“Gori Kavakavadia Do Oi Negea Momokani”

BAIBEL lalonai taunimanima edia kara bona sivarai momo idia noho. Unai sivarai ita duahia neganai ita moale bona idia dekena amo namo ita davaria danu. Aposetolo Paulo ese Roma dekenai ia noho Keristen kongregesen dekenai revareva ia torea, ia gwau: “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada bona Dirava dekenai do ita naria mai haheauka danu.”​—Roma 15:4.

Danu, Paulo ese ia dekenai idia vara gaudia ia gwauraia hedinarai. Paulo bona Banaba edia laolao ginigunana idia karaia haorea neganai Baibel ia gwau: “[Suria Antioka dekenai] idia ginidae neganai ekalesia taudia idia haboua. Bona Dirava danu idia karaia hebou gaudia ibounai ena sivarai idia gwauraia. Idia gwau, ‘Dirava ese abidadama ena iduara idau bese taudia dekenai ia kehoa vadaeni.’ ” (Kara 14:27) Reana unai sivarai ese tadikaka ia hagoadadia bada.

To, sivarai haida ese taunimanima idia hagoadadia lasi. Lauma helaga ena siahu amo, Paulo ese Timoteo ia sisiba henia, ia gwau: “Gori kavakavadia do oi negea momokani, idia be helaga gaudia idia hadikaia, bona hahine burukadia idia kikilaia gaudia.”(1 Timoteo 4:7, NW) Bona Tito ia tore henia, ia gwau namona be abidadama Keristen taudia be “Iuda taudia edia gori, bona hereva momokani idia negea taudia do idia kamonai henia lou lasi.”​—Tito 1:14.

Unai gori kavakavadia, eiava koikoi herevadia, be dahaka? Unai hereva ruaosi be Greek hereva myʹthos (“gori”) amo idia vara. The International Standard Bible Encyclopaedia bukana lalonai ia gwau unai hereva ese “(tomadiho) ta ena sivarai ia gwauraia hedinarai, ia be gori sibona.”

Paulo ena nega lalonai idia gwauraia sivarai kavakavadia be momo. Haheitalai ta be inai: Tobit ena apocryphal bukana be reana lagani 200 bamona Paulo ena nega ia do vara lasi neganai idia torea. Unai buka ese ena tomadiho ia laloa bada Iuda tauna, Tobit, ia sivarailaia, ia gwau manu ta ena kukuri be iena matana dekenai ia moru neganai ena matana be idia kepulu. Gabeai, abitore davana ia abia totona, ena natuna, Tobias, ia siaia. Ia lao noho lalonai, aneru ta ena hereva dainai, Tobias ese gwarume ena kudouna, asena, bona gall ia abidia. Murinai, vabu ta ia davaria, bona ena be nega 7 ia headava, to ia be do rami hebou kekenina ta badina idia ta ta iboudiai idia headava hanuaboina dekenai lauma dikana ta ese ia hamasedia. Aneru ena hereva dainai, Tobias ese unai vabu ia adavaia bona unai demoni lulua oho totona ia ese gwarume ena kudouna bona asena ia gabua ore. Gabeai, ena tamana ena matadia ia hanamodia totona, Tobias ese gwarume ena gall ia gaukaralaia.

Ia hedinarai goevagoeva, unai sivarai be ia momokani lasi. Unai be sibodia idia lalohadailaia gauna bona ia be gari kava gauna sibona lasi, to hereva haida idia maoro lasi. Hegeregere, unai sivarai ia gwau Tobit be not kahana besedia edia gwau-edeede karana bona Israel taudia be Nineve dekenai idia abidia lao karana ia itadia, to Israel ena histori lalonai, unai gau rua idia vara edia nega ena padana be lagani 257. To, unai buka ia gwau Tobit ia mase neganai ena lagani be 112.​—Tobit 1:​4, 11; 14:​1, The Jerusalem Bible.

Unai bamona gori herevadia be Dirava ena abidadama hesiai taudia idia gwauraia ‘hagoadaia herevadia’ bamona lasi. (2 Timoteo 1:13) Idia be lalohadai kava gaudia, histori ese unai sivarai ia hamomokanidia lasi, idia be Dirava momokani idia diba lasi hahine burukadia ese idia sivarailaia gaudia. Keristen taudia ese unai gori kavakavadia do idia negea momokani be gau badana.

