Edena Bamona Taunimanima be Dirava Toana Hegeregerena ai Idia Vara?

“DIRAVA ese taunimanima ia karaia, ia sibona ena laulau bamona, Dirava ena toana hegeregerena ia karaia. Tau bona hahine ia karaia.” Baibel be unai bamona ia hereva, to ena anina be dahaka? Tau bona hahine ginigunadia be edena dala amo Dirava ena toana hegeregerena ai idia vara?​—Genese 1:27.

Edia tauanina be Dirava ena tauanina hegeregerena, a? Lasi, unai bamona ia vara diba lasi. Taunimanima be tanobada tauanina idia abia, mai edia hidiona, bona idia karaia tanobada dekenai idia noho totona. Dirava be lauma, bona guba dekenai ena hairai be bada herea momokani, taunimanima be ia kahirakahira dekenai idia lao diba lasi. (Esodo 33:​18-20; 1 Korinto 15:50) Vadaeni, edena bamona taunimanima be Dirava toana hegeregerena ai idia vara? Taunimanima dekenai dala ia noho Dirava ena kara namodia idia tohotohoa totona​—lalokau, kara maoromaoro, aonega, bona siahu​—bona kara namodia ma haida danu.

Iehova Ena Kara

Iehova Dirava ese ia havaraia gaudia iboudiai dekenai iena kara namodia idia hedinarai, bona taunimanima ginigunadia rua, Adam bona Eva, dekenai iena kara namodia idia hedinarai herea. (Roma 1:20) Tanobada ia karaia neganai ia hegeregere momokani taunimanima idia noholaia totona, bona unai ese iena lalokau karana ia hahedinaraia. Iehova ese hahine goevadaena ia karaia Adam ia bamoa bona edia natudia edia sinana ai do ia lao totona. Idia ruaosi be uma mai hairaina lalonai ia atodia bona edia mauri durua gaudia iboudiai ia henidia mai moale danu idia noho totona. Bona namo bada gauna be inai, Dirava ese dala ia kehoa do idia mauri hanaihanai diba totona.​—Genese 2:​7-9, 15-24.

Taunimanima ginigunadia rua ia tohodia neganai, unai ese Dirava ena aonega karana ia hahedinaraia. Iehova ena guba bona tanobada ruma besena lalonai do idia mauri noho totona, bona taunimanima iboudiai edia tamana bona sinana hegeregerena ai do idia mauri hanaihanai totona, gau badana be idia hahedinaraia idia be mai edia abidadama bona tomadiho momokanina idia abia dae. Vadaeni, edia lalona ena ura momokani idia hahedinaraia totona, Iehova ese ia tohodia​—namo bona dika hadibaia auna dekena amo huahua do idia ania lasi taravatuna ia henidia. Iehova be mai ena aonega, dala ia kehoa taunimanima be edia kamonai bona edia lalokau ia dekenai idia hamomokania totona, bona gabeai idia dekenai ia ura henidia gau namodia do ia henidia!

Dirava ese taunimanima dekenai mauri ena taravatu ia henidia bona ia ura unai taravatu idia badinadia, unai ese iena kara maoromaoro karana ia hahedinaraia; unai taravatu ia haidaua lasi. Dala ia kehoa Adam bona Eva be kara maorodia do idia karaia totona. Bona idia kara dika neganai, ia kota henidia, bona ia gwauraia gwau-edeede davana ia henidia, unai ese iena hahemaoro maoromaoro karana ia hahedinaraia.

Idia dekenai iena hereva idia guguru neganai, unai ese Iehova ena siahu ia hahedinaraia. Satana, gwau-edeede tauna badana, ia gwau Iehova ia koikoi, bona Satana ese Eva ia hamaoroa, bema Dirava do ia gwau-edeede henia, gau namodia momo do ia henia. (Genese 3:​1-7) To, Satana ese ena hereva ia hagugurua diba lasi. Satana be dala lasi Iehova Dirava ia koua Ia ese Adam bona Eva be Eden umana amo Ia luludia neganai, bona Dirava ena hereva Adam dekenai ia guguru neganai, Satana be ia koua diba lasi, Dirava ia gwau: “Oi be tano dekenai karaia gauna, bona tano dekenai do oi giroa lou.” (Genese 3:19) To, Iehova be idia ruaosi ia hamasedia haraga lasi, bona unai ese iena lalokau karana ia hahedinaraia. Adam bona Eva dekenai nega ia henidia edia natudia do idia havaradia totona, bona unai amo ena ura taunimanima dekenai be gabeai do ia hagugurua diba.​—Genese 1:28.

