Iehova Ena Haheauka Karana Tohotohoa
‘Lohiabada ese iena gwauhamata badinaia totona ia hesiku lasi. Lasi, to umui totona ia haheauka noho.’—2 PETERO 3:9.
1. Dahaka harihari gauna hereadaena be Iehova ese taunimanima dekenai ia henia?
IEHOVA ese ita dekenai ia henia gauna be tanobada tauna ta ese ia henia diba lasi. Bona ia be moni amo ita hoia diba lasi eiava iseda hekwarahi dainai ita abia gauna lasi. Unai harihari gauna be mauri hanaihanai—doko diba lasi maurina be tanobada paradaiso ai do ita abia. (Ioane 3:16) Unai be moale bada gauna momokani! Lalohisihisi idia havaraia gaudia, hegeregere dagedage, ogogami, raskol karadia, gorere, bona mase be do idia ore momokani. Bona Dirava ena Basileia henunai taunimanima be maino bona lalotamona ai do idia noho. Ita ura dikadika unai Paradaiso lalonai ita noho!—Isaia 9:6, 7; Apokalupo 21:4, 5.
2. Dahaka dainai Iehova ese Satani ena tanobada dikana ia do hadikaia ore lasi?
2 Iehova be mai ena ura ida tanobada be Paradaiso ai do ia halaoa negana ia naria noho danu. Badina Ia be kara maoromaoro bona hahemaoro goeva ia ura henia. (Salamo 33:5) Dirava be tanobada taudia ia itaia neganai, ia moale lasi, badina idia ese Dirava ena taravatu idia utua, ena siahu idia matauraia lasi bona ena taunimanima idia dagedage henia. To, badina namodia momo dainai, Iehova ese Satani ena tanobada dikana ia do haorea lasi. Unai badina ta be Satani ese Iehova ena lohia siahuna ia hepapahuahulaia. Unai hepapahuahu hamaoromaoroa totona, Iehova ese taunimanima momo idia hahedinaraia lasi karana, haheauka unai, ia hahedinaraia.
3. (a) Baibel lalonai, Greek herevana ta idia hahanaia neganai ena anina be dahaka? (b) Edena henanadai haida do ita herevalaia?
3 Baibel lalonai Greek herevana ta idia hahanaia neganai ena anina be “ta ena lalohadai ia biagua.” Unai dainai unai hereva idia hahanaia neganai, nega momo haheauka eiava davana ia henia haraga lasi idia gaukaralaia. Haheauka totona Greek bona Heberu amo idia abia herevana ena anina be hemami biagua karana bona ia badu haraga lasi. Iehova ia haheauka dainai dahaka namo ita davaria? Iehova bona ena kamonai hesiai taudia edia haheauka karana amo dahaka ita dibaia? Edena bamona ita diba Iehova ena haheauka be mai ena hetoana? Mani ita tahua.
Iehova Ena Haheauka Karana Ita Laloa
4. Aposetolo Petero be Iehova ena haheauka ia herevalaia neganai, dahaka ia gwau?
4 Aposetolo Petero be Iehova ena haheauka karana ia herevalaia, ia gwau: “Lauegu lalokau taudia e, inai hereva tamona do umui laloaboio lasi: Lohiabada ena vairana dekenai, dina tamona be lagani 1000 bamona, bona lagani 1000 be dina tamona bamona. Lohiabada ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:8, 9) Unai siri ese gau rua ia herevalaia, unai ese ita do ia durua Iehova ena haheauka karana ita lalopararalaia totona.
5. Edena dala ai Iehova ese nega ia laloa, bona unai dainai, edena bamona ia kara?
5 Gau ginigunana be Iehova ese nega ia laloa dalana be ita ese ita laloa dalana amo ia idau. Hanaihanai ia mauri noho Diravana dekenai, lagani 1000 be dina tamona bamona. Ia be nega dainai gau do ia karaia haragaharaga lasi, to nega korikori ai ena gwauhamata ia hagugurudia. Iehova ena aonega be bada herea, ia diba edena nega be nega namona kara ta do ia karaia taunimanima ibounai edia namo totona, bona mai haheauka ida unai nega ia naria noho. To, ita gwau lasi Iehova ena hesiai taudia ese hari idia davaria hisihisi be ia laloa lasi. Iehova be hebogahisi bada bona lalokau Diravana. (Luka 1:78; 1 Ioane 4:8) Unai dainai, Ia ese hari idia vara hisihisi idauidau ibounai do ia haorea momokani.—Salamo 37:10.
