Oi Haheauka Diba, A?

IEHOVA ese Abram ia hamaoroa: “Oiemu tano . . . oi rakatania, bona oi dohore lau hadibaia tano dekenai do oi lao. Lau be oi dekenai tubuna momo do lau henia, dohore idia be bese bada herea. Oi do lau hanamoa, bona oiemu ladana do lau habadaia, vadaeni taunimanima ese namo do idia davaria oi dekena amo.” (Genese 12:​1, 2) Unai neganai Abram ena lagani be 75. Iehova ia kamonai henia bona ia aonega dainai iena mauri dinadia ibounai lalonai ia haheauka, Iehova dekenai ia naria.

Gabeai, Dirava ese haheauka tauna Abraham (Abram) dekenai inai gwauhamata ia henia: “Lau gwauhamata inai, oi do lau hanamoa bada, bona tubuna momo herea oi do lau henia.” Aposetolo Paulo be ma ia hereva, ia gwau: “[Abraham] ia haheauka noho dainai, Dirava ena gwauhamata gauna ia davaria.”​—Heberu 6:​13-15.

Haheauka be dahaka? Diksenari idia gwau unai be “lalo-hekwarahi lasi dalana ai gau ta totona naria” karana, eiava “badu negana ai eiava hekwarahi neganai boga-auka” ia hahedinaraia. Unai dainai, bema tau ta eiava gau ta totona oi naria, eiava badu neganai eiava hekwarahi neganai oi naria, emu haheauka ia tohoa. Unai negadia ai, haheauka tauna ia badu lasi; haheauka lasi tauna be reana ia haragaharaga bona ia badu.

Hari Tanobadana Dekenai Haheauka be Lasi

Taunimanima momo ese idia noholaia gabudia ai, idia laloa haheauka lasi to kara haraga be anina bada gauna. Taunimanima hutuma ese idia noholaia siti gabudia ai, taunimanima milion momo be dina ta ta iboudiai idia toreisi dina gauna ia boiboi neganai. Heau helulu bamona ia matamaia​—gabu ta ai do idia lao, ta do idia itaia, gau ta do idia karaia. Ita hoa lasi idia momo idia lalo-hekwarahi bona idia haragaharaga.

Ma haida edia kerere dainai oi lalohisihisi, a? Albert ia gwau: “Lau ura lasi abia hidi negana idia hanaia bona idia leiti.” Taunimanima momo do idia gwau, ta be ia leiti dainai idia naria noho be mai ena hekwarahi, bema gaukara ta ena nega ia doko gwauraia unai be momokani. Britain ena politikol tauna ta lagani 1724 ia lao 1754 neganai, Duke of Newcastle, idia herevalaia inai bamona: ‘Dina ta ta iboudiai daba ai ia be miniti 30 ia haboioa kava, bona dina ena hora oredia lalonai unai miniti 30 dainai ia leiti noho.’ Bema dina ta ta iboudiai unai bamona tauna dekenai oi tabekau, do oi haheauka noho, a?

Motuka oi taria neganai, oi badu haraga, oi ura lasi oi naria, eiava oi ura oi heau haraga, a? Unai bamona neganai, nega momo haheauka lasi karana ese dika ia havaraia. Lagani 1989 lalonai, guna idia gwauraia West Germany ai, dala badadia ai aksiden 400,000 bona ma haida lalonai taunimanima be bero eiava mase idia davaria. Unai aksiden toi toi amo, ta ta be ia vara badina motuka ta be ia vairanai motuka kahirakahira momokani dekenai ia heau eiava ia heau haraga. Unai dainai, taunimanima 137,000 bona ma haida be bero eiava mase idia davaria ena badina ta be haheauka lasi karana. Unai be haheauka lasi karana ena dika davana!

Ann ena maumau be inai: “Bema ta be hanaihanai egu hereva ia utua eiava ta ia heagi momo neganai, lau hekwarahi lau haheauka totona.” Karl-Hermann ia gwau “memero kekeni taudia be buruka taudia idia matauraidia lasi dainai” iena haheauka be bada lasi.

