Henaohenao Tauna ai Oi Lao Lasi!

TA BE oi amo gau ta ia henaoa vadaeni, a? — Unai ia vara dainai, oiemu hemami be edena bamona? — Unai gauna ia abia tauna be henaohenao tauna, bona taunimanima ese henaohenao taudia idia ura henia lasi. Dahaka oi laloa, ta be edena dala ai henaohenao tauna ai ia lao? Ia vara negana amo ia be unai bamona, a? —

Ita diba taunimanima be mai kara dika ida idia vara. Unai dainai ita ibounai be goevadae lasi taudia. To ta ia vara neganai ia be henaohenao tauna lasi. Reana henaohenao tauna ena ruma bese be kara maoromaoro taudia. Reana ena tama sina, taihudia bona tadikakadia be hereva momokani idia gwauraia taudia. To ta be moni bona moni ese idia hoia diba gaudia ia ura henia dikadika dainai henaohenao tauna ai ia lao diba.

Daika be henaohenao tauna ginigunana? — Mani unai ita laloa. Hadibaia Tauna Badana be guba dekenai ia noho neganai, unai tauna ia diba. Unai henaohenao tauna be aneru ta. To Dirava ese ia karaia aneru ibounai be goevadae dainai, unai aneru be edena dala ai henaohenao tauna ai ia lao? — Inai buka ena Karoa 8 dekenai ita itaia bamona, ma ta ena gau ia ura henia. Unai gau oi laloatao, a? —

Dirava ese tau bona hahine ginigunadia ia havaraia murinai, unai aneru ia ura idia ese ia do idia tomadiho henia. Edia tomadiho karana ia abia be maoro lasi. Dirava sibona idia tomadiho henia be maoro. To unai ia henaoa! Adamu bona Heva ia veria ia idia tomadiho henia neganai, unai aneru be henaohenao tauna ai ia lao. Ia be Satani Diabolo ai ia lao.

Dahaka ese ta be henaohenao tauna ai ia halaoa diba? — Ta ena gau ia ura henia dikadika neganai. Unai ura be ia goada momokani diba bona kara namo taudia ia veridia diba kara dika idia karaia totona. Nega haida, henaohenao taudia ai idia lao taudia ese edia kara idia haidaua lasi bona kara namodia idia karaia lasi. Idia ta be Iesu ena aposetolo tauna. Iena ladana be Iuda Iskariote.

Iuda ia diba henaohenao karana be kerere, badina ia be mero maragi negana amo Dirava ena taravatu be ia dekenai idia hadibaia. Ia diba nega ta Dirava be guba amo ena taunimanima ia hamaorodia: “Oi henaoa lasi.” (Esodo 20:15) Iuda ia tubu daekau neganai, Hadibaia Tauna Badana ia hedavari henia bona ena hahediba tauna ta ai ia lao. Gabeai, Iesu ese Iuda ia abia hidi ena aposetolo 12 ta ai ia lao totona.

Iesu bona ena aposetolo taudia idia laolao hebou. Idia aniani hebou. Bona edia moni ibounai be maua ta lalonai idia udaia. Iesu ese Iuda dekenai unai maua ia henia ia naria totona. Oibe, unai moni be Iuda ena lasi. To gabeai Iuda ese ia karaia karana oi diba, a? —

Iuda be unai maua amo moni ia kokia matamaia, to unai bamona ia karaia be kerere. Ma haida ese ia idia itaia lasi neganai ia abia, bona dala ia tahua ma haida ia abia totona. Moni ia laloa matamaia. Dina haida idia noho bena Hadibaia Tauna Badana do idia hamasea neganai, unai ura kererena ese Iuda ia veria bena ia karaia karana mani ita itaia.

Maria, Iesu ena turana Lasaro ena taihuna, ese oela namo hereana ia abia bona Iesu ena aena dekenai ia bubua. To Iuda ia maumau. Ena badina oi diba, a? — Ia gwau namona be unai oela idia hoihoilaia bona moni be ogogami taudia dekenai idia henia. To momokani ia ura moni momo be unai maua lalonai do idia udaia unai amo do ia henaoa diba. —Ioane 12:​1-6.

Iesu ese Iuda ia hamaoroa Maria ese ia hahedinaraia hebogahisi karana do ia koua lasi. Iuda be Iesu ena hereva dekenai ia moale lasi, unai dainai Iesu idia inai henia hahelaga taudia badadia dekenai ia lao. Idia ura hanuaboi dekenai Iesu idia dogoatao, unai amo taunimanima ese do idia itadia lasi.