Gabeai, Iehova Dirava ena kara maoromaoro, lalokau, siahu, bona aonega karadia be ia karaia gwauhamatana ta dekenai idia hedinarai momokani, ia gwau garana ta do ia havaraia bona unai garana be Satana ena kara dika iboudiai do ia haoredia, bona gunaguna Dirava ena lohia dalana dekenai gwau-edeede kara ginigunana amo idia vara gau dikadia do ia kokidia. (Genese 3:15) Iseda Havaraia Diravana be namo herea momokani!

Dirava Tohotohoa Karadia

Ena be taunimanima be idia goevadae lasi hari, to idia ese Dirava ena kara namodia idia hahedinaraia diba. Unai dainai, Paulo ese iena nega Keristen taudia ia sisiba henidia, ia gwau: “Umui be Dirava ena natuna, iena lalokau. Unai dainai, Dirava ena kara bamona do umui karaia be namo.” (Efeso 5:1) To, histori ena sivarai ese ia hahedinaraia taunimanima kahirakahira iboudiai be Dirava ena kara namodia idia dadaraia. Noa ena negai, taunimanima edia kara be dika herea, unai dainai Iehova ese ena lalona ia hadaia taunimanima iboudiai do ia hamasedia totona, Noa bona ena ruma bese taudia sibodia do idia noho. Noa be “kara namo tauna, ia tamona sibona dekenai Dirava ia moale,” bona Dirava ena hereva ia badinaia karana amo ia hahedinaraia Dirava ia lalokau henia.a “Noa be inai bamona ia karaia, Dirava ena hereva ibounai hegeregere.” (Genese 6:​9, 22) Noa be “kara maoromaoro ia harorolaia tauna,” bona unai ese ia hahedinaraia ena dekena taudia ia lalokau henidia bona kara maoromaoro karana ia ura henia. (2 Petero 2:5) Iehova ena hahegani Noa dekenai be bouti ta do ia karaia, bona bouti lalonai aniani do ia haboua, bona animal idauidau do ia haboudia, bona Dirava ia gwauraia negana lalonai bouti dekenai do ia vareai; Noa ese iena hereva ibounai ia badinaia neganai, unai ese ia hahedinaraia ia be mai ena aonega bona tauanina ena goada ena siahu be dala maorona ai ia gaukaralaia. Iena dekena taudia edia kara dika be ia dekenai idia hanai lasi, bona unai ese ia hahedinaraia ia be kara maoromaoro karana ia ura henia.

Baibel lalonai Dirava ena kara idia tohotohoa taudia momo edia sivarai idia noho. Idia amo haheitalai badana ta be Iesu Keriso, goevadae dalanai ia be Dirava toana hegeregerena ai ia vara, unai dainai ia gwau diba: “Lau ia itaia tauna ese egu Tamana danu ia itaia.” (Ioane 14:9) Iesu ena kara namodia amo ia hahedinaraia iena lalokau karana be ia bada. Iena Tamana bona taunimanima ia lalokau henidia dainai, iena noho gabuna guba dekenai ia rakatania bona tanobada dekenai ia mai taunimanima bamona ia noho totona. Ena kara maoromaoro karana amo ia ese ena Tamana ena ladana ia hanamoa bona taunimanima dekenai hahemauri ena sivarai namona ia harorolaia. (Mataio 4:23; Ioane 13:31) Unai lalokau karana dainai Iesu ese ena mauri goevadaena ia henia taunimanima do ia hamauridia totona, bona mai anina bada gauna be inai, unai ese Dirava ena ladana ia hahelagaia. (Ioane 13:1) Dirava ena kara namodia ita tohotohoa totona, Iesu Keriso be haheitalai hereadaena, ani?​—1 Petero 2:21.