Reana unai negadia ai bona ma gau haida dainai oi haheauka lasi. Unai dainai, edena dala ai emu haheauka oi habadaia diba?

Iehova ese Emu Haheauka Ia Hagoadaia Diba

Taunimanima momo idia laloa ta ia haheauka neganai ia be lalo-rua eiava manoka tauna ta. To, Iehova ia laloa haheauka be goada karana. Ia “haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9) Unai dainai, emu haheauka oi hagoadaia totona, namona be Iehova kahirakahira ai oi noho bona mai emu kudouna ibounai ida oi tabekau henia. Dirava dekenai emu turana karana oi hagoadaia be haheauka habadaia karana badana.

Ma danu, tanobada bona taunimanima dekenai Iehova ena ura ita diba be gau badana. Abraham “ese hanua badana ta ia naria noho. Unai hanua [Dirava ena Basileia] be mai ena nadi badina aukana bona mai goadana. Unai hanua be Dirava ese iena palani hegeregerena ia karaia, bona ia haginia danu.” (Heberu 11:10) Unai hegeregerena, Dirava ena gwauhamata ita lalo-pararalaia bona Iehova dekenai ita naria ese namo do ia havaraia. Unai neganai, do oi diba haheauka be daradara toana lasi, to unai ese taunimanima do ia veridia tomadiho momokani dekenai. Unai dainai, “do umui laloaboio lasi, Lohiabada ese umui ia naria noho, mai haheauka danu. Ia ese nega namona umui dekenai ia henia noho inai, iena hahemauri do umui davaria totona.”​—2 Petero 3:15.

Edena bamona bema emu noho dalana dainai oi laloa emu haheauka do ia hegeregere lasi? Abidadama lasi taudia ese oi idia hahisia bada, a? Oi laloa nega daudau lalonai oi gorere, a? Unai bamona neganai, namona be hahediba tauna Iakobo ia torea herevana amo goada oi abia. Peroveta taudia edia haheitalai namona haheauka karana dekenai ia herevalaia murinai, ia hahedinaraia edena dala ai hekwarahi negadia ai ita lalo-goada noho diba. Iakobo ia gwau: “Umui emui huanai be tau ta ia hisihisi noho, a? Do ia guriguri be namo.”​—Iakobo 5:​10, 13.

Guriguri dekenai Dirava oi noia goadagoada emu haheauka ia hagoadaia totona, bena oi ia durua hetoho neganai oi boga-auka totona. Iehova dekenai oi lao hanaihanai, bona oi do ia durua bena do oi diba dahaka gau eiava haida ese dahaka kara idia karaia be emu haheauka ia kokia diba. Hekwarahi ia do vara lasi negadia ai oi guriguri neganai unai ese oi ia durua diba oi haheauka totona.

Oi Sibona Bona Ma Haida Dekenai Oi Laloa Maoromaoro

Emu lalona ia maino noho totona, namona be oi sibona bona ma haida dekenai oi laloa maoromaoro. Unai oi karaia diba Baibel stadilaia karana amo, badina ia hahedinaraia ita ibounai be kara dika dekenai ita vara bona unai dainai ita ibounai ita laloa kerere diba. Ma danu, Baibel ena diba ese oi ia durua diba lalokau dekenai oi tubu totona. Unai kara be mai anina bada ma haida dekenai haheauka oi hahedinaraia totona.​—Ioane 13:34, 35; Roma 5:12; Filipi 1:9.

Oi badu neganai, lalokau dainai bona oi ura ta oi gwauatao henia dainai emu lalona do ia maino lou diba. Bema ta ena kara ese emu lalona ia hahisia, lalokau dainai do oi laloatao ia lasi, to ena kara, oi ura henia lasi. Namona be oi laloa, nega momo emu manoka karadia ese Dirava ena haheauka ia tohoa bona ma haida ia habadudia.