6. Namo lasi Dirava be edena bamona ita laloa, bona dahaka dainai?
6 Momokani, ta be ena ura bada gauna totona ia naria neganai, do ia lalohekwarahi. (Aonega Herevadia 13:12) Unai dainai, taunimanima be edia gwauhamata idia hagugurua lasi neganai, haida idia laloa unai taudia idia ura lasi edia gwauhamata idia badinaia. Namo lasi Dirava dekenai unai bamona ita laloa! Bema ita laloa Dirava be ia metairametaira, nega ia hanaia lalonai do ita daradara bona lalomanoka, bona lauma dalanai do ita manoka. Danu, Petero ese ena sisiba herevana lalonai ia gwauraia taudia—hevaseha bona abidadama lasi taudia—ese ita idia hakaua kerere diba. Unai bamona taudia be mai hevaseha ida idia gwau: “Iesu ia gwauhamata, do ia giroa mai, a? Edeseni ia noho? Do ia mai lasi. Badina be iseda tubuna idia mase vadaeni, to tanobada ia karaia negana ia mai bona harihari gau ta be idau lasi.”—2 Petero 3:4.
7. Edena dala ai Iehova ena haheauka karana ese ia hahedinaraia ia ura taunimanima idia helalo-kerehai?
7 Petero ena hereva ese ia hahedinaraia gau iharuana be, Iehova ia haheauka badina ia ura taunimanima ibounai be edia kara dika amo do idia helalo-kerehai. Edia kara dika idia rakatania lasi taudia be Iehova ese do ia haoredia. To, kara dika tauna ta ia mase neganai, Dirava be ia moale lasi. Ia ura taunimanima idia helalo-kerehai, kara dika idia rakatania, bona do idia mauri noho. (Esekiela 33:11) Unai dainai, Iehova ia haheauka noho bona sivarai namona be tanobada ibounai dekenai idia harorolaia noho, unai amo taunimanima be mauri idia abia diba.
8. Dirava ese Israela taudia ia kara henia dalana amo dahaka ita dibaia?
8 Iehova ese idaunegai Israela taudia ia kara henia dalana amo ena haheauka karana ita itaia. Lagani handred momo lalodiai, edia kamonai lasi karana ia haheaukalaia. Iena peroveta taudia amo idia ia hadibaia loulou: “Emui dala dikadia dekena amo do umui raka siri, bona egu Taravatu bona egu oda ibounai do umui kamonai henia. Inai Taravatu be lau ese emui sene taudia dekenai lau henia, bona egu hesiai taudia, peroveta taudia dekena amo inai taravatu ibounai umui dekenai lau hedinaraia.” Dahaka ia vara? Madi, Israela taudia be “idia kamonai lasi.”—2 King Taudia 17:13, 14.
9. Edena dala ai Iesu be ena haheauka karana amo ena Tamana ena kara ia hahedinaraia namo herea?
9 Gabeai, Iehova ese ena Natuna ia siaia, bona Iesu be Iuda taudia ia noidia loulou Dirava kahirakahira idia lao bona ena turana ai idia lao totona. Iesu be ena haheauka karana amo ena Tamana ena kara ia hahedinaraia namo herea. Iesu ia diba ia be kahirakahira do ia mase, unai dainai mai tai ida ia gwau: “Ierusalema e! Ierusalema e! Peroveta taudia oi alaia mase, bona oi dekenai Dirava ese ia siaia taudia be nadi dekenai oi hodoa. Nega momo lau ura oiemu natuna lau haboua, kokoroku hahine ese iena natuna iena hanina dekenai ia koua bamona, to oi ura lasi!” (Mataio 23:37) Unai be kota biaguna aukana ta ena hereva lasi, to ia ura taunimanima ia durua turana namona ta ena hereva. Iesu be iena guba Tamana bamona, ia ura taunimanima idia helalo-kerehai bona hahemaoro negana ai do idia roho mauri. Haida be Iesu ena sisiba idia badinaia bona lagani 70 C.E. ai Ierusalema idia hadikaia neganai, idia heau mauri.—Luka 21:20-22.