Hari, Dirava Ita Tohotohoa Diba Dalana be Dahaka?

Hari inai negai, edena bamona Dirava ena kara namodia ita tohotohoa diba, bona unai amo ita hahedinaraia ita be Dirava ena kara hegeregerena ita karaia? Namona be lalokau karana do ita laloa guna. Iesu ia gwau: “[Iehova] oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.” Dirava dekenai lalokau ita hahedinaraia diba dalana be dahaka? Aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”​—Mataio 22:37; 1 Ioane 5:3.

Momokani, Iehova ena taravatu do ita badinadia totona, gau badana be unai taravatu ita diba guna. Unai anina be Dirava ena Hereva, Baibel, bona Baibel ia gwauraia bukadia ita duahidia, ita stadilaidia, bona unai hereva ita lalohadailaidia namonamo. Salamo torea tauna bamona, namona be ita gwau: “Emu taravatu lau ura henia dikadika! Dina ibounai lau laloa noho.” (Salamo 119:97) Iseda diba Dirava ena Hereva dekenai ia bada ia lao neganai, Dirava ena lalohadai ita abia. Ita ese kara maoromaoro ita ura henia bona kara dika ita inai henia. (Salamo 45:7) Adam be unai ia karaia lasi dainai ia raka kerere. Iehova ena taravatu ia diba, to ia ura henia bada lasi dainai ia badinaia noho lasi. Dirava ena Hereva ita duahia neganai, namona be hanaihanai sibona dekenai ita henanadai, ita gwau, ‘Inai hereva ena anina lau dekenai be dahaka? Dahaka do lau karaia diba lauegu kara bona Dirava ena kara idia hegeregere momokani totona?’

Danu, Iesu ia gwau: “Oiemu badibadinai tauna dekenai oi lalokau henia, oi sibona oi lalokau henia bamona.” (Mataio 22:39) Laloa namonamo taudia ta ta iboudiai ese sibodia idia lalokau henia bona sibodia edia namo idia tahua. Unai be ia kerere lasi. To iseda dekena taudia dekenai unai bamona lalokau karana ita hahedinaraia, a? Baibel ena hahegani ita badinaia, a? Ia gwau: “Gau namona be mai badina do idia abia taudia amo oi koua lasi, oi henidia diba neganai.”​—Hereva Lada-isidia 3:27; Galatia 6:10.

Aonega karana be edena bamona? Ita ura aonega karana ita hahedinaraia, unai dainai Baibel ita stadilaia badina unai be Dirava ena aonega ita abia diba gabuna. Salamo 119:​98-100 ia gwau: “Lauegu aonega ese lauegu inai taudia edia aonega ia hereaia, emu hahegani ese lau ia ha-aonegaia dainai; badina be ia be lauegu du bona hanaihanai lauegu lalo-parara be lau idia hadibaia taudia iboudiai edia lalo-parara ia hanaia, badina be oiemu hahediba herevadia be lau laloa momo dainai.” Hereva Lada-isidia 3:​18 dekenai, aonega be “mauri auna” ia gwauraia. Bema aonega ita abia bona ita gaukaralaia, Dirava ese ita do ia lalo-namo henia bona ita dekenai mauri hanaihanai davana do ia henia.​—Kohelete 7:12.

Hahemaoro maoromaoro karana be edena bamona? Inai tanobada dikana lalonai, Dirava ita hamoalea totona, gau badana be ita kara maoromaoro. Iesu ese kara maoromaoro ia ura henia bona kara dika ia inai henia. (Heberu 1:9) Hari inai negai Keristen taudia be unai bamona idia karaia. Hahemaoro maoromaoro idia ura henia dainai, kara namodia idia moalelaia. Inai tanobada ena dika karadia idia dadaraia, bona edia mauri lalonai Dirava ena ura idia karaia karana idia laloa bada.​—1 Ioane 2:​15-17.