Oi sibona dekenai oi laloa maoromaoro ese oi ia durua haheauka dekenai oi naria totona. Hegeregere, Iehova ena hesiai gaukara dekenai dagi ena gaukara namodia oi tahua, to oi do abia lasi, a? Oi laloa emu haheauka be ia ore ia lao, a? Bema unai bamona, namona be oi laloatao, hekokoroku ese haheauka lasi karana ia havaraia. Solomon ia gwau: “Mai ena haheauka tauna ese hekokoroku tauna ia hereaia.” (Kohelete 7:8) Oibe, hekokoroku be haheauka ia koua karana badana. Manau tauna ia hekwarahi lasi ia naria totona, ani? Unai dainai, manau oi habadaia, bena ta ia leiti neganai mai emu lalo-maino ida do oi haheaukalaia diba.​—Hereva Lada-isidia 15:33.

Haheauka be mai Davana Namodia

Ita diba Abraham ena kara badana be iena abidadama. (Roma 4:11) To, haheauka dainai iena abidadama ia noho. Iehova dekenai ia naria dainai ia abia davana namona be dahaka?

Iehova ese Abraham dekenai ia abidadama bada. Unai dainai Abraham ena ladana ia bada bona iena tubudia be bese badana ta ai idia lao. Tanobada besedia iboudiai be iena garana dainai sibodia idia hanamodia diba. Abraham be Dirava ena hereva ia gwauraia bona iena Havaraia Tauna ia laulaulaia. Abraham ena abidadama bona haheauka dainai ma gau ta ese unai davana namona ia hanaia diba lasi, ani?

Hetoho idia haheaukalaia noho Keristen taudia dekenai “Iehova ia hebogahisi henia bada.” (Iakobo 5:​10, 11, NW) Unai bamona taudia be iena ura idia badinaia dainai edia lalona ena mamina ia namo. Unai dainai, bema hetoho lalonai mai haheauka danu Iehova dekenai oi naria, emu haheauka dainai Iehova ese oi do ia lalo-namo henia bona oi do ia hanamoa.

Mauri daladia iboudiai dekenai idia haheauka neganai Dirava ena bese taudia be namo idia davaria. Iehova ena hesiai taudia rua, ladadia be Christian bona Agnes, be unai idia davaria idia ura idia maoheni neganai. Christian ena Keristen tama sina idia ura idia naria, Agnes do idia diba namonamo totona, unai dainai edia maoheni be gabeai negana totona idia atoa. Unai kara dainai dahaka ia vara?

Christian ia gwau: “Gabeai sibona ai davaria egu tama sina be aiemai haheauka idia moalelaia bada. Ai haheauka dainai lau bona egu adavana emai turana karana ia haorea lasi. To unai be kara ginigunana egu tama sina ida ai turana karaia totona.” Oibe, haheauka ese namo bada ia havaraia.

Danu, haheauka ese maino ia habadaia. Emu ruma bese taudia bona turadia do idia moale badina edia kerere iboudiai dainai oi badu momo lasi. Ma haida idia kerere neganai oi badu lasi bona oi lalo-parara dainai hemarai do ia koua. China ena aonega herevana ta ia gwau: “Badu neganai oi haheauka dainai dina handred lalonai do oi lalo-hekwarahi lasi.”

Haheauka be emu kara do ia hanamoa, oi ia durua emu kara namodia ma haida hagoadadia totona. Haheauka dainai emu abidadama ia noho daudau diba, emu maino be do ia noho daudau, bona emu lalokau do ia ore lasi. Haheauka ese oi ia durua diba mai moale danu hebogahisi, kara namo, bona kara manada oi hahedinaraia neganai. Haheauka oi hahedinaraia neganai oi ia hagoadaia diba bena hisihisi be nega daudau lalonai oi haheaukalaia diba bona oi boga-auka diba.

Iehova ena gwauhamata idia guguru totona oi haheauka, bena gabeai nega namona do oi abia momokani. Abraham bamona, “abidadama bona haheauka taudia edia kara bamona do umui karaia. Vadaeni Dirava ia gwauhamatalaia davana namona . . . be umui ese do umui abia” diba.​—Heberu 6:12.

[Picture on page 23]

Iehova ida oi hetura namonamo neganai, unai ese oi ia durua, Abraham bamona, haheauka oi hahedinaraia totona