10. Dirava ena haheauka karana dainai edena dala ai namo ita davaria?
10 Dirava ena haheauka karana be kara hereadaena, ani? Ena be taunimanima momo be Dirava idia badinaia lasi, to Iehova ese ita ta ta bona taunimanima milioni momo dekenai dala ia kehoa Ia ita dibaia bona hahemauri ita abia totona. Petero ese Keristani taudia ia hamaoroa: “Lohiabada ese umui ia naria noho, mai haheauka danu. Ia ese nega namona umui dekenai ia henia noho inai, iena hamauria do umui davaria totona.” (2 Petero 3:15) Iehova ena haheauka karana ese dala ia kehoa mauri ita abia totona dainai ita moale, ani? Dina ta ta ai, Iehova ita hesiai henia noho neganai, iseda guriguri lalonai Iehova ita noia iseda kara dainai ia hesiku lasi totona, a?—Mataio 6:12.
11. Iehova ena haheauka karana ita lalopararalaia neganai, dahaka do ita karaia?
11 Iehova ia haheauka ena badina ita lalopararalaia neganai, ita ia durua mai haheauka ida hahemauri negana ita naria totona, bona ita diba iena gwauhamata be nega korikori ai do ia hagugurua. (Lalohisihisi ena Ane 3:26) Dirava ena Basileia ia mai totona ita guriguri neganai, namona be ita abia dae Iehova be unai guriguri do ia haerelaia negana korikori ia diba. Danu, unai ese iseda lalona ia veria Iehova ita tohotohoa totona, unai amo iseda tadikaka bona ita haroro henia taudia dekenai haheauka ita hahedinaraia. Ita danu ita ura lasi ta ia mase, to ita ura idia helalo-kerehai bona ita ida mauri hanaihanai do idia abia.—1 Timoteo 2:3, 4.
Peroveta Taudia Edia Haheauka Karana Laloa
12, 13. Iamesi 5:10 ena hereva hegeregerena, edena dala ai peroveta tauna Isaia ia haheauka?
12 Iehova ena haheauka karana ita laloa neganai, ita ia durua unai kara ita laloa bada bona ita hahedinaraia totona. Goevadae lasi taudia ese haheauka idia hahedinaraia be mai ena hekwarahi, to idia karaia diba. Dirava ena idaunega hesiai taudia amo unai ita diba. Hahediba tauna Iamesi ia gwau: “Lauegu varavara taudia e, peroveta taudia do umui laloa. Lohiabada ena ladana dekenai idia hereva neganai, hisihisi lalonai idia haheauka bona idia goada. Edia kara bamona do umui karaia be namo.” (Iamesi 5:10) Bema ita diba haida be guna ita davaria hahetoho idia haheaukalaia bona idia kwalimu, unai ese ita do ia hagoadaia.
13 Hegeregere, peroveta tauna Isaia be ena hesiai gaukara ia karaia totona, ia haheauka be namo. Iehova ese ia hamaoroa: “Oi lao, inai bese taudia be inai bamona do oi hamaoroa, oi gwau: ‘Do umui kamonai hanaihanai, to hereva ena anina do umui davaria lasi momokani. Do umui itaia hanaihanai, to dahaka ia vara noho do umui diba lasi.’ Inai taunimanima edia lalona do oi koua, bona edia taiana danu do oi koua, bona edia matana do oi hakapua. Unai bamona do oi karaia, gau ta do idia itaia lasi, kamonai lasi, bona diba lasi totona. Badina be bema idia itaia diba, bona kamonai diba, bona hereva anina idia davaria diba neganai, lau dekenai do idia giroa, bona mauri do idia davaria.” (Isaia 6:9, 10) Ena be taunimanima be idia kamonai lasi, to Isaia be mai haheauka ida lagani 46 bamona lalonai Iehova ena hadibaia hereva ia harorolaia. Unai hegeregerena, herevana taunimanima momo idia kamonai lasi, to haheauka karana ese ita do ia durua sivarai namona ita harorolaia noho totona.
