 29.
16. ‘Witness taudia hutuma’ edia helaro be dahaka?
16 Nega daudau lalonai, kamonai taudia, tatau bona hahine, edia helaro be mauri hanaihanai tanobada ai do idia abia. Idia be ‘witness taudia hutuma,’ Iehova ena gwauhamata dainai edia mauri idia atodia diho. Idia momo be idia hahisidia bada bona idia aladia mase, edia abidadama dainai. Idia diba “toreisi lou mauri namo herea do idia davaria.” Tanobada matamatana lalonai, Dirava ese edia davana, toreisi-lou namo hereana, do ia henidia, bena mauri hanaihanai do idia davaria diba.—Ioane 5:28, 29; Heberu 11:35; 12:1.
Keristen Witness Taudia ese Dirava Idia Abidadama Henia
17 Aposetolo edia negai, Iehova ese Basileia bona tanobada do ia lohiaia dalana herevadia ma haida be Keristen ekalesiana ia hadibalaia. Iena lauma ese aposetolo Ioane ia hasiahua, bena ia ese guba Basileiana lalonai Iesu Keriso ida do idia lohia hebou taudia edia momo ia gwauraia, 144,000 unai. Idia be Dirava ena hesiai taudia mai edia kamonai, “taunimanima ibounai edia huanai dekena amo . . . idia ia hoia.” (Apokalupo 7:4; 14:1-4) Guba ai Keriso ida do idia lohia, tanobada do idia lohiaia. (Apokalupo 20:4-6) Unai idaunegai Keristen taudia ese Iehova idia abidadama henia vaitani, idia laloa ena gwauhamata guba Basileiana bona tanobada totona be do ia hamomokanidia; unai dainai edia lalodia be hegeregere edia abidadama dainai do idia mase. Madi, idia momo be unai bamona idia karaia.
18. Hari inai negai, Iehova ena Witness taudia ese idaunegai witness taudia edena bamona idia tohotohodia?
18 Hari inai negai, Iehova ena Witness taudia kahirakahira milion ima ese Dirava unai bamona idia abidadama henia. Idia danu ese Dirava ena gwauhamata idia abidia dae vaitani. Edia mauri idia gwauhamatalai henia, bona Baibel ibounai idia abia edia abidadama hagoadaia totona. (2 Timoteo 3:14-17) Iesu ena orea taudia ginigunadia hegeregeredia, idia gwau: “Dirava ai kamonai henia be namo, taunimanima ai kamonai henia be dika.” (Kara 5:29) Hari Keristen Witness taudia momo be idia dagedage henidia bada. Haida be edia abidadama dainai idia hamasedia. Ma haida be gorere, eiava aksiden, eiava buruka dainai idia mase. To, idaunegai witness taudia mai edia kamonai hegeregeredia, idia ese Dirava idia abidadama henia vadaeni, badina be idia diba iena nega matamatana lalonai toreisi-lou amo do ia hamauridia lou.—Ioane 5:28, 29; Kara 24:15; Apokalupo 20:12, 13.
19, 20. Ita diba Baibel ese dahaka ia perovetalaia, iseda negai do ia vara?
19 Iehova ena Witness taudia idia diba gunaguna Baibel lalonai idia peroveta, idia gwau bese iboudiai lalodia amo do idia mailaidia, tanobada ibounai lalonai orea tamona lalonai do idia noho totona. (Isaia 2:2-4; Apokalupo 7:4, 9-17) Bona Iehova ese ia hagaukaradia noho; tanobada ibounai lalonai idia haroro, unai amo lalo-momokani taudia ma haida idia gogodia, idia danu do ia lalo namo henidia bona do ia naridia totona. (Hereva Lada-isidia 18:10; Mataio 24:14; Roma 10:13) Inai iboudiai ese Iehova idia abidadama henia vaitani, idia diba nega daudau lasi ia ese ena nega matamatana do ia havaraia.—1 Korinto 15:58; Heberu 6:10 itadia.
20 Baibel ena peroveta herevadia ese idia hahedinaraia, lagani 1914 amo ema bona hari, lagani 80 bamona lalodiai, Satana ena tanobada be ena dina gabedia ai ia noho. Ena dokona be kahirakahira. (Roma 16:20; 2 Korinto 4:4; 2 Timoteo 3:1-5) Iehova ena Witness taudia idia boga auka, badina be idia diba nega daudau lasi Dirava ena Basileia ese tanobada do ia lohiaia vaitani. Dirava ese inai nega dikana do ia hadokoa bona ena kara maoromaoro negana matamatana do ia havaraia; unai amo ia ese tanobada ena dika, nega daudau herea ia noho dikana, be do ia haorea vaitani.—Hereva Lada-isidia 2:21, 22.
21. Ena be hisihisi be hari idia vara noho, to dahaka dainai ita moale diba?
21 Bena Iehova ese hahenamo momo herea ita do ia henia ela bona hanaihanai, guna ita ania hisihisina do idia hereaia momokani, bona idia dainai unai hisihisi do ita laloaboio. Unai amo do ia hahedinaraia ita ia laloa bada. Eda lalona idia goada diba, badina be ita diba unai neganai Iehova ese ‘ena imana do ia kehoa, mauri gaudia iboudiai edia ura gaudia do ia henidia.’—Salamo 145:16; Isaia 65:17, 18.
22. Dahaka dainai Iehova ita abidadama henia be namo?
22 Tanobada matamatana ai, kamonai taudia ese Roma 8:21 hamomokania karana do idia itaia: “Dirava ese dina ta iena karaia gaudia be do ia ruhadia dika ena bodaga dekena amo, vadaeni Dirava ena natuna edia hairai do idia abia.” Iesu ese ena hahediba taudia ia hadibalaidia gurigurina hamomokania karana do idia itaia: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) Unai dainai Iehova oi abidadama henia vaitani, badina be ena gwauhamata aukana be: “Kara maoromaoro taudia ese tanobada do idia abia, do idia noholaia hanaihanai.”—Salamo 37:29.
Edena Bamona Do Oi Haere?
◻ Iehova ena palani taunimanima bona tanobada totona be dahaka?
◻ Dahaka dainai Dirava ese dika ia koua lasi tanobada ai?
◻ Idaunegai kamonai taudia ese edena bamona idia hahedinaraia Iehova idia abidadama henia?
◻ Dahaka dainai Dirava ena hesiai taudia hari inai negai ese Iehova idia abidadama henia?
3. Dahaka dainai Iehova ese taunimanima edia gwau-edeede ia hadokoa haraga lasi?
9. Abraham be dahaka ia karaia, unai amo ia hahedinaraia Iehova ia abidadama henia?
17. Keristen taudia ginigunadia edia abidadama Iehova dekenai be ede badana?
[Picture on page 16]
Dirava ese taunimanima ia karadia, paradaiso tanobadana ai do idia mauri hanaihanai mai edia moale ida totona
[Picture on page 18]
Abraham ia laloa Iehova ese mase taudia ia hatoredia isi lou diba