Ita ta ta ibounai dekenai siahu ia noho. Iseda tauanina dekenai goada ena siahu ia noho bona aonega ena siahu ita abia, bona Keristen ena dala dekenai ita goada ita lao neganai, lauma dalanai siahu ita abia. Iehova ese iena lauma helaga amo ita dekenai ia noho siahuna ia habadaia, bona ena be tauanina dalanai ita manoka, to Iehova ena ura ita hagugurua diba. Paulo ia gwau: “Keriso ese lau ia hasiahua, vadaeni gau ibounai lau goadalaia diba.” (Filipi 4:13) Bema Iehova ena lauma helaga abia totona ita guriguri, unai bamona siahu ita abia diba.

Sivarai Namona Harorolaia

Dirava ena kara namodia hani ita hahedinaraidia totona, ita be inai hahegani ita badinaia: “Umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.” (Mataio 28:​19, 20) Unai aonega gaukarana ese kamonai taudia ia hamauridia. Unai be lalokau karana momokani, badina unai kamonai taudia momo be guna ita diba lasi momokani taudia!

Ma danu, unai bamona hahediba gaukarana ita karaia be aonega karana. Ia havaraia huahuana be ia ore lasi. ‘Unai kara namodia amo oi sibona bona oi idia kamonai henia taudia ese mauri do umui davaria;’ edena gaukara ma ta ese unai ia karaia diba? (1 Timoteo 4:16) Hahediba gaukara idia karaia taudia iboudiai idia kwalimu. Idia kamonai taudia bona hahediba gaukara idia karaia taudia be hahenamo ela bona hanaihanai do idia davaria.

Keristen taudia ese edia Baibel stadi taudia dekenai kara maoromaoro badinaia karadia idia hadibadia. Ita durudia “hahemaoro maoromaoro Diravana,” Iehova, ena hesiai gaukara do idia karaia totona. (Malaki 2:17) Hari inai negai, Iehova ena hesiai gaukara idia karaia totona ia dekenai edia mauri idia gwauhamatalaia, bona mai edia abidadama danu unai gaukara idia karaia. Dirava ese ia gwauraidia kara maoromaoro taudia, gwaumaoro ia henidia, bona Aramagedono amo do idia roho mauri diba.​—Roma 3:24; Iakobo 2:​24-26.

Tanobada hegegemadai sivarai namona ena haroro bona hahediba gaukaradia karaia totona, siahu be bada herea! (Mataio 24:14) Taunimanima momo idia ura lasi kamonai ena teritori dekenai hanaihanai ita haroro totona, haheauka ita hahedinaraia be gau badana. To Iehova ese iena lauma siahuna amo, ita ia hasiahua dainai, ita haheauka diba ela bona dokona negana ia ginidae.​—Isaia 40:​30, 31; Mataio 24:13; Luka 11:13.

Momokani, ita be Adam ena goevadae lasi natudia dainai, goevadae dalana amo unai kara namodia do ita hahedinaraidia diba lasi. To, laloaboio lasi, Dirava toana hegeregerena ai taunimanima idia vara, unai dainai bema ita goada karaia Dirava ena kara ita tohotohoa totona, vadaeni, ita vara ena badina ta ita hagugurua unai. (Kohelete 12:13) Bema ita goada karaia unai kara ita badinaia namonamo totona, bona bema ita karaia namonamo lasi neganai Dirava ita guriguri henia iseda kerere do ia gwauatao totona, vadaeni, Dirava ena kara maoromaoro tanobada matamatana dekenai do ita roho mauri diba, bona gabeai mauri goevadaena do ita abia diba. Unai neganai, tanobada paradaisona lalonai do ita noho bona taunimanima iboudiai be do idia goevadae; iboudiai be Iehova ena kara do idia tohotohoa momokani. Unai be moale bada negana! Unai neganai, ita gwau diba taunimanima be Dirava toana hegeregerena ai idia vara.

[Footnotes]

[Picture on page 25]

Iesu ese ita ia hadibaia edena dala amo Iehova ena kara ita tohotohoa diba totona

[Picture on page 26]

Gabeai, ita gwau diba taunimanima be Dirava toana hegeregerena ai idia vara