14, 15. Dahaka ese Ieremia ia durua dagedage bona lalomanoka karana ia haheaukalaia totona?
14 Momokani, peroveta taudia be edia haroro gaukara idia karaia neganai, taunimanima be idia kamonai lasi; idia dagedage henidia danu. Ieremia be au metauna amo idia lokaia, “dibura ruma dekenai idia atoa,” bona ranu guri lalonai idia negea diho. (Ieremia 20:2; 37:15; 38:6) Ia ura durua taudia ese ia idia dagedage henia. To, Ieremia ia badu lasi bona davana ia henia lasi. Lagani momo lalonai ia haheauka.
15 Dagedage bona hevaseha karana ese Ieremia ena haroro karana ia koua lasi, bona hari danu iseda haroro gaukara idia koua lasi. Momokani, nega haida do ita lalomanoka diba. Ieremia danu ia lalomanoka, unai dainai ia gwau: “Taunimanima ibounai ese, inai hereva idia kamonai neganai, lau idia hereva dika henia, bona lau idia hahemaraia noho. Bema lau gwau, ‘Lau ese Lohiabada do lau laloaboio, bona iena ladana dekenai do lau hereva lasi.’ ” To gabeai dahaka ia vara? Ieremia be ena haroro gaukara ia hadokoa, a? Ieremia ia gwau: “Unai neganai oiemu hereva be lahi bamona, lauegu lalona ia gabua noho, ela bona lauegu turiana dekenai. Momokani lau ese oiemu hereva lau koua toho auka herea, to lau koua hegeregere lasi.” (Ieremia 20:8, 9) Mani oi laloa, ia be taunimanima edia hevaseha ia laloa neganai, ena moale ia boio. To ia harorolaia sivaraina ena namo bona ena hairai ia laloa neganai, ia moale. Danu, Iehova be ‘goada bona mai ena siahu’ dainai Ieremia ia hagoadaia Iena hereva be mai gari lasi ida ia harorolaia totona.—Ieremia 20:11.
16. Sivarai namona harorolaia gaukara dekenai edena dala ai ita moale noho diba?
16 Peroveta tauna Ieremia be ena hesiai gaukara lalonai moale ia davaria, a? Oibe! Ia ese Iehova ia hamaoroa: “Oi ese oiemu hereva lau dekenai oi henia, bona lau abia dae, aniani lau abia dae bamona. Bona inai oiemu hereva ese lau ia hamoalea momokani, badina be, Lohiabada, Siahu Ibounai Diravana, lau be oiemu.” (Ieremia 15:16) Ieremia be Dirava momokani ia hesiai henia bona Iena hereva ia harorolaia dainai, unai hahenamo ia moalelaia. Ita danu ita moale diba. Guba dekenai aneru danu idia moale, badina tanobada ibounai taunimanima momo be Basileia ena sivarai namona idia abia dae, idia helalo-kerehai, bona mauri hanaihanai ena dala dekenai idia raka.—Luka 15:10.
“Iobu Ena Haheauka Sivaraina”
17, 18. Iobu be edena dala ai ia haheauka, bona dahaka ia vara?
17 Iamesi be idaunega peroveta taudia ia herevalaia murinai, ia gwau: “Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.” (Iamesi 5:11) Greek herevana idia hahanaia “haheauka” be Iamesi ese siri 10 ai ia gaukaralaia “haheauka” amo ia idau. Diba bada tauna ta be unai hereva edia idau ia herevalaia: “Ginigunana be haida ese ita idia dagedage henia neganai ita haheauka, iharuana be hahetoho ita davaria neganai, ita haheauka.”