Iuda ese hahelaga taudia ia hamaoroa: ‘Bema lau dekenai moni umui henia, umui dekenai Iesu dogoatao dalana do lau hadibaia. Lau dekenai moni hida do umui henia?’

Hahelaga taudia idia haere: ‘Oi dekenai siliva moni 30 do ai henia.’ —Mataio 26:​14-​16.

Iuda ese moni ia abia. Ia karaia karana be hegeregere ia ese Hadibaia Tauna Badana be unai tatau dekenai ia hoihoilaia! Unai bamona kara dikana ia karaia tauna ta oi laloa diba, a? — Ta be henaohenao tauna ai ia lao bona moni ia henaoa neganai, unai bamona kara ia vara. Moni ia ura henia bada, to ma haida eiava Dirava ia ura henia maragi.

Reana do oi gwau, ‘Gau ta do lau ura henia bada lasi to Iehova Dirava sibona do lau lalokau henia.’ Unai bamona hemami oi abia be namo. Iesu ese Iuda be ena aposetolo ta bamona ia abia hidi neganai, reana Iuda ena lalohadai be unai bamona. Henaohenao taudia ai idia lao taudia be unai bamona hemami idia abia danu. Idia haida mani ita laloa.

Idia ta be Dirava ena hesiai tauna ta, iena ladana be Akana, ia be Hadibaia Tauna Badana ia do vara lasi neganai ia noho. Akana ese dabua namo hereana ta, golo bona siliva moni haida ia itaia. Unai gaudia be iena lasi. Baibel ia gwau idia be Iehova ena, badina Iehova ena taunimanima idia inai henia taudia amo idia abia. To Akana ese unai gaudia ia ura henia dikadika dainai ia henaoa. —Iosua 6:​19; 7:​11, 20-​22.

Haheitalai ma ta be inai. Idaunegai, Iehova ese Davida ia abia hidi Israela taudia ia lohiaia totona. Dina ta, Davida ese hahine hairaina Bataseba ia itaia. Bataseba ia itaia noho bona ia ura iena ruma dekenai ia laohaia bena do idia noho hebou. To, ia be Uria ena adavana. Davida be dahaka ia karaia be namo? —

Davida ese ena lalohadai Bataseba dekenai ia haidaua be namo. To unai bamona ia karaia lasi. Unai dainai Davida ese ena ruma dekenai ia laohaia. Gabeai dala ia karaia Uria idia hamasea totona. Dahaka dainai Davida ese unai kara dikadia ia karaia? — Badina tau ta ena adavana ia ura henia bada. —2 Samuela 11:​2-​27.

Davida ia helalo-kerehai dainai, Iehova ese ia hamasea lasi. To unai murinai Davida ese hekwakwanai momo ia davaria. Iena natuna Abesaloma ia ura Davida ena king dagina ia abia. Unai dainai taunimanima be Davida itaia totona idia mai neganai, Abesaloma ese ia rosidia bona ia kisi henidia. Baibel ia gwau: “Abesaloma ese Israela taudia edia lalona ia veria.” Ia ura unai taudia edia lalona ia veria, unai amo ia be king ai do idia halaoa to Davida lasi. —2 Samuela 15:​1-​12.

Nega ta gau ta oi ura henia dikadika, Akana, Davida bona Abesaloma idia karaia bamona, a? — Bema unai gauna be ta ena, to oi henanadai lasi bona oi abia sibona, unai be henaohenao karana. Henaohenao tauna ginigunana, Satani, ia ura henia gauna oi laloatao, a? — Ia ura taunimanima ese ia idia tomadiho henia to Dirava lasi. Unai dainai Adamu bona Heva ia veria ia idia kamonai henia totona neganai, ia henaohenao.

Tau ta be gau ta ia biagua neganai, ia be mai ena maoro ia ura henia tauna dekenai ia henia totona. Hegeregere, gadara totona reana natudia haida edia ruma dekenai oi lao. Unai ruma ena gau ta oi abia bona emu ruma dekenai oi abia lao be maoro, a? — Lasi, to unai ruma ena tama eiava sina ese gwaumaoro ia henia neganai, oi abia diba. Bema idia oi nanadaia lasi bona gau ta be emu ruma dekenai oi abia lao, unai be henaohenao karana.

Dahaka dainai oi ura henaohenao? — Badina oi dekenai ia noho lasi gauna oi ura henia. Ena be unai gauna oi abia neganai ta ese ia itaia lasi, to daika ese ia itaia? — Iehova Dirava. Bona namona be ita laloaboio lasi, Dirava ese henaohenao karana ia inai henia. Unai dainai Dirava bona emu dekena taudia lalokau henia karana ese oi do ia durua henaohenao tauna ai oi lao lasi totona.