Momokani Ia be Henaohenao A?

ABIODUN be ueita tauna badana, hotele badana lalonai ia gaukara, Nigeria ai. Hanuaboi ta aria daiutuna badana ia lokaia gwauraia neganai, baege ta mai ena moni bada, K1,827 bamona, ia davaria. Maoromaoro unai moni be hotele biaguna ta ia henia, bena gabeai moni biaguna, hotele ai ia mahuta hahinena ta, ia mai bona ia abia. Hotele biagua taudia ese dagi badana Abiodun idia henia, bona unai “lagani ena gaukara tauna hereadaena” davana idia henia. Moni biaguna danu ese ena kara davana ia henia.

Niusi magasin ladana Quality ese inai sivarai ia halasia, ia gwau Abiodun be “Samaria Tauna Namona.” Unai moni do ia dogoatao lalohadaina ia abia eiava lasi idia nanadailaia neganai, Abiodun ia gwau: ‘Lau be Iehova ena Witness tauna. Unai dainai, bema tau ta ena gau lau davaria, ia dekenai lau haloua.’

Unai taoni taudia momo ese Abiodun ena kara maoromaoro idia hoalaia. Abiodun ena bamona, Witness taudia unai, ese ena kara idia moalelaia to idia hoalaia lasi. Tanobada hegegemadai taunimanima idia diba Iehova ena Witness taudia be kara maoromaoro taudia. Kara maoromaoro be Keristen karadia korikoridia ta.

To nega haida, idia vara gaudia dainai ia hedinarai goevagoeva lasi dahaka be maoro bona dahaka be kerere. Inai sivarai mani oi laloa. Festus, Iehova ena Witness taudia edia kongregesen ta West Africa ai ena kontribusen monina bona akaun naridia tauna, be moni ai ia dabu momokani.a Doketa taudia idia gwau namona be ena adavana ese opereisini badana do ia abia haraga. Hospital taudia ese idia hamaoroa opereisini ena davana ena kahana do ia henia guna.

Madi, Festus be moni lasi. Taunimanima momo ia noidia moni do idia henia torehai, to idia henia lasi. Bena ia naria monina ia laloa; ena lalona ai ia gwau, ‘Bema lau be mai egu dala egu adavana ena mase do lau koua, to lau koua lasi, unai be maoro a? Kongregesen ena moni do lau “abia torehai” be namo, ani? Bena taunimanima be lauegu amo idia abia torehai vadaeni monina do idia haloua neganai, unai moni do lau haloua.’

Vadaeni, Festus ese kongregesen ena moni amo hospital ena davana ia karaia. Ena adavana ese opereisini ia abia haraga be gau badana, unai dainai iena kara be maoro a?

Unai be Daika Ena Moni?

Inai henanadai ita tahudia namonamo lalonai, inai ita laloa be namo: Festus ese ia abia monina be daidia ese idia henia bona dahaka totona? Unai moni be kongregesen taudia ese sibodia edia ura hegeregerena idia henia, Iehova ena tomadiho goevana durua totona. (2 Korinto 9:7) Unai moni be pei totona lasi, badina be kongregesen gaukarana karaia taudia ese davana idia abia lasi. To idau, unai harihari monina ena kahana badana idia gaukaralaia edia Kingdom Hall haginia bona naria totona. Bena unai ruma namona lalonai, taunimanima idauidau​—matamatadia bona burukadia, taga taudia bona ogogami taudia​—idia hebou diba, Baibel ena hahediba abia totona.

Moni be daika ena? Ia be kongregesen oreana ena. Orea tauna tamona lasi ese moni gaukaralaia dalana ia gwauraia diba. Elda edia orea ese Kingdom Hall ena paoa bona ranu bona unai bamona gaudia edia davana henia karana idia naria, to bema idia ura gau idauna ta ena davana do idia karaia, kongregesen taudia iboudiai idia hadibadia bena edia gwaumaoro idia abia guna.

Abitorehai Eiava Henaohenao?

Festus ena lalohadai be ia abia monina do ia haloua haraga, unai dainai ia laloa ena kara be abitorehai karana. To buka ta ladana Webster’s New Dictionary of Synonyms ia gwau “ta ese ma ta ena gwaumaoro ia abia lasi eiava ia hadibaia guna lasi neganai bema ena kohu ia abia kava,” unai be “henaohenao.” Festus ese kongregesen ena moni ia abia kava, gwaumaoro ia abia lasi. Unai dainai iena kara be henaohenao.

Momokani, henaohenao ena kerere ena bada be idauidau. Iuda Iskariote, Iesu bona aposetolo edia moni naria tauna, ena kara ese unai ia hahedinaraia. Baibel ia gwau: “[Iuda] be henaoa tauna, ia be moni ena maua ia naria, bona idia udaia moni be ia ese ia henaoa.” (Ioane 12:6) Lalo-dika bona mataganigani ese idia doria dainai, Iuda ena kara ia dika momokani ia lao. Siliva monidia 30 abidia totona, ia ese Dirava ena Natuna ia samania.​—Mataio 26:​14-16.