18 Iobu be hisihisi bada ia davaria. Iena moni bona natudia ibounai ia haboioa, bona gorere dikana ta ia davaria. Taunimanima haida ese Iobu idia samania koikoi, idia gwau Iehova ese ia panisia noho, to ia hekwarahi unai koikoi herevana ia hamaoromaoroa totona. Iobu be ia lalohisihisilaia gaudia ia gwauraia hedinarai; mai taitai ida ena hekwakwanai ia gwauraia bona ia gwau ia kerere lasi Dirava vairanai. (Iobu 35:2) To, ena abidadama ia haboioa lasi, bona Dirava badinaia karana ia rakatania lasi. Iobu ese Dirava ia gwauraia dika lasi, Satani ese ia gwauraia bamona. (Iobu 1:11, 21) Dahaka ia vara? Iehova ese “Iobu ena mauri ma ia hanamoa lou bada.” (Iobu 42:12) Iehova ese Iobu ena gorere ia hanamoa lou, ena kohu be nega rua amo ia habadaia, bona ena lalokau taudia ida mauri namona ia abia. Iobu ia haheauka dainai, unai ese ia ia durua Iehova ena kara ia lalopararalaia namonamo totona.
19. Iobu ena haheauka karana amo dahaka ita dibaia?
19 Iobu ena haheauka karana amo dahaka ita dibaia? Iobu bamona, nega haida gorere eiava hekwakwanai haida dainai ita hisihisi. Ita laloparara momokani lasi dahaka dainai Iehova ese ita davaria hisihisi ia koua lasi. To, ita diba momokani gauna be inai: Bema iseda abidadama ita dogoatao noho, hahenamo do ita abia. Iehova ese ia idia tahua taudia dekenai davana namona do ia henia. (Heberu 11:6) Iesu ia gwau: “Do ia haheauka lao ela bona dokona tauna be do ia mauri.”—Mataio 10:22; 24:13.
“Lohiabada Ena Dina be Do Ia Ginidae”
20. Dahaka dainai ita diba momokani Iehova ena dina be do ia ginidae?
20 Ena be Iehova ia haheauka, to ia be kara maoromaoro Diravana, unai dainai kara dika do ia haorea momokani. Dirava ena haheauka be mai ena hetoana. Petero ia gwau: “Gunaguna, taunimanima momo ese Dirava idia kamonai henia lasi neganai, ia ese idia ia bogahisihisi henia lasi.” To Noa bona ena ruma bese be idia roho mauri, unai nega ena tanobada dikana be abata ese ia hadikaia ore. Iehova ese Sodoma bona Gomora ia hahemaoro henia, lahi amo idia ia gabua ore. Unai ese idia hahedinaraia Dirava idia gari henia lasi taudia edia kerere ena davana do idia abia. Unai dainai, ita diba momokani: “Lohiabada ena Dina be do ia ginidae.”—2 Petero 2:5, 6; 3:10.
21. Iseda haheauka karana be edena bamona ita hahedinaraia diba, bona hereva gabena dekenai dahaka do ita herevalaia?
21 Namona be Iehova ena haheauka karana ita tohotohoa, unai amo ma haida ita durua idia helalo-kerehai bona mauri do idia davaria. Danu peroveta taudia ita tohotohoa, ena be sivarai namona ita harorolaia neganai taunimanima idia kamonai lasi, to ita haheauka be namo. Bona, bema Iobu bamona hahetoho ita haheaukalaia, ita diba momokani Iehova ita badinaia dainai Ia ese ita dekenai davana namona do ia henia. Iehova ena hesiai taudia be tanobada ibounai ai sivarai namona idia harorolaia bona Iehova ese edia hekwarahi ia hanamoa dalana ita itaia neganai, unai ese ita ia hamoalea bada. Unai be hereva gabena dekenai do ita stadilaia.
Oi Laloatao, A?
• Dahaka dainai Iehova ia haheauka?
• Peroveta taudia edia haheauka karana amo dahaka ita dibaia?
• Iobu be edena dala ai ia haheauka, bona dahaka ia vara?
• Edena bamona ita diba Iehova ena haheauka karana be mai ena hetoana?
[Picture on page 18]
Iesu be ena haheauka karana amo ena Tamana ena kara ia hahedinaraia namo herea
[Pictures on page 20]
Ieremia ia haheauka dainai, edena dala ai Iehova ese ia hanamoa?
[Pictures on page 21]
Edena dala ai Iehova ese Iobu ena haheauka karana dainai davana namona ia henia?