Hereva Momokani Tohoa Karana

Hari inai negai, unai bamona gori herevadia idia gwauraidia. Paulo ia torea, ia gwau: “Negana do ia ginidae, taunimanima be hereva maoromaoro do idia ura lasi kamonai. Lasi momokani. To . . . hereva momokani do idia negea, to gori kavakava do idia kamonai henia.” (2 Timoteo 4:​3, 4) Tanobada ena gabu haida dekenai, lauma dikadia sivaraidia be momo bona taunimanima momo idia ura kamonai henidia. Unai dainai, namona be aonega Keristen taudia be tomadiho edia sivarai idia “mamidia toho,” unai amo idia diba idia be Baibel ena hereva hegeregerena eiava lasi.​—Iobu 12:11.

Ia hedinarai goevagoeva, sivarai momo be Baibel ena sivarai hegeregeredia lasi. Hegeregere, tanobada ena kahana momo lalodiai, edia sivarai momo lalodiai idia gwau taunimanima dekenai ia mase diba lasi soulina ia noho. Unai sivarai lalonai idia gwau tau ta ia mase neganai, ia mauri lou diba ia vara matamata beibi, lauma ta, animal ta, eiava taunimanima ta ma gabu ta dekenai.

To, Dirava ena Hereva ese ia hahedinaraia taunimanima lalodiai ia mase diba lasi souli ia noho lasi; souli idia mase diba. (Esekiel 18:4) Danu, Baibel lalonai ia gwau mase taudia be gara gabuna dekenai idia noho, idia mauri lasi, idia lalohadai lasi, idia hereva lasi, eiava gau ta idia karaia diba lasi. (Kohelete 9:​5, 10; Roma 6:23) Vadaeni, Paulo ia gwau taunimanima lalonai ia mase diba lasi soulina ia gwauraia gori kavakavadia idia abia dae taudia be Baibel ena ‘hereva momokani idia negea.’

Lauma Dikadia Sivaraidia

Sivarai ma haida be mea hahinedia bona mea tataudia edia kara idia gwauraia. Hegeregere, Africa ena kahana ta ta dekenai, idia gwau unai mea hahinedia bona mea tataudia edia siahu be bada herea, idia gwau idia sibodia eiava taunimanima ma haida be gaigai, maniki, bona manu ai idia halaodia diba; edia gaukara do idia karaia totona idia roho lao diba; edia tauanina idia hunia bona ma idia hahedinaraia diba; haba dekenai idia raka hanai diba; bona tano ese ia koua gaudia idia itaia diba.

Unai bamona sivaraidia be momo herea, bona taunimanima momo herea ese idia abidia dae dainai, reana Keristen kongregesen lalonai haida edia lalona ia veria bena idia laloa unai hereva be idia momokani. Reana inai bamona idia laloa: Taunimanima be unai bamona karadia idia karaia diba lasi, to lauma mauridia, demoni ena amo siahu idia abia neganai, idia karaia diba. Idia laloa kerere, idia laloa 2 Tesalonika 2:​9, 10, ese unai ia hamomokania, ia gwau: “[Satana] ena siahu dekena amo unai Tau Dikana be do ia mai, vadaeni hoa bona toa karadia idauidau momo dekena amo ia ese taunimanima momo do ia hakaua kerere. Ia ese kara kerere bada dekena amo mase dalana dekenai idia raka noho taudia do ia koidia. Inai taudia bema hereva momokani idia abia dae bona lalokau henia neganai. Dirava do ia hamauridia, to idia ura lasi.”

Unai siri ese ia hahedinaraia Satana be siahu bada karadia ia karaia diba, to danu ia gwau Satana be “hoa bona toa karadia” amo taunimanima momo ia “hakaua kerere.” Hanaihanai, Baibel ese ia hahedinaraia Satana be koikoi tauna badana bona ia be “tanobada taudia ibounai ia koia noho.” (Apokalupo 12:9) Mai aonega danu taunimanima edia lalona ia veria diba bena koikoi hereva idia abidia dae.

Unai ia karaia diba dainai, ena be lauma dikadia idia hereva henia bona mea karadia idia karaia, to unai taudia edia hereva momo be idia maoro lasi. Reana unai taudia idia gwau idia itaia, idia kamonai, eiava ma gau haida idia karaia dainai unai kara idia hamomokania; to, idia laloa kerere. Hegeregere, taunimanima haida idia gwau mase taudia edia lauma idia hereva henidia. To idia laloa kerere, Satana ese ia koidia unai. Baibel lalonai ia gwau mase taudia be “regerege lasi gabuna idia lao henia.”​—Salamo 115:17.