To Festus ese ena adavana mai ena gorere metauna ena namo ia tahua dainai moni ia abia. Anina be ia kerere lasi a? Lasi. Mani Baibel ena hereva ta oi laloa, ia gwau: “Hitolo dainai aniani ia henaoa tauna be taunimanima ese do idia gwauraia dika lasi. To bema idia davaria, davana do ia henia nega 7; ena ruma ena kohu namodia iboudiai do ia henia.” (Hereva Lada-isidia 6:​30, 31) Anina be, idia davaria neganai, taravatu hegeregerena do idia hahemaoro henia. Mose ena Taravatu be henao tauna ese ena kerere ena davana do ia abia. Baibel ese henaohenao ena kerere ia hamaragia lasi; ia gwau ena be nega metauna ai ta ia henao, to iena kara dainai reana ena kohu o moni do ia halusia, do ia hemarai, bona Dirava ena lalo-namo do ia haboioa.

Kongregesen lalonai mai edia dagi taudia, bona Keristen korikori taudia oredia danu, be Iehova ena Witness taudia, unai dainai namona be “ta ese edia kerere ia gwauraia diba lasi.” (1 Timoteo 3:10) Festus ese ia henidia torehai monina ia abia lou lasi, unai dainai ia be dala lasi ia abia torehai monina do ia haloua. Gabeai, ena kerere idia davaria neganai, edena bamona idia kara henia? Bema ena henaohenao amo ia helalo kerehai lasi, Keristen kongregesen goevana amo idia atoa siri. (1 Petero 4:15) To ena lalona ese ia botaia dikadika bona ia helalo kerehai. Unai dainai, kongregesen ai ia noho, to ena dagi idia kokia.

Dirava Abidadama Henia

Aposetolo Paulo ia gwau bema ta ia gwau ia ese Dirava ena hesiai ia lao henia to ia henaohenao, ia ese Dirava ena ladana bona ena orea taudia edia ladadia ia hadikadia. Paulo ia gwau: “Taunimanima haida umui hadibaia, to dahaka dainai umui sibona umui hadibaia lasi? Umui haroro, umui gwau, ‘Henaoa lasi,’ to umui be umui henaoa, a? . . . ‘Umui be Iuda taudia dainai, Iuda lasi taudia ese Dirava ena ladana idia hadikaia.’ ”​—Roma 2:​21, 24.

Aguru, idaunegai ia noho aonega tauna, ena hereva be unai hegeregerena. Dirava ia guriguri henia, ia hamaoroa ia ura lasi do ia ogogami, ‘do ia henaohenao bona ena Dirava ena ladana do ia hadikaia garina.’ (Hereva Lada-isidia 30:9) Hari aonega tauna ia diba, ogogami dainai kara maoromaoro tauna be reana do ia henaohenao. Oibe, nega dikadia ese Keristen taudia edia abidadama idia tohoa; idia abia dae momokani Iehova ese ena orea taudia edia dabu hegeregerena do ia durudia, eiava.

Iehova ena Witness taudia ogogamidia mai edia kamonai idia diba momokani “Dirava idia tahua taudia ibounai be davana namona Dirava ese do ia henidia.” (Heberu 11:6) Idia diba Iehova ese ia idia kamonai henia taudia ia durudia, idia dabu gaudia do idia abidia totona. Iesu ia gwau: “Emui lalona idia hekwarahi lasi. Umui hereva lasi, ‘Dahaka do ai ania?’ O, ‘Dahaka do ai inua?’ O, ‘Dahaka dabua do ai atoa?’ . . . Emui Tamana guba dekenai ia noho be ia diba, umui ura gaudia ibounai be unai. To umui be iena Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.”​—Mataio 6:​31-33.

Keristen kongregesen ai heduru idia abia be namo taudia be Dirava ese edena bamona ia durudia? Dala ta be sibodia edia orea taudia edia amo. Dirava ena orea taudia idia lalokau heheni. Baibel ena sisiba idia badinaia; ia gwau: “Bema tau ta be mai ena kohu momo, bona iena tadikakana ia itaia mai ena ogogami, to ia bogahisihisi henia lasi, edena bamona ia hereva, ‘Lau ese Dirava lau lalokau henia’? Lauegu natuna e, iseda lalokau be hereva gauna sibona lasi. Namo ita lalokau henia, hereva sibona dekena amo lasi, to mai kara bona mai momokani danu.”​—1 Ioane 3:​17, 18.

Tanobada hegegemadai, kongregesen 73,000 mai kahana lalodiai, Iehova ena Witness taudia 4,500,000 mai kahana ese Dirava ena taravatu hegeregeredia iena hesiai idia lao henia mai edia goada ida. Idia diba Iehova ese ia idia badinaia taudia do ia rakatanidia lasi. Lagani momo lalodiai iena hesiai idia lao henia taudia edia hereva be King David ena hegeregerena; ia gwau: “Lau buruka vadaeni, to lau ese nega ta kara maoromaoro tauna ta ia rakatania vaitani be lau itaia lasi, eiava ena natuna ese paraoa idia noia be lau itaia lasi.”​—Salamo 37:25.

Unai hereva ia havaradia Diravana ita abidadama henia be namo, ita henaohenao bena Dirava ena lalo-namo be reana do ita haboioa vaitani be dika, ani?​—1 Korinto 6:​9, 10.

[Footnotes]