Idaunegai ema bona hari Diabolo ese taunimanima ia koidia, unai dainai ita gwau diba lasi lauma dikadia sivaraidia idia maoro. Unai sivarai momo be taunimanima edia gari kava o lalohadai kavakava amo idia vara, bona idia gwauraidia loulou dainai idia idau idia lao.

Unai bamona gori herevadia idia gwauraidia loulou neganai, koikoi ibounai edia tamana, Satana Diabolo, ena ura kara idia habadaia. (Ioane 8:44) Taunimanima idia veria lauma dikadia hereva henia karadia idia ura henia totona, to Iehova be unai kara ia ura henia lasi momokani. (Deuteronomi 18:​10-12) Unai kara ese taunimanima be gari bona sene taudia edia gari kava karana ena valavala lalonai ia guidia. Unai dainai ita hoa lasi Paulo ese Keristen taudia ia sisiba henidia ‘gori herevadia’ idia abia dae lasi totona.​—1 Timoteo 1:3, 4.

Demoni Edia Hereva Dadaraia

To, bema unai sivarai idia momokani neganai be edena bamona? Nega haida sivarai lalonai lauma dikadia eiava lauma dikadia ese idia hereva henidia taudia idia gwau Iehova be atai herea bona idia gwau iena Witness taudia be hereva momokani taudia. Keristen taudia ese unai bamona sivarai idia gwauraidia hedinarai be namo, a?

Lasi, unai idia karaia be namo lasi. Baibel ia gwau lauma dikadia ese Iesu be Dirava ena Natuna idia boiboilaia neganai, Iesu ese “idia ia gwau henia, iena ladana idia hedinaraia lasi.” (Mareko 3:12) Unai hegeregerena, Paulo bona Banaba ia hahedinaraidia totona, demoni ta ese kekeni ta ia hasiahua neganai, bena ia gwau Paulo bona Banaba be ‘Atai Momokani Dirava ena hesiai taudia’ bona “hahemauri dalana” idia gwauraia taudia, Paulo ese ia dekena amo lauma dikana ia lulua. (Kara 16:​16-18) Iesu, Paulo, bona Baibel idia torea taudia iboudiai idia ura lasi demoni ese Dirava ena ura eiava ia abia hidi hesiai taudia edia kara idia herevalaia.

Danu, inai oi laloa, Iesu Keriso be tanobada dekenai ia do diho mai lasi neganai, ia be guba dekenai ia noho. Satana ia diba namonamo. To, Iesu be ena hahediba taudia dekenai, Diabolo ena sivarai bona ia karaia diba bona ia karaia diba lasi gaudia ia hadibadia lasi. Satana bona iena demoni be Iesu ena turadia lasi. Dirava ia luludia, idia gwau-edeede, bona helaga gaudia idia inai henia, bona Dirava idia inai henia.

Dahaka ita diba be namo be Baibel ese ita ia hadibaia. Ia hahedinaraia demoni be daidia, edena bamona taunimanima idia koidia, bona edena bamona ita dadaraidia diba. Ia hahedinaraia Iehova bona Iesu edia siahu be demoni edia siahu idia hereaia. Bona ita ia hadibaia bema mai iseda abidadama ida Iehova ena hesiai gaukara ita karaia, lauma dikadia ese ita idia hadikaia hanaihanai diba lasi.​—Iakobo 4:7.

Vadaeni, mai ena badina maorona dainai, Keristen taudia ese gori kavakavadia idia negedia, unai bamona herevadia be Dirava idia inai henia taudia edia kara ia habadaia. Iesu ese ‘hereva momokani ia gwauraia hedinarai,’ bona hari inai negai, ia murinai idia raka taudia be unai idia karaia danu. (Ioane 18:37) Mai edia aonega ida Baibel ena sisiba idia badinaia, ia gwau: ‘Momokani karadia . . . oi karaia noho.’​—Filipi 4:8.

[Picture on page 31]

Keristen momokanidia be lauma dikadia hereva henia bona meamea kara iboudiai idia dadaraidia momokani be gau badana